ബി.ഇ/ ബി.ടെക്ക്, എം.സി.എ, ഡിഗ്രി വിദ്യാര്‍ഥികള്‍ക്കായി കെല്‍ട്രോണിന്‍റെ നോളേജ് സെന്‍ററില്‍ സോഫറ്റ് വെയര്‍ -  ഐ.ടി പ്ലാറ്റ്ഫോമുകളില്‍ ജോബ് ഓറിയന്‍റഡ് ട്രെയിനിംഗ് പ്രോഗ്രാം ആരംഭിക്കുന്നു. കൂടുതല്‍ വിവരങ്ങള്‍ക്കും അപേക്ഷ ഫോറത്തിനും കെല്‍ട്രോണ്‍ നോളജ് സെന്‍റര്‍, അംബേദ്ക്കര്‍ ബില്‍ഡിങ്, റെയില്‍വേ ലിങ്ക് റോഡ്, കോഴിക്കോട് വിലാസത്തില്‍ ബന്ധപ്പെടുക. ഫോണ്‍: 8089245760.

ഗവ. പോളിടെക്നിക് കോളേജില്‍ പഴം പച്ചക്കറി സംസ്ക്കരണം, ബുക്ക് ബൈന്‍റിംഗ് സൗജന്യ കോഴ്സുകളിലേക്ക് 18 വയസ്സിനുമുകളില്‍ പ്രായമുള്ളവര്‍ക്ക് അപേക്ഷിക്കാം. വിദ്യാഭ്യാസയോഗ്യത നിര്‍ബന്ധമില്ല. നാലുമാസമാണ് കോഴ്സുകളുടെ കാലാവധി. വാര്‍ഷിക വരുമാനം കുറഞ്ഞവര്‍ക്കും പട്ടികജാതി- പട്ടികവര്‍ഗ്ഗ, മറ്റുപിന്നോക്ക വിഭാഗക്കാര്‍ക്കും മുന്‍ഗണന ലഭിക്കും. താല്‍പര്യമുള്ളവര്‍ ഏപ്രില്‍ 17ന് രാവിലെ 10.30ന് പോളിടെക്നിക്കിലെ സി.ഡി.ടി.പി ഓഫീസില്‍ കൂടിക്കാഴ്ച്ചക്ക് എത്തണമെന്ന് പ്രിന്‍സിപ്പല്‍ അറിയിച്ചു. ഫോണ്‍: 9495516223, 9495668597.

പൊതു തിരഞ്ഞെടുപ്പുമായി ബന്ധപ്പെട്ട് പാലക്കാട്, ആലത്തൂര്‍ മണ്ഡലങ്ങളിലെ സ്ഥാനാര്‍ത്ഥികള്‍ സൂക്ഷിക്കേണ്ട വരവ്, ചെലവ് കണക്കുകളുടെ ആദ്യ ഘട്ട പരിശോധന ഏപ്രില്‍ 12ന് നടക്കും. കലക്ടറേറ്റ് കോണ്‍ഫറന്‍സ് ഹാളില്‍ രാവിലെ 10.30 ന് എക്സ്പെന്‍ഡിച്ചര്‍ ഒബ്സര്‍വര്‍മാരുടെ ആഭിമുഖ്യത്തിലാണ് പരിശോധന. സ്ഥാനാര്‍ത്ഥികള്‍ ഇലക്ഷന്‍ കമ്മീഷന്‍റെ നിര്‍ദേശ പ്രകാരം കണക്കുകള്‍ സൂക്ഷിക്കണമെന്നും നേരിട്ടോ പ്രതിനിധി മുഖാന്തിരമോ പരിശോധനയ്ക്ക് എത്തണമെന്നും തെരഞ്ഞെടുപ്പ് ചെലവ് നിരീക്ഷണ വിഭാഗം ജില്ലാ നോഡല്‍ ഓഫീസര്‍ അറിയിച്ചു.

പൊതു തിരഞ്ഞെടുപ്പ് വോട്ടെടുപ്പ് ദിവസമായ ഏപ്രില്‍ 23ന് പൊതു അവധി നല്‍കി ഉത്തരവായി. സര്‍ക്കാര്‍- അര്‍ദ്ധ സര്‍ക്കാര്‍, സ്വകാര്യ സ്ഥാപനങ്ങള്‍ക്ക് അവധി ബാധകമായിരിക്കും. സ്വകാര്യ ജീവനക്കാര്‍ക്ക് ഉള്‍പ്പെടെയുള്ളവര്‍ക്ക് ശമ്പളത്തോട് കൂടിയുള്ള അവധി നല്‍കണമെന്ന് ഇലക്ഷന്‍ കമ്മീഷന്‍ നിര്‍ദേശിച്ചു.

ചിറ്റൂര്‍ ടെക്നിക്കല്‍ ഹൈസ്കൂള്‍ 2019-20 അധ്യയന വര്‍ഷത്തേക്ക് പ്രവേശനത്തിനുള്ള അപേക്ഷകള്‍ ഏപ്രില്‍ 11 മുതല്‍ വിതരണം ചെയ്യും. അപേക്ഷ മെയ് രണ്ടിന് വൈകീട്ട് നാല് വരെ സ്വീകരിക്കും.

ജില്ലാ ആശുപത്രിയില്‍ വിവിധ പദ്ധതികളില്‍ ചികിത്സ തേടുന്ന രോഗികള്‍ക്ക് ഇടുപ്പ് സന്ധി, കാല്‍മുട്ട് സന്ധി മാറ്റിവെയ്ക്കലിന് ആവശ്യമായ ഓര്‍ത്തോ ഇംപ്ലാന്‍റുകള്‍ നിശ്ചിത വില കരാര്‍ അടിസ്ഥാനത്തില്‍ ഒരു വര്‍ഷത്തേക്ക് വിതരണം ചെയ്യുന്നതിന് അംഗീകൃത വിതരണക്കാരില്‍ നിന്നും മുദ്രവെച്ച ക്വട്ടേഷനുകള്‍ ക്ഷണിച്ചു. ആവശ്യമായ രേഖകളുമായി മെയ് എട്ടിന്  ഉച്ചയ്ക്ക് ഒന്നിനകം ക്വട്ടേഷനുകള്‍ സൂപ്രണ്ടിന്‍റെ ഓഫീസില്‍ എത്തിക്കണം. അന്നേ ദിവസം ഉച്ചയ്ക്ക് രണ്ടിന് ക്വട്ടേഷനുകള്‍ തുറക്കും. വിശദവിവരങ്ങള്‍ക്ക് ഓഫീസ് ബി3 വിഭാഗത്തില്‍ നേരിട്ടോ 0491-2533327 നമ്പറിലോ ബന്ധപ്പെടാം. 

 
പൊതു തിരഞ്ഞെടുപ്പ് മാതൃകാ പെരുമാറ്റച്ചട്ടം നടപ്പാക്കുന്നതിന്‍റെ ഭാഗമായി രൂപീകരിച്ച ആന്‍റി ഡീഫെയ്സ്മെന്‍റ് സ്ക്വാഡ് ജില്ലയില്‍ ഇതുവരെ അരലക്ഷത്തിലേറെ പ്രചരണ സാമഗ്രികള്‍ നീക്കി. കേന്ദ്ര-സംസ്ഥാന സര്‍ക്കാരുകളുടെ അധീനതയുള്ള പൊതുയിടങ്ങളില്‍ നിന്നും  54788 നിരോധിത പ്രചരണ സാമഗ്രികളാണ് നീക്കം ചെയ്തത്. ഇതില്‍ 48417 പോസ്റ്റര്‍, 1361 ബാനറുകള്‍, 4625 കൊടികള്‍, 385 ചുവരെഴുത്തുകള്‍ ഉള്‍പ്പെടുന്നു. സ്വകാര്യ വ്യക്തികളുടെ സ്ഥലത്ത് ഉടമസ്ഥന്‍റെ അനുമതിയില്ലാതെ പതിച്ച 21 പ്രചരണ വസ്തുക്കളും നീക്കി. ഇന്നലെ (ഏപ്രില്‍ 10) മാത്രം പൊതുസ്ഥലത്തെ 2848 നിരോധിത പ്രചരണ സാമഗ്രികളാണ് നീക്കിയത്.