മങ്കട ഗവ. ഹയർസെക്കൻഡറി സ്‌കൂളിൽ സ്‌കിൽ ഡവലപ്‌മെൻറ് സെൻററിലെ വെബ് ഡവലപ്പർ എന്ന കോഴ്‌സിലേക്ക് ലാബ് ഉപകരണങ്ങൾ വിതരണം ചെയ്യുന്നതിന് ടെൻഡർ ക്ഷണിച്ചു. ഉപകരണങ്ങളുടെ വിശദമായ പട്ടിക സ്‌കൂൾ നോട്ടീസ് ബോർഡിൽ പ്രദർശിപ്പിച്ചിട്ടുണ്ട്. ഏപ്രിൽ രണ്ടിന് വൈകീട്ട് മൂന്നിനുള്ളിൽ പ്രിൻസിപ്പൽ, ഗവ. എച്ച്.എസ്.എസ് മങ്കട, മങ്കട പി.ഒ, മലപ്പുറം, പിൻ: 679324 എന്ന വിലാസത്തിൽ ലഭിക്കണം. ഫോൺ: 04933 236848.

കോടതിപ്പിഴയിനത്തിൽ 3,66,250 രൂപ  ഈടാക്കുന്നതിനായി നിലമ്പൂർ താലൂക്കിലെ കേരള എസ്‌റ്റേറ്റ് വില്ലേജിൽ ജപ്തി ചെയ്ത ബ്ലോക്ക് 152ലെ റി.സ. 258/3-3 ലെ 0.0405 ഹെക്ടർ സ്ഥലവും അതിലെ കെട്ടിടവും ഏപ്രിൽ 23ന് രാവിലെ 11ന് കേരള എസ്‌റ്റേറ്റ് വില്ലേജ് ഓഫീസിൽ വെച്ച് ലേലം ചെയ്ത് വിൽക്കുമെന്ന്  തഹസിൽദാർ അറിയിച്ചു.

കേരളത്തിലെ വിദ്യാര്‍ത്ഥികള്‍ക്കിടയില്‍ വര്‍ധിച്ചുവരുന്ന ലഹരി ഉപയോഗത്തിനെതിരെ ജാഗ്രതയും, ശ്രദ്ധയും ഉണര്‍ത്താനായി സംഘടിപ്പിക്കുന്ന   സഞ്ചരിക്കുന്ന തെരുവു നാടക സംഗീത ശില്പം മലപ്പുറം കലക്ടറേറ്റ് പരിസരത്ത് മാര്‍ച്ച് 15ന് മൂന്നു മണിക്ക് നടക്കും. ജില്ലാ കലക്ടര്‍ വി ആര്‍ വിനോദ് പരിപാടി ഉദ്ഘാടനം ചെയ്യും. രാജ്യസഭ എം പി പി വി അബ്ദുല്‍ വഹാബ് അധ്യക്ഷത വഹിക്കും. ജില്ലയിലെ വിവിധ വിദ്യാലയങ്ങളിലും, തെരുവുകളിലും പരിപാടി അവതരിപ്പിക്കും. നിലമ്പൂര്‍ പീവീസ് മോഡല്‍ സ്‌കൂള്‍ വിദ്യാര്‍ത്ഥികളാണ് സംഗീതശില്പം അവതരിപ്പിക്കുന്നത്.

എല്ലാ മത്സ്യത്തൊഴിലാളികളേയും 2025-26 സാമ്പത്തിക വര്‍ഷത്തില്‍ അപകട ഇന്‍ഷുറന്‍സ് പദ്ധതിയില്‍ അംഗങ്ങളാക്കുന്നതിനായുള്ള ജില്ലാതല ബോധവല്‍ക്കരണ ക്യാപയിൻ ഉദ്ഘാടനവും ഇന്‍ഷുറന്‍സ് ആനുകൂല്യ വിതരണവും നാളെ (മാര്‍ച്ച് 14 ന്) ഉണ്ണിയാല്‍ ഫിഷറീസ് എക്സ്റ്റന്‍ഷന്‍ സെന്ററില്‍ കായിക-വഖഫ്-ഹജ്ജ് തീര്‍ത്ഥാടന വകുപ്പ് മന്ത്രി വി. അബ്ദുറഹ്‌മാന്‍ നിര്‍വ്വഹിക്കും. മത്സ്യബോര്‍ഡ് ചെയര്‍മാന്‍ കൂട്ടായി ബഷീര്‍, മത്സ്യഫെഡ് ഭരണസമിതി അംഗം പി.പി സൈതലവി, നിറമരുതൂര്‍ ഗ്രാമ പഞ്ചായത്ത് പ്രസിഡണ്ട് ഇസ്മായില്‍ പുതുശ്ശേരി, സംഘടനാ പ്രതിനിധികള്‍,രാഷ്ട്രീയ പ്രതിനിധികള്‍, എന്നിവര്‍ പങ്കെടുക്കും.

കേരള സർക്കാർ സ്ഥാപനമായ കേരള സ്റ്റേറ്റ് റൂട്രോണിക്‌സ് സർട്ടിഫിക്കറ്റോടു കൂടി ഒരു വർഷം, ആറ് മാസം, മൂന്ന് മാസം ദൈർഘ്യമുള്ള ലോജിസ്റ്റിക്‌സ് ആൻഡ് സപ്ലൈ ചെയിൻ മാനേജ്‌മെന്റ് കോഴ്സുകളിൽ തിരുവനന്തപുരം, ആറ്റിങ്ങൽ എന്നിവിടങ്ങളിലെ അംഗീകൃത പഠന കേന്ദ്രങ്ങളിലേക്ക് ഇന്റേൺഷിപ്പോടു കൂടി റെഗുലർ/ പാർടൈം ബാച്ചുകളിലേക്ക് എസ്.എസ്.എൽ.സി, പ്ലസ് ടു, ഡിഗ്രി വിജയിച്ചവരിൽ നിന്നും അപേക്ഷ ക്ഷണിച്ചു. ഫോൺ: 7994926081.

കേരള മീഡിയ അക്കാദമിയുടെ ന്യൂമീഡിയ & ഡിജിറ്റല്‍ ജേര്‍ണലിസം ഡിപ്ളോമ കോഴ്സിലേക്ക് (ഈവനിംഗ് ബാച്ച് ) അപേക്ഷ ക്ഷണിച്ചു. മാര്‍ച്ച് 17 വരെ അപേക്ഷകള്‍ സ്വീകരിക്കും. ആറു മാസമാണ് കോഴ്സിന്റെ കാലാവധി. കൊച്ചി, തിരുവനന്തപുരം കേന്ദ്രങ്ങളില്‍ വൈകീട്ട് ആറു മുതല്‍ എട്ടു വരെയാണ് ക്ലാസ് സമയം. ഒരേ സമയം ഓണ്‍ലൈനിലും ഓഫ്‌ലൈനിലും ക്ലാസ് ലഭ്യമാണ്. സര്‍ക്കാര്‍ അംഗീകാരമുള്ള കോഴ്സിന് 35,000 രൂപയാണ് ഫീസ്. ഡിഗ്രിയാണ് വിദ്യാഭ്യാസയോഗ്യത. പ്രായപരിധി ഇല്ല. മോജോ, വെബ് ജേര്‍ണലിസം, ഓണ്‍ലൈന്‍ റൈറ്റിംഗ് ടെക്നിക്ക്സ്, ഫോട്ടോ ജേര്‍ണലിസം,വീഡിയോ പ്രാക്ടീസ് തുടങ്ങിയവയില്‍ പ്രായോഗിക പരിശീലനം നല്‍കും.

കൊണ്ടോട്ടി അഡീഷണൽ ഐ.സി.ഡി.എസ് പ്രൊജക്ടിലെ വാഴയൂർ ഗ്രാമപഞ്ചായത്തിലെ ഒന്നാം വാർഡിൽ പ്രവർത്തിക്കുന്ന അഴിഞ്ഞിലം അങ്കണവാടിയിലേക്ക് അങ്കണവാടി കം ക്രഷ് വർക്കർ, ഹെൽപർ നിയമനം നടത്തുന്നു. അപേക്ഷകർ വാഴയൂർ പഞ്ചായത്തിലെ ഒന്നാം വാർഡിലെ സ്ഥിര താമസക്കാരായിരിക്കണം. യോഗ്യത : ക്രഷ് വർക്കർ-പ്ലസ് ടു, ഹെൽപ്പർ-എസ് എസ് എൽ സി.  അപേക്ഷകർ 2025 ജനുവരി ഒന്നിന് 18 നും 35 നും ഇടയിൽ പ്രായമുള്ളവരായിരിക്കണം. മാർച്ച് 24ന് വൈകിട്ട് അഞ്ചിന് മുമ്പായി അപേക്ഷിക്കണം. അപേക്ഷ ഫോമിന്റെ മാതൃകയും കൂടുതൽ വിവരങ്ങളും കൊണ്ടോട്ടി അഡീഷണൽ ഐസിഡിഎസ് പ്രോജക്ട് ഓഫീസിൽ നിന്ന് ലഭിക്കും. ഫോൺ: 9188959787.

മലബാര്‍ ദേവസ്വം ബോര്‍ഡിന് കീഴിലുള്ള മലപ്പുറം ജില്ലയിലെ കൊണ്ടോട്ടി താലൂക്കിലെ തിരുവങ്ങാട്ട് ശിവക്ഷേത്രം, ഏറനാട് താലൂക്കിലെ തൃപ്പനച്ചി പെരുംതൃക്കോവില്‍ ദേവസ്വം, കരുമന്‍കാവ് ദേവസ്വം, ചെറുകുറ്റിശ്ശേരി ക്ഷേത്രം, ചങ്ങമംഗലം വിഷ്ണുക്ഷേത്രം, നിലമ്പൂര്‍ താലൂക്കിലെ നീലേമ്പ്ര കരിങ്കാളി ക്ഷേത്രം എന്നിവിടങ്ങളിലെ പാരമ്പര്യേതര ട്രസ്റ്റിമാരുടെ ഒഴിവിലേക്ക് ഹിന്ദുമത ധര്‍മസ്ഥാപന നിയമപ്രകാരം അര്‍ഹരായ തദ്ദേശവാസികളില്‍ നിന്നും അപേക്ഷ ക്ഷണിച്ചു.

'എല്ലാവര്‍ക്കും ഭൂമി, എല്ലാ ഭൂമിക്കും രേഖ, എല്ലാ രേഖകളും സ്മാര്‍ട്ട്' എന്ന ആപ്തവാക്യം യാഥാര്‍ത്ഥ്യമാക്കുന്നതിന്റെ ഭാഗമായി നിയോജക മണ്ഡലാടിസ്ഥാനത്തില്‍ പട്ടയ അസംബ്ലികള്‍ സംഘടിപ്പിക്കാന്‍ തീരുമാനിച്ചതിന്റെ ഭാഗമായി മഞ്ചേരി നിയോജക മണ്ഡലത്തിലെ പട്ടയ അസംബ്ലി മാര്‍ച്ച് 26ന് രാവിലെ 11ന് മഞ്ചേരി ടൗണ്‍ ഹാളില്‍ ചേരും. അഡ്വ. യു.എ ലത്തീഫ് എം.എല്‍.എ അധ്യക്ഷത വഹിക്കുന്ന അസംബ്ലിയില്‍ മണ്ഡലത്തിലെ വിവിധ പട്ടയ പ്രശ്നങ്ങള്‍ ചര്‍ച്ച ചെയ്യുകയും  ഉചിതമായ തീരുമാനം കൈക്കൊള്ളുകയും ചെയ്യും. പരിപാടിയില്‍ മണ്ഡലത്തിലെ രാഷ്ട്രീയ പ്രതിനിധികളും, ജീവനക്കാരും പങ്കെടുക്കും.

മാലിന്യ സംസ്‌കരണവുമായി ബന്ധപ്പെട്ട് തദ്ദേശ വകുപ്പിന്റെ കീഴിലുള്ള ജില്ലാ എൻഫോഴ്സ്‌മെന്റ് സ്‌ക്വാഡിന്റെ പരിശോധന ഊർജിതമായി തുടരുന്നു. ഇന്നലെ നിലമ്പൂർ നഗരസഭയിൽ നടത്തിയ പരിശോധനയിൽ സർക്കാർ നിരോധനമുള്ള  300 എം.എല്ലിന്റെ 11292 പ്ലാസ്റ്റിക് കുടിവെള്ള കുപ്പികൾ പിടിച്ചെടുത്തു. നിലമ്പൂർ നഗരസഭയിലെ കരിമ്പുഴയിൽ പ്രവർത്തിക്കുന്ന ഹിൽവ വാട്ടർ എന്ന സ്ഥാപനത്തിൽ നിന്നാണ് കുടിവെള്ള കുപ്പികൾ പിടിച്ചെടുത്തത്. സ്ഥാപനത്തിനെതിരെ 10,000 രൂപ പിഴ ചുമത്തുന്നതിന് നിലമ്പൂർ മുനിസിപ്പൽ സെക്രട്ടറിക്ക് ജില്ലാ എൻഫോഴ്സ്മെന്റ് സ്‌ക്വാഡ് നിർദേശം നൽകി.