തൃശ്ശൂര്‍ ജില്ലയില്‍ പുല്ലഴി, പേരാമ്പ്ര, പൂക്കോട്, ഗുരുവായൂര്‍ വില്ലേജുകളില്‍ ഡിജിറ്റല്‍ സര്‍വ്വേയുടെ ഫീല്‍ഡ് പരിശോധനകള്‍ക്കും സര്‍വ്വേ ഉപകരണങ്ങള്‍ കൊണ്ടുപോകാനും ഉദ്യോഗസ്ഥരുടെ യത്രയ്ക്കുമായി ടാക്‌സി പെര്‍മിറ്റും 7 സീറ്റ് സൗകര്യവുമുള്ള വാഹനം മാസവാടകയില്‍ ലഭ്യമാക്കുന്നതിന് ക്വട്ടേഷന്‍ ക്ഷണിച്ചു. മുദ്ര വെച്ച ക്വട്ടേഷനുകള്‍ ഏപ്രില്‍ 3 നകം റീസര്‍വെ സൂപ്രണ്ട്, തൃശ്ശൂര്‍-680003 എന്ന വിലാസത്തില്‍ തപാല്‍ വഴിയോ, ഓഫീസില്‍
നേരിട്ടോ ലഭിക്കണം. കൂടുതല്‍ വിവരങ്ങള്‍ക്കായി ഫോണ്‍: 0487 2363624.

തൃശ്ശൂര്‍ ജില്ലയില്‍ പാണഞ്ചേരി, കൈനൂര്‍ വില്ലേജുകളില്‍ ഡിജിറ്റല്‍ സര്‍വ്വേയുടെ ഫീല്‍ഡ് പരിശോധനകള്‍ക്കും സര്‍വ്വേ ഉപകരണങ്ങള്‍ കൊണ്ടുപോകാനും ഉദ്യോഗസ്ഥരുടെ യാത്രയ്ക്കുമായി ടാക്‌സി പെര്‍മിറ്റും 7 സീറ്റ് സൗകര്യവുമുള്ള വാഹനം മാസവടകയില്‍ ലഭ്യമാക്കുന്നതിന് ക്വട്ടേഷന്‍ ക്ഷണിച്ചു. മുദ്രവെച്ച ക്വട്ടേഷന്‍ മാര്‍ച്ച് 27 നകം ലഭിക്കണം. ക്വട്ടേഷനുകള്‍ റീസര്‍വ്വെ സൂപ്രണ്ട്, തൃശ്ശൂര്‍-680003 എന്ന വിലാസത്തില്‍ തപാല്‍ വഴിയോ, ഓഫീസില്‍ നേരിട്ടോ നല്‍കാവുന്നതാണ്. കൂടുതല്‍ വിവരങ്ങള്‍ക്കായി ഫോണ്‍: 0487 2363624.
 

പോര്‍ക്കുളം ഗ്രാമ പഞ്ചായത്ത് 2024-25 വാര്‍ഷിക പദ്ധതിയില്‍ ഉള്‍പ്പെടുത്തി ഭിന്നശേഷിക്കാര്‍ക്കുള്ള ഉപകരണങ്ങള്‍ വിതരണം ചെയ്തു. പഞ്ചായത്ത് പ്രസിഡന്റ് അഡ്വ. കെ. രാമകൃഷ്ണന്‍ ചടങ്ങിന്റെ വിതരണോദ്ഘാടനം നിര്‍വ്വഹിച്ചു. 2 ലക്ഷം രൂപയ്ക്കുള്ള വാക്കിങ് സ്റ്റിക്ക്, സ്റ്റാറ്റിക് സൈക്കില്‍, സ്‌ക്രച്ചസ്സ്, മെമ്മറ്റി കിറ്റ്, വിവിധതരം ഷൂസുകള്‍, ആധുനികരീതിയിലുള്ള വീല്‍ചെയറുകള്‍, തെറാപ്പി മേറ്റുകള്‍, തെറാപ്പി ബോളുകള്‍, കാല്‍മുട്ട് കവചം (ക്‌നീ ക്യാപ്പ്), ട്രാം ബോര്‍ഡ് തുടങ്ങി 15 പേര്‍ക്കുള്ള ഉപകരണങ്ങളാണ് വിതരണം ചെയ്തത്.

തളിക്കുളം ഗ്രാമപഞ്ചായത്തില്‍ ജനകീയാസൂത്രണം 2024-25 പദ്ധതിയുടെ ഭാഗമായി ഇന്നും നാളെയും (മാര്‍ച്ച് 19, 20) വനിതകള്‍ക്കും കൗമാരക്കാരായ പെണ്‍കുട്ടികള്‍ക്കുമുള്ള അനീമിയ രക്ത പരിശോധന ക്യാമ്പ് നടക്കും. തളിക്കുളം കുടുംബാരോഗ്യ കേന്ദ്രത്തില്‍ നടക്കുന്ന ക്യാമ്പില്‍ എസ്.സി വനിതകള്‍ക്കുള്ള രക്തപരിശോധന ക്യാമ്പ് ഇന്ന് (മാര്‍ച്ച് 19) രാവിലെ 9.30 മുതല്‍ ഉച്ചതിരിഞ്ഞ് 3 വരെയും പഞ്ചായത്തിലെ വനിതകള്‍ക്കും കൗമാരക്കാരായ പെണ്‍കുട്ടികള്‍ക്കുമുള്ള രക്ത പരിശോധന ക്യാമ്പ് നാളെ (മാര്‍ച്ച് 20) രാവിലെ 9.30 മുതല്‍ ഉച്ചതിരിഞ്ഞ് 3 വരെയും നടക്കും.

മുരിയാട് ഗ്രാമപഞ്ചായത്തിന്റെ മൂന്നാം നൂറുദിന കര്‍മ്മ പരിപാടിയുടെ ഭാഗമായി പൂര്‍ത്തീകരിച്ച ഊരകം നോര്‍ത്ത് കുടിവെള്ള പദ്ധതി പഞ്ചായത്ത് പ്രസിഡന്റ് ജോസ്. ജെ. ചിറ്റിലപ്പിള്ളി നാടിന് സമര്‍പ്പിച്ചു. പഞ്ചായത്ത് വികസന ഫണ്ടില്‍ നിന്നും 9 ലക്ഷം രൂപയോളം ചിലവഴിച്ച് ഏകദേശം മുപ്പതില്‍പ്പരം കുടുംബങ്ങള്‍ക്ക് ശുദ്ധജലം വിതരണം ചെയ്യാന്‍ കഴിയുന്ന വിധത്തിലാണ് പദ്ധതി പൂര്‍ത്തീകരിച്ചിരിക്കുന്നത്.

മാലിന്യമുക്ത നവകേരളം ജനകീയക്യാമ്പയിന്റെ ഭാഗമായി മാസ്സ് ക്ലീനിംഗ് മാര്‍ച്ച് 23ന് രാവിലെ പത്ത് മുതല്‍ ആരംഭിക്കുമെന്ന് ജില്ലാ കളക്ടര്‍ വി.ആര്‍ വിനോദ് അറിയിച്ചു. ക്യാമ്പയിന്റെ ഭാഗമായി സിവില്‍ സ്റ്റേഷനിലെ സര്‍ക്കാര്‍ ഓഫീസുകളിലെ  മാലിന്യ സംസ്‌കരണ സംവിധാനങ്ങള്‍, സൗന്ദര്യവത്കരണം എന്നിവ സംബന്ധിച്ച് കോണ്‍ഫറന്‍സ് ഹാളില്‍ ജില്ലാതല ഉദ്യോഗസ്ഥര്‍ക്കായി നടത്തിയ യോഗത്തില്‍ സംസാരിക്കുകയായിരുന്നു അദ്ദേഹം. മാര്‍ച്ച് 23ന് കളക്ടറേറ്റും പരിസരവും ശുചിയാക്കും. ഉദ്യോഗസ്ഥര്‍ പങ്കെടുക്കണമെന്നും 100 വളണ്ടിയര്‍മാരുടെ സേവനം ലഭ്യമാക്കുമെന്നും കളക്ടര്‍ അറിയിച്ചു.

ജില്ലയിലെ വിവിധ തദ്ദേശ സ്ഥാപനങ്ങളിലെ ഹരിത കർമസേനക്ക് ഇലക്ട്രിക് വാഹനം നൽകി. ജില്ലാ പഞ്ചായത്തിന്റെ വാർഷിക പദ്ധതിയിലുൾപ്പെടുത്തിയാണ് വാഹനങ്ങൾ നൽകിയത്. അജൈവ മാലിന്യം ശേഖരിച്ച് എംസിഎഫിലേക്ക് എത്തിക്കാനാണ് വാഹനം അനുവദിച്ചിട്ടുള്ളത്. വാഹനങ്ങൾ ജില്ലാ പഞ്ചായത്ത് പ്രസിഡന്റ് എംകെ റഫീഖ കൈമാറി. എ.ആർ നഗർ, പറപ്പൂർ, കൂട്ടിലങ്ങാടി, കാലടി, താനാളൂർ, കോഡൂർ, തെന്നല, തൃപ്പങ്ങോട്, ഒതുക്കുങ്ങൽ ഗ്രാമപഞ്ചായത്തുകൾക്കും വളാഞ്ചേരി, തിരൂർ നഗരസഭകൾക്കുമാണ് വാഹനം നൽകിയത്. വൈസ് പ്രസിഡന്റ് ഇസ്മയിൽ മൂത്തേടം, സ്ഥിരം സമിതി അധ്യക്ഷരായ എൻ എ കരീം, സറീന ഹസീബ്, സെക്രട്ടറി എസ് ബിജു എന്നിവർ സംസാരിച്ചു.

ജില്ലയിലെ കേരള കർഷകതൊഴിലാളി ക്ഷേമനിധിയിൽ അംഗങ്ങളായ തൊഴിലാളികളുടെ മക്കൾക്ക് ഉന്നത വിദ്യാഭ്യാസ അവാർഡ് വിതരണം ചെയ്തു. മലപ്പുറം ദിലീപ് മുഖർജി ഭവനിൽ നടന്ന പരിപാടി കേരള കർഷകതൊഴിലാളി ക്ഷേമനിധി ബോർഡ് ചെയർമാൻ എൻ. ചന്ദ്രൻ ഉദ്ഘാടനം ചെയ്തു. കർഷക തൊഴിലാളി ക്ഷേമനിധി ബോർഡ് ഡയറക്ടർ എ. രാമചന്ദ്രൻ  അധ്യക്ഷത വഹിച്ചു. കർഷകതൊഴിലാളി സംഘടനാ നേതാക്കളായ സുരേഷ്, കെ.കെ. ഹംസ, പി.ജി രാജഗോപാലൻ, ടി. മുഹമ്മദാലി, ഒ. ഗോപാലൻ, വി. അജയ് കുമാർ എന്നിവർ സംസാരിച്ചു. കേരള  കർഷകതൊഴിലാളി ക്ഷേമനിധി  ബോർഡ്  ജില്ലാ എക്‌സിക്യൂട്ടീവ് ഓഫീസർ സി കാഞ്ചന സ്വാഗതവും ക്ലർക്ക് കെ. ജൈസൽ നന്ദിയും പറഞ്ഞു.

മങ്കട ഗവ. കോളേജിൽ സൈക്കോളജി ഡിപ്പാർട്ട്‌മെന്റിന്റെയും ജീവനി സെന്റർ ഫോർ വെൽബീയിങിന്റെയും ഐ.ക്യു.എ.സി യുടെയും സംയുക്ത ആഭിമുഖ്യത്തിൽ മെന്റൽ ഹെൽത്ത് ക്ലബ്ബ് രൂപീകരിച്ചു. കോളജ് പ്രിൻസിപ്പൽ ഡോ. പി ഉദയകുമാർ ഉദ്ഘാടനം ചെയ്തു. പരിപാടിയോടനുബന്ധിച്ച് വളണ്ടിയർമാർക്ക് ഒരാഴ്ച നീണ്ടുനിൽകുന്ന ട്രെയിനിംഗ് സംഘടിപ്പിക്കുകയും ചെയ്തു. സൈക്കോളജി വിഭാഗം മേധാവി എ. മുഹമ്മദ് ജുനൈദ് അധ്യക്ഷത വഹിച്ചു. ഡോ. ടി. ഷിഖില, ഐ.ക്യു.എ.സി കോർഡിനേറ്ററായ സി.പി സമീറലി, പി.ടി.എ സെക്രട്ടറി കെ. സുനിത, എൻ. അയന, രേഷ്മ ശങ്കർ, ഡോ. ശ്രീപ്രിയ, ഡോ. സരിഗമ ആർ നായർ, ഡോ. കെ.പി അബ്ദുള്ളക്കുട്ടി, പി.വി കൃഷ്ണാനന്ദ്, സോന, പി. സാനിഷ് സംസാരിച്ചു.

              കേരള സംഗീത നാടക അക്കാദമിയുടെ 2024 ലെ പുരസ്‌കാരങ്ങള്‍ പ്രഖ്യാപിച്ചു. വീണ വിദ്വാന്‍ എ. അനന്തപത്മനാഭന്‍, നാടകകൃത്തും സംവിധായകനുമായ സേവ്യര്‍ പുല്‍പ്പാട്ട്, നര്‍ത്തകിയും നൃത്ത അധ്യാപികയുമായ കലാമണ്ഡലം സരസ്വതി എന്നിവര്‍ക്കാണ് ഫെലോഷിപ്പ്. അക്കാദമിയുടെ പരിധിയില്‍ വരുന്ന വിവിധ കലാമേഖലകളില്‍ സമഗ്രസംഭാവനകള്‍ നല്‍കിയ പ്രതിഭകള്‍ക്കാണ് ഫെലോഷിപ്പ് നല്‍കുന്നത്. 50,000 രൂപയും ഫലകവും പ്രശസ്തിപത്രവും ശില്‍പ്പവും അടങ്ങുന്നതാണ് ഫെലോഷിപ്പ്. 2024 ലെ അവാര്‍ഡിന് 18 പ്രതിഭകളെയും ഗുരുപൂജാ പുരസ്‌കാരത്തിന് 22 പ്രതിഭകളെയും തെരഞ്ഞെടുത്തു.