എരഞ്ഞോളിപ്പാലം കുഴിപ്പങ്ങാട് റോഡിൽ എരഞ്ഞോളിപ്പാലം മുതൽ കുഴിപ്പങ്ങാട് വരെ ബി.എം.ബി.സി കൾവർട്ട് ഉൾപ്പെടെയുള്ള കോൺക്രീറ്റ് പ്രവൃത്തികൾ നടക്കുന്നതിനാൽ ഇത് വഴിയുള്ള വാഹനഗതാഗതം മാർച്ച് 18 മുതൽ മെയ് അഞ്ച് വരെ പൂർണമായും നിരോധിച്ചതായി തലശ്ശേരി പൊതുമരാമത്ത് നിരത്തുകൾ ഉപവിഭാഗം അസി. എക്സിക്യൂട്ടീവ് എഞ്ചിനീയർ അറിയിച്ചു. ഇത് വഴി പോകുന്ന വാഹനങ്ങൾ മറ്റ് അനുയോജ്യമായ വഴികൾ ഉപയോഗിക്കണം

 സംസ്ഥാന യുവജന കമ്മീഷൻ കോട്ടയം മാന്നാനം കെ.ഇ. കോളേജിൽ നടത്തുന്ന  'കരിയർ എക്സ്പോ 2025' തൊഴിൽമേളയുടെ ഉദ്ഘാടനം ചൊവ്വാഴ്ച (മാർച്ച് 18)  രാവിലെ ഒമ്പതിന് യുവജന കമ്മീഷൻ അധ്യക്ഷൻ എം. ഷാജർ നിർവഹിക്കും. കോളജ് പ്രിൻസിപ്പൽ പ്രൊഫ. ഡോ. ഐസൺ വി. വഞ്ചിപുരെക്കൽ അധ്യക്ഷത വഹിക്കും. കമ്മീഷൻ അംഗം അബേഷ് അലോഷ്യസ് പങ്കെടുക്കും.

ജില്ലാ പഞ്ചായത്ത് വാർഷിക പദ്ധതിയിൽ ഉൾപ്പെടുത്തി ബ്രെയിലി ലിപിയിൽ അച്ചടിച്ച 10 ക്ലാസ്സിക് കൃതികളുടെ പ്രകാശനം മാർച്ച് 18 ചൊവ്വാഴ്ച രാവിലെ 11 മണിക്ക് ജില്ലാ പഞ്ചായത്ത് വിസി ഹാളിൽ പ്രസിഡൻറ് അഡ്വ. കെ.കെ. രത്‌നകുമാരി പ്രകാശനം ചെയ്യും. വൈസ് പ്രസിഡൻറ് അഡ്വ. ബിനോയ് കുര്യൻ അധ്യക്ഷനാവും.

 മുൻകാലങ്ങളിൽ അധിക / അനധികൃത ഖനനത്തിലൂടെ  നീക്കിയ ധാതുക്കൾക്കുള്ള കുടിശികകൾ ഒടുക്കുന്നതിനായി മൈനിങ് ആൻഡ് ജിയോളജി വകുപ്പ് നടത്തിവരുന്ന അദാലത്തിന്റെ കാലാവധി മർച്ച് 31 വരെ നീട്ടി. ഇനി തീയതി നീട്ടില്ലെന്നും മാർച്ച് 31 നു ശേഷം നൽകുന്ന അപേക്ഷകളുടെയും അധിക അനധികൃത ഖനനം കണ്ടെത്തുന്നവരുടെയും റോയൽറ്റിയും പിഴയും 2023 മാർച്ച് 31 ലെ ചട്ടഭേദഗതി പ്രകാരമായിരിക്കുമെന്നും വകുപ്പ് അഡീഷണൽ ഡയറക്ടർ അറിയിച്ചു. 

 സാങ്കേതിക വിദ്യാഭ്യാസ വകുപ്പിന്  കീഴിൽ പാമ്പാടി ഏഴാം മൈലിൽ പ്രവർത്തിക്കുന്ന ഗവൺമെന്റ് ടെക്‌നിക്കൽ ഹൈസ്‌കൂളിലേക്ക്  എട്ടാം ക്ലാസ് പ്രവേശനത്തിന് രജിസ്‌ട്രേഷൻ ആരംഭിച്ചു. www.polyadmission.org/ths  എന്ന വെബ്‌സൈറ്റ് മുഖേനയും സ്‌കൂൾ ഓഫീസിൽ നേരിട്ട് എത്തിയും അപേക്ഷ നൽകാം. അവസാന തീയതി ഏപ്രിൽ എട്ട്. വിശദവിവരത്തിന് ഫോൺ: 0481-2507556/9400006469/9048283292/9447763360/9544382952

കേരള മൈനർ മിനറൽ കൺസഷൻ ചട്ടങ്ങൾ പ്രകാരം മുൻകാലങ്ങളിൽ ഖനനം ചെയ്തു നീക്കിയ ധാതുക്കൾക്കുള്ള കുടിശ്ശികകൾ ഒടുക്കുന്നതിനും അപ്രകാരം കുറ്റം രാജിയാക്കുന്നതിലേക്കുമായുള്ള അദാലത്തിന്റെ കാലാവധി 2025 മാർച്ച് 31 വരെ നീട്ടിയതായി മൈനിംഗ് ആൻഡ് ജിയോളജി വകുപ്പ് ജിയോളജിസ്റ്റ് അറിയിച്ചു. അദാലത്തുമായി ബന്ധപ്പെട്ട് 2023 ആഗസ്റ്റ് 25ന് ഉത്തരവ് ഇറക്കിയിരുന്നു. ഇതിന്റെ കാലാവധി 2024 മാർച്ച് 31 വരെ ആയിരുന്നു.

വൈക്കത്തിന്റെ  വെള്ളിത്തിരയിൽ 'ആളനക്ക'മുണ്ടാകാൻ അധികം കാത്തിരിക്കേണ്ട. സംസ്ഥാന ചലച്ചിത്ര വികസന കോർപറേഷൻ ആധുനിക സംവിധാനങ്ങളോടെ വൈക്കം ആറാട്ടുകുളങ്ങര കിളിയാട്ടുനടയിൽ നിർമിക്കുന്ന മൾട്ടിപ്ലക്സ് നിർമാണം അവസാനഘട്ടത്തിൽ.
നിലവിൽ തിയറ്റർ സമുച്ചയത്തിന്റെ കെട്ടിടത്തിന്റെ ജോലികൾ പൂർത്തീകരിച്ചു കഴിഞ്ഞു. തിയറ്റർ എൻജിനീയറിംഗുമായി ബന്ധപ്പെട്ട ജോലികളാണ് ഇനി ബാക്കിയുള്ളത്. അതിന്റെ ആദ്യഘട്ടമായ സ്പീക്കർ വയറിംഗ് ജോലികൾ ടെൻഡർ ചെയ്തു കഴിഞ്ഞു. ബാക്കി വരുന്ന എൻജിനീയറിംഗ് ജോലികളുടെ ടെൻഡർ നടപടികളും  ഈ മാസത്തിൽ പൂർത്തീകരിക്കും.

വൈക്കം ഉദയാനാപുരത്തെ ഫുട്‌ബോൾ പ്രേമികൾക്കായി ആധുനിക നിലവാരത്തിൽ  ടർഫ്  ഒരുങ്ങുന്നു. സംസ്ഥാന കായിക വകുപ്പിന്റെ 'ഒരു പഞ്ചായത്ത് ഒരു കളിക്കളം' പദ്ധതിയുടെ ഭാഗമായി ഉദയനാപുരം ഗ്രാമപഞ്ചായത്ത് ഒന്നാം വാർഡിലെ അക്കരപ്പാടം ഗവൺമെൻറ് യു.പി. സ്‌കൂൾ ഗ്രൗണ്ടിലാണ്  ടർഫ് കോർട്ട് ഒരുങ്ങുന്നത്.
48 മീറ്റർ നീളത്തിലും 20 മീറ്റർ വീതിയിലുമാണ്  നിർമാണം. രാജ്യാന്തര ഫുട്‌ബോൾ ഫെഡറേഷന്റെ(ഫിഫ) മാനദണ്ഡപ്രകാരമുള്ള വസ്തുക്കൾ ഉപയോഗിച്ചാണ് നിർമാണം. പ്രകാശത്തിനായുള്ള സംവിധാനങ്ങൾ സ്ഥാപിക്കുന്നതൊഴികെയുള്ള പ്രവർത്തനങ്ങൾ പൂർത്തീകരണഘട്ടത്തിലാണ്.