സംസ്ഥാന മന്ത്രിസഭ ആയിരം ദിനവുമായി ബന്ധപ്പെട്ട് ജില്ലാ ഇന്‍ഫര്‍മേഷന്‍ ഓഫീസില്‍ ഡോക്യുമെന്ററി പ്രദര്‍ശനത്തിന് എ4 വലുപ്പത്തില്‍ സ്‌ക്രീന്‍ പ്രിന്റ്, ഫ്ളാപ്പ് എന്നിവയോടുകൂടിയ തുണി സഞ്ചി തയ്യാറാക്കുന്നതിന് ക്വട്ടേഷന്‍ ക്ഷണിച്ചു. ഒരു തുണി സഞ്ചിയുടെ നിരക്കാണ് കാണിക്കേണ്ടത്. താത്പര്യമുള്ളവര്‍ ഫെബ്രുവരി 14 വൈകീട്ട് മൂന്നിനകം ക്വട്ടേഷന്‍ സമര്‍പ്പിക്കണം. ഫോണ്‍.0483-2734387.

സാംസ്‌കാരിക വകുപ്പ് സര്‍വ്വോദയ മണ്ഡലവുമായി ചേര്‍ന്ന്  തവനൂരില്‍ നടത്തുന്ന  രക്തസാക്ഷ്യം പരിപാടിയില്‍ ഇന്ന് (ഫെബ്രുവരി 13 ) വൈകീട്ട് അഞ്ചിന് നടക്കുന്ന സാഹിത്യ സമ്മേളനം  കഥയുടെ കുലപതി ടി. പദ്മനാഭന്‍ ഉദ്ഘാടനം ചെയ്യും. കേരള സാഹിത്യ അക്കാദമി സെക്രട്ടറി ഡോ കെ.പി.മോഹനന്‍ അധ്യക്ഷനാകുന്ന സാഹിത്യ സമ്മേളനത്തില്‍ ഡോ.ഖദീജാ മുംതാസ്, അശോകന്‍ ചരുവില്‍, ടി.ഡി.രാമകൃഷ്ണന്‍, പയ്യന്നൂര്‍ കുഞ്ഞിരാമന്‍, ഡോ. പ്രഭാകരന്‍ പഴശ്ശി തുടങ്ങിയവര്‍ പങ്കെടുക്കും. ചടങ്ങില്‍ മഹാത്മാഗാന്ധി യൂനിവേഴ്‌സിറ്റി ഡി.ലിറ്റ് നല്കിയ ടി.പദ്മനാഭനെ ആദരിക്കും. രാത്രി ഏഴ് മണിക്ക് കരിന്തലക്കൂട്ടത്തിന്റെ നാടന്‍ പാട്ടും അരങ്ങേറും.

ജില്ലാ എംപ്‌ളോയ്‌മെന്റ് എക്‌സ്‌ചേഞ്ചിലെ എംപ്ലോയബിലിറ്റി സെന്റര്‍ മുഖേന പ്രമുഖ സ്ഥാപനങ്ങളിലേക്ക് ഡെപ്യൂട്ടി ബ്രാഞ്ച് മാനേജര്‍, എച്ച്. ആര്‍ എക്‌സിക്യൂട്ടീവ്, മാര്‍ക്കറ്റിംഗ് എക്‌സിക്യൂട്ടീവ്, സെയില്‍സ് എക്‌സിക്യൂട്ടീവ്, ഓഫീസ്സ്റ്റാഫ്, ടെലികാളര്‍, റിസപ്ഷനിസ്റ്റ്, ടീച്ചര്‍, സ്റ്റുഡന്റ്‌റിലേഷന്ഷിപ് ഓഫീസര്‍ എന്നീ തസ്തികകളിലേക്ക് ഉദ്യോഗാര്‍ത്ഥികളെ ആവശ്യമുണ്ട്. എംപ്ലോയബിലിറ്റി സെന്ററില്‍ ഫെബ്രുവരി 14ന് രാവിലെ 10 ന് നടക്കുന്ന കൂടിക്കാഴ്ചയില്‍ എസ്.എസ്.എല്‍.സി, പ്ലസ്ടു, ഡിപ്ലൊമ, ഡിഗ്രി, ടി.ടി.സി, എം.ബി.എ   യോഗ്യതയുള്ളവര്‍ ബയോഡാറ്റയുമായി എത്തണം. ഫോണ്‍ : 04832 734 737.

71-ാമത്  സര്‍വ്വോദയ മേളയുടെ ഭാഗമായി തവനൂര്‍ കേളപ്പജി സ്തൂപത്തിലെ പ്രാര്‍ത്ഥനാ സദസ്സിനും, കേളപ്പജി സമാധിയിലെ പുഷ്പാര്‍ച്ചനക്കും ശേഷം  രാഷ്ട്രപിതാവിന്റെ  ചിതാഭസ്മ നിമജ്ജന സ്മരണയില്‍ ശാന്തിയാത്ര നടത്തി.

ജില്ലയിലെ മൂന്ന് തദ്ദേശ സ്വയംഭരണ സ്ഥാപനങ്ങളിലെ വാര്‍ഡുകളില്‍ നാളെ നടക്കുന്ന ഉപതിരഞ്ഞെടുപ്പിനുള്ള എല്ലാ ക്രമീകരണങ്ങളും പൂര്‍ത്തിയായി. ഇലക്‌ട്രോണിക് വോട്ടിങ് മെഷിനുകളും മറ്റ് ഇലക്ഷന്‍ സാമഗ്രികളും ഇന്ന് (ഫെബ്രുവരി 13) വിതരണം ചെയ്യും. മൂന്ന് വാര്‍ഡുകളിലായി ക്രമീകരിച്ചിരിക്കുന്ന 30 ബൂത്തകളി ലേക്കായി 46 വോട്ടിങ് മെഷീനുകള്‍ വിതരണത്തിന് തയ്യാറായി. എല്ലാ പോളിങ് സ്റ്റേഷനുകളിലും പരിശീലനം ലഭിച്ച  ഉദ്യോഗസ്ഥരെ നിയമിച്ചു കഴിഞ്ഞു.

കേരളക്കര കണ്ട രണ്ട് വലിയ ദുരന്തങ്ങളിലൂടെ കടന്ന് പോയ കടലിന്റെ മക്കള്‍ ഇപ്പോള്‍ സര്‍ക്കാരിന്റെ കൈവലയത്തില്‍ സുരക്ഷിതരാണ്. ഓഖിയുടെ ദുരന്തങ്ങളില്‍ നിന്ന് കരകയറുന്നതിനും മുമ്പേ  നേരിടേണ്ടി വന്ന പ്രളയവും കൂടി  ജില്ലയിലെ തീരദേശ മേഖലയെ കൂടുതല്‍ ദുരിതാവസ്ഥയിലായി. ഈ ഘട്ടത്തിലാണ് കൂടുതല്‍ സുരക്ഷാ പദ്ധതികളുമായി മത്സ്യമേഖലക്ക്  പുത്തന്‍ ഉണര്‍വേകാന്‍   വിവിധ പദ്ധതികള്‍ സര്‍ക്കാര്‍ നടപ്പിലാക്കുന്നത്.

സര്‍ക്കാരിന്റെ ആയിരം ദിനാഘോഷങ്ങളിലേക്ക് കടക്കുന്ന വേളയില്‍ ഇതിനകം തന്നെ വനിതാ ശിശു വികസന വകുപ്പിന്റെ നേതൃത്വത്തില്‍ ജില്ലയിലെ അശരണരായ വിധവകള്‍ക്ക് മെച്ചപ്പെട്ട ജീവിത സൗകര്യം ഒരുക്കുന്നതിനായി 2018-19 സാമ്പത്തിക വര്‍ഷം 114 പേര്‍ക്ക്  11,07,000 രൂപ നല്‍കി.  സര്‍ക്കാരിന്റെ അഭയകിരണം പദ്ധതിയില്‍ ഉള്‍പ്പെടുത്തിയാണ് ധനസഹായം വിതരണം ചെയ്തത്. വനിതകള്‍ ഗൃഹനാഥരായ 122 വിധവകളുടെ മക്കള്‍ക്ക് വിദ്യാഭ്യാസ സ്‌കോളര്‍ഷിപ്പായി 6,25,500 രൂപ ധന സഹായവും വിധവാ പുനര്‍വിവാഹ ധന സഹായമായി 50,000 രൂപയും നല്‍കി.

വിദ്യാഭ്യാസത്തിനു ശേഷം ജോലിക്കായി നെട്ടോട്ടമോടുന്ന യുവാക്കള്‍ക്കും പ്രത്യേക പരിഗണനാ വിഭാഗമായ ഭിന്നശേഷിക്കാര്‍ക്കും സര്‍ക്കാര്‍-സ്വകാര്യ മേഖലകളില്‍ തൊഴില്‍ നേടാന്‍ അവസരമൊരുക്കുകയാണ് ജില്ലയില്‍ പ്രവര്‍ത്തിക്കുന്ന സര്‍ക്കാരിന്റെ നാഷനല്‍ എംപ്ലോയ്മെന്റ് സര്‍വ്വീസ് വകുപ്പ്. സ്ഥിര-താത്കാലിക തസ്തികകളിലായി 2150 നിയമനങ്ങളാണ് ജില്ലയില്‍ ഇതുവരെയായി നടന്നത്.