കണ്ണൂരുകാര്‍ക്ക് രാമശ്ശേരി ഇഡ്ഡലിയുടെ രുചി ആസ്വദിക്കാനുള്ള അവസരം വീണ്ടുമൊരുക്കി കെ ടി ഡി സി ലൂംലാന്‍ഡ് ഹോട്ടല്‍. ഇഡ്ഡലി മേളയുടെ രണ്ടാം സീസണ്‍ രാമചന്ദ്രന്‍ കടന്നപ്പള്ളി എം എല്‍ എ ഉദ്ഘാടനം ചെയ്തു. കെ വി സുമേഷ് എം എല്‍ എ അധ്യക്ഷനായി. കേരള വിഷന്‍ ചാനല്‍ എം ഡി പ്രജേഷ് അച്ചാണ്ടി മുഖ്യാതിഥിയായി. കെ ടി ഡി സി ബോര്‍ഡ് അംഗങ്ങളായ ഒ കെ വാസു മാസ്റ്റര്‍, യു ബാബു ഗോപിനാഥ്, ലൂംലാന്‍ഡ് ഹോട്ടല്‍ മാനേജര്‍ സുര്‍ജിത് ഉണ്ണികൃഷ്ണന്‍ തുടങ്ങിയവര്‍ സംസാരിച്ചു. ഡിസംബര്‍ 21 മുതല്‍ 27 വരെ വൈകുന്നേരം 3 മണി മുതല്‍ 10 മണി വരെയാണ് ഇഡ്ഡലി മേള ഉണ്ടാകുക.

ക്രിസ്തുമസ് പുതുവത്സര ആഘോഷങ്ങളുടെ ഭാഗമായി ശിശുസംരക്ഷണ സ്ഥാപനങ്ങളിലെ കുട്ടികള്‍ക്കായി സമ്മാനവിതരണം നടത്തുന്നു. ജില്ലാ ഭരണകൂടത്തിന്റെ നേതൃത്വത്തില്‍ കെയറിങ് കരോള്‍സ് എന്ന പേരിലാണ് പരിപാടി സംഘടിപ്പിക്കുന്നത്. ജില്ലയിലെ 21 ശിശു സംരക്ഷണ സ്ഥാപനങ്ങളിലെ കുട്ടികള്‍ക്ക് വസ്ത്രം, പുസ്തകം, പേന, കളിപ്പാട്ടം തുടങ്ങിയ സമ്മാനങ്ങളാണ് നല്‍കാനുദ്ദേശിക്കുന്നത്. താല്പര്യമുള്ളവര്‍ക്ക് സമ്മാനങ്ങള്‍ നേരിട്ടോ അല്ലാതെയോ ഡിസംബര്‍ 30 ന് മുമ്പായി കലക്ടറേറ്റില്‍ എത്തിക്കാം. ഓണ്‍ലൈനായി ഓര്‍ഡര്‍ ചെയ്തും സമ്മാനങ്ങള്‍ നല്‍കാവുന്നതാണ്. സമ്മാനങ്ങള്‍ അയക്കേണ്ട വിലാസം: കലക്ടറേറ്, സിവില്‍ സ്റ്റേഷന്‍ കണ്ണൂര്‍

'നീരുറവ്' നീര്‍ത്തടധിഷ്ഠിത സമഗ്ര വികസന പദ്ധതിയുടെ ഭാഗമായി മാലൂരില്‍ ജലസംരക്ഷണ പ്രവര്‍ത്തനങ്ങള്‍ക്ക് തുടക്കമായി. മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയില്‍ ഉള്‍പ്പെടുത്തി താല്‍ക്കാലിക തടയണകള്‍ നിര്‍മ്മിക്കുന്നതിന്റെ പഞ്ചായത്ത് തല ഉദ്ഘാടനം പ്രസിഡണ്ട് വി ഹൈമാവതി നിര്‍വഹിച്ചു. വൈസ് പ്രസിഡണ്ട് ചമ്പാടന്‍ ജനാര്‍ദ്ദനന്‍ അധ്യക്ഷനായി.

സംസ്ഥാന ഭൂജല അതോറിറ്റിയുടെ പ്ലാന്‍ ഫണ്ടിലുള്‍പ്പെടുത്തി ഭൂജല വകുപ്പ് സംഘടിപ്പിച്ച ബോധവല്‍ക്കരണ സെമിനാര്‍ ഇരിട്ടി ബ്ലോക്ക് പഞ്ചായത്ത് പ്രസിഡണ്ട് കെ വേലായുധന്‍ ഉദ്ഘാടനം ചെയ്തു. ഇരിട്ടി ബ്ലോക്ക് പഞ്ചായത്ത് ഓഡിറ്റോറിയത്തില്‍ നടന്ന ചടങ്ങില്‍ വൈസ് പ്രസിഡണ്ട് നജീദ സാദിഖ് അധ്യക്ഷത വഹിച്ചു.

ഹാപ്പിനെസ്സ് ഫെസ്റ്റിവലിനോടനുബന്ധിച്ച് സംഘടിപ്പിക്കുന്ന നാടകോത്സവത്തിന്റെ ഉദ്ഘാടനം ഡിസംബര്‍ 21ന് വൈകിട്ട് ആറ് മണിക്ക് പ്രസിദ്ധ സിനിമാതാരവും  എം എൽ എ യുമായ  മുകേഷ് നിര്‍വഹിക്കും. എം വി ഗോവിന്ദന്‍ മാസ്റ്റര്‍ എം എല്‍ എ അധ്യക്ഷത വഹിക്കും. 21, 22 തീയതികളിലായി ധര്‍മശാലയിലെ ഗവ എന്‍ജിനീയറിങ് കോളേജ് ഓഡിറ്റോറിയത്തിലാണ് നാടകോത്സവം നടക്കുന്നത്. സമാപന ഉദ്ഘാടനം 22ന് വൈകിട്ട് ആറ് മണിക്ക് സംഗീത നാടക അക്കാദമി സെക്രട്ടറി കരിവെള്ളൂര്‍ മുരളി നിര്‍വഹിക്കും.

പയ്യന്നൂർ - തലശ്ശേരി ദേശീയ പാതയിലെ കണ്ണപുരം -കണ്ണൂർ ഭാഗം, കണ്ണൂർ മുഴപ്പിലങ്ങാട് ഭാഗം ,തലശ്ശേരി കൂത്തുപറമ്പ് റോഡ്, കണ്ണൂർ - മട്ടന്നൂർ എയർപോർട്ട് റോഡ് എന്നിവിടങ്ങളിൽ വ്യാപകമായി റോഡപകടങ്ങളും മരണങ്ങളും ഉണ്ടാവുന്ന സാഹചര്യത്തിൽ വിദഗ്ധ സമിതിയെ കൊണ്ട് പരിശോധന നടത്തണമെന്ന് ജില്ലാ റോഡ് സുരക്ഷാ സമിതിയിൽ നിർദ്ദേശം. സമിതി അംഗവും സിറ്റി കമ്മീഷണറുമായ അജിത് കുമാറാണ് നിർദ്ദേശമുന്നയിച്ചത്. കഴിഞ്ഞ ഒരു കൊല്ലത്തിനിടെ അപകടങ്ങളും അപകടമരണങ്ങളും ഈ ഭാഗങ്ങളിൽ പതിവായ സാഹചര്യത്തിലാണീ നിർദേശം.

ഇടുക്കി, കണ്ണൂര്‍ സിറ്റി, കണ്ണൂര്‍ റൂറല്‍ എന്നീ ജില്ലകളിലെ പൊലീസ് ഉദ്യോഗസ്ഥരുടെയും വിരമിച്ച ഉദ്യോഗസ്ഥരുടെയും സര്‍വീസ് സംബന്ധമായ പരാതികളില്‍ പരിഹാരം കാണുന്നതിനായി സംസ്ഥാന പൊലീസ് മേധാവി ഡോ.ഷെയ്ഖ് ദര്‍വേഷ് സാഹിബ് ജനുവരി 10ന് ഓണ്‍ലൈന്‍ അദാലത്ത് നടത്തും. പരാതികള്‍ ലഭിക്കേണ്ട അവസാന തീയതി ഡിസംബര്‍ 26.
പരാതികള്‍ spctalks.pol@kerala.gov.in എന്ന ഇ മെയിലില്‍ അയക്കണം. പരാതിയില്‍ മൊബൈല്‍ നമ്പര്‍ ഉള്‍പ്പെടുത്തണം. ഹെല്‍പ്പ് ലൈന്‍ നമ്പര്‍: 9497900243.

2018 മെയ് വരെയുള്ള കാലയളവില്‍ നടന്ന അഖിലേന്ത്യാ അപ്രന്റിസ്ഷിപ്പ് ട്രേഡ് ടെസ്റ്റില്‍ പങ്കെടുത്ത് വിജയിച്ച ട്രെയിനികളില്‍ നാഷണല്‍ അപ്രന്റിസ്ഷിപ് സര്‍ട്ടിഫിക്കറ്റും പ്രൊവിഷണല്‍ നാഷണല്‍ അപ്രന്റിസ്ഷിപ് സര്‍ട്ടിഫിക്കറ്റും ഇതുവരെ കൈപ്പറ്റാത്തവര്‍ ജനുവരി 31നകം ഐ ഡി കാര്‍ഡ് ഉള്‍പ്പെടെ ആവശ്യമായ രേഖകള്‍ സഹിതം നേരിട്ട് ഹാജരായി കണ്ണൂര്‍ ആര്‍ ഐ സെന്ററില്‍ നിന്നും സര്‍ട്ടിഫിക്കറ്റ് കൈപ്പറ്റേണ്ടതാണ്. നിശ്ചിത തീയതിക്കകം സര്‍ട്ടിഫിക്കറ്റുകള്‍ കൈപ്പറ്റിയില്ലെങ്കില്‍ തിരിച്ചയക്കാനുള്ള നടപടി സ്വീകരിക്കുമെന്ന് അസിസ്റ്റന്റ് അപ്രന്റിസ്ഷിപ്പ് അഡ്വൈസർ അറിയിച്ചു.  ഫോണ്‍: 0497 2704588.

ജില്ലയില്‍ ആരോഗ്യ വകുപ്പിന് കീഴിലുള്ള സ്ഥാപനങ്ങളില്‍ നിലവിലുള്ളതും വരാനിരിക്കുന്നതുമായ ഒഴിവുകളിലേക്ക് അഡ്ഹോക് വ്യവസ്ഥയില്‍ താല്‍ക്കാലിക ഡോക്ടര്‍മാരെ നിയമിക്കുന്നതിന് വാക് ഇന്‍ ഇന്റര്‍വ്യൂ നടത്തുന്നു. യോഗ്യത: എം ബി ബി എസ്, ടി സി എം സി രജിസ്ട്രേഷന്‍. താല്‍പര്യമുള്ളവര്‍ വിദ്യാഭ്യാസ യോഗ്യത തെളിയിക്കുന്ന സര്‍ട്ടിഫിക്കറ്റുകളുടെ അസ്സലും പകര്‍പ്പും ബയോഡാറ്റയും സഹിതം ഡിസംബര്‍ 29ന് രാവിലെ 10.30ന് മുമ്പ് കണ്ണൂര്‍ ജില്ലാ മെഡിക്കല്‍ ഓഫീസില്‍(ആരോഗ്യം) ഹാജരാകണം.

സംസ്ഥാന യുവജന കമ്മീഷന്റെ ആഭിമുഖ്യത്തില്‍ യുവകര്‍ഷകര്‍ക്കായി ദ്വിദിനസംഗമം സംഘടിപ്പിക്കുന്നു.    ജനുവരി 6,7 തീയതികളില്‍ ആലപ്പുഴ കലവൂര്‍ ആര്യാട് ബ്ലോക്ക് പഞ്ചായത്ത് ഹാളിലാണ് പരിപാടി. 18 നും 40 ഇടയില്‍ പ്രായമുള്ള യുവ കര്‍ഷകര്‍ക്കും കൃഷിയില്‍ താല്‍പര്യം ഉള്ളവര്‍ക്കും പങ്കെടുക്കാം. താല്‍പര്യമുള്ളവര്‍ ബയോഡാറ്റ official.ksyc@gmail.com എന്ന മെയില്‍ ഐഡിയിലോ കേരള സംസ്ഥാന യുവജന കമ്മീഷന്‍, വികാസ് ഭവന്‍, തിരുവനന്തപുരം, പിന്‍ 695033 എന്ന വിലാസത്തിലോ ഡിസംബര്‍ 31ന് മുമ്പ് അപേക്ഷിക്കണം. ഫോണ്‍: 0471 2308630.