ലോകബാങ്കിന്റെ സഹായത്തോടെ കൃഷി വകുപ്പ് നടപ്പാക്കുന്ന കേര പദ്ധതി പ്രകാരം ഏലം പുനര്‍നടീലിനു ഹെക്ടറിന് ഒരു ലക്ഷം രൂപ നിരക്കില്‍ ധനസഹായം നല്‍കുന്നതിനുള്ള പദ്ധതിയ്ക്ക് ഇടുക്കി ജില്ലയിലെ കര്‍ഷകരില്‍ നിന്നും അപേക്ഷ സ്വീകരിക്കുന്നതിനുള്ള തീയതി മാര്‍ച്ച് 25 വരെ നീട്ടി.

ഉല്പാദനക്ഷമത കുറഞ്ഞ ഏലം ചെടികള്‍ മുറിച്ചു മാറ്റി കാലാവസ്ഥാ വ്യതിയാനത്തെ പ്രതിരോധിക്കാന്‍ ശേഷിയുള്ളതും, ഉല്പാദനക്ഷമത കൂടിയതുമായ ഇനങ്ങളുപയോഗിച്ചുള്ള മൂവായിരത്തി അഞ്ഞൂറ് ഹെക്ടറിലെ പുനര്‍നടീലാണ് പദ്ധതിയിലൂടെ ലക്ഷ്യം വെയ്ക്കുന്നത്. ഏഴായിരത്തോളം ഏലം കര്‍ഷകര്‍ക്ക് നേരിട്ട് ആനുകൂല്യം ലഭിക്കും.

അവധിക്കാല ഫോസ്റ്റര്‍ കെയര്‍ പദ്ധതിയുടെ ഭാഗമായി ശിശു സംരക്ഷണ സ്ഥാപനങ്ങളില്‍ താമസിക്കുന്ന കുട്ടികളെ സ്വന്തം വീട്ടില്‍ താമസിപ്പിച്ചു സംരക്ഷിക്കുവാന്‍ താല്‍പ്പര്യമുള്ളവരില്‍ നിന്ന് അപേക്ഷ ക്ഷണിച്ചു. വിവിധ കാരണങ്ങളാല്‍ സ്വന്തം രക്ഷിതാക്കളുടെ കൂടെ താമസിക്കാന്‍ സാധിക്കാത്ത കുട്ടികള്‍ക്ക് മധ്യവേനല്‍ അവധിക്കാലത്ത് ഭവനാന്തരീക്ഷത്തില്‍ താമസിക്കുന്നതിനുളള അവസരം ഒരുക്കലാണ് ഫോസ്റ്റര്‍ കെയര്‍ പദ്ധതി ലക്ഷ്യമിടുന്നത്.

പള്ളിവാസൽ വിപുലീകരണ പദ്ധതി നാളെ (മാർച്ച് 12) രാവിലെ 11 മണിക്ക് മുഖ്യമന്ത്രി പിണറായി വിജയൻ രാഷ്ട്രത്തിന് സമർപ്പിക്കും. പള്ളിവാസൽ വിപുലീകരണ പദ്ധതി പവർഹൗസ്‌ അങ്കണത്തിൽ നടക്കുന്ന ചടങ്ങിൽ വൈദ്യുതി വകുപ്പ് മന്ത്രി കെ. കൃഷ്ണൻകുട്ടി അധ്യക്ഷത വഹിക്കും. ജലവിഭവ വകുപ്പ് മന്ത്രി റോഷി ആഗസ്റ്റിൻ മുഖ്യപ്രഭാഷണം നടത്തും. ഇടുക്കി ജലവൈദ്യുതി പദ്ധതിയുടെ സുവർണ ജൂബിലി ആഘോഷങ്ങളുടെ ഉദ്ഘാടനവും മുഖ്യമന്ത്രി നിർവഹിക്കും.

കാട്ടാക്കട നഗരവികസനത്തിന്റെ ഭാഗമായി ആദ്യഘട്ട ഭൂമി ഏറ്റെടുത്തവർക്കുള്ള നഷ്ടപരിഹാര വിതരണത്തിന്റെ ഉദ്ഘാടനം റവന്യൂ വകുപ്പ് മന്ത്രി കെ. രാജൻ ഓൺലൈനായി നിർവഹിച്ചു.

കാട്ടാക്കട ജംഗ്ഷൻ വികസനം എന്ന ദീർഘനാളായ സ്വപ്നം ഇവിടെ യാഥാർത്ഥ്യമാവുകയാണെന്നും ഭൂമി ഏറ്റെടുക്കൽ നടപടികൾ ഇപ്പോൾ സുതാര്യമാണെന്നും മന്ത്രി പറഞ്ഞു.

അഞ്ചാനകുഴിക്കര - പാച്ചൻമുക്ക്-കാക്കാണിക്കര - വട്ടക്കരിക്കകം റോഡിന്റെ ഉദ്ഘാടനം ഡി.കെ മുരളി എംഎൽഎ നിർവഹിച്ചു.  എംഎൽഎയുടെ ആസ്തി വികസന ഫണ്ടിൽ നിന്ന് 40 ലക്ഷം രൂപ വിനിയോഗിച്ചാണ് റോഡിന്റെ നിർമ്മാണം പൂർത്തിയാക്കിയത്.

 അടിസ്ഥാന സൗകര്യ വികസനത്തിൽ വലിയൊരു ചുവടുവെയ്പ്പായി മാറുന്ന ഈ പദ്ധതി ഗ്രാമീണ മേഖലയുടെ വികസനത്തിന് പുതിയ വേഗത പകരുമെന്ന് സി.കെ മുരളി എംഎൽഎ പറഞ്ഞു.

പാങ്ങോട് കാക്കാണിക്കര ജംഗ്ഷനിൽ നടന്ന ചടങ്ങിൽ പാങ്ങോട് ഗ്രാമപഞ്ചായത്ത് പ്രസിഡന്റ് സിമി പി, കാക്കാണിക്കര വാർഡ് അംഗം കെ.അനിൽകുമാർ, എക്സിക്യൂട്ടീവ് എഞ്ചിനീയർ ഗിരീഷ് കുമാർ തുടങ്ങിയവർ പങ്കെടുത്തു

 ജനങ്ങൾക്ക് മുമ്പിൽ മുഖം തിരിഞ്ഞു നടക്കുന്ന സമീപനമല്ല സർക്കാരിനുള്ളതെന്നും ഓരോ പ്രദേശത്തെയും ആവശ്യങ്ങളറിഞ്ഞും കേട്ടുമാണ് സർക്കാർ പരിഹാരം കാണുന്നതെന്നും ഭക്ഷ്യ സിവിൽ സപ്ലൈസ് വകുപ്പ് മന്ത്രി ജി. ആർ അനിൽ. ബിഎം&ബിസി നിലവാരത്തിൽ നിർമിച്ച വാവറഅമ്പലം - ശ്രീനാരായണപുരം റോഡിന്റെ ഉദ്ഘാടനവും കണിയാപുരം -നേതാജിപുരം, ശ്രീനാരായണപുരം -പോത്തൻകോട്, മെഡിക്കൽ കോളേജ് -തിരുവനന്തപുരം എന്നിവിടങ്ങളിലേക്കുള്ള ബസ് സർവീസിന്റെ ഫ്ലാഗ് ഓഫും നിർവഹിച്ചു സംസാരിക്കുകയായിരുന്നു മന്ത്രി.

ബ്രഹ്മോസ് എയ്‌റോസ്പെയ്‌സ് തിരുവനന്തപുരം ലിമിറ്റഡിന്റെ പുതിയ മിസൈൽ നിർമ്മാണ യൂണിറ്റ് പദ്ധതി കള്ളിക്കാടിൽ പ്രഖ്യാപിച്ചു. കള്ളിക്കാട് ദീപ ഓഡിറ്റോറിയത്തിൽ നടന്ന ചടങ്ങ് സി.കെ ഹരീന്ദ്രൻ എംഎൽഎ ഉദ്ഘാടനം ചെയ്തു. കള്ളിക്കാടിൻ്റെ വികസനത്തിന് ഒരു നാഴികക്കല്ലാകും ബ്രഹ്മോസിൻ്റെ മിസൈൽ നിർമ്മാണ യൂണിറ്റെന്ന് എംഎൽഎ പറഞ്ഞു.

ആയിരം കോടിയുടെ നിക്ഷേപമാണ് ആദ്യഘട്ടത്തിൽ വരുന്നത്. നാടിന്റെ വികസനക്കുതിപ്പിനും രാജ്യത്തിൻ്റെ സുരക്ഷയ്ക്കും മുതൽക്കൂട്ടാകുന്ന പദ്ധതിയിലൂടെ നൂറുകണക്കിന് തൊഴിലവസരങ്ങൾക്കും വൻതോതിലുള്ള നികുതി വരുമാനത്തിനും വഴിയൊരുങ്ങുമെന്നും അദ്ദേഹം വ്യക്തമാക്കി.

പോത്തൻകോട് പണിമൂല ദേവീ ക്ഷേത്രത്തിൽ ഏപ്രിൽ 1 മുതൽ 7വരെ നടക്കുന്ന ദ്വൈവാർഷിക സപ്തദിന ദേശീയോത്സവത്തോടനുബന്ധിച്ച മുന്നൊരുക്കങ്ങൾ വിലയിരുത്തുന്നതിനായി അവലോകന യോ​ഗം ചേർന്നു. ഭക്ഷ്യപൊതുവിതരണ വകുപ്പ് മന്ത്രി ജി.ആർ അനിൽ അധ്യക്ഷത വഹിച്ചു.

നെടുമങ്ങാട് പെരിങ്ങമ്മല സ്മാർട്ട് വില്ലേജ് ഓഫീസിൽ പണികഴിപ്പിച്ച പുതിയ മന്ദിരത്തിന്റെ ഉദ്ഘാടനം റവന്യൂ വകുപ്പ് മന്ത്രി കെ. രാജൻ ഓൺലൈനായി നിർവഹിച്ചു. സംസ്ഥാന സർക്കാരിന്റെ 2023 - 24 പ്ലാൻ സ്കീം പദ്ധതിയിൽ ഉൾപ്പെടുത്തിയാണ് അത്യാധുനിക സൗകര്യങ്ങളോടുകൂടിയ മന്ദിരം നിർമ്മിച്ചത്.