ഒറ്റപ്പാലം നിയോജക മണ്ഡലത്തിലെ കാര്‍ഷിക മേഖലകളിലെ വികസന പ്രവര്‍ത്തനങ്ങള്‍ ഊര്‍ജ്ജിതമാക്കാനായി നടത്തുന്ന കാര്‍ഷിക മഹോത്സവം ഒക്ടോബര്‍ 23 മുതല്‍ 25 വരെ നടക്കും. കാര്‍ഷിക മഹോത്സവത്തിന്റെ വിജയകരമായ നടത്തിപ്പിന് വേണ്ടി സംഘാടകസമിതി രൂപീകരിച്ചു. സംഘാടക സമിതി രൂപീകരണ യോഗം ചേര്‍ന്നു.  
കാര്‍ഷിക മഹോത്സവത്തിന്റെ  ഉദ്ഘാടനം ഒക്ടോബര്‍ 24ന് രാവിലെ 10 മണിക്ക് കൃഷിവകുപ്പ് മന്ത്രി പി പ്രസാദ് നിര്‍വഹിക്കും. വിവിധ ദിവസങ്ങളിലായി മന്ത്രിമാരായ കെ കൃഷ്ണന്‍കുട്ടി,എം ബി രാജേഷ്, സജി ചെറിയാന്‍,ജി ആര്‍ അനില്‍ തുടങ്ങിയവര്‍ പങ്കെടുക്കും.

പാലക്കാട് ജില്ലയിലെ വെള്ളിയാങ്കല്ലിലുള്ള നാഗലശ്ശേരി ഗവ. ഐ. ടി ഐയില്‍ അഡീറ്റീവ് മാനുഫാക്ചറിങ് (3 ഡി പ്രിന്റിങ്) ടെക്നീഷ്യന്‍, കമ്പ്യൂട്ടര്‍ എയ്ഡഡ് എംബ്രോയിഡറി ആന്‍ഡ് ഡിസൈനിങ് എന്നീ ട്രേഡുകളിലേക്ക് പ്രവേശനത്തിന് അപേക്ഷിക്കാം. അപേക്ഷകള്‍ സെപ്റ്റംബര്‍ 30 വരെ സ്വീകരിക്കുമെന്ന് പ്രിന്‍സിപ്പല്‍ അറിയിച്ചു. ഫോണ്‍: 9746715651, 9526326361.

ഒറ്റപ്പാലം ബി.ആര്‍.സി തല കളിയങ്കണം - കിഡ്‌സ് അത്‌ലറ്റ്  ഫിറ്റ്‌നസ് ഉപകരണങ്ങള്‍ വിതരണം ചെയ്തു. വിതരണോദ്ഘാടനം കെ പ്രേംകുമാര്‍ എംഎല്‍എ  നിര്‍വഹിച്ചു. പൊതു വിദ്യാഭ്യാസ വകുപ്പ് എസ്.എസ്.കെ സ്‌പോര്‍ട്‌സ് കേരള ഫൗണ്ടേഷന്‍ എന്നിവ സംയുക്തമായി കേരളത്തിലെ എല്ലാ പൊതു വിദ്യാലയങ്ങളിലെയും പ്രീ-പ്രൈമറി, ഒന്ന്, രണ്ട് ക്ലാസ്സിലെ വിദ്യാര്‍ഥികള്‍ക്കാണ് ഉപകരണങ്ങള്‍ വിതരണം ചെയ്യുന്നത്.  ബിആര്‍സി പരിധിയിലെ  71 വിദ്യാലയങ്ങള്‍ക്കാണ് സ്‌പോര്‍ട്‌സ് കിറ്റുകള്‍ കൈമാറിയത്.

കിഡ്നി രോഗികള്‍ക്ക് ഡയാലിസിസ് ചെയ്യുന്നതിനുള്ള സാമ്പത്തിക സഹായം നല്‍കുന്ന 'സ്‌നേഹസ്പര്‍ശം' പദ്ധതിക്ക് തേങ്കുറിശ്ശി ഗ്രാമപഞ്ചായത്തില്‍ തുടക്കമായി. 2025-26 സാമ്പത്തിക വര്‍ഷത്തില്‍ ഉള്‍പ്പെടുത്തിയാണ് പദ്ധതി നടപ്പാക്കുന്നത്. പദ്ധതി ഉദ്ഘാടനം  ഗ്രാമപഞ്ചായത്ത് പ്രസിഡന്റ് ആര്‍. ഭാര്‍ഗവന്‍ നിര്‍വഹിച്ചു. ഒരു ഡയാലിസിസിന് ആയിരം രൂപ വീതം നല്‍കുന്നതാണ് പദ്ധതി. നിലവില്‍ പത്ത് പേരാണ് ധനസഹായത്തിനായി രജിസ്റ്റര്‍ ചെയ്തിട്ടുള്ളത്. സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ എം.എസ്. സജിഷ പദ്ധതിയുടെ റിപ്പോര്‍ട്ട് അവതരിപ്പിച്ചു.

'അമ്മമാനസം 2.0 പെരിനാറ്റല്‍ മാനസികാരോഗ്യ പരിപാടിയുടെ ജില്ലാതല ഉദ്ഘാടനം ജില്ലാ പഞ്ചായത്ത് പ്രസിഡന്റ് കെ.ബിനുമോള്‍ നിര്‍വഹിച്ചു. തദ്ദേശ സ്വയംഭരണ വകുപ്പ്, ജില്ലാ കുടുംബശ്രീ  ജില്ലാ മിഷന്‍ ജന്‍ഡര്‍ എഫ്.എന്‍.എച്ച്.ഡബ്ലിയു പദ്ധതി എന്നിവയുടെ സംയുക്താഭിമുഖ്യത്തിലാണ് പരിപാടി സംഘടിപ്പിച്ചത്. ഗര്‍ഭകാലത്തും പ്രസവാനന്തര ഘട്ടത്തിലും സ്ത്രീകള്‍ക്കുണ്ടാകുന്ന മാനസികാരോഗ്യ പ്രശ്‌നങ്ങളെക്കുറിച്ച് അവബോധം വളര്‍ത്തുക എന്നതാണ് പരിപാടിയുടെ ലക്ഷ്യം.

വിഷന്‍ 2031 സംസ്ഥാനതല വിഷയാധിഷ്ഠിത സെമിനാറുകളുടെ ഭാഗമായി പാലക്കാട് ജില്ലയില്‍ ഒക്ടോബര്‍ 13 ന് തദ്ദേശ സ്വയംഭരണ വകുപ്പിന്റെ ആഭിമുഖ്യത്തില്‍ സെമിനാര്‍ നടക്കും. സെമിനാറിന്റെ സംഘാടക സമിതി യോഗം സെപ്റ്റംബര്‍ 25ന് വൈകീട്ട് മൂന്നിന് ജില്ലാ പഞ്ചായത്ത് ഹാളില്‍ തദ്ദേശ സ്വയംഭരണ വകുപ്പ് മന്ത്രി എം.ബി രാജേഷിന്റെ അധ്യക്ഷതയില്‍ ചേരുമെന്ന് തദ്ദേശ സ്വയംഭരണ വകുപ്പ് ഡെപ്യൂട്ടി ഡയറക്ടര്‍ അറിയിച്ചു.
 

ചാമ്പ്യന്‍സ് ബോട്ട് ലീഗ് വള്ളംകളി മത്സരം കോട്ടപ്പുറം അച്ചാംതുരുത്തി തേജസ്വിനി പുഴയില്‍ ഒക്ടോബര്‍ രണ്ടിന് നടക്കും. പരിപാടിയുടെ വിജയത്തിന് സംഘാടകസമിതി രൂപീകരിച്ചു. യോഗം എം.രാജഗോപാലന്‍ എം.എല്‍.എ ഉദ്ഘാടനം ചെയ്തു. ആദ്യമായി കാസര്‍കോട് ജില്ലയില്‍ നടക്കുന്ന ചാമ്പ്യന്‍സ് ബോട്ട് ലീഗ് മത്സരങ്ങള്‍ വന്‍ വിജയമാക്കുന്നതിന് എല്ലാവരുടെയും കൂട്ടായ പ്രവര്‍ത്തനം ഉണ്ടാകണമെന്ന് എം.എല്‍.എ പറഞ്ഞു. വടക്കന്‍ കേരളത്തില്‍ ചാലിയാര്‍ പുഴയിലും ധര്‍മ്മടത്തും ചെറുവത്തൂരിലും മാത്രമാണ് ചാമ്പ്യന്‍സ് ബോട്ട് ലീഗ് മത്സരങ്ങള്‍ നടക്കുന്നത്.