വിജ്ഞാപനം പ്രസിദ്ധീകരിച്ചു

കേരളാ സ്റ്റേറ്റ് ഇലക്ട്രിസിറ്റി ലൈസന്‍സിംഗ് ബോര്‍ഡ് നടത്തുന്ന 2019 ലെ വയര്‍മാന്‍ പരീക്ഷക്കുള്ള വിജ്ഞാപനം പ്രസിദ്ധീകരിച്ചു. പരീക്ഷക്ക് മാര്‍ച്ച് 31 വരെ അപേക്ഷിക്കാം. കൂടുതല്‍ വിവരങ്ങള്‍ക്ക് ഇലക്ട്രിക്കല്‍ ഇന്‍സ്‌പെക്ടറുടെ ഓഫീസുമായി ബന്ധപ്പെടുക. ഫോണ്‍. 0497 2700882. 

വൈദ്യുതി മുടങ്ങും

പാപ്പിനിശ്ശേരി ഇലക്ട്രിക്കല്‍ സെക്ഷന്‍ പരിധിയിലെ കീച്ചേരി, വേളാപുരം, അയിക്കല്‍, കല്‍ അയിക്കല്‍, അരോളി, കമ്മാടത്ത്‌കൊട്ട, കാരക്കല്‍ എന്നീ ഭാഗങ്ങളില്‍ നാളെ (മാര്‍ച്ച് 19) രാവിലെ ഒമ്പത് മണി മുതല്‍ വൈകീട്ട് അഞ്ച് മണി വരെ വൈദ്യുതി മുടങ്ങും.

ലോക്‌സഭാ തെരഞ്ഞെടുപ്പിനോടനുബന്ധിച്ച് അബ്കാരി മേഖലയിലെ കുറ്റകൃത്യങ്ങള്‍ തടയുന്നതിനുള്ള തീവ്രയജ്ഞ എന്‍ഫോഴ്‌സ്‌മെന്റ് പ്രവര്‍ത്തനങ്ങളുടെ ഭാഗമായി എക്‌സൈസ് വകുപ്പ് കണ്ണൂര്‍ എക്‌സൈസ് ഡിവിഷന്‍ ഓഫീസ് കേന്ദ്രീകരിച്ച് ഡിവിഷണല്‍ കണ്‍ട്രോള്‍ റൂമും റെയ്ഞ്ച് ഓഫീസുകള്‍ കേന്ദ്രീകരിച്ച് 24 മണിക്കൂറും പ്രവര്‍ത്തിക്കുന്ന സ്‌ട്രൈക്കിംഗ് ഫോഴ്‌സ് ടീമും രൂപീകരിച്ചു. 

വോട്ടവകാശം വിനിയോഗിക്കുന്നതിന്റെ പ്രാധാന്യം സമ്മതിദായകരെ ബോധ്യപ്പെടുത്തുന്നതിനും വോട്ടിംഗ് ശതമാനം വര്‍ധിപ്പിക്കുന്നതിനും നടത്തുന്ന ബോധവല്‍ക്കരണ പരിപാടികളുടെ ഭാഗമായി കലക്ടറേറ്റ് പരിസരത്ത് ഒപ്പുമരം സംഘടിപ്പിച്ചു. സ്വീപിന്റെ ആഭിമുഖ്യത്തില്‍ നടത്തിയ പരിപാടി ജില്ലാ കലക്ടര്‍ മീര്‍ മുഹമ്മദ് അലി ഉദ്ഘാടനം ചെയ്തു. ഒപ്പിനോടൊപ്പം തെരഞ്ഞെടുപ്പ് സന്ദേശവും ഒപ്പുമരത്തില്‍ പരിപാടിയില്‍ പങ്കാളികളായവര്‍ രേഖപ്പെടുത്തി.

ലേക്‌സഭ തെരഞ്ഞെടുപ്പുമായി ബന്ധപ്പെട്ട് കണ്ണൂര്‍, തലശ്ശേരി താലൂക്കുകളിലെ സെക്ടര്‍ ഓഫീസര്‍മാര്‍ക്ക് പരിശീലനം നല്‍കി. തെരഞ്ഞെടുപ്പിന് മുന്നോടിയായും തെരഞ്ഞെടുപ്പ് ദിവസവും ഓഫീസര്‍മാര്‍ നിര്‍വ്വഹിക്കേണ്ട ചുമതലകളെക്കുറിച്ച്  വിശദീകരിച്ചു. 

പോളിംഗ് സ്റ്റേഷനുകളില്‍ എളുപ്പത്തില്‍ എത്തിച്ചേരാന്‍ കഴിയുന്ന രണ്ടോ മൂന്നോ റൂട്ട്മാപ്പുകള്‍ ബന്ധപ്പെട്ട സെക്ടര്‍ ഓഫീസര്‍ തയ്യാറാക്കണം. വോട്ടിംഗ് ഉപകരണങ്ങള്‍ക്ക് തകരാര്‍ സംഭവിക്കുന്നതുള്‍പ്പെടെയുള്ള സാഹചര്യങ്ങളില്‍ ബന്ധപ്പെട്ട ഉദ്യോഗസ്ഥര്‍ക്ക് എളുപ്പത്തില്‍ നിശ്ചിത കേന്ദ്രത്തിലെത്താന്‍ ഇത് ഉപകാരപ്പെടും. 

ജില്ലയിലെ പൊതുസ്ഥലങ്ങളിലെയും ബസ്സ്‌സ്റ്റാന്റുകളിലെയും സര്‍ക്കാര്‍ ഓഫീസ് കോമ്പൗണ്ടുകളിലെയും എല്ലാ പരസ്യങ്ങളും മാര്‍ച്ച് 21നകം നീക്കം ചെയ്യാന്‍ ജില്ലാ തെരഞ്ഞെടുപ്പ് ഓഫീസര്‍ കൂടിയായ ജില്ലാ കലക്ടര്‍ മീര്‍ മുഹമ്മദലി നിര്‍ദ്ദേശം നല്‍കി. തെരഞ്ഞെടുപ്പ് പെരുമാറ്റച്ചട്ടം കര്‍ശനമായി നടപ്പിലാക്കുന്നതിന്റെ ഭാഗമായാണ് ഈ നടപടി. കലക്ടറുടെ ചേമ്പറില്‍ ചേര്‍ന്ന തെരഞ്ഞെടുപ്പ് ഉദ്യോഗസ്ഥരുടെ യോഗത്തിലാണ് കലക്ടര്‍ ഈ നിര്‍ദേശം നല്‍കിയത്. 

പരീക്ഷാഭവൻ മെയ് 16 മുതൽ 23 വരെ നടത്തുന്ന എൽ.പി/യു.പി. അറബിക്/ഉറുദു/സംസ്‌കൃതം ഭാഷാദ്ധ്യാപക യോഗ്യതാപരീക്ഷയ്ക്ക് ലഭിച്ച അപേക്ഷകളിൽ അപാകത കണ്ടെത്തിയിട്ടുള്ളവരുടെ ലിസ്റ്റ് പരീക്ഷാഭവന്റെ www.keralapareekshabhvan.in എന്ന ഔദ്യോഗിക വെബ്‌സൈറ്റിൽ പ്രസിദ്ധപ്പെടുത്തി. അപാകതകൾ പരിഹരിക്കാനാവശ്യമായ രേഖകൾ പരീക്ഷാകേന്ദ്രം മുഖേന ഏപ്രിൽ 10 വൈകിട്ട് അഞ്ചിനു മുമ്പായി പരീക്ഷാഭവനിൽ ലഭ്യമാക്കണമെന്ന് പരീക്ഷാസെക്രട്ടറി അറിയിച്ചു.

പി.എൻ.എക്സ്. 956/19