ഇന്‍സ്റ്റിറ്റ്യൂട്ട് ഓഫ് മാനേജ്‌മെന്റ് ഇന്‍ ഗവണ്‍മെന്റിന്റെ (IMG)ആഭിമുഖ്യത്തില്‍ വിവരാവകാശ നിയമം 2005, സംബന്ധിച്ച സൗജന്യ ഓണ്‍ലൈന്‍ കോഴ്‌സിലേക്ക്  ഡിസംബര്‍ 27 വരെ രജിസ്റ്റര്‍ ചെയ്യാം.  തിരഞ്ഞെടുക്കപ്പെടുന്ന വ്യക്തികളെ ഇ-മെയില്‍ മുഖാന്തിരം അറിയിക്കും.  കൂടുതല്‍ വിവരങ്ങള്‍ക്ക് http://rti.img.kerala.gov.inഎന്ന വെബ്‌സൈറ്റ് സന്ദര്‍ശിക്കുകയോ 8281064199 എന്ന നമ്പറില്‍ ബന്ധപ്പെടുകയോ ചെയ്യണം.

പി.എന്‍.എക്‌സ്.5455/17

കേരള നിയമസഭയുടെ ആരോഗ്യവും കുടുംബക്ഷേമവും സംബന്ധിച്ച സബ്ജക്ട് കമ്മിറ്റി ഡിസംബര്‍ 26ന് രാവിലെ 10 മുതല്‍ 11 വരെ നിയമസഭാ സമുച്ചയത്തിലെ 5 ഡി കോണ്‍ഫറന്‍സ് ഹാളില്‍ സമിതിയുടെ പരിഗണനയിലുളള കേരള ക്ലിനിക്കല്‍ സ്ഥാപനങ്ങള്‍ (രജിസ്‌ട്രേഷനും നിയന്ത്രണവും) ബില്‍, 2017 സംബന്ധിച്ച് വ്യക്തികളില്‍ നിന്നും സംഘടനകളില്‍ നിന്നും ഹര്‍ജികളും നിവേദനങ്ങളും സ്വീകരിക്കും. ഹര്‍ജികളും നിവേദനങ്ങളും നല്‍കാനാഗ്രഹിക്കുന്ന വ്യക്തികളും സംഘടനകളും അവ സമിതി ചെയര്‍പേഴ്‌സനെ അഭിസംബോധന ചെയ്ത് നല്‍കണം.

പി.എന്‍.എക്‌സ്.5454/17

സംസ്ഥാന യുവജനക്ഷേമ ബോര്‍ഡ് യുവസംരംഭകര്‍ക്കായി നടത്തുന്ന കീ സമ്മിറ്റ് 2018 ശില്പശാലയുടെ ലോഗോയും വെബ്‌സൈറ്റും നിയമസഭാ സ്പീക്കര്‍ പി. ശ്രീരാമകൃഷ്ണന്‍ പ്രകാശനം ചെയ്തു.  

18നും 40നുമിടയില്‍ പ്രായമുളള യുവതീ യുവാക്കളില്‍ നിന്ന് തെരഞ്ഞെ ടുക്കപ്പെടുന്നവര്‍ക്കാണ് ജനുവരി 17, 18 തീയതികളില്‍ ടാഗോര്‍ തിയേറ്ററില്‍ നടക്കുന്ന ശില്പശാലയില്‍ പങ്കെടുക്കാന്‍ കഴിയുക.  സംസ്ഥാനത്തെ നവീനാശയങ്ങളുളള യുവാക്കള്‍ക്ക് സംരംഭക സ്വപ്നങ്ങള്‍ യഥാര്‍ത്ഥ്യമാക്കാനുളള പശ്ചാത്തലം ഒരുക്കുകയാണ്  ശില്പശാലയുടെ പ്രധാന ലക്ഷ്യം. 

ദുരന്ത നിവാരണ പ്രവര്‍ത്തനങ്ങളില്‍ സര്‍ക്കാരിനെ സഹായിക്കാന്‍ തയ്യാറുള്ള സന്നദ്ധ സ്ഥാപനങ്ങള്‍ സംഘടനകള്‍ എന്നിവയില്‍ നിന്ന് സര്‍ക്കാര്‍ അപേക്ഷ ക്ഷണിച്ചു. മുന്‍ പരിചയമുള്ളവര്‍ക്ക് മുന്‍ഗണന. തെരെഞ്ഞെടുക്കുന്നവരെ ഉള്‍പ്പെടുത്തി സംസ്ഥാന ദുരന്ത നിവാരണ അതോറിറ്റി പാനല്‍ തയ്യാറാക്കും. ഓണ്‍ലൈനായി അപേക്ഷിക്കണം. www.sdma.gov.in എന്ന വെബ്‌സൈറ്റില്‍ വിശദാംശമുണ്ട്. അവസാന തീയതി ഡിസംബര്‍31.

പി.എന്‍.എക്‌സ്.5452/17

ബ്രയില്‍ ലിപിയുടെ ഉപജ്ഞാതാവ് ലൂയിബ്രയിലിന്റെ 208 ാമത് ജന്മദിനത്തോടനുബന്ധിച്ച് 'വൈജ്ഞാനിക പ്രദര്‍ശനം 2018' പൊതുജനങ്ങള്‍ക്കും വിദ്യര്‍ത്ഥികള്‍ക്കുമായി പ്രദര്‍ശനം ജനുവരി നാലിന് തൈക്കാട് കാഴ്ചപരിമിതിയുള്ളവര്‍ക്ക് വേണ്ടിയുള്ള സര്‍ക്കാര്‍ സ്‌കൂള്‍ അങ്കണത്തില്‍ നടക്കും.

സംസ്ഥാനത്തെ സര്‍ക്കാര്‍ ഓഫീസുകളില്‍ വിവിധ ആവശ്യങ്ങള്‍ക്കായെത്തുന്ന ശാരീരികാവശതയുള്ള മുതിര്‍ന്ന പൗരന്മാര്‍ക്ക് പ്രത്യേക പരിഗണന നല്‍കുന്നതിന് വകുപ്പ് മേധാവികളും ഓഫീസ് തലവന്‍മാരും നടപടി സ്വീകരിക്കണമെന്ന് സര്‍ക്കാര്‍ നിര്‍ദേശിച്ചു. വീഴ്ച വരുത്തുന്നവര്‍ക്കെതിരെ കര്‍ശന അച്ചടക്ക നടപടി സ്വീകരിക്കണമെന്നും പൊതുഭരണ വകുപ്പ് പ്രിന്‍സിപ്പല്‍ സെക്രട്ടറിയുടെ സര്‍ക്കുലറില്‍ വ്യക്തമാക്കി.

പി.എന്‍.എക്‌സ്.5449/17

വൈദ്യുതിനിരക്ക് നിര്‍ണയിക്കുന്നതുമായി ബന്ധപ്പെട്ട് പ്രസിദ്ധീകരിച്ച വൈദ്യുതി താരിഫ് റഗുലേഷന്‍ 2017 കരട് സംബന്ധിച്ച് വൈദ്യുതി റഗുലേറ്ററി കമ്മീഷന്‍ പൊതുജനങ്ങളുടെ അഭിപ്രായങ്ങളും നിര്‍ദേശങ്ങളും ക്ഷണിച്ചു.

2018 ജനുവരി ഒന്നിന് വൈകിട്ട് അഞ്ച് മണിവരെ സെക്രട്ടറി, സംസ്ഥാന വൈദ്യുതി റെഗുലേറ്ററി കമ്മീഷന്‍, കെ.പി.എഫ്.സി ഭവനം, സി.വി രാമന്‍പിള്ള റോഡ്, തിരുവനന്തപുരം എന്ന വിലാസത്തില്‍ സമര്‍പ്പിക്കാം. കരട് റെഗുലേഷന്റെ പൂര്‍ണ്ണരൂപം കമ്മീഷന്റെ വെബ്‌സൈറ്റില്‍ (www.erckerala.org) ലഭ്യമാണ്.

കൈത്തറി വസ്ത്ര ഡയറക്ടറേറ്റിന്റെ ആഭിമുഖ്യത്തില്‍ ഡിസംബര്‍ 23 വരെ വികാസ് ഭവനില്‍ കൈത്തറി വസ്ത്രങ്ങളുടെ പ്രദര്‍ശനവും വില്‍പനയും സംഘടിപ്പിക്കും.  പ്രസിദ്ധമായ കാസര്‍കോഡ് സാരികള്‍, കണ്ണൂര്‍ ഫര്‍ണിഷിംഗ് ഉത്പന്നങ്ങള്‍, കൂത്താമ്പുളളി, ചേന്ദമംഗലം, ബാലരാമപുരം സാരികള്‍, സെറ്റുമുണ്ടുകള്‍, ബാഗുകള്‍, മെയ്ഡ്അപ്‌സ്, കര്‍ട്ടനുകള്‍, റെഡിമെയ്ഡുകള്‍ തുടങ്ങി വൈവിധ്യമാര്‍ന്നതും, ഗുണമേന്മയുളളതുമായ ഉത്പന്നങ്ങള്‍ ലഭിക്കും.  കൈത്തറി ഉത്പനന്നങ്ങള്‍ക്ക് 20 ശതമാനം സര്‍ക്കാര്‍ റിബേറ്റ് ലഭിക്കും.

പി.എന്‍.എക്‌സ്.5447/17

മാധ്യമങ്ങളിലെ പങ്കാളിത്ത പെന്‍ഷന്‍ പദ്ധതിയില്‍ വരുന്ന പത്രപ്രവര്‍ത്തകേതര ജീവനക്കാരുടെ പെന്‍ഷന്‍ ആയിരം രൂപ വര്‍ദ്ധിപ്പിച്ച് സര്‍ക്കാര്‍ ഉത്തരവായി.  ഇതോടെ പെന്‍ഷന്‍ തുക 6,000 രൂപയായി.  2017 ഏപ്രില്‍ ഒന്നു മുതല്‍ മുന്‍കാല പ്രാബല്യത്തോടെയാണ് ഉത്തരവ്.

പി.എന്‍.എക്‌സ്.5446/17

സംസ്ഥാനത്തെ എല്ലാ ജില്ലകളിലും സാംസ്‌കാരിക സമുച്ചയങ്ങള്‍ നിര്‍മ്മിക്കുന്നതിനും ചിത്രാഞ്ജലി സ്റ്റുഡിയോ ഫിലിം സിറ്റിയായി വികസിപ്പിക്കുന്നതിനും വിവിധോപയോഗ ഫിലിം ഫെസ്റ്റിവല്‍ കോംപ്ലക്‌സ് നിര്‍മ്മിക്കുന്നതിനുമുള്ള വിശദ പദ്ധതി റിപ്പോര്‍ട്ട് തയ്യാറാക്കുന്നതിനും പദ്ധതി നിര്‍വഹണത്തില്‍ തീരുമാനമെടുക്കുന്നതിനുമായി വിദഗ്ധ കമ്മിറ്റി രൂപീകരിച്ച് സര്‍ക്കാര്‍ ഉത്തരവായി.