ലോക്‌സഭാ തിരഞ്ഞെടുപ്പില്‍ പരമാവധി വോട്ടര്‍മാരുടെ പങ്കാളിത്തം ലക്ഷ്യമിട്ടുള്ള പ്രചാരണത്തിനായി 'വോട്ടോറിക്ഷ'യും. സിസ്റ്റമാറ്റിക് വോട്ടേഴ്‌സ് എജ്യുക്കേഷന്‍ ആന്റ് ഇലക്ടറല്‍ പാര്‍ട്ടിസിപ്പേഷന്‍ (സ്വീപ്) പരിപാടിയുടെ ഭാഗമായി പ്രത്യേകം സജ്ജീകരിച്ച ഓട്ടോറിക്ഷയാണ് വോട്ടോറിക്ഷയായി ഇന്നു(മാര്‍ച്ച്14) മുതല്‍ ജില്ലയില്‍ പര്യടനം നടത്തുന്നത്. 

ഇന്നു രാവിലെ 10.30ന് കളക്‌ട്രേറ്റ് വളപ്പില്‍ ജില്ലാ  തിരഞ്ഞെടുപ്പ് ഓഫീസര്‍കൂടിയായ ജില്ലാ കളക്ടര്‍ പി.കെ സുധീര്‍ ബാബു വാഹനം ഫ്‌ളാഗ് ഓഫ് ചെയ്യും. സാധാരണക്കാരന്റെ വാഹനമെന്ന നിലയിലാണ് പ്രചാരണത്തിനായി ഓട്ടോറിക്ഷ തിരഞ്ഞെടുത്തതെന്ന് കളക്ടര്‍ പറഞ്ഞു.

സി-ഡിറ്റ് സൈബര്‍ശ്രീ സെന്ററില്‍ മാറ്റ്‌ലാബ് പരിശീലനത്തിന് അപേക്ഷ ക്ഷണിച്ചു. തിരുവനന്തപുരം അംബേദ്കര്‍

ഭവനില്‍ ഏപ്രിലില്‍ ആരംഭിക്കുന്ന പരിശീലനത്തിന് 20-നും 26-നും മദ്ധ്യേ പ്രായമുള്ള പട്ടികജാതി വിഭാഗത്തില്‍പ്പെട്ടവര്‍ക്ക് അപേക്ഷിക്കാം. 

മഹാപ്രളയത്തെ തുടര്‍ന്നുണ്ടായ കൃഷിനാശവും വിലത്തകര്‍ച്ചയും മൂലം ജില്ലയില്‍ ആത്മഹത്യ ചെയ്ത ഒന്‍പത് കര്‍ഷകരുട ആശ്രിതര്‍ക്ക് മുഖ്യമന്ത്രിയുടെ ദുരിതാശ്വാസ നിധിയില്‍ നിന്നും 29 ലക്ഷം രൂപ ധനസഹായം അനുവദിച്ചു.

ലോക്‌സഭാ വോട്ടെടുപ്പിന് ശേഷം ഏഴ് നിയമസഭാ മണ്ഡലങ്ങളിലെയും വോട്ടെണ്ണല്‍ പൈനാവ് മോഡല്‍ റസിഡന്‍ഷ്യല്‍ സ്‌കൂളില്‍  നടത്താന്‍ തീരുമാനിച്ചു. ജില്ലാകലക്ടര്‍ എച്ച്. ദിനേശന്റെ നേതൃത്വത്തിലുള്ള സംഘം കെട്ടിട പരിശോധന നടത്തി. സുരക്ഷിതമായ സാഹചര്യത്തില്‍ വോട്ടെണ്ണല്‍ നടത്താമെന്ന് സംഘം വിലയിരുത്തി. വോട്ടെടുപ്പിന് ശേഷം വോട്ടിംഗ് മെഷീന്‍ സ്‌കൂളില്‍ സൂക്ഷിക്കുന്നതിനും ധാരണയായി. എ.ഡി.എം അനില്‍ ഉമ്മന്‍, ഇലക്ഷന്‍ ഡെപ്യൂട്ടി കലക്ടര്‍ ജോസ് ജോര്‍ജ്ജ്, പി.ഡബ്ല്യൂ.ഡി ഉദ്യോഗസ്ഥര്‍ എന്നിവരുടെ സാന്നിധ്യത്തിലാണ് പരിശോധന നടത്തിയത്. 

ലോക്‌സഭാ തെരഞ്ഞെടുപ്പുമായി ബന്ധപ്പെട്ട് ജില്ലയിലെ ഉടുമ്പന്നൂര്‍, അറക്കുളം, വെള്ളിയാമറ്റം ട്രൈബല്‍ പ്രദേശങ്ങളില്‍  മാര്‍ച്ച് 18നും കാന്തല്ലൂര്‍, മറയൂര്‍ ട്രൈബല്‍ പ്രദേശങ്ങളില്‍  19നും സംസ്ഥാന തെരഞ്ഞെടുപ്പ് കമ്മീഷന്റെ സ്വീപ്പ് ആക്ഷന്‍ പ്ലാനുമായി ബന്ധപ്പെട്ട് സംഘടിപ്പിക്കുന്ന തെരുവ് നാടകത്തെ കുറിച്ച് ചര്‍ച്ച ചെയ്യുന്നതിനായി ഇന്ന് (14.3.19) 11.30ന് കലക്ടറുടെ ചേമ്പറില്‍ യോഗം ചേരും.

ദേശീയ ഭക്ഷ്യഭദ്രതാ നിയമം 2013   സംസ്ഥാനത്ത്  നടപ്പിലാക്കുന്നതിനും നിയമത്തെക്കുറിച്ച്  ജനപ്രതിനിധികള്‍ക്ക് പരിശീലനം നല്‍കുന്നതിന് ജില്ലയിലെ ഗ്രാമ, ബ്ലോക്ക്, ജില്ലാ പഞ്ചായത്തുകളിലെയും മുനിസിപ്പാലിറ്റികളിലെയും പ്രസിഡന്റുമാര്‍, വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍മാര്‍,   മുനിസിപ്പല്‍ ചെയര്‍മാന്‍മാര്‍ എന്നിവര്‍ക്കായി  ഏകദിന ശില്‍പശാല  കളക്ട്രേറ്റ് കോണ്‍ഫറന്‍സ് ഹാളില്‍ നടത്തി.   

ഇടുക്കി ജില്ലാ ഇന്‍ഫര്‍മേഷന്‍  ഓഫീസറായി എന്‍. സതീഷ്‌കുമാര്‍ ചുമതലയേറ്റു. ഡല്‍ഹിയിലേക്ക് ഡെപ്യൂട്ടി ഡയറക്ടര്‍ ആയി സ്ഥംമാറിപ്പോകുന്ന എന്‍.പി സന്തോഷിന് പകരമാണ് എന്‍. സതീഷ്‌കുമാര്‍ ചുമതലയേറ്റത്. കോഴിക്കോട് ജില്ലാ ഇന്‍ഫര്‍മേഷന്‍ ഓഫീസറായി സേവനമനുഷ്ഠിച്ച് വരികയായിരുന്നു.

വോട്ടര്‍മാരെ പ്രീതിപ്പെടുത്തുന്നതിനായി പണം, മദ്യം, പാരിതോഷികങ്ങള്‍ തുടങ്ങിയവ നല്‍കുന്നത് ജനപ്രാതിനിധ്യ നിയമപ്രകാരം ശിക്ഷാര്‍ഹമാണെന്ന് ജില്ലാതെരഞ്ഞെടുപ്പ് ഓഫീസര്‍ കൂടിയായ ജില്ലാ കലക്ടര്‍ അറിയിച്ചു. ഇത്തരം പ്രവൃത്തികള്‍ നിരീക്ഷിക്കുന്നതിനായി ഇലക്ഷന്‍ ഫ്ളയിംഗ് സ്‌ക്വാഡുകളെയും, സ്റ്റാറ്റിക് സര്‍വൈലന്‍സ് ടീമുകളെയും നിയമസഭാ മണ്ഡലാടിസ്ഥാനത്തില്‍ കോഴിക്കോട് ജില്ലയില്‍ നിയോഗിച്ചിട്ടുണ്ട്.

ഭിന്നശേഷിക്കാര്‍ക്ക്  സുഖപ്രദമായി വോട്ടുചെയ്യാന്‍ ജില്ലയിലെ തെരഞ്ഞടുപ്പ് കേന്ദ്രങ്ങള്‍ ഭിന്നശേഷി സൗഹൃദമാക്കാനുള്ള നടപടികളുമായി ജില്ലാ ഭരണകൂടം. മുഴുവന്‍ തെരഞ്ഞെടുപ്പു കേന്ദ്രങ്ങളിലും വീല്‍ചെയറുകള്‍ കടന്നു പോകുന്ന തരത്തില്‍ ഒരു ഭാഗത്ത് കൈവരികള്‍ വെച്ച റാമ്പുകള്‍ സജ്ജീകരിക്കും. വീല്‍ചെയര്‍ വോട്ടിങ് മെഷീന് അടുത്തെത്തി വോട്ടു ചെയ്യാന്‍ പറ്റുന്ന തരത്തിലായിരിക്കും ഇത് ഏര്‍പ്പെടുത്തുക. ക്യു നില്‍ക്കാതെ വോട്ടു ചെയ്യാനുള്ള സൗകര്യവുമുണ്ടാകും.  

2019 ലോകസഭാ തെരഞ്ഞെടുപ്പുമായി ബന്ധപ്പെട്ട് സ്ഥാനാര്‍ത്ഥികളുടെയും രാഷ്ട്രീയ പാര്‍ട്ടികളുടെയും തെരഞ്ഞെടുപ്പ് ചെലവ് കണക്കാക്കുന്നത് സംബന്ധിച്ച് യോഗം ഇന്ന് (മാര്‍ച്ച് 14) ന് നാല് മണിക്ക് ജില്ലാകലക്ടരുടെ ചേമ്പറില്‍ നടക്കും.തെരഞ്ഞെടുപ്പ് പ്രചരണത്തിനുപയോഗിക്കുന്ന വസ്തുവകകളുടെ നിരക്ക് സംബന്ധിച്ച് യോഗത്തില്‍ ചര്‍ച്ച ചെയ്യും.