ദേശീയ പാതകൾ ഉൾപ്പെടെ നിർമ്മാണ പ്രവർത്തനങ്ങൾ നടക്കുന്ന റോഡുകളിൽ വെള്ളക്കെട്ടുണ്ടാകാനുള്ള സാഹചര്യങ്ങൾ ഒഴിവാക്കാൻ ഡ്രെയ്നേജുകളുടെ ശുചീകരണം അടിയന്തരമായി നടത്താനും നിർമ്മാണ പ്രവർത്തനങ്ങൾ നടക്കുന്ന സ്ഥലങ്ങളിൽ കൃത്യമായ മുന്നറിയിപ്പുകൾ നൽകാനും കളക്ടർ ആവശ്യപ്പെട്ടു. കലുങ്കുകൾ, പാലങ്ങൾ, എന്നിവയ്ക്ക് സമീപം കൂട്ടിയിട്ടിയിരിക്കുന്ന മണ്ണ്, മറ്റ് നിർമ്മാണ സാമഗ്രികൾ എന്നിവ ജലനിർഗമനത്തിന് തടസ്സം സൃഷ്ടിക്കുമെന്നതിനാൽ അത് മുൻഗണനാടിസ്ഥാനത്തിൽ നീക്കം ചെയ്യാനും കളക്ടർ നിർദ്ദേശം നൽകി.

ജില്ലയിലെ ഡാമുകൾ, റഗുലേറ്ററുകൾ എന്നിവയുടെ ഷട്ടറുകൾ പ്രവർത്തനക്ഷമമാണോയെന്ന് പരിശോധിച്ച് ഉറപ്പുവരുത്തുന്നതിനും  പ്രധാന റെഗുലേറ്ററുകളുടെ സ്പിൽവേകളിലെ തടസ്സങ്ങൾ നീക്കാൻ ഉടനടി നടപടി സ്വീകരിക്കുന്നതിനും കളക്ടർ നിർദേശം നൽകി. ഡാമുകൾ കൃത്യമായ റൂൾ കർവ് പാലിക്കണം. അണക്കെട്ടുകൾ തുറക്കേണ്ട സാഹചര്യമുണ്ടെങ്കിൽ 36 മണിക്കൂർ മുമ്പ് ജില്ലാ ദുരന്ത നിവാരണ അതോറിറ്റിയേയും  ബന്ധപ്പെട്ട തദ്ദേശസ്വയംഭരണ സ്ഥാപനങ്ങളേയും അറിയിക്കണം. ദുരന്തനിവാരണ അതോറിറ്റിയുടെ അനുമതിക്കു ശേഷമേ അണക്കെട്ടുകളിൽ നിന്ന് വെള്ളം തുറന്നു വിടാവൂ.

 തദ്ദേശ സ്വയംഭരണ സ്ഥാപനങ്ങൾ, ലാൻഡ് ഡെവലെപ്മെൻ്റ് കോർപ്പറേഷൻ തുടങ്ങിയ വകുപ്പുകൾ മഴക്കാല പൂർവ ശുചീകരണ പ്രവർത്തനങ്ങൾ അടിയന്തരമായി ആരംഭിക്കണമെന്നും   ഏപ്രിൽ 30 നകം പൂർത്തീകരിക്കണമെന്നും കളക്ടർ നിർദ്ദേശിച്ചു.  നഗര മേഖലകളിൽ ഉൾപ്പെടെ വെള്ളക്കെട്ട് രൂപപ്പെടാൻ സാധ്യത ഉള്ളതിനാൽ ഡ്രെയ്നേജ്, തോടുകൾ, ഓടകൾ, കൾവർട്ടുകൾ, കനാലുകൾ, പുഴകൾ, മറ്റ് ജലസേചന സംവിധാനങ്ങൾ എന്നിവയിലെ തടസ്സങ്ങൾ നീക്കി നീരൊഴുക്ക് സുഗമമാക്കാനുള്ള നടപടികൾ സ്വീകരിക്കണമെന്നും കളക്ടർ പറഞ്ഞു. ഇതിനായി മുൻഗണനാ പട്ടിക തയ്യാറാക്കി സമയബന്ധിതമായി പ്രവർത്തിക്കാൻ അദ്ദേഹം ഉദ്യോഗസ്ഥർക്ക് നിർദ്ദേശം നൽകി.

ജില്ലയിലെ വരൾച്ചാ പ്രതിരോധ പ്രവർത്തനങ്ങളുടേയും മഴക്കാല മുന്നൊരുക്കങ്ങളുടേയും പുരോഗതി കളക്ടർ അർജുൻ പാണ്ഡ്യൻ്റെ അധ്യക്ഷതയിൽ ചേർന്ന യോഗം വിലയിരുത്തി.

കോളേജ് വിദ്യാര്‍ത്ഥികള്‍ക്കും പൊതുജനങ്ങള്‍ക്കുമായി സ്‌മോള്‍ ഇന്‍ഡസ്ട്രീസ് ഡെവലപ്പ്‌മെന്റ് ബാങ്ക് ഓഫ് ഇന്ത്യ (സിഡ്ബി) യുടെ സഹകരണത്തോടെ നടത്തുന്ന സമ്മര്‍ സ്റ്റാര്‍ട്ട് അപ് ഫെസ്റ്റിവലിന്റെ മൂന്നാം പതിപ്പിന് നാളെ (മാര്‍ച്ച് 15) തൃശ്ശൂര്‍ ഗവ. എഞ്ചിനീയറിംഗ് കോളേജില്‍ തുടക്കമാകും. സ്റ്റാര്‍ട്ട് അപ്കള്‍ക്ക് ധനസഹായത്തിനൊപ്പം നൂതന ആശയങ്ങളും കണ്ടുപിടുത്തങ്ങളും അവതരിപ്പിക്കാനും, സംരംഭക മോഹങ്ങളെ ഉത്തേജിപ്പിക്കുന്നതിലൂടെ സ്റ്റാര്‍ട്ട് അപ് സംവിധാനങ്ങളെ വളര്‍ത്തിയെടുക്കുന്നതിനും സമ്മര്‍ സ്റ്റാര്‍ട്ട്അപ് ഫെസ്റ്റിവല്‍ വേദി ഒരുക്കും.

ഐ.എച്ച്.ആര്‍.ഡി യുടെ കീഴിലുള്ള മാവേലിക്കര കോളേജ് ഓഫ് അപ്ലൈഡ് സയന്‍സില്‍ സെയില്‍സ് മാര്‍ക്കറ്റിംഗ്, അക്കൗണ്ടിംഗ് ഇലക്ട്രോണിക്‌സ്, കമ്പ്യൂട്ടര്‍ സയന്‍സ് എന്നീ വിഷയങ്ങളില്‍ മൂന്ന് മാസത്തെ ഇന്റേണ്‍ഷിപ്പിനുള്ള അപേക്ഷ ക്ഷണിച്ചു. അതത് വിഷയങ്ങളിലെ ബിരുദ വിദ്യാർത്ഥികൾക്കോ, കോഴ്‌സ് കഴിഞ്ഞവര്‍ക്കോ ഇന്റേണ്‍ഷിപ്പിന് അപേക്ഷക്കാം. താല്പര്യമുള്ളവര്‍ അസ്സല്‍
സര്‍ട്ടിഫിക്കറ്റുകളുമായി മാര്‍ച്ച് 20 ന് രാവിലെ 11 ന് കോളേജില്‍ എത്തേണ്ടതാണ്. ഫോണ്‍ : 9495069307, 8547005046.

ഐ.എച്ച്.ആര്‍.ഡി യുടെ കീഴിലുള്ള മാവേലിക്കര കോളേജ് ഓഫ് അപ്ലൈഡ് സയന്‍സില്‍ മൂന്ന് മാസത്തെ ലൈബ്രറി ഓട്ടോമേഷന്‍ ട്രെയിനിങ് / ഇന്റേണ്‍ഷിപ്പിന് അപേക്ഷ ക്ഷണിച്ചു. ലൈബ്രറി സയന്‍സില്‍ ബിരുദവും, ബിരുദാനന്തര ബിരുദവും ഉള്ളവര്‍ക്ക് അപേക്ഷിക്കാം. പ്രായപരിധിയില്ല. താല്‍പ്പര്യമുള്ളവര്‍ അസ്സല്‍ സര്‍ട്ടിഫിക്കറ്റുകളുമായി മാര്‍ച്ച് 20 ന് രാവിലെ 10 ന് കോളേജില്‍ എത്തേണ്ടതാണ്.  ഫോണ്‍ : 9495069307, 8547005046, 9495106544

വെള്ളാങ്ങല്ലൂര്‍ ഐ.സി.ഡി.എസ് പ്രോജക്ട് പരിധിയിലുള്ള വെള്ളാങ്ങല്ലൂര്‍ ഗ്രാമപഞ്ചായത്തിലെ വാര്‍ഡ് നമ്പര്‍ എട്ട്, 15 എന്നിവിടങ്ങളിലെ അങ്കണവാടി കം ക്രഷിലേക്ക് (സെന്റര്‍ നമ്പര്‍ 51, 43) ക്രഷ് വര്‍ക്കര്‍ / ക്രഷ് ഹെല്‍പ്പര്‍ തസ്തികകളിലേക്ക് അപേക്ഷ ക്ഷണിച്ചു. അതത് വാര്‍ഡില്‍ സ്ഥിരതാമസമുള്ള 18 നും 35 നും ഇടയില്‍ പ്രായമുള്ള വനിതകള്‍ക്ക് അപേക്ഷിക്കാം. ക്രഷ് വര്‍ക്കര്‍ തസ്തികയിലേക്ക് അപേക്ഷിക്കുന്നവര്‍ക്ക്  പ്ലസ്ടുവും, ക്രഷ് ഹെല്‍പ്പര്‍ തസ്തികയിലേക്ക് അപേക്ഷിക്കുന്നവര്‍ക്ക് പത്താം ക്ലാസ്സും ആണ് യോഗ്യത. അഭിമുഖത്തിന്റെ അടിസ്ഥാനത്തില്‍ റാങ്ക്‌ലിസ്റ്റ് തയ്യാറാക്കിയാണ് നിയമനം നടത്തുക.

നാഷണല്‍ ഹെല്‍ത്ത് മിഷന്റെ കീഴിലുള്ള ജില്ലാ ഹെല്‍ത്ത് ആന്‍ഡ് ഫാമിലി വെല്‍ഫെയര്‍ സൊസൈറ്റിയിലേക്ക് ഡാറ്റ മാനേജര്‍ തസ്തികയിലേക്ക് കരാര്‍ അടിസ്ഥാനത്തില്‍ നിയമനം നടത്തും. ബി.ടെക് /ബി.ഇ ഇന്‍ കമ്പ്യൂട്ടര്‍ സയന്‍സ് / ഐടി / ഇലക്ട്രോണിക്‌സ് അല്ലെങ്കില്‍ എം.സി.എ./എം.എസ്.സി കമ്പ്യൂട്ടര്‍ സയന്‍സ്, എം.എസ്.സി സ്റ്റാറ്റിസ്റ്റിക്‌സ്, എം.എസ്.സി ബയോ സ്റ്റാറ്റിസ്റ്റിക്‌സ്, എം.എസ് സി. ബയോ ഇന്‍ഫോര്‍മാറ്റിക്‌സ് അല്ലെങ്കില്‍ പബ്ലിക് ഹെല്‍ത്തില്‍ ബിരുദാനന്തര ബിരുദം എന്നിവയും മൈക്രോ സോഫ്റ്റ് ഓഫീസ് ടൂള്‍സില്‍ പ്രാവീണ്യവുമാണ് യോഗ്യത.

 ചാലക്കുടി നഗരസഭയുടെ 2025-26 വാര്‍ഷിക പദ്ധതിക്ക് വികസന സെമിനാര്‍ അംഗീകാരം നല്‍കി. ബജറ്റ് വിഹിതമായി നഗരസഭക്ക് അനുവദിച്ചിട്ടുള്ള 21 കോടി രൂപക്ക് പുറമെ തനത് ഫണ്ടും, ഹെല്‍ത്ത് ഗ്രാന്റ്, ശുചിത്വ മിഷന്‍ ഗ്രാന്റ് തുടങ്ങിയ ഫണ്ടുകളും ഉള്‍പ്പെടുന്നതാണ് ഈ വര്‍ഷത്തെ പദ്ധതികള്‍. ചാലക്കുടി നിയോജകമണ്ഡലം എംഎല്‍എ സനീഷ് കുമാര്‍ ജോസഫ് വികസന സെമിനാര്‍ ഉദ്ഘാടനം ചെയ്തു.