തദ്ദേശ തിരഞ്ഞെടുപ്പിനോടനുബന്ധിച്ച് ബ്ലോക്ക് തല പരിശീലനം നൽകുന്ന ഉദ്യോഗസ്ഥർക്കുള്ള ഏകദിന പരിശീലനം കളക്ട്രേറ്റിലെ ജില്ലാ ആസൂത്രണ സമിതി ഹാളിൽ നടന്നു. ബൂത്ത് തലത്തിൽ സ്വീകരിക്കേണ്ട നടപടികൾ, വോട്ടിംഗ് യന്ത്രങ്ങളുടെ ക്രമീകരണങ്ങൾ, പോളിംഗ് ദിവസത്തെ മറ്റ് അനുബന്ധ പ്രവർത്തനങ്ങൾ തുടങ്ങിയവയാണ് ജില്ലാതല പരിശീലകർ ബ്ലോക്ക്തല പരിശീലകരെ പരിചയപ്പെടുത്തിയത്. ജില്ലയിലെ 16 ബ്ലോക്ക് പഞ്ചായത്തുകളിൽ നിന്നും 63 ഉദ്യോഗസ്ഥർ പരിശീലന പരിപാടിയിൽ പങ്കെടുത്തു.

ഇടുക്കി ജില്ലാതല ശിശുദിനാഘോഷം നവംബര്‍ 14 ന് രാവിലെ 10.30 ന് കുട്ടികളുടെ പ്രധാനമന്ത്രിയായി തിരഞ്ഞെടുക്കപ്പെട്ട  ഇഷാന ബിജേഷ്  ഓണ്‍ലൈനായി ഉദ്ഘാടനം ചെയ്യും.  ശാന്തിഗ്രാം ജിഇഎംഎച്ച് സ്‌കൂള്‍ വിദ്യാര്‍ഥി ജൂവല്‍ ജോജോ അധ്യക്ഷനായിരിക്കും. ജില്ലാ കളക്ടര്‍ എച്ച് ദിനേശന്‍ സ്റ്റാമ്പ് പ്രകാശനവും ശിശുദിനസന്ദേശവും നല്‍കും .വിദ്യാര്‍ഥികളായ എല്‍സ മരിയ തോമസ,് ഷാരോണ്‍ ബൈജു ജോസഫ് ജോയ് തുടങ്ങിയവര്‍ ആശംസകളര്‍പ്പിക്കും.

- തിരഞ്ഞെടുപ്പ് പ്രചാരണത്തിന്റെ ഭാഗമായി ഭവന സന്ദര്‍ശനത്തിന് ഒരു സമയം സ്ഥാനാര്‍ഥികള്‍ ഉള്‍പ്പെടെ പരമാവധി അഞ്ചുപേര്‍ മാത്രം.

- കോവിഡ് പ്രോട്ടോകോള്‍ പാലിച്ചു വേണം സ്ഥാനാര്‍ഥികളും മറ്റും ഭവനസന്ദര്‍ശനം നടത്തേണ്ടത്.

- റോഡ് ഷോ / വാഹനറാലി എന്നിവയ്ക്ക് പരമാവധി മൂന്നു വാഹനങ്ങള്‍.

- ജാഥ, ആള്‍ക്കൂട്ടം, കൊട്ടിക്കലാശം എന്നിവ കോവിഡ് 19 പശ്ചാത്തലത്തില്‍ ഒഴിവാക്കേണ്ടതാണ്.

- പൊതുയോഗങ്ങള്‍, കുടുംബയോഗങ്ങള്‍ എന്നിവ കോവിഡ് നിയന്ത്രണങ്ങള്‍ പാലിച്ചു മാത്രമേ നടത്താന്‍ പാടുള്ളൂ.
പൊതുയോഗങ്ങള്‍ നടത്തുന്നതിന് പോലീസിന്റെ മുന്‍കൂര്‍ അനുമതി വാങ്ങണം.

ഇടുക്കിയിലെ തദ്ദേശ തിരഞ്ഞെടുപ്പിനായി പുതിയതായി അനുവദിച്ച രണ്ടു കേന്ദ്രങ്ങള്‍ ഉള്‍പ്പെടെ നിലവില്‍ 10 കേന്ദ്രങ്ങളാണ് സജ്ജീകരിച്ചിരിക്കുന്നത്. തൊടുപുഴ മുനിസിപ്പാലിറ്റിയില്‍ തൊടുപുഴ  സെന്‍ സെബാസ്റ്റ്യന്‍സ് ഹൈസ്‌കൂളും കട്ടപ്പന ബ്ലോക്ക് പഞ്ചായത്തില്‍ കട്ടപ്പന സെന്റ് ജോര്‍ജ് ഫൊറോന ചര്‍ച്ച് പാരിഷ് ഹാളുമാണ് പുതിയതായി അനുവദിച്ച വോട്ടെണ്ണല്‍ കേന്ദ്രങ്ങള്‍.

ഇടുക്കിയിലെ  തദ്ദേശ തിരഞ്ഞെടുപ്പിനുള്ള മള്‍ട്ടി പോസ്റ്റ് വോട്ടിംഗ് യന്ത്രങ്ങളുടെയും  നഗരസഭകളില്‍ ഉപയോഗിക്കുന്ന സിംഗിള്‍ പോസ്റ്റ് വോട്ടിംഗ് യന്ത്രങ്ങളുടെയും പരിശോധന പൂര്‍ത്തീകരിച്ചു.
മള്‍ട്ടി പോസ്റ്റ് വോട്ടിംഗിന്  2050 കണ്ട്രോള്‍ യൂണിറ്റുകളും 6150 ബാലറ്റ് യൂണിറ്റുകളുമാണ് തയ്യാറാക്കിയിരിക്കുന്നത്. നഗരസഭകളിലേക്കായുള്ള  സിംഗിള്‍ പോസ്റ്റ് വോട്ടിംഗിന് 200 കണ്ട്രോള്‍ യൂണിറ്റുകളും 200 ബാലറ്റ് യൂണിറ്റുകളുടെയുമാണ് പരിശോധന പൂര്‍ത്തികരിച്ച് ചെറുതോണി പഞ്ചായത്ത് ടൗണ്‍ ഹാളില്‍ സൂക്ഷിച്ചിരിക്കുന്നത്.

 ലൈസന്‍സുള്ള ആയുധങ്ങള്‍ കൈവശമുള്ളവര്‍ തദ്ദേശസ്വയംഭരണ തെരഞ്ഞെടുപ്പിന്റെ പശ്ചാത്തലത്തില്‍ അവ  തൊട്ടടുത്ത പോലീസ് സ്റ്റേഷനുകളില്‍  രണ്ടു ദിവസത്തിനകം ഹാജരാക്കണമെന്നു ജില്ലാ വരണാധികാരി കൂടിയായ ജില്ലാ കളക്ടര്‍ ഉത്തരവിട്ടു. ആയുധങ്ങള്‍ സൂക്ഷിക്കേണ്ടവര്‍ ആരൊക്കെയാണെന്നുള്ളത് തീരുമാനിക്കാനും പരിശോധിക്കാനുമായി ജില്ലാ കളക്ടര്‍, ജില്ലാ പോലീസ് മേധാവി, എഡിഎം എന്നിവരടങ്ങുന്ന കമ്മറ്റി രൂപീകരിച്ചിട്ടുണ്ട്.

പട്ടികജാതി വിഭാഗത്തില്‍പെട്ട അംഗീകൃത പെട്രോളിയം ഡീലര്‍മാര്‍ക്ക് അവരുടെ നിലവില്‍ പെട്രോള്‍/ഡീസല്‍ വില്‍പ്പനശാലകള്‍ പ്രവര്‍ത്തനനിരതമാക്കുന്നതിനായി പ്രവര്‍ത്തനമൂലധന വായ്പ നല്‍കാന്‍ പരിഗണിക്കുന്നതിനായി കേരള പട്ടികജാതി പട്ടികവര്‍ഗ്ഗ വികസന കോര്‍പ്പറേഷന്‍ അപേക്ഷ ക്ഷണിച്ചു. അപേക്ഷകന്‍ പട്ടികജാതി വിഭാഗത്തില്‍പ്പെട്ടയാളും പൊതുമേഖലയിലുള്ള ഏതെങ്കിലും പെട്രോളിയം കമ്പനിയുടെ അംഗീകൃത ഡീലര്‍ ആയിരിക്കേണ്ടതുമാണ്. അപേക്ഷകന് സംരംഭം നടത്തുന്നതിനാവശ്യമായ അടിസ്ഥാന സൗകര്യങ്ങള്‍, വിവിധ ലൈസന്‍സുകള്‍, ടാക്‌സ് രജിസ്‌ട്രേഷന്‍ എന്നിവ ഉണ്ടായിരിക്കണം