പാലക്കാട് കണ്‍സ്യൂമര്‍ഫെഡിന്റെ റീജിയണല്‍ പര്‍ച്ചേഴ്‌സ് കമ്മിറ്റി യോഗം മാര്‍ച്ച് 25 ന് രാവിലെ 11 മണിക്ക് കണ്‍സ്യൂമര്‍ഫെഡിന്റെ റീജിയണല്‍ ഓഫീസില്‍ ചേരും. പാലക്കാട് കണ്‍സ്യൂമര്‍ഫെഡിന്റെ ത്രിവേണി സൂപ്പര്‍ മാര്‍ക്കറ്റുകളിലേക്ക് 2025 ഏപ്രില്‍ മാസത്തിലെ വില്പനക്കാവശ്യമായ പലചരക്ക്, കോസ്‌മെറ്റിക്‌സ്, സ്റ്റേഷനറി,  ഹൗസ് ഹോള്‍ഡ്,  വെജിറ്റബിള്‍സ് തുടങ്ങിയ സാധനങ്ങള്‍ വിതരണം ചെയ്യാന്‍ താല്‍പര്യമുള്ള വിതരണക്കാര്‍ വില വിവരം, സാമ്പിള്‍ എന്നിവ അടങ്ങിയ ക്വട്ടേഷന്‍ സഹിതം കമ്മിറ്റിയില്‍ പങ്കെടുക്കണമെന്ന് റീജിയണല്‍ മാനേജര്‍ അറിയിച്ചു.

വടക്കന്തറ പൊലീസ് ക്വാര്‍ട്ടേഴ്സ് വളപ്പില്‍ മതിലിനോട് ചേര്‍ന്നു നില്‍ക്കുന്ന ഒരു അത്തിമരം, ഒരു മഴ മരം എന്നിവ മുറിച്ചു മാറ്റുന്നതിനുള്ള ലേലം മാര്‍ച്ച് 19 ന് രാവിലെ 11 മണിക്ക് പാലക്കാട് സബ് ഡിവിഷണല്‍ പൊലീസ് ഓഫീസില്‍ നടക്കും. പങ്കെടുക്കാന്‍ ആഗ്രഹിക്കുന്നവര്‍ ലേലം ആരംഭിക്കുന്നതിന് മുമ്പ് ലേല സ്ഥലത്ത് ഹാജരായി നിരതദ്രവ്യമായി ആയിരം രൂപ അടയ്ക്കണം. കൂടുതല്‍ വിവരങ്ങള്‍ക്ക് ഫോണ്‍: 0491 2536700.

പൊതുവിതരണ ഉപഭോക്തൃകാര്യ വകുപ്പിന്റെ ആഭിമുഖ്യത്തില്‍ ലോക ഉപഭോക്തൃ അവകാശ ദിനാചരണം ഇന്ന് (മാര്‍ച്ച് 15) നടക്കും. രാവിലെ 10 മണിക്ക് പാലക്കാട് തൃപ്തി ഹാളില്‍ നടക്കുന്ന ജില്ലാതല പരിപാടിയുടെ ഉദ്ഘാടനം ജില്ലാ ഉപഭോക്തൃതര്‍ക്ക പരിഹാര കമ്മീഷന്‍ പ്രസിഡന്റ് വി. വിനയ് മേനോന്‍ നിര്‍വഹിക്കും. ജില്ലാ സപ്ലൈ ഓഫീസര്‍ എ.എസ് ബീന അധ്യക്ഷത വഹിക്കുന്ന പരിപാടിയില്‍ ഓയിസ്‌ക യൂത്ത് ഫോറം സൗത്ത് ഇന്ത്യ ഡയറക്ടര്‍ ഡോ. എന്‍ ശുദ്ധോധനന്‍ മുഖ്യപ്രഭാഷണം നടത്തും. 'സുസ്ഥിര ജീവിതശൈലിയിലേക്കുള്ള ശരിയായ മാറ്റം' എന്നതാണ് ഈ വര്‍ഷത്തെ ലോക ഉപഭോക്തൃ അവകാശ ദിനത്തിന്റെ പ്രമേയം.

നെന്മാറ- വല്ലങ്ങി വേലയോടനുബന്ധിച്ച് ഏപ്രില്‍ രണ്ട്, മൂന്ന് തീയതികളില്‍ നെന്മാറ, അയിലൂര്‍  ഗ്രാമപഞ്ചായത്ത് പരിധികളില്‍  മദ്യ നിരോധനം ഏര്‍പ്പെടുത്തി ജില്ലാ കളക്ടര്‍ ഉത്തരവിട്ടു.  അന്നേ ദിവസങ്ങളില്‍ രാവിലെ ആറു മണി മുതല്‍ രാത്രി പത്ത് മണി വരെ ഈ പ്രദേശങ്ങളിലെ മദ്യവില്‍പ്പന ശാലകള്‍  തുറന്നു പ്രവര്‍ത്തിക്കാന്‍ പാടില്ല. ഉത്തരവ് ലംഘിക്കുന്നവര്‍ക്കെതിരെ കേരള അബ്കാരി ആക്ട് 54 അനുസരിച്ച് നിയമ നടപടി സ്വീകരിക്കുമെന്നും ജില്ലാ കളക്ടര്‍ അറിയിച്ചു.
 

ഗായത്രിപ്പുഴ പദ്ധതിയിലെ ജലസേചനവുമായി ബന്ധപ്പെട്ട് ഉപദേശക സമിതിയോഗം ഇന്ന് (മാര്‍ച്ച് 15) ന് ഉച്ചയ്ക്ക് 12 ന് കൊല്ലങ്കോട് ബ്ലോക്ക് കമ്മ്യൂണിറ്റിഹാളില്‍ ചേരുമെന്ന് എക്സിക്യൂട്ടീവ് എഞ്ചിനീയര്‍ അറിയിച്ചു.

കൊല്ലങ്കോട് ബ്ലോക്ക് പഞ്ചായത്ത് 2024-25 വര്‍ഷത്തെ വാര്‍ഷിക പദ്ധതിയില്‍ ഉള്‍പ്പെടുത്തി നിര്‍മ്മിക്കുന്ന കൊടുവായൂര്‍ വൃദ്ധവികലാംഗ സദനത്തിന്റെ നിര്‍മ്മാണോദ്ഘാടനം ഇന്ന് (മാര്‍ച്ച് 15) വൈകിട്ട് നാലിന്്  കെ. രാധാകൃഷ്ണന്‍ എം.പി.നിര്‍വഹിക്കും. ഇതിനോടനുബന്ധിച്ച് പൊതുയോഗം കൊടുവായൂര്‍ ഗ്രാമപീടികയില്‍ ചേരും.

കേന്ദ്ര യുവജന കായിക മന്ത്രാലയത്തിന്റെ കീഴിൽ നടത്തുന്ന ഖേലോ ഇന്ത്യ ഗെയിംസിന്റെ ഭാഗമായി ദേശിയ ഫെൻസിങ് ചാമ്പ്യൻഷിപ്പ് - അസ്‌മിത ലീഗിന്റെ മൂന്നാം ഘട്ടം ഹൈബി ഈഡൻ എം.പി ഉദ്ഘാടനം ചെയ്തു.  

എറണാകുളം രാജീവ് ഗാന്ധി ഇൻഡോർ സ്റ്റേഡിയത്തിൽ കേരള ഫെൻസിങ് അസോസിയേഷന്റെ നേത്യത്വത്തിൽ മാർച്ച് 18 വരെ ആണ് മത്സരം നടക്കുന്നത്. അഞ്ചു ദിവസങ്ങളിലായി നടക്കുന്ന മത്സരത്തിൽ നാനൂറിലധികം കായികതാരങ്ങൾ പങ്കെടുക്കും.