വിമുക്തഭടന്മാര്‍, അവരുടെ വിധവകള്‍/ ആശ്രിതര്‍ എന്നിവരുടെ പുനരധിവാസത്തിന്റെ ഭാഗമായി തൃശ്ശൂര്‍ ജില്ലാ സൈനികക്ഷേമ കാര്യാലയത്തിന്റെ ആഭിമുഖ്യത്തില്‍ തൃശൂര്‍ പോസ്റ്റ് ഓഫീസ് റോഡിലുള്ള കെല്‍ട്രോണ്‍ നോളജ് സെന്ററില്‍ ജൂണ്‍ മാസം മുതല്‍ ഡിസിഎ (ഡിപ്ലോമ ഇന്‍ കമ്പ്യൂട്ടര്‍ ആപ്ലിക്കേഷന്‍), സര്‍ട്ടിഫൈഡ് കോഴ്‌സ് ഇന്‍ കമ്പ്യൂട്ടറൈസ്ഡ് ഫിനാന്‍ഷ്യല്‍ അക്കൗണ്ടിംഗ് (ടാലി ആന്റ് എംഎസ് ഓഫീസ്) എന്നീ കോഴ്‌സുകള്‍ നടത്തുന്നു. ആറു ലക്ഷത്തില്‍ താഴെ വാര്‍ഷിക വരുമാനമുള്ള വിമുക്തഭടന്മാര്‍/ ആശ്രിതര്‍/ വിധവകള്‍ എന്നിവര്‍ക്ക് അപേക്ഷിക്കാം.
 

സംരംഭകര്‍ക്കായി വ്യവസായ വാണിജ്യ വകുപ്പിന്റെ സംരംഭകത്വ വികസന ഇന്‍സ്റ്റിറ്റ്യൂട്ടായ കേരള ഇന്‍സ്റ്റിറ്റ്യൂട്ട് ഫോര്‍ എന്റര്‍പ്രണര്‍ഷിപ്പ് ഡെവലപ്‌മെന്റ് (കെ.ഐ.ഇ.ഡി), മൂന്ന് ദിവസത്തെ 'ഡിജിറ്റല്‍ മാര്‍ക്കറ്റിംഗ്' വര്‍ക്ക്ഷോപ്പ് സംഘടിപ്പിക്കുന്നു. മെയ് 22 മുതല്‍ 24 വരെ കളമശ്ശേരി കെ.ഐ.ഇ.ഡി ക്യാമ്പസിലാണ് പരിശീലനം. എം.എസ്.എം.ഇ മേഖലയിലെ സംരംഭകര്‍/എക്‌സിക്യൂട്ടീവ്‌സ് എന്നിവര്‍ക്ക് പരിശീലനത്തില്‍ പങ്കെടുക്കാം.

ആലപ്പുഴ: ജനപങ്കാളിത്തത്തോടെയുള്ള മഴക്കാലപൂര്‍വ ശുചീകരണത്തിന് ജില്ലയില്‍ തുടക്കം. മാലിന്യമുക്തം നവകേരളം പദ്ധതിയുടെ ഭാഗമായി തദ്ദേശസ്വയംഭരണ സ്ഥാപനങ്ങളുടെ നേതൃത്വത്തിലാണ് രണ്ടു ദിവസത്തെ മെഗാ ക്ലീനിംഗ് നടക്കുന്നത്. ആദ്യ ദിവസം സര്‍ക്കാര്‍ സ്ഥാപനങ്ങളാണ് ശുചീകരിച്ചത്. പെരുമ്പളം ഗവണ്‍മെന്റ് ഹയര്‍ സെക്കന്‍ഡറി സ്‌കൂളിലെ ശുചീകരണ പ്രവര്‍ത്തികളുടെ ഉദ്ഘാടനം ജില്ല പഞ്ചായത്ത് പ്രസിഡന്റ് കെ.ജി.രാജേശ്വരി നിര്‍വഹിച്ചു. ഇന്ന് (മെയ് 19) പൊതുവിടങ്ങള്‍ ശുചിയാക്കും. 

ആലപ്പുഴ: ചേര്‍ത്തല നഗരസഭയിലെ മഴക്കാലപൂര്‍വ്വ ജനകീയ ശുചീകരണ പ്രവര്‍ത്തനങ്ങളില്‍ വന്‍ ജനപങ്കാളിത്തം. ആദ്യദിനം ചേര്‍ത്തല നഗരത്തിലെ പതിനാല് റോഡരികുകള്‍ ശുചിയാക്കി. പതിനൊന്ന് കിലോമീറ്റര്‍ പാതയോരമാണ് മൂന്നൂറോളം വരുന്ന സന്നദ്ധ പ്രവര്‍ത്തകര്‍ ചേര്‍ന്ന് ശുചീകരിച്ചത്. ഇതിന്റെ ഭാഗമായി രണ്ട് ടണ്‍ മാലിന്യം ശേഖരിച്ച് നീക്കി. നഗര ശുചീകരണത്തിന്റെ ഭാഗമായി ശേഖരിച്ച ജൈവമാലിന്യങ്ങള്‍ എയറോബിക്ക് യൂണിറ്റിലേക്കും അജൈവമാലിന്യങ്ങള്‍ ഹരിതകര്‍മ്മസേന വഴി  റീ സൈക്ലിംഗ് യൂണിറ്റിലേക്കും എത്തിച്ചു.   

ആലപ്പുഴ: അമ്പലപ്പുഴ വടക്ക് ഗ്രാമപഞ്ചായത്തില്‍ പ്രസിഡന്റ് എസ്.ഹാരിസിന്റെ നേതൃത്വത്തില്‍ എല്ലാ വാര്‍ഡുകളിലും ശുചീകരണ പ്രവര്‍ത്തനങ്ങള്‍ നടത്തി. ജനപ്രതിനിധികള്‍, കുടുംബശ്രീ പ്രവര്‍ത്തകര്‍, തൊഴിലുറപ്പ് തൊഴിലാളികള്‍, ഹരിതകര്‍മ്മ സേനാംഗങ്ങള്‍, സന്നദ്ധ പ്രവര്‍ത്തകര്‍ എന്നിവര്‍ ശുചീകരണ പ്രവര്‍ത്തനത്തില്‍ പങ്കാളികളായി.

മഹാത്മാഗാന്ധി ദേശീയ ഗ്രാമീണ തൊഴിലുറപ്പു പദ്ധതിയുടേയും പ്രധാനമന്ത്രി ആവാസ് യോജനാ പദ്ധതിയുടേയും ഓംബുഡ്സ്മാൻ സാം ഫ്രാങ്ക്ളിൻ മെയ് 21 ചൊവ്വാഴ്ച രാവിലെ 11 മുതൽ ഒരു മണി വരെ പാറശാല ബ്ലോക്കു പഞ്ചായത്ത് ഹാളിൽ സിറ്റിംഗ് നടത്തും.

ചെങ്കൽ, കാരോട്, കുളത്തൂർ, പാറശാല , പൂവാർ, തിരുപുറം പഞ്ചായത്തുകളിലെ തൊഴിലുറപ്പു പദ്ധതി തൊഴിലാളികൾ, മേറ്റുമാർ, പൊതു പ്രവർത്തകർ, ജനപ്രതിനിധികൾ, ജീവനക്കാർ, പ്രധാനമന്ത്രി ആവാസ് യോജന ഭവന പദ്ധതി ഗുണഭോക്താക്കൾ എന്നിവർക്ക് പരാതികളും നിർദേശങ്ങളും നേരിട്ടു നൽകാമെന്ന് ഓംബുഡ്സ്മാൻ അറിയിച്ചു.

കേന്ദ്ര കാലാവസ്ഥാ നിരീക്ഷണ കേന്ദ്രം തിരുവനന്തപുരം ജില്ലയിൽ മെയ് 19, 20, 21 ദിവസങ്ങളിൽ ഓറഞ്ച് അലേർട് പ്രഖ്യാപിച്ചിട്ടുള്ളതിനാലും ഉരുൾപൊട്ടൽ, മണ്ണിടിച്ചിൽ സാധ്യതകൾ ഉള്ളതിനാലും മലയോര മേഖലകളിൽ ജാഗ്രത പാലിക്കേണ്ടതിനാലും ജില്ലയിലെ മലയോര - കായലോര മേഖലകളിലേക്കുള്ള അവശ്യ സർവീസുകൾ ഒഴികെയുള്ള ഗതാഗതം, ക്വാറിയിംഗ്, മൈനിംഗ് പ്രവർത്തനങ്ങൾ എന്നിവ ഇനിയൊരു അറിയിപ്പുണ്ടാകുന്നതുവരെ നിരോധിച്ചു കൊണ്ട് ജില്ലാ കളക്ടർ ജെറോമിക് ജോർജ് ഉത്തരവിട്ടു. കൂടാതെ കടലോര പ്രദേശങ്ങളിലേക്കുള്ള വിനോദ സഞ്ചാരം ഉൾപ്പെടെ മറ്റൊരു അറിയിപ്പുണ്ടാകുന്നതുവരെ നിരോധിച്ചിട്ടുമുണ്ട്.

ആലപ്പുഴ: സംസ്ഥാന ന്യൂനപക്ഷ കമ്മിഷന്‍ സിറ്റിംഗ് ഇന്ന് (മെയ് ഏഴ്) രാവിലെ 11 മണിക്ക് കളക്ട്രേറ്റ് കോണ്‍ഫറന്‍സ് ഹാളില്‍ നടക്കും. നിലവിലുള്ള പരാതികള്‍ പരിഗണിക്കുന്നതോടൊപ്പം പുതിയ പരാതികള്‍ സ്വീകരിക്കും.

ആലപ്പുഴ: ഹരിതകേരളം മിഷന്റെ നേതൃത്വത്തില്‍ വേള്‍ഡ് വൈല്‍ഡ് ലൈഫ് ഫണ്ടുമായി സഹകരിച്ച് സ്‌കൂള്‍ വിദ്യാര്‍ഥികള്‍ക്കായി ജൈവവൈവിധ്യ പഠനോത്സവവും ക്വിസ് മത്സരവും സംഘടിപ്പിക്കുന്നു. ഇതിന്റെ ഭാഗമായി ആലപ്പുഴ ജില്ലയില്‍ മേയ് ഏഴിന് ബ്ലോക്കുതലത്തിലും പത്തിന് ജില്ലാതലത്തിലും ക്വിസ് മത്സരങ്ങള്‍ സംഘടിപ്പിക്കും. ജില്ലാതല വിജയികളെ പങ്കെടുപ്പിച്ച് മേയ് 20 മുതല്‍ മൂന്നു ദിവസം മൂന്നാര്‍, അടിമാലി എന്നിവിടങ്ങളില്‍ പഠനോത്സവ ക്യാമ്പ് സംഘടിപ്പിക്കും. 7,8,9 ക്ലാസുകളിലേക്ക് എത്തുന്ന വിദ്യാര്‍ത്ഥികള്‍ക്ക് മത്സരത്തില്‍ പങ്കെടുക്കാം. രജിസ്ട്രേഷന്‍ ഓണ്‍ലൈനായി നടത്താം.