കിലയും കെ ഡിസ്‌കും ചേര്‍ന്ന് കുന്ദമംഗലം ബ്ലോക്ക് പഞ്ചായത്തില്‍ നടപ്പാക്കുന്ന ബ്ലോക്ക് ഇന്നവേഷന്‍ ക്ലസ്റ്റര്‍ പദ്ധതിയുടെ ഭാഗമായി എന്‍ഐടി കാലിക്കറ്റ്, സി.ഡബ്ല്യു.ആര്‍.ഡി.എം, കോഴിക്കോട് ഗവ. എന്‍ജിനീയറിങ് കോളേജ് എന്നിവിടങ്ങളിലെ വിദഗ്ധര്‍ മാമ്പുഴയുടെ തീരങ്ങള്‍ സന്ദര്‍ശിച്ചു. ഇതിന്റെ റിപ്പോര്‍ട്ട് ഒരാഴ്ചക്കകം ബ്ലോക്ക് പഞ്ചായത്തിന് സമര്‍പ്പിക്കും. 

സംസ്ഥാന അത്ലറ്റിക്‌സ് അസോസിയേഷൻന്റെ മൂന്നാമത് സംസ്ഥാന മാസ്റ്റേഴ്‌സ് അത്ലറ്റിക്‌സ് ചാമ്പ്യൻഷിപ്പിനായി സംഘാടക സമിതി രൂപീകരിച്ചു. സ്പോർട്സ് കൗൺസിൽ ജില്ലാ പ്രസിഡന്റ് എം. മധു സംഘാടക സമിതി രൂപീകരണ യോഗം ഉദ്ഘാടനം ചെയ്‌തു.  ഒക്ടോബർ 21, 22 തീയതികളിൽ എം.കെ ജിനചന്ദ്രൻ സ്‌മാരക ജില്ലാ സ്റ്റേഡിയത്തിലായിരിക്കും  മത്സരങ്ങൾ നടക്കുക.  ജില്ലയിൽ ആദ്യമായാണ് മാസ്റ്റേഴ്‌സ് മീറ്റ് നടക്കുന്നത്. വിവിധ ജില്ലകളിൽ നിന്നുള്ള 30 മുതൽ 100 വയസുവരെ പ്രായയുള്ള പുരുഷ-വനിത കായിക താരങ്ങൾ മത്സരത്തിൽ പങ്കെടുക്കും. 

ജില്ലാ ഭരണകൂടത്തിന്റെ പദ്ധതിക്ക് അംഗീകാരം

  
വനം വന്യജീവി വകുപ്പിന്റെ ആഭിമുഖ്യത്തിൽ ഒക്ടോബർ രണ്ട് മുതൽ എട്ട് വരെ വന്യജീവി വാരാഘോഷം സംഘടിപ്പിക്കുന്നു. വന്യജീവി സംരക്ഷണ സന്ദേശം പ്രചരിപ്പിക്കുക, അവയെക്കുറിച്ചുള്ള അവബോധം വർധിപ്പിക്കുക എന്ന ലക്ഷ്യത്തോടെ സ്‌കൂൾ-കോളജ് വിദ്യാർത്ഥികളെ പങ്കെടുപ്പിച്ചു കൊണ്ട് വിവിധ മത്സരങ്ങളും സംഘടിപ്പിക്കും. ഒക്ടോബർ രണ്ട്, മൂന്ന് തിയ്യതികളിലായി ജില്ലാതല മത്സരങ്ങളും, ഒക്‌ടോബർ എട്ടിന് സംസ്ഥാനതല മത്സരങ്ങളും നടക്കും.

18 വര്‍ഷം മുമ്പ് മനോനില തെറ്റി ഒന്നര വയസ്സുകാരനായ മകനൊപ്പം കോഴിക്കോട് വന്നിറങ്ങിയ ബിഹാര്‍ സ്വദേശിനിയായ മക്കാനി എന്ന ലീലാവതി (55) ഒടുവില്‍ സഹോദരങ്ങള്‍ക്കൊപ്പം നാട്ടിലേക്ക്. മാനസികനില വീണ്ടെടുത്ത ശേഷം കോഴിക്കോട് മായനാട് ഗവ. ആശാ ഭവനില്‍ കഴിഞ്ഞ മക്കാനിയെ തേടി സഹോദരങ്ങളായ രാംസുന്ദര്‍, സിമുറ എന്നിവരെത്തിയതോടെയാണ് നാടിന്റെ തണലിലേക്ക് പുറപ്പെട്ടത്. കേന്ദ്ര ആഭ്യന്തര മന്ത്രാലയത്തിലെ റിട്ട. ഓഫീസറും സാമൂഹിക പ്രവര്‍ത്തകനുമായ എം ശിവന്റെ ഇടപെടലാണ് മക്കാനിയെ ബന്ധുക്കളിലേക്കെത്തിച്ചത്. നിലമ്പൂരില്‍ ജോലി ചെയ്യുന്ന മകന്‍ ആനന്ദിനെ കണ്ടശേഷമാണ് ഇവര്‍ നാട്ടിലേക്ക് തിരിച്ചത്. 

പട്ടികജാതി വിഭാഗക്കാരുടെ അടിസ്ഥാന സൗകര്യങ്ങള്‍ മെച്ചപ്പെടുത്തി ഗ്രാമവികസനത്തില്‍ വഴികാട്ടിയാവുന്ന അംബേദ്കര്‍ ഗ്രാമം പദ്ധതി ജില്ലയില്‍ പൂര്‍ത്തിയായത് 28 പട്ടികജാതി നഗറുകളില്‍. ഓരോ നിയമസഭാ മണ്ഡലത്തിലും അടിസ്ഥാന സൗകര്യങ്ങളുടെ അഭാവമുള്ള, 25ഉം അതിലധികവും പട്ടികജാതി കുടുംബങ്ങള്‍ താമസിക്കുന്ന നഗറുകള്‍ തെരഞ്ഞെടുത്ത് അവിടുത്തെ ആവശ്യങ്ങള്‍ വിലയിരുത്തി ഒരു കോടി രൂപയുടെ വികസന പ്രവര്‍ത്തനങ്ങളാണ് നിലവില്‍ നടപ്പാക്കുന്നത്. 

യാത്രക്കാരുടെ മനം നിറച്ച് സുൽത്താൻ ബത്തേരിയുടെ ഗ്രാമവണ്ടി യാത്ര തുടരുന്നു. ഉൾപ്രദേശങ്ങളിൽ ഗതാഗത സൗകര്യം ലഭ്യമാക്കുന്നതിന് പുറമെ സാധാരണക്കാര്‍ക്ക് കുറഞ്ഞ ചെലവിൽ യാത്ര ചെയ്യാനുള്ള സൗകര്യമെന്ന നിലയിൽകൂടിയാണ് സുൽത്താൻ ബത്തേരി ബ്ലോക്ക് പഞ്ചായത്തിന്റെ 2023-24 വാർഷിക പദ്ധതിയിൽ 10 ലക്ഷം രൂപ വകയിരുത്തി ഗ്രാമവണ്ടി ആരംഭിച്ചത്. സേവനം കൂടുതൽ കാര്യക്ഷമമാക്കാൻ സുൽത്താൻ ബത്തേരി ബ്ലോക്ക് പഞ്ചായത്തിന്റെ ശക്തമായ പിന്തുണയും ലഭിച്ചു.

എടവക പഞ്ചായത്തിൽ സംഘടിപ്പിച്ച ജില്ലാ കളക്ടറുടെ പരാതി പരിഹാര അദാലത്തിൽ 32 പരാതികൾക്ക് പരിഹാരമായി. പഞ്ചായത്ത് സ്വരാജ് ഹാളിൽ നടന്ന അദാലത്തിൽ ജില്ലാ കളക്ടര്‍ ഡി.ആര്‍ മേഘശ്രീ, എഡിഎം കെ ദേവകി, സബ് കളക്ടര്‍ അതുൽ സാഗര്‍ എന്നിവരാണ് പരാതികൾ പരിഗണിച്ചത്. നേരത്തെ ഓൺലൈനായി രജിസ്റ്റര്‍ ചെയ്ത 18 പരാതികൾക്ക് പുറമേ 62 പരാതികൾ കൂടി നേരിട്ട് അദാലത്ത് വേദിയിൽ ലഭിച്ചു.

വയോജനങ്ങളുടെ ക്ഷേമവും സംരക്ഷണം ഉറപ്പാക്കുകയാണ് സർക്കാർ ലക്ഷ്യമെന്ന് പട്ടികജാതി പട്ടികവർഗ പിന്നാക്ക ക്ഷേമ വകുപ്പ് മന്ത്രി ഒ ആർ കേളു പറഞ്ഞു. വെള്ളമുണ്ട എട്ടേനാൽ സിറ്റി ഓഡിറ്റോറിയത്തിൽ വയോജന സംഗമം, 'മുമ്പേ നടന്നവർക്ക് താങ്ങാകാം സീസൺ-2' ഉദ്ഘാടനം ചെയ്തു സംസാരിക്കുകയായിരുന്നു മന്ത്രി.
എല്ലാവിധ നിയമ പരിരക്ഷയും ക്ഷേമ പരിരക്ഷയും  വയോജനങ്ങൾക്കായി സർക്കാർ ഉറപ്പ് നൽകിയിട്ടുണ്ട്. വയോജന കമ്മീഷൻ രൂപീകരിച്ചതടക്കമുള്ള പ്രവർത്തനങ്ങൾ ലോകത്തിനു തന്നെ മാതൃകയാണ്.

വെള്ളമുണ്ട ഗ്രാമപഞ്ചായത്തിന്റെ ആഭിമുഖ്യത്തിൽ വർണ്ണചിറകുകൾ എന്ന പേരിൽ വിഭിന്നശേഷി കലോത്സവം സംഘടിപ്പിച്ചു. വെള്ളമുണ്ട എട്ടേനാൽ സിറ്റി ഓഡിറ്റോറിയത്തിൽ മാനന്തവാടി ബ്ലോക്ക് പഞ്ചായത്ത് പ്രസിഡന്റ് ജസ്റ്റിൻ ബേബി ഉദ്ഘാടനം ചെയ്തു.

വിഭിന്ന ശേഷിക്കാരുടെ കലാ-കായിക കഴിവുകൾ വികസിപ്പിക്കുന്നതിനും മാനസിക ഉല്ലാസത്തിനും വേണ്ടി സർക്കാർ നടപ്പാക്കിവരുന്ന പദ്ധതിയാണിത്. ബഷീർ കൊടുവള്ളിയുടെ മാജിക് ഷോയും ഉണ്ടായി. കലാമത്സരങ്ങളിൽ പങ്കെടുത്ത വിഭിന്നശേഷി വിഭാഗത്തിൽപ്പെട്ടവർക്ക്
സമ്മാനം വിതരണം ചെയ്തു.