ഊത്ത പിടുത്തം ഉൾപ്പെടെ അനധികൃത മത്സ്യബന്ധനം ശ്രദ്ധയിൽ പെട്ടാൽ ഉൾനാടൻ അക്വാകൾച്ചർ ആൻഡ് ഫിഷറീസ് ആക്ട് പ്രകാരം കർശനമായ നടപടികളും പിഴയും ഈടാക്കുമെന്ന് ജില്ലാ ഫിഷറീസ് ഡെപ്യൂട്ടി ഡയറക്ടർ അറിയിച്ചു. തെക്കുപടിഞ്ഞാറൻ കാലവർഷത്തിന്റെ തുടക്കത്തിൽ പ്രജനനത്തിനായി മത്സ്യങ്ങൾ നടത്തുന്ന ദേശാന്തരഗമനമായ ഊത്ത എന്ന പേരിൽ അറിയപ്പെടുന്ന ഊത്തകയറ്റം ഈ വർഷം മെയ് പകുതിയോടെ ആരംഭിച്ചിട്ടുണ്ട്. ഊത്ത പിടുത്തം സർക്കാർ നിയമപരമായി നിരോധിച്ചിട്ടുള്ളതാണ്. കാലവർഷം ആരംഭിച്ചതോടെ ഇത് ക്രമാതീതമായി വർധിക്കുകയും കൂടുതൽ പ്രചാരണം നൽകുന്ന തരത്തിലുള്ള വീഡിയോ പ്രദർശിപ്പിക്കപ്പെടുകയും ചെയ്യുന്നുണ്ട്.

കണ്ണൂര്‍ താലൂക്ക് 1 വില്ലേജ് പരിധിയിലുള്ള വാടക കെട്ടിടത്തിലെ ജംഗമ വസ്തുക്കള്‍  ജൂണ്‍ 21 ന് രാവിലെ 11 മണിക്ക് കണ്ണൂര്‍ താലൂക്ക് കോണ്‍ഫറന്‍സ് ഹാളില്‍ പരസ്യമായി ലേലം ചെയ്യും. കൂടുതല്‍ വിവരങ്ങള്‍ കണ്ണൂര്‍ താലൂക്ക് ഓഫീസുമായി ബന്ധപ്പെടാം.

ജലസേചന വകുപ്പ് പ്രോജക്ട് സര്‍ക്കിള്‍ സൂപ്രണ്ടിംഗ് എന്‍ജിനീയറുടെ ഉടമസ്ഥതയിലുള്ളതും അസിസ്റ്റന്റ് എന്‍ജിനീയര്‍ കസ്റ്റോഡിയനായിട്ടുള്ളതുമായ അംബാസിഡര്‍ കാര്‍ ജൂണ്‍ 17 ന് രാവിലെ 11 മണിക്ക് സബ് ഡിവിഷന്‍ കാര്യാലയ പരിസരത്ത് പരസ്യമായി ലേലം ചെയ്യും. ഫോണ്‍: 9744210328

പയ്യന്നൂര്‍ കോളേജ് ഓഫ് അപ്ലൈഡ് സയന്‍സില്‍ ഒന്നാംവര്‍ഷ യുജി, പിജി കോഴ്സുകളിലേക്ക് അപേക്ഷ ക്ഷണിച്ചു. ബിഎസ്ഇ കമ്പ്യൂട്ടര്‍ സയന്‍സ്, ബികോം വിത്ത് കമ്പ്യൂട്ടര്‍ അപ്ലിക്കേഷന്‍, ബികോം കോ-ഓപ്പറേഷന്‍, ബി എ ഇംഗ്ലീഷ് വിത്ത് ജേര്‍ണലിസം തുടങ്ങിയ ബിരുദ കോഴ്സുകളിലേക്കും എംഎസ്സി കമ്പ്യൂട്ടര്‍ സയന്‍സ്, എം കോം ഫിനാന്‍സ് എന്നീ ബിരുദാനന്തര കോഴ്സുകളിലേക്കുമാണ് അഡ്മിഷന്‍ ആരംഭിച്ചിരിക്കുന്നത്. http://www.ihrdadmissions.org വെബ്സൈറ്റ് വഴിയും കോളേജ് നേരിട്ടും അപേക്ഷ സമര്‍പ്പിക്കാം. ഫോണ്‍- 04972877600, 8547005059
 

കേരള സംസ്ഥാന പട്ടികജാതി പട്ടികവര്‍ഗ്ഗ വികസന കോര്‍പ്പറേഷന്‍ പട്ടികജാതി പട്ടികവര്‍ഗ്ഗത്തില്‍പ്പെട്ട ഗവണ്‍മെന്റ് ഉദ്യോഗസ്ഥര്‍ക്ക് നടപ്പിലാക്കുന്ന വ്യക്തിഗതവായ്പാ പദ്ധതിക്ക് കീഴില്‍ വായ്പ അനുവദിക്കുന്നതിനായി കണ്ണൂര്‍ ജില്ലയിലെ പട്ടികജാതി പട്ടികവര്‍ഗ്ഗത്തില്‍പ്പെട്ട ഗവ ഉദ്യോഗസ്ഥരില്‍ നിന്നും അപേക്ഷകള്‍ ക്ഷണിച്ചു. അപേക്ഷകര്‍ റിട്ടയര്‍മെന്റിന് ഏറ്റവും ചുരുങ്ങിയത് ആറ് വര്‍ഷം സര്‍വീസ് ബാക്കിയുള്ളവരായിരിക്കണം. പരമാവധി നാല് ലക്ഷം രൂപയാണ് വായ്പ അനുവദിക്കുന്നത്. പലിശ നിരക്ക് 10 ശതമാനം.

ജില്ലാ സാമൂഹ്യനീതി വകുപ്പ്, കണ്ണൂര്‍ പ്രസ് ക്ലബ്, നോര്‍ത്ത് മലബാര്‍ ചേംബര്‍ ഓഫ് കൊമേഴ്സ്, ആസ്റ്റര്‍ മിംസ് കണ്ണൂര്‍, എന്നിവയുടെ സംയുക്ത ആഭിമുഖ്യത്തില്‍ ഷെമീര്‍ ഊര്‍പ്പള്ളി തയ്യാറാക്കിയ 'പുനരുത്ഥാനം' ഭിന്നശേഷിക്കാരുടെ പോരാട്ടവീര്യങ്ങള്‍ എന്ന പുസ്തക പകാശനം പുരാവസ്തു, രജിസ്ട്രേഷന്‍ വകുപ്പ് മന്ത്രി രാമചന്ദ്രന്‍ കടന്നപ്പള്ളി ജൂണ്‍ എട്ടിന് 2.30 ന് കണ്ണൂര്‍ ചേംബര്‍ ഹാളില്‍ നിര്‍വഹിക്കും. പരിപാടിയോടനുബന്ധിച്ച് ഭിന്നശേഷിയുള്ളവരുടെ രക്ഷിതാക്കളുടെ സംഗമവും സംവാദവും സംഘടിപ്പിക്കും. 

കണ്ണൂര്‍ ഗവ. എഞ്ചിനിയറിംഗ് കോളേജിലെ സിവില്‍, ഇലക്ട്രിക്കല്‍, ഇലക്ട്രോണിക്സ്, മെക്കാനിക്കല്‍ വിഭാഗങ്ങളില്‍ ട്രേഡ്സ്മാന്‍ തസ്തികയില്‍ നിലവിലുള്ള ഒഴിവുകളിലേക്കും വരാനിരിക്കുന്ന അക്കാദമിക വര്‍ഷത്തില്‍ ഉണ്ടാകാവുന്ന ഒഴിവുകളിലേക്കും നിയമനം നടത്തുന്നതിനായി അഡ്ഹോക് ടെക്നിക്കല്‍ സ്റ്റാഫ് പാനല്‍ രൂപീകരിക്കുന്നു. ഉദ്യോഗാര്‍ത്ഥികള്‍ എല്ലാ അസ്സല്‍ സര്‍ട്ടിഫിക്കറ്റുകള്‍ സഹിതം ജൂണ്‍ 17 ന് രാവിലെ 9.30 ന് സ്ഥാപനത്തിലെ അതാത് വകുപ്പ് തലവന്മാരുടെ മുമ്പാകെ എഴുത്തുപരീക്ഷക്കും അഭിമുഖത്തിനും നേരിട്ട് ഹാജരാകണം

2025 വര്‍ഷത്തില്‍ ട്രോളിംഗ് നിരോധനം നടപ്പിലാക്കുന്നത് മൂലം തൊഴില്‍ നഷ്ടപ്പെടുന്ന യന്ത്രവത്കൃത മത്സ്യബന്ധന യാനങ്ങളിലെ മത്സ്യത്തൊഴിലാളികള്‍ക്കും പീലിങ്ങ് ഉള്‍പ്പെടെയുള്ള അനുബന്ധ തൊഴിലാളികള്‍ക്കും സൗജന്യ റേഷന്‍ ലഭ്യമാക്കുന്നതിനായി ബന്ധപ്പെട്ട യാന ഉടമകള്‍ അതാത് മത്സ്യബന്ധന യാനങ്ങളില്‍ ജോലിചെയ്യുന്ന മത്സ്യത്തൊഴിലാളികളുടെ ലിസ്റ്റ് സഹിതം അപേക്ഷ ബന്ധപ്പെട്ട മത്സ്യഭവനുകളില്‍ ജൂണ്‍ 12 നകം സമര്‍പ്പിക്കണം. ഫോണ്‍- 04972731081

ഇന്‍ഫര്‍മേഷന്‍ ആന്റ് പബ്ലിക്ക് റിലേഷന്‍സ് വകുപ്പ് പത്തനംതിട്ട ജില്ലാ ഇന്‍ഫര്‍മേഷന്‍ ഓഫീസില്‍ കരാര്‍ അടിസ്ഥാനത്തില്‍ ഫോട്ടോഗ്രാഫര്‍മാരുടെ പാനല്‍ തയ്യാറാക്കുന്നതിന് ഫോട്ടോഗ്രാഫര്‍മാരില്‍ നിന്ന് അപേക്ഷ ക്ഷണിച്ചു.

കണ്ണൂര്‍ റൂറല്‍ ജില്ലാ പോലീസ് ഡി എച്ച് ക്യു ക്യാമ്പില്‍ ക്യാമ്പ് ഫോളോവര്‍ തസ്തികയില്‍ നിലവിലുള്ള മൂന്ന് ഒഴിവലേക്ക് (കുക്ക് 2, ധോബി 1) ദിവസ വേതനാടിസ്ഥാനത്തില്‍ 710/ രൂപ പ്രകാരം 59 ദിവസത്തേക്ക് താല്‍ക്കാലികമായി നിയമിക്കുന്നു. അഭിമുഖം ജൂണ്‍ ഒമ്പതിന് രാവിലെ 11 ന് മാങ്ങാട്ടുപറമ്പിലുള്ള കണ്ണൂര്‍ റൂറല്‍ ജില്ലാ പോലീസ് ആസ്ഥാനത്ത് നടത്തും. മുന്‍പരിചയമുള്ളവര്‍ അസ്സല്‍ തിരിച്ചറിയല്‍ രേഖ, പ്രവൃത്തി പരിചയം തെളിയിക്കുന്ന രേഖകള്‍ സഹിതം നേരിട്ട് എത്തണം.