നാഷണല്‍ ഇന്‍സ്റ്റിറ്റിയൂഷന്‍ ഓഫ് സ്പീച്ച് ആന്‍ഡ് ഹിയറിംഗിന്റെ(നിഷ്) സഹകരണത്തോടെ ജില്ലാ ചൈല്‍ഡ് പ്രൊട്ടക്ഷന്‍ യൂണിറ്റിന്റെ ആഭിമുഖ്യത്തില്‍ മറവി രോഗം ഒരു ആമുഖം എന്ന വിഷയത്തെ സംബന്ധിച്ച് ഓണ്‍ലൈന്‍ ബോധവത്കരണ സെമിനാര്‍ 27ന് രാവിലെ 10ന് ആറന്മുള മിനി സിവില്‍ സ്‌റ്റേഷന്‍ മൂന്നാം നിലയിലെ ജില്ലാ ചൈല്‍ഡ് പ്രൊട്ടക്ഷന്‍ യൂണിറ്റ് ഓഫീസില്‍ നടക്കും. ആദ്യം പേര് രജിസ്റ്റര്‍ ചെയ്യുന്ന 20 പേര്‍ക്ക് പരിപാടിയില്‍ പങ്കെടുക്കാം. കൂടുതല്‍ വിവരങ്ങള്‍ക്ക് 0468-2319998 എന്ന നമ്പരില്‍ ബന്ധപ്പെടണം. 

* പരാതികളുടെ എണ്ണത്തിലും പരിഹാരത്തിലും വമ്പൻ നേട്ടം

* തിരഞ്ഞെടുപ്പ് കമ്മീഷൻ അഭിനന്ദിച്ചു

മാതൃകാപെരുമാറ്റച്ചട്ടലംഘനം ശ്രദ്ധയിൽപ്പെട്ടാൽ റിപ്പോർട്ട് ചെയ്യാനുള്ള തിരഞ്ഞെടുപ്പ് കമ്മീഷന്റെ 'സി-വിജിൽ' മൊബൈൽ ആപ്പ് വഴി ലഭിച്ച പരാതികളുടെ എണ്ണത്തിൽ കേരളത്തിന് റെക്കോർഡ് നേട്ടം. ലഭിച്ച പരാതികളിൽ 92 ശതമാനവും പരിഹരിച്ച് കേരളം ദേശീയ ശരാശരിയേക്കാൾ ഏറെ മുന്നിലെത്തി. ദേശീയശരാശരി 78 ശതമാനമാണ്. മികച്ച പ്രവർത്തനം കാഴ്ചവെച്ച മുഖ്യ തിരഞ്ഞെടുപ്പ് ഓഫീസറെ കേന്ദ്ര തിരഞ്ഞെടുപ്പ് കമ്മീഷൻ അഭിനന്ദിച്ചു. 

കുടുംബശ്രീ ജില്ലാമിഷന്റെ നേതൃത്വത്തില്‍ തെരഞ്ഞെടുപ്പുദിനത്തില്‍ ഭക്ഷണവിതരണം നടത്തി കുടുംബശ്രീ പ്രവര്‍ത്തകര്‍ മാതൃകയായി. ജില്ലയിലെ 750 ബൂത്തുകളിലും മണലൂരിലെ തിരഞ്ഞെടുപ്പ് സാമഗ്രികള്‍ വിതരണ കേന്ദ്രത്തിലുമായി 6000- ഓളം ഉദ്യോഗസ്ഥര്‍ക്ക് ന്യായവില ഭക്ഷണമാണ് വിതരണം നടത്തിയത്. പുതുക്കാട്, ഒല്ലൂര്‍, ഗുരുവായൂര്‍, വടക്കാഞ്ചേരി എന്നീ 4 നിയോജകമണ്ഡലങ്ങളില്‍ പൂര്‍ണമായും കുന്നംകുളം മണ്ഡലത്തില്‍ ഭാഗികമായുമാണ് ഭക്ഷണവിതരണം നടത്തിയത്. കുടുംബശ്രീ സി.ഡി.എസ്സ് ചെയര്‍പേഴ്‌സന്മാരുടെ നേതൃത്വത്തില്‍ പോളിംഗ് സ്റ്റേഷനുകളിലും, കളക്ഷന്‍ കേന്ദ്രങ്ങളിലും ഭക്ഷണം എത്തിച്ചു.

ജില്ലയില്‍ പലയിടത്തും എച്ച് 1 എന്‍ 1 കേസുകള്‍ റിപ്പോര്‍ട്ട് ചെയ്തതിന്റെ അടിസ്ഥാനത്തില്‍ ഏതെങ്കിലും തരത്തിലുള്ള ലക്ഷണങ്ങള്‍ കണ്ടാല്‍ ഉടന്‍ തന്നെ അടുത്തുള്ള ആരോഗ്യ കേന്ദ്രത്തില്‍ പോയി വിദഗ്ദ സഹായം തേടണമെന്ന് ഡി എം ഒ അറിയിച്ചു.

ലോക്‌സഭാ തെരഞ്ഞെടുപ്പിനെ തുടര്‍ന്ന് ഏ ആര്‍ ഒ, മൈക്രോ ഒബ്‌സര്‍വര്‍മാര്‍, സ്ഥാനാര്‍ത്ഥികളുടെ ഏജന്റുമാര്‍ എന്നിവരുടെ യോഗം തൃശൂര്‍ തെരഞ്ഞെടുപ്പ് പൊതുനിരീക്ഷകന്‍ പി കെ സേനാപതിയുടെ അധ്യക്ഷതയില്‍ ഗവ. എന്‍ജിനീയറിങ് കോളേജില്‍ ചേര്‍ന്നു. തൃശൂര്‍ ലോക്‌സഭാ മണ്ഡലത്തിലെ ഏഴ് നിയോജക മണ്ഡലങ്ങളിലെ ബൂത്തുകളിലെ ഉയര്‍ന്ന, താഴ്ന്ന പോളിങ് ശതമാനങ്ങളെക്കുറിച്ചും ചര്‍ച്ച ചെയ്തു. യോഗത്തില്‍ ജില്ലാ തെരഞ്ഞെടുപ്പ് ഓഫീസറായ ജില്ലാ കളക്ടര്‍ ടി വി അനുപമ, അസി. കളക്ടര്‍ പ്രേം കൃഷ്ണന്‍, ഇലക്ഷന്‍ ഡെപ്യൂട്ടി കളക്ടര്‍ എസ് വിജയന്‍ തുടങ്ങിയവര്‍ പങ്കെടുത്തു.

ഈ വര്‍ഷത്തെ തൃശൂര്‍ പൂരം സുഗമവും വിപുലവുമായി നടത്തുന്നതിനുള്ള വിഷയങ്ങള്‍ ചര്‍ച്ച ചെയ്യുന്നതിന് ഇന്ന് (ഏപ്രില്‍ 25) വൈകീട്ട് 3 ന് കളക്ടറേറ്റ് കോണ്‍ഫറന്‍സ് ഹാളില്‍ യോഗം ചേരുമെന്ന് ജില്ലാ കളക്ടര്‍ ടി വി അനുപമ അറിയിച്ചു.

പുല്ലൂറ്റ് കെ.കെ.ടി.എം. ഗവ. കോളേജ് ക്യാംപസിലുള്ള കോളേജ് കാന്റീന്‍ 2019 ജൂണ്‍ ഒന്ന് മുതല്‍ 2020 മെയ് 31 വരെയുള്ള കാലയളവില്‍ നടത്തിപ്പിനായി ക്വട്ടേഷന്‍ ക്ഷണിച്ചു. ക്വട്ടേഷന്‍ സമര്‍പ്പിക്കുന്നതിനുള്ള അവസാന തീയതി മെയ് ആറ് ഉച്ച 2 മണി വരെ. കൂടുതല്‍ വിവരങ്ങള്‍ക്ക് കോളേജ് ഓഫീസുമായി ബന്ധപ്പെടുക. ഫോണ്‍: 0480 2802213.

കെ.കെ.ടി.എം. ഗവ. കോളേജ് ലൈബ്രറിയിലേയ്ക്ക് 2019 ജൂണ്‍ 1 മുതല്‍ 2020 മാര്‍ച്ച് 31 വരെ ആവശ്യമായ പത്രങ്ങള്‍, ആഴ്ചപതിപ്പുകള്‍, മാസികകള്‍, ആനുകാലികങ്ങള്‍ എന്നിവ വിതരണം ചെയ്യുന്നതിന് ക്വട്ടേഷന്‍ ക്ഷണിച്ചു. ക്വട്ടേഷന്‍ സമര്‍പ്പിക്കാനുള്ള അവസാന തീയതി മെയ് 10. കൂടുതല്‍ വിവരങ്ങള്‍ക്ക് കോളേജ് ഓഫീസുമായി ബന്ധപ്പെടുക. ഫോണ്‍: 0480 2802213.

ഇന്ത്യന്‍ മഹാസമുദ്രത്തില്‍ ന്യൂനമര്‍ദ്ദം രൂപപ്പെട്ടുവരുന്നതിനാല്‍ മത്സ്യത്തൊഴിലാളികള്‍ ഏപ്രില്‍ 27 മുതല്‍ ഇന്ത്യന്‍ മഹാസമുദ്രത്തിന്റെ ഭൂമധ്യരേഖാ പ്രദേശത്തും അതിനോട് ചേര്‍ന്നുള്ള തെക്ക് പടിഞ്ഞാറന്‍ ബംഗാള്‍ ഉള്‍ക്കടലിലും, തമിഴ്‌നാട് തീരത്തും ഈ കാലയളവില്‍ മത്സ്യബന്ധനത്തിന് പോകരുതെന്ന് കേന്ദ്ര കാലാവസ്ഥാ നിരീക്ഷണകേന്ദ്രം അറിയിച്ചു. കടല്‍ പ്രക്ഷുബ്ധമോ അതി പ്രക്ഷുബ്ധമോ ആകാന്‍ സാധ്യതയുള്ളതിനാല്‍ ആഴക്കടലില്‍ മത്സ്യബന്ധനത്തില്‍ ഏര്‍പ്പെട്ടിരിക്കുന്നവര്‍ 27ന് അതിരാവിലെ 12 മണിയോടെ തന്നെ ഏറ്റവും അടുത്തുള്ള തീരത്തെത്തിച്ചേരണമെന്നും അറിയിച്ചു.

അന്തർസംസ്ഥാന സർവീസ് നടത്തുന്ന സ്വകാര്യ ബസുകളെ നിയന്ത്രിക്കാൻ ഗതാഗത വകുപ്പ് കർശന നടപടി സ്വീകരിക്കുമെന്ന് ഗതാഗത മന്ത്രി എ. കെ. ശശീന്ദ്രൻ വാർത്താസമ്മേളനത്തിൽ പറഞ്ഞു. ഇത്തരം ബസുകളിൽ സ്പീഡ് ഗവർണറുകളും ജി. പി. എസും നിർബന്ധമാക്കും. ജൂൺ ഒന്നു മുതൽ കേരളത്തിൽ സർവീസ് നടത്തുന്ന അന്തർസംസ്ഥാന ബസുകളിൽ ജി. പി. എസ് സംവിധാനം ഉണ്ടാവണമെന്ന് തീരുമാനിച്ചിട്ടുണ്ട്.