ആറാട്ടുപുഴ പൂരത്തിന്റെ സുഗമമായ നടത്തിപ്പുമായി ബന്ധപ്പെട്ട് റവന്യു വകുപ്പ് മന്ത്രി കെ. രാജന്റെ അധ്യക്ഷതയില്‍ യോഗം ചേര്‍ന്നു. ഏപ്രില്‍ 9 ന് ആഘോഷിക്കുന്ന പൂരം അതിന്റെ എല്ലാ വിധത്തിലുമുള്ള സുഗമമായ സംവിധാനങ്ങളോടും കൂടി നടത്തുന്നതിന് ആവശ്യമായ ക്രമീകരണങ്ങള്‍ ഒരുക്കണമെന്ന് മന്ത്രി ബന്ധപ്പെട്ട വകുപ്പുകള്‍ക്ക് നിര്‍ദ്ദേശം നല്‍കി. പൂരത്തിന് കൂടുതല്‍ ആളുകള്‍ എത്തുന്നതിനാല്‍ ആവശ്യമായ സുരക്ഷാ, ഗതാഗത ക്രമീകരണങ്ങളും മറ്റ് സംവിധാനങ്ങളും ഒരുക്കാന്‍ ബന്ധപ്പെട്ട വകുപ്പുകള്‍ക്ക് മന്ത്രി നിര്‍ദ്ദേശം നല്‍കി.

സംസ്ഥാന സർക്കാർ കിഫ്ബി ധനസഹായത്തോടെ നിർമ്മിച്ച ജില്ലയിലെ ആദ്യ മലയോര ഹൈവേ പട്ടിക്കാട് വിലങ്ങന്നൂർ റീച്ചിൻ്റെ ഉദ്ഘാടനം സംസ്ഥാന പൊതുമരാമത്ത് ടൂറിസം വകുപ്പ് മന്ത്രി പി എ മുഹമ്മദ് റിയാസ് നിർവഹിച്ചു.
 
പശ്ചാത്തല സൗകര്യങ്ങളുടെ മുൻഗണനാപട്ടികയിൽ ഉള്ളതാണ് മലയോര ഹൈവേ എന്നും ഭാവി പ്രവർത്തനങ്ങൾക്ക് ഊർജ്ജം നൽകുന്ന പിന്തുണയാണ് ജനങ്ങൾ പദ്ധതിക്ക് നൽകിയതെന്നും മന്ത്രി പി എ മുഹമ്മദ് റിയാസ് അഭിപ്രായപ്പെട്ടു. മലയോര ഹൈവേയുടെ
793 കിലോമീറ്റർ വരുന്ന  250 കിലോമീറ്റർ
റോഡ് 2025 ഓടെ പൂർത്തിയാകും.

ആധുനിക തൊഴിലവസരങ്ങൾക്കനുസൃതമായി വിദ്യാർഥികളെ പരിശീലിപ്പിച്ചെടുക്കുന്ന രീതിയിൽ സാങ്കേതിക വിദ്യാഭ്യാസ രംഗത്തെ മാറ്റിയെടുക്കാനാണ് സർക്കാർ  ശ്രമിക്കുന്നതെന്ന് സഹകരണ- തുറമുഖം- ദേവസ്വം വകുപ്പ് മന്ത്രി വി.എൻ. വാസവൻ പറഞ്ഞു. കടുത്തുരുത്തി ഗവൺമെന്റ് പോളിടെക്നിക് കോളജിന്റെ രജത ജൂബിലി ആഘോഷങ്ങൾ ഉദ്ഘാടനം ചെയ്യുകയായിരുന്നു അദ്ദേഹം.  കോഴ്‌സുകളുടെ വൈവിധ്യവൽക്കരണത്തിലൂടെയേ പോളിടെക്‌നിക്കുകളെ മുന്നോട്ടുകൊണ്ടുപോകാൻ കഴിയൂ എന്നും മന്ത്രി പറഞ്ഞു. വിവരസാങ്കേതികവിദ്യയിൽ ഓരോ സെക്കൻഡിലും മാറ്റം വന്നുകൊണ്ടിരിക്കുകയാണ്. അതനുസരിച്ചുള്ള മാറ്റം വിദ്യാഭ്യാസത്തിലും ഉണ്ടാകണം.

വൈക്കം മഹാദേവക്ഷേത്രത്തിൽ 12 വർഷത്തിൽ ഒരിക്കൽ മാത്രം നടക്കുന്ന കോടി അർച്ചനയും വടക്കുപുറത്തു പാട്ടും മഹോത്സവുമായി ബന്ധപ്പെട്ട് വകുപ്പുകളുടെ ഏകോപനം ഉറപ്പാക്കാൻ ദേവസ്വം-തുറമുഖ- സഹകരണ വകുപ്പു മന്ത്രി വി.എൻ. വാസവന്റെ അധ്യക്ഷതയിൽ വൈക്കം സത്യാഗ്രഹ മെമ്മോറിയൽ ഹാളിൽ ചേർന്ന അവലോകനയോഗം നിർദേശിച്ചു. ചടങ്ങുകൾ വിവിധ സർക്കാർ വകുപ്പുകളുടെയും വടക്കുപുറത്തു പാട്ടു കമ്മറ്റിയുടെയും ക്ഷേത്രഭാരവാഹികളുടെയും ഒത്തൊരുമിച്ച പ്രവർത്തനത്തിലൂടെ പിഴവുകളില്ലാതെ നടത്തണമെന്നു ദേവസ്വം മന്ത്രി ആവശ്യപ്പെട്ടു.

 ഏറ്റുമാനൂർ ഗവൺമെന്റ് ഐ.ടി.ഐയിൽ ടെക്‌നീഷ്യൻ പവർ ഇലക്ട്രോണിക്‌സ് സിസ്റ്റം ട്രേഡിലേയ്ക്ക് മണിക്കൂർ വേതനാടിസ്ഥാനത്തിൽ ഇൻസ്ട്രക്ടർമാരെ നിയമിക്കുന്നു. ഇലക്ട്രോണിക്‌സ്/ ഇലക്ട്രോണിക്‌സ് ആൻഡ് ടെലി കമ്മ്യൂണിക്കേഷൻ/ ഇലക്ട്രോണിക്‌സ് ആൻഡ് കമ്മ്യൂണിക്കേഷൻ എൻജിനീയറിങ്ങിൽ ബി.ടെക്കും ഒരു വർഷ പ്രവൃത്തിപരിചയവും അല്ലെങ്കിൽ ഡിപ്ലോമയും രണ്ട് വർഷ പ്രവൃത്തിപരിചയവും അല്ലെങ്കിൽ ടെക്‌നീഷ്യൻ പവർ ഇലക്ട്രോണിക്‌സ് സിസ്റ്റം ട്രേഡിൽ എൻ.ടി.സിയും മൂന്ന് വർഷ പ്രവൃത്തിപരിചയവുമാണ് യോഗ്യത. യോഗ്യതയുള്ള ഉദ്യോഗാർത്ഥികൾ മാർച്ച് 23 രാവിലെ 10.30 ന് അസൽ സർട്ടിഫിക്കറ്റുകളുമായി കോളജ് പ്രിൻസിപ്പലിന് മുൻപിൽ ഹാജരാകണം.

ചേലക്കരയിലെ വന്യജീവി ആക്രമണം തടയുന്നതിൻ്റെ ഭാഗമായി സോളാർ വേലി സ്ഥാപിക്കുന്നതിൻ്റെ ഉദ്ഘാടനം ആലത്തൂർ ലോക്‌സഭാംഗം കെ. രാധാകൃഷ്ണൻ എം പി നിർവഹിച്ചു. രാഷ്ട്രീയ കൃഷി വികാസ് യോജന പദ്ധതി വഴി 70 ലക്ഷം രൂപ ചെലവിലാണ് സോളാർ വേലി നിർമിച്ചത്.

വന്യജീവി ആക്രമണങ്ങളിൽ നിന്നും ജനങ്ങൾക്ക് സംരക്ഷണം ലഭിക്കാനും കാർഷിക മലയോര മേഖലയെ സംരക്ഷിക്കുന്നതിനും വേണ്ടിയുള്ള പരിഹാരമായാണ് സോളാർ വേലി നിർമ്മിക്കുന്നതെന്ന് ചടങ്ങ് ഉദ്ഘാടനം ചെയ്ത് കൊണ്ട് എം പി പറഞ്ഞു. സംസ്ഥാന, കേന്ദ്ര സർക്കാരുകൾ സംയുക്തമായി പദ്ധതികൾ നടപ്പിലാക്കണം എന്നും വന്യജീവികളുടെ സംരക്ഷണത്തിന് നടപടികൾ വേണമെന്നും എംപി പറഞ്ഞു.

#ഹരിതചട്ടം പാലിച്ച് പൊങ്കാല#

#അന്നദാനത്തിന് രജിസ്ട്രേഷൻ നിർബന്ധം#

കരിക്കകം ശ്രീ ചാമുണ്ഡി ക്ഷേത്രത്തിൽ ഏപ്രിൽ 3 മുതൽ 9 വരെ നടക്കുന്ന ഉത്സവത്തോടനുബന്ധിച്ച് വിവിധ വകുപ്പുകളിലെ ഉദ്യോഗസ്ഥരുടെ അവലോകന യോഗം ചേർന്നു.

ക്ഷേത്രം ട്രസ്റ്റ് ഹാളിൽ നടന്ന യോഗത്തിൽ കടകംപള്ളി സുരേന്ദ്രൻ എം എൽ എ അധ്യക്ഷത വഹിച്ചു. ആറ്റുകാൽ പൊങ്കാലയ്ക്കു ശേഷം ഏറ്റവും പ്രാധാന്യത്തോടെ നടത്തുന്നതാണ് കരിക്കകം പൊങ്കലയെന്ന് എംഎൽഎ പറഞ്ഞു. ക്ഷേത്ര പരിസരത്തെ മയക്കുമരുന്ന് വ്യാപനം തടയുന്നതിന് വിവിധ വകുപ്പുകളുടെ ഏകോപനം ഉണ്ടാകണമെന്ന് അദ്ദേഹം ആവശ്യപ്പെട്ടു.

വാർഷിക സ്‌റ്റോക്കെടുപ്പ് പ്രമാണിച്ച് ഏപ്രിൽ ഒന്ന്, രണ്ട് തീയതികളിൽ ജില്ലാ സ്‌റ്റേഷനറി ഓഫിസിൽനിന്നു സ്‌റ്റേഷനറി വിതരണം ഉണ്ടായിരിക്കുന്നതല്ലെന്ന് ജില്ലാ സ്‌റ്റേഷനറി ഓഫിസർ അറിയിച്ചു.

എളവള്ളി ഗ്രാമപഞ്ചായത്തിലെ പറക്കാട് അഞ്ചാം വാർഡ് വ്യാപാരഭവൻ റോഡ് കോൺക്രീറ്റിങ് പ്രവൃത്തികൾ പൂർത്തീകരിച്ച് തുറന്നു കൊടുത്തു. റോഡിൻ്റെ ഉദ്ഘാടനം എളവള്ളി ഗ്രാമപഞ്ചായത്ത് പ്രസിഡന്‍റ്  ജിയോ ഫോക്സ് നിർവഹിച്ചു. ധനകാര്യ കമ്മീഷൻ ഗ്രാൻഡിൽനിന്നും 5 ലക്ഷം രൂപ വിനിയോഗിച്ചാണ് റോഡിൻ്റെ കോൺക്രീറ്റിംഗ് ഉൾപ്പെടെയുള്ള നവീകരണ പ്രവർത്തനങ്ങൾ നടത്തിയത്. റോഡിൻ്റെ രണ്ടാംഘട്ടം പ്രവർത്തനങ്ങൾക്കായി ഈ വർഷം 4 ലക്ഷം രൂപയും വകയിരുത്തിയിട്ടുണ്ട്.

കുടുംബശ്രീ ജില്ലാ മിഷന്റെ നേതൃത്വത്തിൽ നെടുമങ്ങാട് ഡി.വൈ.എസ്.പി ഓഫീസിൽ ആരംഭിച്ച സ്നേഹിത- പോലീസ്  എക്സ്റ്റന്‍ഷന്‍ സെന്‍റർ നെടുമങ്ങാട് നഗരസഭ ചെയർപേഴ്സൺ സി. എസ് ശ്രീജ ഉദ്ഘാടനം ചെയ്തു.

പോലീസ് സ്റ്റേഷനുകളിൽ വിവിധ ആവശ്യങ്ങൾക്കായി എത്തുന്ന അതിക്രമങ്ങൾക്കും ചൂഷണങ്ങൾക്കും ഇരയായ സ്ത്രീകൾക്കും കുട്ടികൾക്കും മാനസിക പിന്തുണ നൽകുന്നതിന്   സംസ്ഥാനത്തെ എല്ലാ ഡി.വൈ.എസ്.പി/എ.സി.പി ഓഫീസുകളിലും കുടുംബശ്രീയുടെ നേതൃത്വത്തിൽ സ്നേഹിത എക്സ്റ്റൻഷൻ സെന്ററുകൾ ആരംഭിക്കുന്നു. ഇതിന്റെ ഭാഗമായാണ് നെടുമങ്ങാട് ഡി. വൈ. എസ്. പി ഓഫീസിലും സെന്റർ ആരംഭിച്ചത്.