കോട്ടയം ജില്ലയിലെ ഒരു സർക്കാർ സ്ഥാപനത്തിൽ ജെൻഡർ സ്പെഷ്യലിസ്റ്റ് തസ്തികയിലെ താത്ക്കാലിക ഒഴിവിലേക്ക് അപേക്ഷ ക്ഷണിച്ചു. 

സോഷ്യൽ വർക്കിലോ മറ്റേതെങ്കിലും സമാന വിഷയങ്ങളിലോ ബിരുദം ഉണ്ടായിരിക്കണം. ബിരുദാനന്തര ബിരുദം ഉള്ളവർക്ക് മുൻഗണന. സർക്കാർ അല്ലെങ്കിൽ സ്വകാര്യ മേഖലയിൽ ഈ മേഖലയിൽ കുറഞ്ഞത് മൂന്ന് വർഷത്തെ പ്രവൃത്തി പരിചയം ഉണ്ടായിരിക്കണം. താത്പ്പര്യമുള്ള ഉദ്യോഗാർഥികൾ മേയ് മൂന്നിന് മുമ്പായി ബന്ധപ്പെട്ട എംപ്ലോയ്മെൻറ് എക്സ്ചേഞ്ചുകളിൽ പേര് രജിസ്റ്റർ ചെയ്യണം.

മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയിൽ ഉൾപ്പെടുത്തി, 43 ലക്ഷം രൂപ ചെലവിൽ നവീകരിക്കുന്ന മറ്റത്തൂർ ഗ്രാമപഞ്ചായത്തിലെ കാവനാട് റോഡിന്റെ നിർമ്മാണോദ്ഘാടനം കെ. കെ. രാമചന്ദ്രൻ എം.എൽ.എ നിർവഹിച്ചു.

മറ്റത്തൂർ ഗ്രാമപഞ്ചായത്തിലെ വിവിധ റോഡുകൾക്കായി എം.എൽ.എയുടെ ആസ്തി വികസന ഫണ്ടിൽ നിന്ന് കൂടി വിവിധ പദ്ധതികൾ നാടിന്റെ വികസനത്തിനായി നടപ്പിലാക്കി വരികയാണെന്ന് കെ. കെ. രാമചന്ദ്രൻ എം.എൽ.എ പറഞ്ഞു.

ഗ്രാമപഞ്ചായത്ത് പ്രസിഡന്റ് അശ്വതി വി.ബി അധ്യക്ഷയായ യോഗത്തിൽ, ഗ്രാമപഞ്ചായത്ത് അംഗം സനൽ ഉണ്ണികൃഷ്ണൻ സ്വാഗതം പറഞ്ഞു.

കണ്ണൂർ സർവകലാശാല ഡോ.ജാനകി അമ്മാൾ ക്യാമ്പസ്, പാലയാടുള്ള ആന്ത്രോപോളജി പഠനവകുപ്പിൽ 2025-26 അധ്യയന വർഷത്തേക്കുള്ള എം. എ ആന്ത്രോപോളജി പ്രവേശനത്തിന് അപേക്ഷ ക്ഷണിച്ചു. 45 ശതമാനം മാർക്കോടുകൂടിയ ബിരുദമാണ് യോഗ്യത. താത്പര്യമുള്ളവർ admission.kannuruniversity.ac.in എന്ന കണ്ണൂർ സർവകലാശാല വെബ്സൈറ്റിൽ മെയ് 15 ന് മുമ്പായി രജിസ്റ്റർ ചെയ്ത് അപേക്ഷിക്കണം. കൂടുതൽ വിവരങ്ങൾ വെബ്സൈറ്റിൽ ലഭ്യമാണ്.

 ഫോൺ : 0497-2715261, 0497-2715286

കേരള സർക്കാരിൻ്റെ സാംസ്കാരിക വകുപ്പും കൊടകര ബ്ലോക്ക് പഞ്ചായത്തും സംയുക്തമായി നടത്തുന്ന വജ്ര ജൂബിലി ഫെലോഷിപ്പ് പദ്ധതിയുടെ ഭാഗമായി പെയിൻ്റിംഗ്, ചുവർ ചിത്രകല, മോഹിനിയാട്ടം, നാടകം എന്നീ കലകളിൽ സൗജന്യ കലാപരിശീലനത്തിന് അപേക്ഷ ക്ഷണിച്ചു. അപേക്ഷാ ഫോമുകൾ കൊടകര ബ്ലോക്ക് പഞ്ചായത്ത് ഓഫീസിലും ബ്ലോക്കിന് പഞ്ചായത്തിന് കീഴിലുള്ള ഗ്രാമപഞ്ചായത്ത് ഓഫീസുകളിലും ലഭ്യമാണ്.

കൂടുതൽ വിവരങ്ങൾക്ക് 04802751462 എന്ന നമ്പറിൽ ബ്ലോക്ക് പഞ്ചായത്തുമായി ബന്ധപ്പെടുക.

തൃശൂർ ഗവ. മെഡിക്കൽ കോളേജിൽ പുതുതായി നിർമ്മിക്കുന്ന ക്രിട്ടിക്കൽ കെയർ ബ്ലോക്കിന്റെ നിർമ്മാണം ഉടൻ ആരംഭിക്കും. ഇതിനായുള്ള കിക്കോഫ് മീറ്റിംഗ് മെഡിക്കൽ കോളേജ് കോൺഫറൻസ് ഹാളിൽ സേവ്യർ ചിറ്റിലപ്പള്ളി എം എൽ എ യുടെ അധ്യക്ഷതയിൽ ചേർന്നു. ക്രിട്ടിക്കൽ കെയർ യൂണിറ്റ് ആരംഭിക്കുന്നതിനായി ആധുനിക കെട്ടിടം നിർമ്മിക്കുന്നതിനും അനുബന്ധ ഉപകരണങ്ങൾക്കുമായി 23.25 കോടി രൂപയുടെ ഭരണാനുമതി നേരത്തെ ലഭിച്ചിരുന്നു. അതിൽ കെട്ടിടത്തിന്റെ പ്രവൃത്തിക്കുള്ള 16.63 കോടി രൂപയുടെ ഭരണാനുമതി ലഭിക്കുകയും ടെൻഡർ നടപടികൾ പൂർത്തീകരിക്കുകയും ചെയ്തു. 

ഏപ്രില്‍ 21 ന് കണ്ണൂര്‍ പൊടിക്കുണ്ടില്‍ അപകടകരമായ രീതിയില്‍ ബസ്സോടിച്ച് ലോറിയുമായി അപകടമുണ്ടാക്കി ലോറി ഡ്രൈവറുടെ മരണത്തിനിടയാക്കിയ സംഭവത്തില്‍ ബസ്സ് ഡ്രൈവര്‍ വി. കെ. റിബിന്റെ ലൈസന്‍സ് ആറ് മാസത്തേക്ക് മരവിപ്പിച്ചതായും ഐഡിടിആര്‍ പരിശീലനത്തിനായി നിര്‍ദേശിക്കുകയും ചെയ്തതായി ജില്ലാ റീജിയണല്‍ ട്രാന്‍സ്‌പോര്‍ട്ട് ഓഫീസര്‍ അറിയിച്ചു.

ശ്രീനാരായണപുരം ഗ്രാമപഞ്ചായത്തും തൃശ്ശൂർ ജില്ലാ ചെസ് അസോസിയേഷനുമായി സഹകരിച്ച് നടത്തിയ ചെസ് ശില്പശാലയ്ക്ക് സമാപനം.

  ശ്രീനാരായണപുരം പഞ്ചായത്ത്‌ പ്രസിഡൻ്റ് എം എസ് മോഹനൻ സമാപന ചടങ്ങ് ഉദ്ഘാടനം നിർവഹിച്ചു. ഗ്രാമപഞ്ചായത്തിലെ എൽ പി - യു.പി വിദ്യാലയങ്ങളിൽ നിന്നും തെരഞ്ഞെടുത്ത വിദ്യാർത്ഥികൾക്ക് 10 ദിവസങ്ങളിലായാണ് ശില്പശാല നടത്തിയത്. ജില്ലാ ചെസ് അസോസിയേഷൻ ജില്ലാ സെക്രട്ടറി പീറ്റർ ജോസഫിൻ്റെ നേതൃത്വത്തിൽ പനങ്ങാട് സെൻ്റ് ജോർജ്സ് മിക്സെഡ് എൽപി സ്കൂളിലാണ് പരിശീലനം സംഘടിപ്പിച്ചത്.

എച്ച് ടി ലൈനില്‍ അറ്റകുറ്റപ്പണികള്‍ നടക്കുന്നതിനാല്‍ ഏപ്രില്‍ 25 ന് രാവിലെ ഒന്‍പത് മുതല്‍ വൈകുന്നേരം അഞ്ച് വരെ ജനശക്തി ട്രാന്‍സ്ഫോര്‍മര്‍ പരിധിയില്‍ ഭാഗികമായും, എച്ച് ടി എ ബി കേബിള്‍ പ്രവൃത്തി നടക്കുന്നതിനാല്‍ രാവിലെ ഒന്‍പത് മുതല്‍ ഉച്ചയ്ക്ക് മൂന്ന് വരെ ചാപ്പ, കാനച്ചേരി, കാനച്ചേരി പള്ളി, എടയില്‍ പീടിക ട്രാന്‍സ്ഫോര്‍മര്‍ പരിധിയിലും വൈദ്യുതി മുടങ്ങും.

തൃശ്ശൂർ ജില്ലാതല പോലീസ് കംപ്ലയിന്റ്സ് അതോറിറ്റി മെയ് ഏഴിന് കളക്ടറേറ്റ് അനക്സ് കോൺഫറൻസ് ഹാളിൽ നടത്തുവാൻ നിശ്ചയിച്ചിരുന്ന വിചാരണ മെയ് എട്ടിലേക്ക് മാറ്റിയതായി ജില്ലാതല പോലീസ് കംപ്ലയിന്റ്സ് അതോറിറ്റി സെക്രട്ടറി അറിയിച്ചു.