തിരഞ്ഞെടുപ്പ് പ്രചാരണാര്‍ഥം സ്വകാര്യവ്യക്തികളുടെ സ്ഥലത്ത് പുതുതായി പതിക്കുന്ന/ സ്ഥാപിക്കുന്ന പോസ്റ്ററുകള്‍, നോട്ടീസുകള്‍, ലഘുലേഖകള്‍, ഫ്ളക്സുകള്‍ എന്നിവയുടെ വിവരങ്ങളും ഉടമകളുടെ അനുമതി പത്രത്തിന്‍റെ പകര്‍പ്പും എല്ലാ ശനിയാഴ്ച്ചകളിലും വൈകീട്ട് അഞ്ചിനകം മാതൃകാ പെരുമാറ്റച്ചട്ടം നടപ്പാക്കല്‍ നോഡല്‍ ഓഫീസറായ എ.ഡി.എമ്മിന് സമര്‍പ്പിക്കണമെന്ന് അറിയിച്ചു.  

    തൊഴില്‍ വകുപ്പിന് ആഭിമുഖ്യത്തില്‍  സെക്യൂരിറ്റി മേഖലയില്‍ നിലനില്‍ക്കുന്ന തൊഴില്‍ചൂഷണം തടയുന്നതിന് ലേബര്‍ കമ്മീഷണറുടെയും റീജിയണല്‍ ജോയിന്‍റ്  ലേബര്‍ കമ്മീഷണര്‍ ശ്രീലാലിന്‍റെയും നിര്‍ദ്ദേശാനുസരണം ജില്ലയില്‍ വ്യാപക പരിശോധന. പരിശോധനയില്‍ തൊഴിലാളികള്‍ക്കും ലഭിക്കേണ്ട മിനിമം വേതനം ലഭ്യമാകാത്തതും, തൊഴിലാളികളുടെ വേതനം വേതന സുരക്ഷാ പദ്ധതി മുഖേന നല്‍കാത്തത് ഉള്‍പ്പെടെയുള്ള അപാകതകള്‍ കണ്ടെത്തിയതായി ജില്ലാ ലേബര്‍ ഓഫീസര്‍ എം.കെ.രാമകൃഷ്ണന്‍ അറിയിച്ചു. പരിശോധനയുടെ അടിസ്ഥാനത്തില്‍ തൊഴിലുടമകള്‍ക്ക് പരിശോധന ഉത്തരവ് നല്‍കി.

    കൊല്ലങ്കോട്- കുനിശ്ശേരി  റോഡില്‍ അറ്റക്കുറ്റപണികള്‍ നടക്കുന്നതിനാല്‍  ഏപ്രില്‍ 16 വരെ വാഹന ഗതാഗത നിയന്ത്രണം. കൊല്ലങ്കോട് ഭാഗത്തും നിന്നും വരുന്ന വാഹനങ്ങള്‍ വിത്തനശ്ശേരി  വഴി തിരിഞ്ഞ് പല്ലാവൂര്‍ ജംങ്ഷനില്‍ എത്തി കുനിശ്ശേരിയിലേക്കും  കുനിശ്ശേരിയില്‍ നിന്ന് കൊല്ലങ്കോട് ഭാഗത്തേക്ക് വരുന്ന വാഹനങ്ങള്‍ പല്ലാവൂര്‍ ജംങ്ഷനില്‍ എത്തി വിത്തനശ്ശേരി വഴി തിരിഞ്ഞു പോകണമെന്ന് പാലക്കാട് ഡിവിഷന്‍ നിരത്തു വിഭാഗം ക്സെിക്യൂട്ടീവ് എഞ്ചിനീയര്‍ അറിയിച്ചു.

മുണ്ടൂര്‍ ആര്യനെറ്റ് ഇന്‍സ്റ്റിട്ട്യൂട്ട് ഓഫ് ടെക്നോളജി ലോക്സഭാ തിരഞ്ഞെടുപ്പില്‍ പാലക്കാട്, ആലത്തൂര്‍ മണ്ഡലങ്ങളുടെ വോട്ടെണ്ണല്‍ കേന്ദ്രമാകും. ഇരു ലോക്സഭാ മണ്ഡലങ്ങളിലുമായി ഉള്‍പ്പെടുന്ന 14 നിയോജക മണ്ഡലങ്ങളുടെയും സ്ട്രോങ്ങ് റൂമുകള്‍ക്കും കൗണ്ടിങ് ഹാളുകള്‍ക്കും ആര്യനെറ്റ് ഇന്‍സ്റ്റിട്ട്യൂട്ടില്‍ മതിയായ സൗകര്യങ്ങള്‍ ഉള്ളതായി ജില്ലാ പൊലീസ് മേധാവിയും ജില്ലാ തിരഞ്ഞെടുപ്പ് ഉദ്യോഗസ്ഥന്‍ കൂടിയായ ജില്ലാ കലക്ടറും സംയുക്തമായി നടത്തിയ പരിശോധനയില്‍ വിലയിരുത്തിയതിന്‍റെ അടിസ്ഥാനത്തിലാണ് തീരുമാനം.

വോട്ടു ചെയ്യാന്‍ താല്‍പര്യമില്ലാത്ത മകനെ വോട്ടു ചെയ്യാന്‍ പ്രേരിപ്പിക്കുന്ന അച്ഛന്‍റേയും വോട്ടു ചെയ്യുന്നതിനായി ദൂരെയുള്ള ജോലിസ്ഥലങ്ങളില്‍ നിന്നും നാട്ടിലെത്തി സഹോദരന് വോട്ടിന്‍റെ പ്രാധാന്യത്തെക്കുറിച്ച് പറഞ്ഞു മനസിലാക്കുന്ന സഹോദരങ്ങളുടേയും കഥ ലളിതമായി അവതരിപ്പിക്കുകയാണ് തോല്‍പ്പാവക്കൂത്തിലൂടെ. നിസാരമെന്നു പലരും കരുതുന്ന ഓരോ വോട്ടും വളരെ വിലയേറിയതാണെന്ന സന്ദേശമാണ് ഇതിലൂടെ നല്‍കുന്നത്.