വൈക്കം ഉദയാനാപുരത്തെ ഫുട്‌ബോൾ പ്രേമികൾക്കായി ആധുനിക നിലവാരത്തിൽ  ടർഫ്  ഒരുങ്ങുന്നു. സംസ്ഥാന കായിക വകുപ്പിന്റെ 'ഒരു പഞ്ചായത്ത് ഒരു കളിക്കളം' പദ്ധതിയുടെ ഭാഗമായി ഉദയനാപുരം ഗ്രാമപഞ്ചായത്ത് ഒന്നാം വാർഡിലെ അക്കരപ്പാടം ഗവൺമെൻറ് യു.പി. സ്‌കൂൾ ഗ്രൗണ്ടിലാണ്  ടർഫ് കോർട്ട് ഒരുങ്ങുന്നത്.
48 മീറ്റർ നീളത്തിലും 20 മീറ്റർ വീതിയിലുമാണ്  നിർമാണം. രാജ്യാന്തര ഫുട്‌ബോൾ ഫെഡറേഷന്റെ(ഫിഫ) മാനദണ്ഡപ്രകാരമുള്ള വസ്തുക്കൾ ഉപയോഗിച്ചാണ് നിർമാണം. പ്രകാശത്തിനായുള്ള സംവിധാനങ്ങൾ സ്ഥാപിക്കുന്നതൊഴികെയുള്ള പ്രവർത്തനങ്ങൾ പൂർത്തീകരണഘട്ടത്തിലാണ്.

സംസ്ഥാന സർക്കാർ 'വിജ്ഞാന കേരളം' പദ്ധതിയുടെ ഭാഗമായി അസാപ് കേരളയുടെ പാണ്ടിക്കാട് കമ്മ്യൂണിറ്റി സ്‌കിൽ പാർക്കിൽ  ജോബ് ഫെയർ സംഘടിപ്പിച്ചു. പാണ്ടിക്കാട് പഞ്ചായത്ത് പ്രസിഡന്റ് റമീഷ ഉദ്ഘാടനം ചെയ്തു. പാണ്ടിക്കാട് പഞ്ചായത്ത് മെമ്പർ മജീദ് മാസ്റ്റർ അധ്യക്ഷത വഹിച്ചു. അസാപ് കേരള അസ്സോസിയേറ്റ് ഡയറക്ടർ കെ.വി രാകേഷ് സ്വാഗതവും അസാപ് കേരള സി.എസ്.പി പാണ്ടിക്കാട് എക്സിക്യൂട്ടീവ് ടി.ടി അഷിത നന്ദിയും പറഞ്ഞു

കുടുംബശ്രീയുടെ നേതൃത്വത്തിൽ ബുദ്ധിപരമായ വെല്ലുവിളികൾ നേരിടുന്നവർക്കായി ആനക്കയം ഗ്രാമപഞ്ചായത്തിൽ ആരംഭിച്ച ബഡ്‌സ് റീഹാബിലിറ്റേഷൻ സെന്റർ ജില്ലാ പഞ്ചായത്ത് പ്രസിഡൻറ് എം.കെ റഫീഖ ഉദ്ഘാടനം ചെയ്തു. 34 കുട്ടികളാണ് ഇതുവരെ സ്ഥാപനത്തിൽ അഡ്മിഷൻ എടുത്തിട്ടുള്ളത്. ഒരു ടീച്ചറും, അസിസ്റ്റൻറ് ടീച്ചർ, ആയ എന്നിവരാണ് റിഹാബിലിറ്റേഷൻ സെന്ററിലെ ഉദ്യോഗസ്ഥർ. പുതുതായി നിർമ്മിച്ച കെട്ടിടത്തിൽ കുട്ടികൾക്ക് വേണ്ട എല്ലാവിധ സൗകര്യങ്ങളും സജ്ജമാണ്.

പോക്‌സോ കേസുകളിൽ വിചാരണസമയത്തും മുൻപും കുട്ടികൾക്ക് കൗൺസിലിങ്, മെഡിക്കൽ അസ്സിസ്റ്റൻസ്, ലീഗൽ എയിഡ് സർവീസസ്, മറ്റു സേവനങ്ങൾ തുടങ്ങിയ സഹായങ്ങൾ നൽകുന്നതിനായി വനിതാ ശിശു വികസന വകുപ്പ് ജില്ലാ ചൈൽഡ് പ്രൊട്ടക്ഷൻ യൂണിറ്റ് സപ്പോർട്ട് പേഴ്സൺമാരുടെ പാനൽ തയ്യാറാക്കുന്നതിനായി അപേക്ഷകൾ ക്ഷണിച്ചു.

ബീഹാര്‍ സ്വദേശിനി ചുൻചുൻ കുമാരി (25) എന്ന വ്യക്തിയെ 2025 മാര്‍ച്ച് ഒന്നു മുതല്‍ കഞ്ചിക്കോട് വാട്ടര്‍ ടാങ്ക് എന്ന സ്ഥലത്തു നിന്നും കാണാതായതായി വാളയാര്‍ പൊലീസ് അറിയിച്ചു. ഹോട്ടല്‍ മേഖലയില്‍ ജോലി ചെയ്തു വരികയായിരുന്നു.  കാണാതായ സംഭവത്തില്‍ വാളയാര്‍ പൊലീസ് കേസ് രജിസ്റ്റര്‍ ചെയ്തിട്ടുണ്ട്. ഇവരെക്കുറിച്ച് വിവരങ്ങള്‍ ലഭിക്കുന്നവര്‍ വാളയാര്‍ പോലീസ് സ്റ്റേഷനില്‍ അറിയിക്കണമെന്ന് വാളയാര്‍ എസ്.എച്ച്.ഒ അറിയിച്ചു. ഫോണ്‍:  94979 80635 (എസ്.ഐ), 98478 18507  (എ.എസ്.ഐ)

സംസ്ഥാന സർക്കാർ സ്ഥാപനമായ എൽ.ബി.എസ് സെന്റർ ഫോർ സയൻസ് ആൻഡ് ടെക്നോളജിയുടെ പരപ്പനങ്ങാടി ഉപകേന്ദ്രത്തിൽ എസ്.എസ്.എൽ.സി യോഗ്യതയുള്ളവർക്ക് ഡാറ്റാ എൻട്രി ആൻഡ് ഓഫീസ് ഓട്ടോമേഷൻ (ഇംഗ്ലീഷ്-മലയാളം), സർട്ടിഫിക്കറ്റ് കോഴ്സ് ഇൻ പൈത്തൺ, സി++, ഹൈസ്‌കൂൾ വിദ്യാർത്ഥികൾക്കായി വെബ് ഡിസൈൻ, ഡിജിറ്റൽ ലിറ്ററസി സർട്ടിഫിക്കേഷൻ എന്നീ കോഴ്സുകളിലേയ്ക്ക് അപേക്ഷിക്കാം. ഇപ്പോൾ പരീക്ഷ എഴുതുന്നവർക്കും നിബന്ധനകൾക്ക് വിധേയമായി അപേക്ഷിക്കാവുന്നതാണ്. http://lbscentre.kerala.gov.in/services/courses  എന്ന ലിങ്കിലൂടെയാണ് ഓൺലൈനായി അപേക്ഷിക്കേണ്ടത്.

കെ.വി.കെ ദിനത്തോടനുബന്ധിച്ച് കൃഷി വിജ്ഞാന കേന്ദ്രം, മലപ്പുറം (തവനൂർ) കർഷകർക്കായി 'പച്ചക്കറികളിലെ സംയോജിത കീട-രോഗ നിയന്ത്രണം' എന്ന വിഷയത്തിൽ ഒരു ദിവസത്തെ സൗജന്യ പരിശീലന ക്ലാസ് സംഘടിപ്പിക്കുന്നു. തവനൂർ കൃഷി വിജ്ഞാന കേന്ദ്രത്തിൽ മാർച്ച് 24ന് രാവിലെ 9.30 മുതൽ ഉച്ചയ്ക്ക് 12 മണി വരെയാണ് ക്ലാസ്സ്. താല്പര്യമുള്ളവർ മാർച്ച് 21ന് വൈകീട്ട് മൂന്നിന് മുൻപായി 8547193685 എന്ന നമ്പറിൽ വിളിച്ച് രജിസ്റ്റർ ചെയ്യണം.

കേരള മൈനർ മിനറൽ കൺസഷൻ ചട്ടത്തിൽ സർക്കാർ ഭേദഗതികൾ കൊണ്ടുവന്നതിനാൽ മുൻകാലങ്ങളിൽ ഖനനം ചെയ്ത് നീക്കിയ ധാതുക്കൾക്കുള്ള കുടിശികകൾ ഒടുക്കുന്നതിനുള്ള അദാലത്തിന്റെ കാലാവധി മാർച്ച് 31 വരെ നീട്ടി.  ഖനനമേഖലയിലുള്ളവരുടെ ആവശ്യം പരിഗണിച്ചാണ് നടപടി. ഇത് അവസാന അവസരമായി കണക്കാക്കി അപേക്ഷകൾ 31.03.2025 തിയതിക്ക് മുമ്പായി ജില്ലാ ഓഫീസുകളിൽ സമർപ്പിക്കണമെന്ന് ജില്ലാ ജിയോളജിസ്റ്റ് അറിയിച്ചു. മാർച്ച് 31ന് ശേഷം സമർപ്പിക്കുന്ന അപേക്ഷകളുടെയും അധിക / അനധികൃത ഖനനം കണ്ടെത്തുന്നവയുടെയും റോയൽറ്റിയും പിഴയും 2023 മാർച്ച് 31 ലെ ചട്ട ഭേദഗതിയിൽ നിഷ്‌കർഷിച്ചിരിക്കുന്ന പ്രകാരം മാത്രമായിരിക്കുമെന്നും ജിയോളജിസ്റ്റ് അറിയിച്ചു.

പരപ്പനങ്ങാടി നഗരസഭയിലെ വലിയപറമ്പ് റോഡ് പ്രവൃത്തിക്ക് വെള്ളപ്പൊക്ക ദുരിതാശ്വാസ പദ്ധതിയിൽ ഉൾപ്പെടുത്തി അഞ്ച് ലക്ഷം രൂപ വകയിരുത്തിയതായി ജില്ലാ കളക്ടർ അറിയിച്ചു.