ക്രിസ്തുമസ് - ന്യൂ ഇയര്‍ ആഘോഷത്തിന്റെ ഭാഗമായി സപ്ലൈകോ സംഘടിപ്പിക്കുന്ന ക്രിസ്തുമസ് ന്യൂ ഇയര്‍ ഫെയര്‍ ഡിസംബര്‍ 21 ന് തുടങ്ങും. സബ്സിഡി സാധനങ്ങള്‍ക്ക് പുറമെ സബ്സിഡിയിതര സാധനങ്ങള്‍ക്കും വിലക്കിഴിവുണ്ട്. രാവിലെ 11 ന് എം നൗഷാദ്, എം എല്‍ എ ഉദ്ഘാടനം ചെയ്യും. മേയര്‍ പ്രസന്ന ഏണസ്റ്റ് അധ്യക്ഷയാകും. എന്‍ കെ പ്രേമചന്ദ്രന്‍, എം പി ജില്ലാ പഞ്ചായത്ത് പ്രസിഡന്റ് പി കെ ഗോപന്‍ ഡെപ്യൂട്ടി മേയര്‍ കൊല്ലം മധു, ജില്ലാ പഞ്ചായത്ത് വൈസ് പ്രസിഡന്റ് ശ്രീജ ഹരീഷ്, ഡിവിഷന്‍ കൗണ്‍സിലര്‍ എ കെ സവാദ് എന്നിവര്‍ പങ്കെടുക്കും.  

ചവറ നിയോജകമണ്ഡലത്തിലെ നവകേരള സദസ്സില്‍ 5049 നിവേദനങ്ങള്‍ ലഭിച്ചു. ആകെ 21 കൗണ്ടറുകളാണ് സജ്ജീകരിച്ചിരുന്നത്. ഭിന്നശേഷിക്കാര്‍ക്ക് ഒരു കൗണ്ടറും മുതിര്‍ന്ന പൗര•ാര്‍ക്ക് രണ്ടും സ്ത്രീകള്‍ക്കായി ഏഴ് പ്രത്യേക കൗണ്ടറുകളും ഒരുക്കി. നിവേദനം സ്വീകരിക്കുന്നതിനായി പ്രത്യേകം പരിശീലനം നല്‍കിയാണ് ഉദ്യോഗസ്ഥരെയാണ് നിയമിച്ചത്. ലഭിച്ച നിവേദനങ്ങള്‍ ബന്ധപ്പെട്ട വകുപ്പുകള്‍ക്ക് കൈമാറി സമയബന്ധിതമായി നടപടികള്‍ സ്വീകരിക്കും.

നവ കേരളത്തിനെ ആവേശത്തോടെ വരവേറ്റ് ചവറ നിയോജക മണ്ഡലം. കെഎംഎംഎല്‍ ഗ്രൗണ്ടിലെ സദസില്‍ ആയിരങ്ങള്‍ പങ്കെടുത്തു. വിവിധ- സാംസ്‌കാരിക കലാപരിപാടികള്‍ അരങ്ങേറി. ചലച്ചിത്ര സംഗീതസംവിധായകനും പിന്നണിഗായകനുമായ ജാസി ഗിഫ്റ്റിന്റെ നേതൃത്വത്തില്‍ സംഘടിപ്പിച്ച സംഗീത പരിപാടി ആവേശമുയര്‍ത്തി.

കെഎംഎംഎല്‍ ഗ്രൗണ്ടില്‍ സംഘടിപ്പിച്ച ചവറ നിയോജകമണ്ഡലത്തിലെ നവകേരളസദസ്സില്‍ മുഖ്യമന്ത്രിക്ക് സ്‌നേഹ സമ്മാനം നല്‍കി കുഞ്ഞ് അര്‍ജുന്‍. മെറ്റല്‍ എന്‍ഗ്രേവിംഗ് വിദ്യയിലൂടെ വരച്ച മുഖ്യമന്ത്രിയുടെ ചിത്രമാണ് സമ്മാനിച്ചത്. ചവറ സ്വദേശികളായ അനൂപ്-അജന്ത ദമ്പതികളുടെ മകനായ അര്‍ജുന്‍ ശങ്കരമംഗലം ബോയ്‌സ് ഹയര്‍ സെക്കന്‍ഡറി സ്‌കൂളിലെ ആറാം ക്ലാസ്സ് വിദ്യാര്‍ത്ഥിയാണ്.

മുഖ്യമന്ത്രിയും മന്ത്രിമാരും കേരളത്തിലെ വിവിധ മണ്ഡലങ്ങളില്‍ പര്യടനംനടത്തുന്ന ബസിന്റെ ചെറുമാതൃകയാണ് പടിഞ്ഞാറെകല്ലട സ്വദേശിയായ രഞ്ജിത്ത് സമ്മാനിച്ചത്. ഫോംഷീറ്റ് ഉപയോഗിച്ച് ഒരാഴ്ച മാത്രമെടുത്തായിരുന്നു കലാവിരുത്.

ഒരു പ്രതിസന്ധിയിലും ഉലയാത്തതരത്തിലുള്ള വികസന-ക്ഷേമപ്രവര്‍ത്തനങ്ങളുമായി സംസ്ഥാന സര്‍ക്കാര്‍ മുന്നോട്ട് കുതിക്കുകയാണെന്ന് ഫിഷറീസ് വകുപ്പ് മന്ത്രി സജി ചെറിയാന്‍. കെ എം എം എല്‍ മൈതാനിയില്‍ ചവറ നിയോജകമണ്ഡലത്തിലെ നവകേരള സദസ്സില്‍ സംസാരിക്കുകയായിരുന്നു അദ്ദേഹം. സാമ്പത്തിക പ്രതിസന്ധിയുടെ കാലഘട്ടത്തിലും ക്ഷേമപെന്‍ഷന്‍ 1600 രൂപയിലേക്ക് ഉയര്‍ത്തി. സാമ്പത്തിക ആനുകൂല്യങ്ങള്‍ പലതും സംസ്ഥാനത്തിന് ലഭിക്കാത്ത ഘട്ടത്തില്‍ പോലും ഒരു ക്ഷേമ പ്രവര്‍ത്തനങ്ങള്‍ക്കും മുടക്കം വരുത്തിയിട്ടില്ല.

ഓരോ സാധാരണക്കാരുടെയും ക്ഷേമംമുന്‍നിര്‍ത്തിയുള്ള വികസനനയമാണ് സംസ്ഥാന സര്‍ക്കാരിനുള്ളതെന്ന് ഭക്ഷ്യ-പൊതുവിതരണ വകുപ്പ് മന്ത്രി ജി ആര്‍ അനില്‍. കെ എം എം എല്‍ മൈതാനിയില്‍ ചവറ മണ്ഡലം നവകേരള സദസ്സില്‍ സംസാരിക്കുയായിരുന്നു അദ്ദേഹം. അടിസ്ഥാന ആവശ്യമായ ഭക്ഷണം, പാര്‍പ്പിടം, ഭൂമി തുടങ്ങിയ സൗകര്യങ്ങള്‍ ലഭ്യമാക്കുകയുമാണ്.  

2016 മുതല്‍ ഇതുവരെ മൂന്നര ലക്ഷത്തിലധികം പട്ടയങ്ങള്‍ വിതരണം ചെയ്തു. കുറഞ്ഞ നിരക്കില്‍ ഭക്ഷ്യസാധനങ്ങള്‍ പൊതുവിതരണ ശൃംഖലകളിലൂടെ എത്തിക്കാനായി. ഓണം, ക്രിസ്മസ് തുടങ്ങിയ ഉത്സവനാളുകളില്‍ കുറഞ്ഞനിരക്കില്‍ ഭക്ഷ്യസാധനങ്ങള്‍ ലഭ്യമാക്കാന്‍ പ്രത്യേകചന്തകള്‍ സജ്ജീകരിച്ചു വരുന്നു.

പൊതുവിദ്യാലയങ്ങളില്‍ കഴിഞ്ഞ ഏഴര വര്‍ഷത്തിനുള്ളില്‍ പത്തര ലക്ഷം വിദ്യാര്‍ഥികള്‍ സര്‍ക്കാര്‍ സ്‌കൂളുകളില്‍ പുതിയതായി പ്രവേശനം നേടിയെന്ന് കായിക വകുപ്പ് മന്ത്രി വി അബ്ദുറഹ്മാന്‍. കെ എം എം എല്‍ മൈതാനിയില്‍ ചവറ നിയോജകമണ്ഡലം നവകേരള സദസ്സില്‍ സംസാരിക്കുകയായിരുന്നു അദ്ദേഹം. നിരവധി വിദ്യാഭ്യാസ പരിഷ്‌കരണങ്ങളാണ് പൊതുവിദ്യാഭ്യാസ രംഗത്ത് നടത്തിയത്. അക്കാദമിക നിലവാരം ഉയര്‍ത്തിയും അടിസ്ഥാനസൗകര്യങ്ങള്‍ ഒരുക്കിയും അടച്ചുപൂട്ടലിന്റെ വക്കിലെത്തിയ പൊതുവിദ്യാഭ്യാസരംഗത്തെ കൈപിടിച്ചുയര്‍ത്തി. കോവിഡ് കാലത്തും വിദ്യാര്‍ത്ഥികളുടെ വിദ്യാഭ്യാസത്തിന് മുടക്കം വരുത്തിയില്ല.

നാടിന്റെ ഭാവിക്കായി ജനങ്ങള്‍ ഐക്യത്തോടെ അണിനിരക്കുന്ന കാഴ്ചയാണ് ഓരോ നവകേരള സദസ്സിലുമെന്ന് മുഖ്യമന്ത്രി പിണറായി വിജയന്‍. കെ എം എം എല്‍ മൈതാനിയില്‍ ചവറ നിയോജകമണ്ഡലം നവകേരള സദസ് ഉദ്ഘാടനം ചെയ്യുകയായിരുന്നു അദ്ദേഹം. നാടിന്റെ പുരോഗതിക്ക് സഹായകരമാണ് ജനങ്ങളുടെയും നിലപാട്. ബഹിഷ്‌കരണ പ്രഖ്യാപനം തള്ളിയതുതന്നെയാണ് തെളിവ്. ഏത് പ്രതിസന്ധിയെയും അതിജീവിക്കാനുള്ള കരുത്താണ് ജനങ്ങള്‍ വിവിധ സദസുകളിലൂടെ പകരുന്നത്.

നവകേരള സദസ്സിന്റെ ഭാഗമായി കരുനാഗപ്പള്ളി മണ്ഡലത്തില്‍ സ്വീകരിച്ചത് 7768 നിവേദനങ്ങള്‍. ആകെ 21 കൗണ്ടറുകളാണ് സജ്ജീകരിച്ചത്. സംശയങ്ങള്‍ക്കും സേവനങ്ങള്‍ക്കുമായി പ്രത്യേക ഹെല്‍പ് ഡെസ്‌ക്കുമുണ്ടായിരുന്നു. ഭിന്നശേഷിക്കാര്‍, വയോജനങ്ങള്‍, സ്ത്രീകള്‍ എന്നിവര്‍ക്ക് മുന്‍ഗണന നല്‍കി. രാവിലെ ഏഴ് മുതല്‍ കൗണ്ടറുകളില്‍ പരാതികള്‍ സ്വീകരിച്ചു തുടങ്ങി. മുഖ്യമന്ത്രി വേദി വിട്ടുപോയതിന് ശേഷവും നിവേദനങ്ങള്‍ സ്വീകരിച്ചു. നിവേദനങ്ങള്‍ പരിശോധിച്ച് തുടര്‍നടപടികള്‍ക്കായി ജില്ലതല മേധാവികള്‍ക്ക് പോര്‍ട്ടലിലൂടെ നല്‍കും.

ജനകീയ സര്‍ക്കാരിനെ ഹൃദ്യമായി വരവേറ്റ് കരുനാഗപ്പള്ളി മണ്ഡലം. ജനനായകരെ കാണാന്‍ എച്ച് ആന്‍ഡ് ജെ മാള്‍ മൈതാനത്ത് ആയിരങ്ങളെത്തി. ശാസ്ത്രീയ സംഗീതം, സംഘനൃത്തം, സംഘഗാനം തുടങ്ങിയ കലാപരിപാടികള്‍ ആസ്വദിക്കാനും അവസരമൊരുക്കിയിരുന്നു. വാദ്യമേളങ്ങളുടെ അകമ്പടിയോടെയാണ് മന്ത്രിസഭയെ എതിരേറ്റത്.