പോളിടെക്‌നിക് ഡിപ്ലോമ സ്‌പോട്ട് അഡ്മിഷൻ സംസ്ഥാനതലത്തിൽ ഓൺലൈനായി നടത്തും. അപേക്ഷകർക്ക് നവംബർ 21 മുതൽ 24 വരെ www.polyadmission.org  എന്ന വെബ്‌സൈറ്റിലെ ""Spot Admission Registration"  എന്ന ലിങ്ക് വഴി രജിസ്റ്റർ ചെയ്യാം. ആപ്ലിക്കേഷൻ നമ്പരും ജനനതീയതിയും നല്കുമ്പോൾ ലഭിക്കുന്ന ഒടിപി ഉപയോഗിച്ച് റജിസ്‌ട്രേഷൻ പൂർത്തിയാക്കാം. പഴയ ഓപ്ഷനുകൾ റദ്ദാകുന്നതിനാൽ ഓൺലൈൻ സ്‌പോട്ട് അഡ്മിഷനിലേക്ക് പഴയ ഓപ്ഷനുകൾ പരിഗണിക്കില്ല.

12 കോടി രൂപ ഒന്നാം സമ്മാനമായി നൽകുന്ന ക്രിസ്മസ് - പുതുവത്സര ബമ്പർ ഭാഗ്യക്കുറി ഇന്ന് (നവംബർ 20) തിരുവനന്തപുരത്തു ഭാഗ്യക്കുറി വകുപ്പ് ഡയറക്ടർ അമിത് മീണ പ്രകാശനം ചെയ്യും. ഗോർഖി ഭവനിലെ നറുക്കെടുപ്പ് വേദിയിൽ ഉച്ചയ്ക്ക് 3 നാണ് പ്രകാശനം .

സംസ്ഥാനത്ത് 19 മുതൽ 25 വരെ നടക്കുന്ന ക്വാമി ഏകതാ വാരാചരണത്തിന് (ദേശീയോദ്ഗ്രഥന വാരം) തുടക്കമായി. സെക്രട്ടേറിയറ്റ് ഉൾപ്പെടെ എല്ലാ സർക്കാർ വകുപ്പുകളിലും പൊതുമേഖലാ സ്ഥാപനങ്ങളിലും വ്യാഴാഴ്ച രാവിലെ 11ന് ദേശീയോദ്ഗ്രഥന പ്രതിജ്ഞയെടുത്തു. സെക്രട്ടേറിയറ്റ് ദർബാർ ഹാളിൽ നടന്ന ചടങ്ങിൽ അഡീഷണൽ ചീഫ് സെക്രട്ടറി ടി.കെ. ജോസ് ജീവനക്കാർക്ക് പ്രതിജ്ഞ ചൊല്ലിക്കൊടുത്തു. കോവിഡ് 19 മാർഗനിർദ്ദേശം പാലിച്ചാണ് ദേശീയോദ്ഗ്രഥന വാരം ആചരിക്കുന്നത്.
പി.എൻ.എക്‌സ്. 4066/2020

പത്തനംതിട്ട ജില്ലയില്‍ എക്‌സൈ് വകുപ്പില്‍ സിവില്‍ എക്‌സൈസ് ഓഫീസര്‍  (എന്‍സിഎ എസ്‌ഐയുസി-എന്‍)  (കാറ്റഗറി നമ്പര്‍ 064/18)  തസ്തികയുടെ 03/03/2020 തീയതില്‍  നിലവില്‍ വന്ന ചുരുക്കപ്പട്ടികയില്‍ ഉള്‍പ്പെട്ടിട്ടുളള ഉദ്യോഗാര്‍ത്ഥികള്‍ക്കായി നവംബര്‍ 25 ന് കായികക്ഷമതാ പരീക്ഷയും ശാരീരിക അളവെടുപ്പും രാവിലെ ആറു മുതല്‍ കൊല്ലം ലാല്‍ ബഹദൂര്‍ ശാസ്ത്രി സ്‌റ്റേഡിയത്തില്‍ നടത്തും. ചുരുക്കപ്പട്ടികയില്‍ ഉള്‍പ്പെട്ട എല്ലാ ഉദ്യോഗാര്‍ഥികള്‍ക്കും പ്രൊഫൈല്‍ മെസേജ്, എസ്എംഎസ് മുഖേന അറിയിപ്പ് നല്‍കിയിട്ടുണ്ട്.  കോവിഡ് നെഗറ്റീവ് സര്‍ട്ടിഫിക്കറ്റ് ഹാജരാക്കുന്ന ഉദ്യോഗാര്‍ഥികളെ മാത്രമേ ടെസ്റ്റിന് പങ്കെടുപ്പിക്കൂ.

പത്തനംതിട്ട ജനറല്‍ ആശുപത്രിയില്‍ ഒ.പി/ഐ.പി കൗണ്ടറുകളില്‍ സെര്‍വര്‍ സ്ഥാപിക്കുന്നതിന് പരിചയ സമ്പന്നരായ  വ്യക്തികള്‍, സ്ഥാപനങ്ങള്‍ എന്നിവരില്‍ നിന്നും  ടെന്‍ഡര്‍  ക്ഷണിച്ചു.   സാമ്പത്തിക  ടെന്‍ഡറും, സാങ്കേതിക ടെന്‍ഡറും  പ്രത്യേകം കവറുകളില്‍ സമര്‍പ്പിക്കണം.  കൂടുതല്‍ വിവരങ്ങള്‍ ആശുപത്രിയുടെ  ഓഫീസില്‍ നിന്നും പ്രവൃത്തിദിനങ്ങളില്‍ അറിയാം. ടെന്‍ഡര്‍  ലഭിക്കേണ്ട അവസാന തീയതി ഈ മാസം 30 ന് രാവിലെ 11 ന്. ഫോണ്‍ : 0468 2222364.

തദ്ദേശ സ്ഥാപനങ്ങളിലേക്കുള്ള പൊതുതെരഞ്ഞെടുപ്പില്‍ മത്സരിക്കുന്നതിന് നാമനിര്‍ദേശപത്രിക സമര്‍പ്പിക്കുന്നതിനുള്ള സമയപരിധി ഇന്ന് (നവംബര്‍ 19 വ്യാഴം) അവസാനിക്കും. പത്രികകളുടെ സൂക്ഷ്മ പരിശോധന നവംബര്‍ 20ന് നടക്കും.  

കേരള പഞ്ചായത്തിരാജ് നിയമത്തിലെയും മുനിസിപ്പാലിറ്റി നിയമത്തിലെയും നിബന്ധനകളുടെ അടിസ്ഥാനത്തില്‍ അതത് വരണാധികാരികളാണ് നാമനിര്‍ദേശ പത്രികകളുടെ സൂക്ഷ്മ പരിശോധന നടത്തുക.

തെരഞ്ഞെടുപ്പുമായി ബന്ധപ്പെട്ടു രാഷ്ട്രീയ കക്ഷികളും സ്ഥാനാര്‍ഥികളും താത്കാലിക ഓഫിസുകള്‍ തുറക്കുമ്പോള്‍ നിര്‍ദിഷ്ട ദൂരപരിധി കര്‍ശനമായി പാലിക്കണം. പഞ്ചായത്തുകളില്‍ പോളിംഗ് സ്റ്റേഷന്‍ പ്രവര്‍ത്തിക്കുന്ന കെട്ടിടത്തിന്റെ 200 മീറ്റര്‍ പരിധിയിലും നഗരസഭയില്‍ പോളിംഗ് സ്റ്റേഷന്റെ 100 മീറ്റര്‍ പരിധിയിലും തെരഞ്ഞെടുപ്പ് ദിവസം തെരഞ്ഞെടുപ്പ് ഓഫിസുകള്‍ പ്രവര്‍ത്തിപ്പിക്കരുത്. പൊതു-സ്വകാര്യ സ്ഥലങ്ങള്‍ കൈയേറിയും, ആരാധനാലയങ്ങള്‍, വിദ്യാഭ്യാസ സ്ഥാപനങ്ങള്‍, ആശുപത്രികള്‍ എന്നിവിടങ്ങളിലും ഇത്തരം ഓഫിസുകള്‍ പാടില്ല.

തദ്ദേശ സ്വയംഭരണ സ്ഥാപനങ്ങളിലേക്കുള്ള പൊതുതെരഞ്ഞെടുപ്പിന്റെ പരസ്യ പ്രചാരണത്തില്‍ പെരുമാറ്റച്ചട്ടം കര്‍ശനമായി പാലിക്കാന്‍ സ്ഥാനാര്‍ഥികള്‍ പ്രത്യേക ശ്രദ്ധവയ്ക്കണം.

തെരഞ്ഞെടുപ്പ് പ്രചാരണത്തിനായി ഇരുചക്ര വാഹനമുള്‍പ്പെടെയുള്ള വാഹനങ്ങള്‍ ഉപയോഗിക്കുമ്പോള്‍ അതതു റിട്ടേണിംഗ് ഓഫിസര്‍മാരില്‍നിന്നുള്ള അനുമതി നിര്‍ബന്ധമായും വാങ്ങിയിരിക്കണം.

കോഴഞ്ചേരി താലൂക്കിന്റെ പരിധിയില്‍ വരുന്ന 2020 ജനുവരി മുതല്‍ ജൂണ്‍ വരെയുളള കാലയളവിലെ  മുദ്ര ചെയ്യേണ്ടിയിരുന്ന  അളവുതൂക്ക ഉപകരണങ്ങളും, ഓട്ടോറിക്ഷാ മീറ്ററുകളും  ഈ മാസം 30നകം മുദ്ര ചെയ്യണമെന്ന് ലീഗല്‍ മെട്രോളജി അസിസ്റ്റന്റ്  കണ്‍ട്രോളര്‍ അറിയിച്ചു. ഫോണ്‍ മുഖേന ബുക്ക് ചെയ്തുവേണം  ഉപകരണങ്ങള്‍ ഹാജരാക്കുവാന്‍. വൈകിയാല്‍ ഇതിന് പിഴ ഒടുക്കേണ്ടി വരും. ഫോണ്‍ : 0468 2322853.