ജില്ലയിലെ മികച്ച ഗ്രാമപഞ്ചായത്തിനുള്ള സര്‍ക്കാരിന്റെ സ്വരാജ് ട്രോഫി  പനങ്ങാട് ഗ്രാമപഞ്ചായത്തിന് വേണ്ടി പ്രസിഡന്റ് വി.എം കമലാക്ഷി ഏറ്റുവാങ്ങി. തൃശൂരില്‍ നടന്ന സംസ്ഥാനതല പഞ്ചായത്ത് ദിനാഘോഷ ചടങ്ങില്‍ തദ്ദേശസ്വയംഭരണ വകുപ്പ് മന്ത്രി എ.സി മൊയ്തീന്‍ പുരസ്‌കാരങ്ങള്‍ വിതരണം ചെയ്തു. ജില്ലാതലത്തില്‍ മികച്ച ഒന്നാമത്തെ ഗ്രാമപഞ്ചായത്ത് സെക്രട്ടറിക്കുള്ള പുരസ്‌കാരത്തിനും പനങ്ങാട് അര്‍ഹമായി. കെ.അബ്ദു റഹീമാണ് ഗ്രാമപഞ്ചായത്ത് സെക്രട്ടറി. 10 ലക്ഷം രൂപയും സ്വരാജ് ട്രോഫിയും സാക്ഷ്യപത്രവുമാണ് പനങ്ങാട് പഞ്ചായത്തിന് ലഭിച്ചത്. 

മസ്തിഷ്‌ക മരണാനന്തരമുള്ള അവയവദാനത്തിന്റെ  ബോധവത്കരണാര്‍ത്ഥം അവയവദാന പ്രവര്‍ത്തനങ്ങളിലെ പുതിയ ശസ്ത്രക്രിയ, നിയമമാറ്റങ്ങള്‍ എന്നിവ സംബന്ധിച്ച് സ്നേഹസ്പര്‍ശവും ഐ.എം.എ കോഴിക്കോടും മൃതസഞ്ജീവനിയും ചേര്‍ന്ന് ബോധവല്‍കരണ ക്ലാസ് സംഘടിപ്പിക്കും.  ഫെബ്രുവരി 24 ന് രാവിലെ ഐ.എം.എ ഹാളിലാണ് പരിപാടി. കോഴിക്കോട്, കണ്ണൂര്‍, കാസര്‍ഗോഡ്, വയനാട്, മലപ്പുറം, പാലക്കാട്, ജില്ലകളിലെ സര്‍ക്കാര്‍,സ്വകാര്യ ആശുപത്രികളിലെ പ്രതിനിധികള്‍ക്കായി വിവിധ വിഷയങ്ങളില്‍ പ്രാവീണ്യമുള്ളവര്‍ ക്ലാസെടുക്കും.

അറ്റകുറ്റപ്പണികള്‍ നടക്കുന്നതിനാല്‍ പുത്തന്‍ചന്ത ഇലക്ട്രിക്കല്‍ സെക്ഷന്‍ പരിധിയില്‍ ത്രിവേണി, സ്റ്റാറ്റിയൂ ജനറല്‍ പോസ്പിറ്റല്‍ എന്നിവിടങ്ങളിലും വെള്ളയമ്പലം ഇലക്ട്രിക്കല്‍ സെക്ഷന്‍ പരിധിയില്‍ ജവഹര്‍നഗര്‍, ഭഗവതിനഗര്‍ എന്നീ  പ്രദേശങ്ങളിലും ഇന്ന് (ഫെബ്രുവരി 22) രാവിലെ ഒന്‍പത് മുതല്‍ വൈകുന്നേരം അഞ്ച് വരെ വൈദ്യുതി മുടങ്ങുമെന്ന് കെ.എസ്.ഇ.ബി. അറിയിച്ചു.
     (പി.ആര്‍.പി. 264/2019)

കളക്ടറേറ്റില്‍ ഭരണഭാഷാ ബോധവത്കരണ പരിപാടിയും ലോക മാതൃഭാഷാ ദിനാഘോഷവും സംഘടിപ്പിച്ചു. കളക്ടറേറ്റ് കോണ്‍ഫറന്‍സ് ഹാളില്‍ നടന്ന ചടങ്ങില്‍ ഭാഷാ വിദഗ്ധന്‍ ആര്‍. ശിവകുമാര്‍ ക്ലാസെടുത്തു. എ.ഡി.എം. വി.ആര്‍. വിനോദ്, ഡെപ്യൂട്ടി കളക്ടര്‍ ജോണ്‍ സാമുവല്‍, ഔദ്യോഗിക ഭാഷാവകുപ്പ് സെക്ഷന്‍ ഓഫിസര്‍ എ. അജിത് പ്രസാദ് തുടങ്ങിയവര്‍ പങ്കെടുത്തു.
     (പി.ആര്‍.പി. 263/2019)

ജില്ലാ ദുരന്തനിവാരണ അതോറിറ്റിയിലേക്ക് ഇലക്ട്രോണിക് ഉപകരണം വാങ്ങുന്നതിന് മത്സരാധിഷ്ഠിത ക്വട്ടേഷന്‍ ക്ഷണിച്ചു. സി.സി.ടി.വി കണക്ഷനും അനുബന്ധ പ്രവര്‍ത്തിയും ചെയ്യുന്നതിനാണ് ക്വട്ടേഷന്‍ ക്ഷണിച്ചത്. ക്വട്ടേഷന്‍ നല്‍കേണ്ട അവസാന തീയതി ഫെബ്രുവരി 28. താത്പര്യമുള്ളവര്‍ വില വിവരപട്ടിക സിവില്‍ സ്റ്റേഷനില്‍ പ്രവര്‍ത്തിക്കുന്ന ദുരന്തനിവാരണ വിഭാഗത്തില്‍ എത്തിക്കണമെന്ന് ഡെപ്യൂട്ടി കളക്ടര്‍ (ഡി.എം) അറിയിച്ചു. കൂടുതല്‍ വിവരങ്ങള്‍ക്ക് 0471-2731210.
(പി.ആര്‍.പി. 262/2019)

പിന്നാക്കവിഭാഗ വികസന വകുപ്പിന്റെ മത്സരപരീക്ഷാ പരിശീലന ധനസഹായ പദ്ധതിയായ എംപ്ലോയബിലിറ്റി എന്‍ഹാന്‍സ്‌മെന്റ് പ്രോഗ്രാമിന്റെ 2018-19 ലെ മെഡിക്കല്‍/എന്‍ജിനീയറിങ് വിഭാഗത്തില്‍ പ്രത്യേക പരിഗണന അര്‍ഹിക്കുന്ന ഗുണഭോക്താക്കളുടെ പട്ടിക പ്രസിദ്ധീകരിച്ചു. www.bcdd.kerala.gov.in എന്ന വെബ്‌സൈറ്റില്‍ പട്ടിക ലഭ്യമാണെന്ന് മേഖലാ ഡെപ്യൂട്ടി ഡയറക്ടര്‍ അറിയിച്ചു.
(പി.ആര്‍.പി. 261/2019)

ഭാഗ്യക്കുറി ക്ഷേമനിധി ബോര്‍ഡ് അംഗങ്ങള്‍ക്കുള്ള സൗജന്യ ബീച്ച് അംബ്രല്ല വിതരണോദ്ഘാടനം ഫെബ്രുവരി 26 ന് വൈകിട്ട് 3.15 ന് ബാങ്ക് എപ്ലോയീസ് യൂണിയന്‍ ഹാളില്‍ ദേവസ്വം-ടൂറിസം-സഹകരണ വകുപ്പ് മന്ത്രി കടകംപള്ളി സുരേന്ദ്രന്‍ നിര്‍വഹിക്കുമെന്ന് ജില്ലാ ക്ഷേമനിധി ഓഫീസര്‍ അറിയിച്ചു.  ബീച്ച് അംബ്രല്ലക്ക് അര്‍ഹരായിട്ടുള്ള ഗുണഭോക്താക്കള്‍ 2.30 ന് ജനറല്‍ പോസ്റ്റ് ഓഫീസിന് സമീപത്തുള്ള ബാങ്ക് എംപ്ലോയീസ് യൂണിയന്‍ ഹാളിലെത്തി പേര് രജിസ്റ്റര്‍ ചെയ്യണമെന്നും അറിയിപ്പില്‍ പറയുന്നു.
(പി.ആര്‍.പി. 260/2019)

സംസ്ഥാന സര്‍ക്കാരിന്റെ ആയിരം ദിനാഘോഷങ്ങളുടെ ഭാഗമായി സെന്‍ട്രല്‍ സ്റ്റേഡിയത്തില്‍ സംഘടിപ്പിച്ചിട്ടുള്ള പ്രദര്‍ശന നഗരിയിലെത്തുന്നവര്‍ക്ക് നോക്കുപാവ വിദ്യ ആസ്വദിക്കാന്‍ അവസരം. അന്യംനിന്നു പോകുന്ന ഗ്രാമീണ കലാരൂപമായ നോക്കുപാവ വിദ്യ ഇന്ന് (ഫെബ്രുവരി 22) വൈകിട്ട് 6.30ന് സെന്‍ട്രല്‍ സ്റ്റേഡിയത്തിലെ പ്രത്യേക വേദിയില്‍ അരങ്ങേറും. ഇതിഹാസങ്ങളിലേയും പുരാണങ്ങളിലേയും ചില       പ്രത്യേക മുഹൂര്‍ത്തങ്ങളിലൂടെ കടന്നുപോകുന്ന പാട്ടിനൊത്ത് മേല്‍ച്ചുണ്ടില്‍ രണ്ടടി നീളമുള്ള കമുകിന്‍ തണ്ടില്‍ പാവകളെ നൃത്തംചെയ്യിക്കുന്ന കലയാണ് നോക്കുപാവ വിദ്യ.

അന്യംനിന്നുപോകുന്ന ഗ്രാമഭംഗി ആസ്വദിക്കണമെങ്കില്‍ സെന്‍ട്രല്‍ സ്റ്റേഡിയത്തിലെ കൃഷിവകുപ്പിന്റെ സ്റ്റാളില്‍ എത്തിയാല്‍ മതി. സംസ്ഥാന സര്‍ക്കാരിന്റെ 1000 ദിനാഘോഷങ്ങളോടനുബന്ധിച്ച് സജ്ജമാക്കിയ പ്രദര്‍ശനനഗരിയിലാണ് കൃഷിവകുപ്പിന്റെ പ്രത്യേക സ്റ്റാള്‍. കാളവണ്ടി ചക്രവും, ജല ചക്രവും ഇവിടെ എത്തുന്നവരെ വരവേല്‍ക്കുന്നു. ഒറ്റത്തടിയില്‍ തീര്‍ത്ത ചക്ക വിളക്കും, കേര വിളക്കും കാണാന്‍ നിരവധി പേരാണ് ഇവിടെത്തുന്നത്.

സൗജന്യമായി രക്തസമ്മര്‍ദ്ദവും പ്രമേഹവും പരിശോധിക്കാന്‍ താല്പര്യമുള്ളവര്‍ സെന്‍ട്രല്‍ സ്റ്റേഡിയത്തിലേക്കു വരൂ.. സംസ്ഥാന സര്‍ക്കാരിന്റെ 1000 ദിനാഘോഷത്തോടനുബന്ധിച്ച് നടക്കുന്ന പ്രദര്‍ശനനഗരിയിലെ ആരോഗ്യ വകുപ്പിന്റെ സ്റ്റാളില്‍ സൗജന്യമായി പരിശോധിച്ചു നല്‍കും. കൂടാതെ പകര്‍ച്ചവ്യാധികള്‍ക്കെതിരെയുള്ള ആരോഗ്യ ജാഗ്രതാ നിര്‍ദ്ദേശങ്ങളും ബോധവത്കരണവും പതിനെട്ട് വയസിനു താഴെയുള്ള ഹൃദ്രോഗമുള്ള കുട്ടികള്‍ക്ക് സൗജന്യ ചികിത്സ നല്‍കുന്ന ആരോഗ്യ വകുപ്പിന്റെ ഹൃദ്യം പദ്ധതിയെ കുറിച്ചുള്ള വിശദ വിവരങ്ങളും ലഭിക്കും. ഹൃദ്യം പദ്ധതിയിലേക്ക് രജിസ്റ്റര്‍ ചെയ്യാനും സ്റ്റാളില്‍ സൗകര്യമൊരുക്കിയിട്ടുണ്ട്.