കോഴിക്കോട് ജില്ലയെ കേരളത്തിലെ ആദ്യത്തെ സമ്പൂര്‍ണ ഹോംഷോപ്പ് ജില്ലയായി പ്രഖ്യാപിക്കുന്ന പ്രവര്‍ത്തനങ്ങളുടെ ഭാഗമായി കുന്നമംഗലത്തെ സമ്പൂര്‍ണ ഹോംഷോപ്പ് ബ്ലോക്ക് പഞ്ചായത്തായി പ്രഖ്യാപിക്കുന്നതിനുള്ള  പദ്ധതി രൂപരേഖ തയ്യാറാക്കിയതായി ബ്ലോക്ക് പഞ്ചായത്ത് പ്രസിഡണ്ട്  രമ്യ ഹരിദാസ് പറഞ്ഞു. 

പ്രളയാനന്തര കേരളത്തില്‍ വരള്‍ച്ചാ ഭീഷണിയെ അതിജീവിക്കാന്‍ സര്‍ക്കാര്‍ നടപ്പാക്കുന്ന ജനകീയ യജ്ഞം വിജയിപ്പിക്കുന്നതിന് പൊതുസമൂഹത്തിന്റെ പങ്കാളിത്തം അനിവാര്യമാണെന്ന് നവകേരളം കര്‍മ്മ പദ്ധതി സംസ്ഥാന കോ-ഓര്‍ഡിനേറ്റര്‍ ചെറിയാന്‍ ഫിലിപ്പ് പറഞ്ഞു. സെന്‍ട്രല്‍ സ്റ്റേഡിയത്തില്‍ സംസ്ഥാന സര്‍ക്കാരിന്റെ ആയിരം ദിനാഘോഷങ്ങളുടെ തിരുവനന്തപുരം ജില്ലാതല പരിപാടിയില്‍ ഹരിതകേരളം സുസ്ഥിര വികസന പാതയില്‍ എന്ന വിഷയത്തില്‍ നടന്ന സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം.

മാത്തറ കനറാ ബാങ്ക് സ്വയംതൊഴില്‍ പരിശീലന കേന്ദ്രത്തില്‍ ഇന്‍സ്റ്റലേഷന്‍ ആന്‍ഡ്  സര്‍വീസിങ്ങ് ഓഫ് സിസിടിവി ക്യാമറ, സെക്യൂരിറ്റി അലാറം ആന്‍ഡ് സ്മോക്ക് ഡിറ്റക്ടര്‍ കോഴ്സില്‍ സൗജന്യ പരിശീലനം നല്‍കുന്നു. താല്‍പര്യമുളള 18 നും 45 നും ഇടയില്‍ പ്രായമുള്ളവര്‍ക്ക് അപേക്ഷിക്കാം. അപേക്ഷാ ഫോം പരിശീലനകേന്ദ്രത്തില്‍ ലഭിക്കും.  ഫോട്ടോപതിച്ച അപേക്ഷ മാര്‍ച്ച് രണ്ടിന് അഞ്ച് മണി വരെ ഓഫീസില്‍ സ്വീകരിക്കുമെന്ന് ഡയറക്ടര്‍ അറിയിച്ചു. ഫോണ്‍ - 0495 - 2432470, 9447276470.

    ഫെബ്രുവരി മാസത്തെ കോഴിക്കോട് ജില്ലാ  വികസന സമിതി യോഗം മാര്‍ച്ച് രണ്ടിന് രാവിലെ 10.30 മണിക്ക് കലക്ടറേറ്റ് കോണ്‍ഫറന്‍സ് ഹാളില്‍ ചേരും. 

കോഴിക്കോട് ടിമ്പര്‍ സെയില്‍സ് ഡിവിഷന് കീഴിലെ ചാലിയം തടി ഡിപ്പോ കോമ്പൗണ്ടില്‍ സ്ഥിതിചെയ്യുന്ന ഇട്ടി അച്ച്യുതന്‍ സ്മാരക ഹോര്‍ത്തൂസ് ബൊട്ടാണിക്കല്‍ ഗാര്‍ഡിന്റെ പരിപാലനത്തിനും നവീകരണത്തിനുമായി വനം വകുപ്പില്‍ രജിസ്റ്റര്‍ ചെയ്ത സി ക്ലാസ് കോണ്‍ട്രാക്ടര്‍മാരില്‍നിന്നും ടെണ്ടര്‍ ക്ഷണിച്ചു. ടെണ്ടര്‍ മാര്‍ച്ച് ആറിന് മൂന്ന് മണിക്ക് വനശ്രീ മാത്തോട്ടം കോംപ്ളക്സിലെ കോഴിക്കോട് ടിമ്പര്‍ സെയിന്‍സ് ഡിവിഷന്‍ ഓഫീസില്‍ നടത്തും. ഫോണ്‍ - 0495 2414702.