കുട്ടികളിലെ അക്കാദമിക് മികവും ഗുണനിലവാരവും കൂടുതൽ മെച്ചപ്പെടുത്തുന്നതിനായി സംസ്ഥാന സർക്കാർ ആരംഭിച്ച സമഗ്ര വിദ്യാഭ്യാസ ഗുണമേന്മാ പദ്ധതിയുടെ ജില്ലാതല ഉദ്ഘാടനം മാർച്ച് 15ന് രാവിലെ പത്തുമണിക്ക് സഹകരണ-തുറമുഖ-ദേവസ്വം വകുപ്പ് മന്ത്രി വി.എൻ. വാസവൻ നിർവഹിക്കും. കോട്ടയം എം.ഡി. സെമിനാരി ഹയർ സെക്കൻഡറി സ്‌കൂൾ ഓഡിറ്റോറിയത്തിൽ നടക്കുന്ന പരിപാടിയിൽ തിരുവഞ്ചൂർ രാധാകൃഷ്ണൻ എം.എൽ.എ. അധ്യക്ഷത വഹിക്കും. ജില്ലാ വിദ്യാഭ്യാസസമിതിയുടെ നേതൃത്വത്തിൽ തദ്ദേശ സ്വയംഭരണ സംവിധാനങ്ങളുടെയും ജില്ലാ ഭരണകൂടത്തിന്റെയും പിന്തുണയോടെയാണ് സമഗ്ര വിദ്യാഭ്യാസ ഗുണമേന്മാ പദ്ധതി നടപ്പിലാക്കുന്നത്.

പാചകവാതക വിതരണവുമായി ബന്ധപ്പെട്ട പരാതികൾ പരിഹരിക്കുന്നതിന് അദാലത്ത് നടത്തി. കളക്ട്രേറ്റിലെ തൂലിക കോൺഫറൻസ് ഹാളിൽ നടന്ന അദാലത്തിൽ അഡീഷണൽ ജില്ലാ മജിസ്ട്രേറ്റ് എസ്. ശ്രീജിത്ത് അധ്യക്ഷത വഹിച്ചു. ഓയിൽ കമ്പനി പ്രതിനിധികൾ, പാതകവാതക വിതരണ ഏജൻസി പ്രതിനിധികൾ, പൊതു വിതരണ വകുപ്പ് ഉദ്യോഗസ്ഥർ, ഉപഭോക്തൃ സംഘടനാ പ്രതിനിധികൾ, പൊതുജനങ്ങൾ എന്നിവർ പങ്കെടുത്തു.

 കേരള വനിതാ കമ്മീഷൻ കോട്ടയം ജില്ലാതല അദാലത്ത് മാർച്ച് 14 ന് ചങ്ങനാശേരി മുനിസിപ്പൽ ടൗൺ ഹാളിൽ രാവിലെ 10 മണി മുതൽ നടക്കും. അദാലത്തിൽ പുതിയ പരാതികളും സ്വീകരിക്കും.​  

 അഭ്യസ്തവിദ്യർക്ക് തൊഴിലും വിദ്യാർഥികൾക്ക് തൊഴിൽപരിശീലനവും ഒരുക്കുന്ന വിജ്ഞാനകേരളം ജനകീയ ക്യാംപയിൻ  ജില്ലയിൽ സജീവമാകുന്നു. തദ്ദേശ സ്വയംഭരണ വകുപ്പിന്  കീഴിൽ കേരള നോളജ് ഇക്കോണമി മിഷന്റെ നേതൃത്വത്തിലുള്ള പദ്ധതിക്ക് കിലയുടെയും കുടുംബശ്രീ മിഷന്റെയും സമ്പൂർണ പങ്കാളിത്തം ഉണ്ട്.
 ഒരു വർഷം അഞ്ചുലക്ഷം പേർക്ക് തൊഴിൽ, രണ്ടുലക്ഷം പേർക്ക് നൈപുണ്യ പരിശീലനം എന്നീ പ്രഖ്യാപനത്തോടെ ആയിരുന്നു  സംസ്ഥാനതലത്തിൽ പദ്ധതിയുടെ തുടക്കം. ജില്ലയിൽ തദ്ദേശസ്ഥാപന അടിസ്ഥാനത്തിൽ പദ്ധതി കാര്യക്ഷമമാക്കുന്നതിനുള്ള പ്രവർത്തനങ്ങളാണ് നിലവിൽ പുരോഗമിക്കുന്നത്.

പാഞ്ഞാള്‍ ഗ്രാമീണ വായനശാലയില്‍ തുടങ്ങിയ പാഞ്ഞാള്‍ പഞ്ചായത്ത് ജോബ് സ്റ്റേഷന്‍ ഗ്രാമ പഞ്ചായത്ത് പ്രസിഡന്റ് വി. തങ്കമ്മ ഉദ്ഘാടനം ചെയ്തു. വിവിധ യോഗ്യതകളുള്ള ഉദ്യോഗാര്‍ത്ഥികള്‍ക്കായി ജോബ് രജിസ്‌ട്രേഷനും അവര്‍ക്ക് ആവശ്യമായ തൊഴില്‍ കണ്ടെത്തുന്നതിനും ഇന്റര്‍വ്യുകളില്‍ പങ്കെടുക്കുന്നതിനും അടക്കമുള്ള സേവനങ്ങളും ഇനി മുതല്‍ പഞ്ചായത്തിലെ ജോബ് സ്റ്റേഷന്‍ വഴി ലഭ്യമാകും.

 ജില്ലാ എംപ്ലോയബിലിറ്റി സെന്ററിൽ നൂറ്റമ്പതിലധികം  ഒഴിവുകളിലേക്ക് വോക്ക് ഇൻ ഇന്റർവ്യൂ നടത്തുന്നു. മാർച്ച് 15ന് രാവിലെ പത്തിനു നടക്കുന്ന അഭിമുഖത്തിൽ എംപ്ലോയബിലിറ്റി സെന്ററിൽ നേരത്തെ രജിസ്റ്റർ ചെയ്തിട്ടുള്ളവർക്കും 250 രൂപ ഫീസ് അടച്ച് സ്പോട്ട് രജിസ്ട്രേഷൻ ചെയ്തും പങ്കെടുക്കാം. വിശദ വിവരത്തിന് ഫോൺ: 0481-2563451.

 കാഞ്ഞിരപ്പള്ളി താലൂക്കിലെ കോരുത്തോട്, ഏരുമേലി തെക്ക്, എരുമേലി വടക്ക് വില്ലേജുകളിലേക്ക് മൂന്നാംഘട്ട ഡിജിറ്റൽ സർവെയുടെ ഫീൽഡ് ജോലി ആരംഭിക്കുന്ന തീയതി മുതൽ ഒരു വർഷത്തേക്ക് ടാക്സി പെർമിറ്റുള്ള ഫ്രണ്ട് വീൽ വാഹനങ്ങൾ( മഹീന്ദ്ര ബോലേറോ,ജീപ്പ് തുടങ്ങിയവ) മാസ വാടകക്ക് ലഭ്യമാക്കുന്നതിന് ക്വട്ടേഷൻ ക്ഷണിച്ചു. മാർച്ച് 17ന് വൈകീട്ട് അഞ്ചിനകം വാഹന ഉടമകൾക്കോ വ്യക്തികൾക്കോ അസിസ്റ്റന്റ് ഡയറക്ടർ റീസർവെ, കോട്ടയം-686001 എന്ന വിലാസത്തിൽ തപാൽ മുഖേനയോ നേരിട്ടോ   ക്വട്ടേഷൻ നൽകാം. വിശദവിവരത്തിന് ഫോൺ: 0481 2567092, 9747946564.

 പൊലീസ് സ്റ്റേഷനുകളില്‍ പരാതികളുമായി എത്തുന്നവര്‍ക്ക് ആവശ്യമായ മാനസിക പിന്തുണ ഉറപ്പാക്കുന്നു. അവരുടെ പ്രശ്‌നങ്ങള്‍ പഠിച്ച് മാനസികാവസ്ഥ അവലോകനം ചെയ്ത് പൊലീസുമായി ബന്ധപ്പെട്ടും നിയമ സഹായത്തിനും സഹായിക്കുന്നു. ആവശ്യക്കാര്‍ക്ക് റഫറിംഗ് സംവിധാനത്തിലൂടെ മാനസികാരോഗ്യ സേവനം ലഭ്യമാക്കുന്നു. സമൂഹത്തിലെ ദുര്‍ബല ജനവിഭാഗങ്ങള്‍ നേരിടുന്ന ചൂഷണങ്ങളും അതിക്രമങ്ങളും ഇല്ലാതാക്കുന്നതിനും അവരുടെ അവകാശങ്ങള്‍ ഉറപ്പാക്കാനും മുഖ്യധാരയിലേക്ക് എത്തിക്കുന്നതിനും സ്‌നേഹിത എക്‌സ്‌പെന്‍ഷന്‍ കേന്ദ്രത്തിന് സാധിക്കും. സമൂഹത്തിന്റെ മാനസികാരോഗ്യ മേഖലയില്‍ സമ്പൂര്‍ണ്ണവും സുസ്ഥിരവുമായി വികസനമാണ് പദ്ധതി ലക്ഷ്യമിടുന്നത്.

കുടുംബശ്രീ മിഷനും സംസ്ഥാന ആഭ്യന്തര വകുപ്പും സംയുക്തമായി നടപ്പാക്കുന്ന സ്‌നേഹിത എക്സ്റ്റന്‍ഷന്‍ സെന്ററുകള്‍ നാളെ (മാര്‍ച്ച് 15) മുതല്‍ ആരംഭിക്കും. സംസ്ഥാനത്തുടനീളം എസിപി, ഡിവൈഎസ്പി ഓഫീസുകള്‍ കേന്ദ്രീകരിച്ചാണ് പദ്ധതി നടപ്പിലാക്കുന്നത്. കുടുംബശ്രീ മിഷന്റെ   സ്‌നേഹിത ജെന്‍ഡര്‍ ഹെല്‍പ്പ് ഡസ്‌ക്കിന്റെ കൗണ്‍സിലിംഗ് സേവനം പോലീസ് സ്റ്റേഷനുകളിലും ഉറപ്പാക്കുകയാണ്. പോലീസ് സ്റ്റേഷനുകളില്‍ വിവിധ ആവശ്യങ്ങള്‍ക്ക് എത്തുന്നവരില്‍ അടിയന്തര മാനസിക പിന്തുണ ആവശ്യമുള്ളവര്‍ക്ക് കൗണ്‍സിലിംഗ് ഉള്‍പ്പെടെയുള്ള സേവനങ്ങള്‍ ലഭ്യമാക്കും.

ദുരന്തനിവാരണവുമായി ബന്ധപ്പെട്ടു വിജയപുരം ക്ലസ്റ്റർ തല മോക്ഡ്രിൽ ഏപ്രിൽ 11ന് പൊൻപള്ളിയിൽ സംഘടിപ്പിക്കും. ഇതിന്റെ ഭാഗമായുള്ള ടേബിൾടോപ്പ് യോഗം ഏപ്രിൽ എട്ടിന് കോട്ടയം താലൂക്ക് ഓഫീസിൽ ചേരും. റീബിൽഡ് കേരളാ ഇനിഷ്യേറ്റീവ് ഫോർ റിസൽട്‌സ് പദ്ധതിയുടെ ഭാഗമായി കോട്ടയം, പത്തനംതിട്ട, ആലപ്പുഴ, ഇടുക്കി ജില്ലകളിലാണ് ദുരന്തനിവാരണവുമായി ബന്ധപ്പെട്ടു തദ്ദേശ സ്ഥാപനങ്ങളുടെ ക്ലസ്റ്റർ തലത്തിൽ മോക്ഡ്രില്ലുകൾ നടത്തുന്നത്.