പൊലീസ് സ്റ്റേഷനുകളില്‍ പരാതികളുമായി എത്തുന്നവര്‍ക്ക് ആവശ്യമായ മാനസിക പിന്തുണ ഉറപ്പാക്കുന്നു. അവരുടെ പ്രശ്‌നങ്ങള്‍ പഠിച്ച് മാനസികാവസ്ഥ അവലോകനം ചെയ്ത് പൊലീസുമായി ബന്ധപ്പെട്ടും നിയമ സഹായത്തിനും സഹായിക്കുന്നു. ആവശ്യക്കാര്‍ക്ക് റഫറിംഗ് സംവിധാനത്തിലൂടെ മാനസികാരോഗ്യ സേവനം ലഭ്യമാക്കുന്നു. സമൂഹത്തിലെ ദുര്‍ബല ജനവിഭാഗങ്ങള്‍ നേരിടുന്ന ചൂഷണങ്ങളും അതിക്രമങ്ങളും ഇല്ലാതാക്കുന്നതിനും അവരുടെ അവകാശങ്ങള്‍ ഉറപ്പാക്കാനും മുഖ്യധാരയിലേക്ക് എത്തിക്കുന്നതിനും സ്‌നേഹിത എക്‌സ്‌പെന്‍ഷന്‍ കേന്ദ്രത്തിന് സാധിക്കും. സമൂഹത്തിന്റെ മാനസികാരോഗ്യ മേഖലയില്‍ സമ്പൂര്‍ണ്ണവും സുസ്ഥിരവുമായി വികസനമാണ് പദ്ധതി ലക്ഷ്യമിടുന്നത്.

കുടുംബശ്രീ മിഷനും സംസ്ഥാന ആഭ്യന്തര വകുപ്പും സംയുക്തമായി നടപ്പാക്കുന്ന സ്‌നേഹിത എക്സ്റ്റന്‍ഷന്‍ സെന്ററുകള്‍ നാളെ (മാര്‍ച്ച് 15) മുതല്‍ ആരംഭിക്കും. സംസ്ഥാനത്തുടനീളം എസിപി, ഡിവൈഎസ്പി ഓഫീസുകള്‍ കേന്ദ്രീകരിച്ചാണ് പദ്ധതി നടപ്പിലാക്കുന്നത്. കുടുംബശ്രീ മിഷന്റെ   സ്‌നേഹിത ജെന്‍ഡര്‍ ഹെല്‍പ്പ് ഡസ്‌ക്കിന്റെ കൗണ്‍സിലിംഗ് സേവനം പോലീസ് സ്റ്റേഷനുകളിലും ഉറപ്പാക്കുകയാണ്. പോലീസ് സ്റ്റേഷനുകളില്‍ വിവിധ ആവശ്യങ്ങള്‍ക്ക് എത്തുന്നവരില്‍ അടിയന്തര മാനസിക പിന്തുണ ആവശ്യമുള്ളവര്‍ക്ക് കൗണ്‍സിലിംഗ് ഉള്‍പ്പെടെയുള്ള സേവനങ്ങള്‍ ലഭ്യമാക്കും.

ദുരന്തനിവാരണവുമായി ബന്ധപ്പെട്ടു വിജയപുരം ക്ലസ്റ്റർ തല മോക്ഡ്രിൽ ഏപ്രിൽ 11ന് പൊൻപള്ളിയിൽ സംഘടിപ്പിക്കും. ഇതിന്റെ ഭാഗമായുള്ള ടേബിൾടോപ്പ് യോഗം ഏപ്രിൽ എട്ടിന് കോട്ടയം താലൂക്ക് ഓഫീസിൽ ചേരും. റീബിൽഡ് കേരളാ ഇനിഷ്യേറ്റീവ് ഫോർ റിസൽട്‌സ് പദ്ധതിയുടെ ഭാഗമായി കോട്ടയം, പത്തനംതിട്ട, ആലപ്പുഴ, ഇടുക്കി ജില്ലകളിലാണ് ദുരന്തനിവാരണവുമായി ബന്ധപ്പെട്ടു തദ്ദേശ സ്ഥാപനങ്ങളുടെ ക്ലസ്റ്റർ തലത്തിൽ മോക്ഡ്രില്ലുകൾ നടത്തുന്നത്.

അയ്യന്തോള്‍ ഗവ. വൊക്കേഷണല്‍ ഹയര്‍ സെക്കണ്ടറി സ്‌കൂളില്‍ ഹൈസ്‌കൂള്‍ വിഭാഗത്തിനായി നിര്‍മ്മിക്കുന്ന ഓഡിറ്റോറിയം, ക്ലാസ് റൂമുകള്‍, സൗഹൃദ വാഷ്‌റൂം എന്നിവയുടെ നിര്‍മ്മാണോദ്ഘാടനം ഇന്ന് (മാര്‍ച്ച് 14) നടക്കും. രാവിലെ 11 ന് ഹയര്‍ സെക്കന്ററി സ്‌കൂള്‍ വിഭാഗം ഓഡിറ്റോറിയത്തില്‍ നടക്കുന്ന ചടങ്ങില്‍ ഉന്നത വിദ്യാഭ്യാസ സാമൂഹ്യനീതി വകുപ്പ് മന്ത്രി ഡോ. ആര്‍. ബിന്ദു ഉദ്ഘാടനം നിര്‍വ്വഹിക്കും. പി. ബാലചന്ദ്രന്‍ എംഎല്‍എ അധ്യക്ഷത വഹിക്കുന്ന ചടങ്ങില്‍ തൃശ്ശൂര്‍ കോര്‍പ്പറേഷന്‍ മേയര്‍ എം.കെ വര്‍ഗ്ഗീസ് മുഖ്യാതിഥിയാകും.

തൃശ്ശൂര്‍ ജില്ലയിലെ കേച്ചേരിയില്‍ കേരള സംസ്ഥാന കണ്‍സ്യൂമര്‍ ഫെഡറേഷന്റെ ഉടമസ്ഥതയില്‍ പ്രവര്‍ത്തിക്കുന്ന ത്രിവേണി ഇന്‍സ്റ്റിറ്റ്യൂട്ട് ഓഫ് ഫാര്‍മസിയില്‍ പുതുതായി നിര്‍മ്മിച്ച അക്കാദമിക് ബ്ലോക്ക് ഇന്ന് (മാര്‍ച്ച് 14) രാവിലെ 10.30 ന് സംസ്ഥാന സഹകരണ, ദേവസ്വം വകുപ്പ് മന്ത്രി വി.എന്‍ വാസവന്‍ ഉദ്ഘാടനം ചെയ്യും. മുരളി പെരുനല്ലി എംഎല്‍എ അധ്യക്ഷത വഹിക്കും. സഹകരണ സംഘം രജിസ്ട്രാര്‍ ഡോ. ഡി. സജിത് ബാബു മുഖ്യപ്രഭാഷണം നടത്തും. ചടങ്ങില്‍ ഉന്നത വിജയം നേടിയ വിദ്യാര്‍ത്ഥികള്‍ക്കുള്ള അവാര്‍ഡ്ദാനവും നടക്കും.

 ജില്ലയിലെ തദ്ദേശ സ്വയംഭരണ സ്ഥാപനങ്ങൾ അന്താരാഷ്ട്ര സീറോ വേസ്റ്റ് ദിനമായ മാർച്ച് 30ന് സമ്പൂർണ മാലിന്യമുക്തമായി പ്രഖ്യാപിക്കും. ജില്ലാ പഞ്ചായത്ത് പ്രസിഡന്റ്  ഹേമലതാ പ്രേം സാഗറിന്റെ അധ്യക്ഷതയിൽ ജില്ലാ പ്ലാനിംഗ് ഓഫീസിൽ ചേർന്ന മാലിന്യമുക്ത നവകേരളം സമ്പൂർണ ശുചിത്വ  പ്രഖ്യാപന പ്രവർത്തന യോഗത്തിലാണ് തീരുമാനം.
 മാർച്ച് 30ന് മുൻപായി വാർഡുതല പ്രഖ്യാപനങ്ങൾ നടത്തും. ഇതിന്റെ ഭാഗമായി മാർച്ച് 22, 23 തീയതികളിൽ പൊതുജനങ്ങൾ, റസിഡന്റ്സ് അസോസിയേഷനുകൾ, കുടുംബശ്രീ, അയൽക്കൂട്ടങ്ങൾ, സന്നദ്ധ സംഘടനകൾ എന്നിവരുടെ നേതൃത്വത്തിൽ
ജില്ലയിൽ മെഗാ ക്ലീനിങ് പരിപാടി സംഘടിപ്പിക്കും.

ആലപ്പുഴ വണ്ടാനം പോസ്റ്റ് ഓഫീസിനു പിന്നിൽ നഴ്‌സിംഗ് കോളജിന് സമീപം താൽക്കാലിക കെട്ടിടത്തിൽ  പ്രവർത്തിക്കുന്ന ആലപ്പുഴ ഗവൺമെന്റ് ഡെന്റൽ കോളജിന്റെ പ്രവർത്തനം വണ്ടാനം കുറവൻതോട് ജംഗ്ഷനിലുള്ള പുതിയ കെട്ടിടത്തിലേക്ക് മാറ്റുന്നതിനാൽ  മാർച്ച് മുതൽ മേയ് വരെ ചികിത്സയിൽ ഭാഗീകമായി കാലതാമസം നേരിട്ടേക്കാമെന്ന് ഡെന്റൽ കോളജ് പ്രിൻസിപ്പൽ അറിയിച്ചു.

 ദേശീയ സമ്പാദ്യ പദ്ധതിയുടെ ഭാഗമായുള്ള സ്റ്റുഡന്റ്സ് സേവിങ് സ്‌കീമിൽ സംസ്ഥാനത്ത് ഈ വർഷം ഏറ്റവുമധികം നിക്ഷേപം ലഭിച്ചത് കോട്ടയം ജില്ലയിൽ. കൂടുതൽ സ്‌കൂളുകളെ ചേർത്ത ജില്ലയും കോട്ടയമാണ്. ജില്ലയിൽ 862 സർക്കാർ, എയിഡഡ് സ്‌കൂളുകളുള്ളതിൽ 836 ഇടത്തും(97 ശതമാനം) പദ്ധതി തുടങ്ങി. പദ്ധതിയിൽ ചേർന്ന 26793 കുട്ടികളിൽ നിന്നായി 86,24,637 രൂപയാണ് മാർച്ച് 12 വരെയുള്ള നിക്ഷേപം. 322 രൂപയാണ് ഒരു കുട്ടിയുടെ ശരാശരി നിക്ഷേപം. 20 ശതമാനം കുട്ടികൾ പദ്ധതിയിൽ ചേർന്നു.

ഇന്നത്തെ യുവത്വം വിദേശങ്ങളിലേക്ക് ചേക്കേറുമ്പോൾ അവരെ ഭാഷാ നൈപുണ്യം നൽകി മികച്ച തൊഴിലിലേക്ക് എത്തിക്കുക എന്നതാണ് സർക്കാരിന്റെ ലക്ഷ്യമെന്ന് ഉന്നത വിദ്യാഭ്യാസ മന്ത്രി ഡോ.ആർ ബിന്ദു . കേരള ലാംഗ്വേജ് നെറ്റ് വർക്കിന്റെയും മലയാള സർവകലാശാലയുടെയും നേതൃത്വത്തിൽ പൊന്നാനി ഐ സി എസ് ആർ ക്യാമ്പസിൽ ആരംഭിച്ച ശൈഖ് സൈനുദ്ദീൻ മഖ്ദൂം സ്മാരക വിദേശ ഭാഷാ പഠന- വിവർത്തന ഉപ കേന്ദ്രം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. 

 സംസ്ഥാനത്തെ ഏറ്റവും മികച്ച അറിവുൽപാദന കേന്ദ്രമാക്കി മാറ്റാൻ ഈ പദ്ധതി കൊണ്ട് സാധിക്കും എന്നും മന്ത്രി പറഞ്ഞു.