പത്താംതരം - പ്ലസ് റ്റു തുല്യതാ പഠനത്തിന് ജില്ലയില്‍ നിന്നും കൂടുതല്‍ പേരെ ഉള്‍പ്പെടുത്തുന്നതിനുള്ള പ്രചാരണ പ്രവര്‍ത്തനങ്ങള്‍ തുടങ്ങി. പറളിയില്‍ നടന്ന പരിപാടിയില്‍ ജില്ലാ പഞ്ചായത്ത് വൈസ് പ്രസിഡന്‍റ് റ്റി.കെ.നാരായണദാസ് ഉദ്ഘാടനം ചെയ്തു. സെല്‍മത്ത്, മീനാകുമാരി, ഓമന എന്നിവര്‍ക്ക് ഹയര്‍സെക്കന്‍ഡറി രജിസ്ട്രേഷന്‍ അപേക്ഷാഫോമും കാജാഹുസൈന്‍, മുജീബ് എന്നിവര്‍ക്ക് പത്താംതരം രജിസ്ട്രേഷന്‍ ഫോമും കൈമാറി.ഹയര്‍ സെക്കന്‍ഡറിക്ക് ഹുമാനിറ്റീസ്, കൊമേഴ്സ് വിഷയങ്ങളാണ് പഠിപ്പിക്കുക. പത്താം ക്ലാസ് ജയിച്ച് പ്ലസ് റ്റു തോറ്റവര്‍ക്ക് രജിസ്റ്റര്‍ ചെയ്യാം.

പകര്‍ച്ചപ്പനി പടരുന്ന സാഹചര്യത്തില്‍ ജലം മലിനമാക്കാതിരിക്കാന്‍ വ്യാപകമായ ബോധവല്‍ക്കരണം നടത്തണമെന്ന് കെ.വി.അബ്ദുള്‍ ഖാദര്‍ എം.എല്‍.എ ജില്ലാ വികസന സമിതിയില്‍ പ്രമേയത്തിലൂടെ ആവശ്യപ്പെട്ടു. ജലാശയങ്ങളിലും തോടുകളിലും മാലിന്യം തളളുന്നവര്‍ക്കെതിരെ കര്‍ശന നടപടി എടുക്കണം. ഇത്തരക്കാരെ പോലീസ് നിരീക്ഷിക്കുകയും ഇവര്‍ക്ക് ബോധവല്‍ക്കരണം നല്‍ക്കുകയും വേണം. പൊതുജനങ്ങള്‍ ജലാശയങ്ങള്‍ മലിനമാക്കുന്നവര്‍ക്കെതിരെ ജാഗ്രത പാലിക്കണമെന്നും എം.എല്‍.എ ആവശ്യപ്പെട്ടു. അദാലത്തില്‍ പിഴ അടച്ച് തീര്‍പ്പാക്കിയ കേസുകളില്‍ അപേക്ഷകരുടെ ആധാരം നല്‍കാന്‍ ജില്ലാ ബാങ്ക് കാലതാമസം കാണിക്കരുതെന്നും അദ്ദേഹം പറഞ്ഞു.

പകര്‍ച്ചപ്പനി പ്രതിരോധ പ്രവര്‍ത്തനങ്ങളുടെ ഭാഗമായി ഈ മാസം 27 മുതല്‍ 29 വരെ സംസ്ഥാനത്തൊട്ടാകെ നടക്കുന്ന ശുചീകരണ യജ്ഞം നാടിന്റെ ഉത്തരവാദിത്വമായി കണ്ട് ജില്ലയില്‍ എല്ലാ വിഭാഗം ആളുകളും പങ്കുചേരണമെന്ന് വനം, പരിസ്ഥിതി വകുപ്പ് മന്ത്രി കെ രാജു നിര്‍ദേശിച്ചു. കൊല്ലം കളക്‌ട്രേറ്റ് കോണ്‍ഫറന്‍സ് ഹാളില്‍ പകര്‍പ്പനി നിയന്ത്രണവുമായി ബന്ധപ്പെട്ട അടിയന്തിര യോഗത്തില്‍ അധ്യക്ഷത വഹിച്ചു സംസാരിക്കുകയായിരുന്നു അദ്ദേഹം. ശുചീകരണത്തില്‍ ഇതുവരെ കുറവുകള്‍ സംഭവിച്ചിട്ടുണ്ടെങ്കില്‍ അവ പരഹരിക്കാന്‍ കഴിയുംവിധം ആത്മാര്‍ത്ഥമായ പ്രവര്‍ത്തനം യജ്ഞത്തിന്റെ ഭാഗമായി നടത്തേണ്ടതുണ്ട്.

മെഡിക്കല്‍ വിദ്യാഭ്യാസ വകുപ്പിന് കീഴിലുള്ള കോഴിക്കോട്, മഞ്ചേരി മെഡിക്കല്‍ കോളേജുകളില്‍ വ്യവസ്ഥ ലംഘിച്ച് ജോലിയില്‍ പ്രവേശിക്കാതിരുന്ന ജൂനിയര്‍ റെസിഡന്റ്, സീനിയര്‍ റെസിഡന്റ് ഡോക്ടര്‍മാര്‍ക്കെതിരെ റവന്യു റിക്കവറി നടപടികള്‍ ആരംഭിച്ചു. വീഴ്ച വരുത്തിയ ഡോക്ടര്‍മാരുടെ പട്ടിക ജില്ലാ കളക്ടര്‍മാര്‍ക്ക് നല്‍കിയിട്ടുണ്ട്. പി. ജി കോഴ്‌സ് പ്രോസ്‌പെക്ടസിലെ വ്യവസ്ഥകള്‍ പാലിക്കാതെയിരുന്നാല്‍ ബോണ്ടു തുകയും സ്‌റ്റൈപ്പന്റും തിരിച്ചടയ്ക്കാമെന്ന് പഠന കാലയളവില്‍ സര്‍ക്കാരുമായി സമ്മതപത്രം ഒപ്പിട്ടിരുന്നു. നിയമനം ലഭിച്ചിട്ടും വ്യവസ്ഥ അനുസരിച്ച് ജോലിയില്‍ പ്രവേശിക്കാതിരുന്നതിനെ തുടര്‍ന്നാണ് നടപടി.

ജില്ലയിലെ വിവിധ ഗവണ്‍മെന്റ്‌ ഓഫീസുകളിലെ കമ്പ്യൂട്ടറുകളില്‍ റാന്‍സംവെയര്‍ വൈറസ്‌ ആക്രമണ സാധ്യതയെ പ്രതിരോധിക്കുന്നതിനായി ജില്ലാ -താലൂക്ക്‌ തലങ്ങളില്‍ സഹായ കേന്ദ്രങ്ങള്‍ ആരംഭിച്ചു. ജില്ലാഭരണകൂടം, നാഷണല്‍ ഇന്‍ഫര്‍മാറ്റിക്‌സ്‌ സെന്റര്‍, കേരള സ്റ്റേറ്റ്‌ ഐ.ടിമിഷന്‍ എന്നിവരുടെ നേതൃത്വത്തിലാണ്‌ ഹെല്‍പ്‌ഡെസ്‌കിന്റെ പ്രവര്‍ത്തനം. ജില്ലയിലെ ഗവണ്‍മെന്റ്‌ ഓഫീസുകള്‍ ഹെല്‍പ്‌ഡെസ്‌കുമായി ബന്ധപ്പെട്ട്‌ വൈറസ്‌ പ്രതിരോധ പ്രവര്‍ത്തനങ്ങള്‍ ഊര്‍ജ്ജിതമാക്കണമെന്ന്‌ ജില്ലാകലക്‌ടര്‍ അറിയിച്ചു. ഹെല്‍പ്‌ഡെസ്‌കിന്റെ പൂര്‍ണ്ണ വിവരങ്ങളും മറ്റു നിര്‍ദ്ദേശങ്ങളും www.idukki.gov.in എന്ന ജില്ലാ വെബ്‌സൈറ്റില്‍ ലഭ്യമാണ്‌.

കയർ ജിയോ ടെക്‌സ്റ്റയിൽസ് സ്‌കൂളിന് തുടക്കം - 1000 യൂണിറ്റ് ആരംഭിക്കും - തൊഴിലുറപ്പിലൂടെ 100 കോടി രൂപയുടെ കയർ ഭൂവസ്ത്രം ഉപയോഗിക്കും ആലപ്പുഴ: കുടുംബശ്രീവഴി എല്ലാ പഞ്ചായത്തുകളിലും തൊണ്ടുതല്ലൽ യൂണിറ്റുകൾ ആരംഭിക്കുമെന്ന് ധനകാര്യ-കയർ വകുപ്പു മന്ത്രി ഡോ. റ്റി.എം. തോമസ് ഐസക് പറഞ്ഞു. കയർ വികസന വകുപ്പ് ആലപ്പുഴയിൽ ആരംഭിച്ച കയർ ജിയോടെക്‌സ്റ്റയിൽസ് സ്‌കൂളിന്റെ ഉദ്ഘാടനം നിർവഹിച്ചു പ്രസംഗിക്കുകയായിരുന്നു അദ്ദേഹം. കുടുംബശ്രീവഴി 1000 തൊണ്ടുതല്ലൽ കേന്ദ്രങ്ങൾ ആരംഭിക്കും. അതിനുള്ള യന്ത്രങ്ങൾ നിർമിക്കാനുള്ള ഓർഡർ കയർ യന്ത്രനിർമാണ ഫാക്ടറിക്ക് നൽകിക്കഴിഞ്ഞു. യന്ത്രം സൗജന്യമായി നൽകും.