പണ്ഡിറ്റ് ജവഹർലാൽ നെഹ്‌റുവിന്റെ  ജന്മദിനം ജില്ല ശിശുക്ഷേമ സമിതിയുടെ ആഭിമുഖ്യത്തിൽ വിപുലമായി ആഘോഷിച്ചു. ജില്ല കേന്ദ്രീകരിച്ച് ആലപ്പുഴ ടൗണിൽ കുട്ടികളുടെ വർണ്ണാഭമായ ശിശുദിന റാലി സംഘടിപ്പിച്ചു. 
ജില്ലാ പോലീസ് മേധാവി എം.പി.മോഹനചന്ദ്രൻ സല്യൂട്ട് സ്വീകരിച്ചു. അഡീഷണൽ ജില്ലാ മജിസ്ട്രേട്ട് ആശ സി. എബ്രഹാം റാലി ഫ്ളാഗ് ഓഫ് ചെയ്തു. തുടർന്ന് തുറന്ന ജീപ്പിൽ കുട്ടികളുടെ പ്രധാനമന്ത്രി നിവേദ്യ ലാൽ, പ്രസിഡൻ്റ് ആരോൺ എസ്. ജോൺ, എസ്. ചാരുലത, ഫൈഫാ
റാഷിദ് എന്നിവർ അഭിവാദ്യം സ്വീകരിച്ച്  റാലി  ജവഹർ ബാലഭവനിൽ സമാപിച്ചു.

ലോക പ്രമേഹദിനവുമായി ബന്ധപ്പെട്ട് ജില്ലാ ആരോഗ്യ വകുപ്പ് പൊതുജനങ്ങൾക്ക് അരോഗാവബോധം സൃഷ്ടിക്കുന്നതിന് നടപ്പാക്കുന്ന 'മധുര നൊമ്പരം' ക്യാമ്പയിന് തുടക്കമായി. നവംബർ 14 മുതൽ ഒരാഴ്ചത്തെ ക്യാമ്പയിൻ രക്തത്തിലെ പഞ്ചസാര അളവ് കൃത്യമായി പരിശോധിക്കാനും ചികിത്സ ഉറപ്പാക്കാനും ജനങ്ങളെ ബോധവത്കരിക്കുന്നു. ജില്ലയിലുടനീളം പ്രമേഹ പരിശോധന ക്യാമ്പുകളും പ്രമേഹാവബോധ പ്രവർത്തനങ്ങളും സംഘടിപ്പിക്കുമെന്ന് ജില്ലാ മെഡിക്കൽ ഓഫീസർ പിയുഷ് എം നമ്പൂതിരിപ്പാട് അറിയിച്ചു. 'തടസ്സങ്ങൾ നീക്കാം വിടവുകൾ നികത്താം' എന്നതാണ് ഇത്തവണത്തെ പ്രമേഹ ദിന സന്ദേശം.

ജില്ലാ ഓഫീസ് സാമ്പത്തിക സ്ഥിതി വിവരകണക്ക് വകുപ്പ് ഓഫീസിലേക്ക് 11ാമത് കാര്‍ഷിക സെന്‍സസ് ജില്ലാതല പരിശീലന പരിപാടിയുടെ ഭാഗമായി പരിശീലന സാമഗ്രികള്‍ നല്‍കുന്നതിന് വ്യക്തികളില്‍ നിന്നും സ്ഥാപനങ്ങളില്‍ നിന്നും ക്വട്ടേഷന്‍ ക്ഷണിച്ചു. ക്വട്ടേഷനുകള്‍ ലഭിക്കേണ്ട അവസാന തീയതി നവംബര്‍ 20ന്  രാവിലെ 11. നവംബര്‍ 20ന് രാവിലെ  11.30ന് ക്വട്ടേഷന്‍ തുറക്കും. ക്വട്ടേഷനുകള്‍ ജില്ലാ ഓഫീസ്, സാമ്പത്തിക സ്ഥിതി വിവരക്കണക്ക് വകുപ്പ്, ജില്ലാ ആസൂത്രണ സമിതി കാര്യായലം, സിവില്‍ സ്റ്റേഷന്‍, വിദ്യാനഗര്‍ - 671123 എന്ന വിലാസത്തില്‍ ലഭിക്കണം. ഫോണ്‍- 04994 293430, 9946620881.

കല്ലിക്കണ്ടി എൻഎഎം കോളേജ് കാന്റീൻ ജീവനക്കാരി ജാനുവിന് കോളേജ് വിദ്യാർഥികളുടെ നേതൃത്വത്തിൽ നിർമ്മിച്ചു നൽകുന്ന സ്‌നേഹവീടിന്റെ താക്കോൽദാനം നിയമസഭാ സ്പീക്കർ അഡ്വ എ.എൻ ഷംസീർ നിർവ്വഹിച്ചു. പഠന കാലത്ത് സ്നേഹവീട് നിർമ്മിച്ചു നൽകിയതിലൂടെ തികച്ചും മാതൃകാപരമായ പ്രവർത്തനമാണ് വിദ്യാർഥികൾ കാഴ്ചവെച്ചതെന്ന് സ്പീക്കർ പറഞ്ഞു. ജാനുവിന്റെ വർഷങ്ങളായുള്ള വീടെന്ന സ്വപ്നമാണ് കോളേജ് വിദ്യാർഥികളും മാനേജ്‌മെന്റും ജീവനക്കാരും ചേർന്ന് യാഥാർഥ്യമാക്കിയത്.

സംസ്ഥാനസ്കൂൾ ശാസ്ത്രമേളയുടെ മുന്നോടിയായി സംഘടിപ്പിച്ച വിളംബര ഘോഷയാത്ര പ്രധാന വേദിയായ സെന്റ് ജോസഫ് സ്കൂളിൽ എത്തിച്ചേർന്നപ്പോൾ സംഘാടകസമിതി ചെയർമാനും ഫിഷറീസ്, സാംസ്കാരിക യുവജനക്ഷേമ വകുപ്പ് മന്ത്രിയുമായ മന്ത്രി സജി ചെറിയാൻ സ്കൂൾ അങ്കണത്തിൽ  ദീപശിഖ തെളിച്ചു. തുടർന്ന് നടന്ന ചടങ്ങ് മന്ത്രി ഉദ്ഘാടനം ചെയ്തു. ആലപ്പുഴയിൽ നടക്കുന്ന സംസ്ഥാന സ്കൂൾ ശാസ്ത്രമേള  ചരിത്രത്തിൻ്റെ ഭാഗമാകുമെന്ന് മന്ത്രി പറഞ്ഞു. പി പി ചിത്തരഞ്ജൻ എം എൽ എ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡൻ്റ് കെ ജി രാജേശ്വരി, ആലപ്പുഴ മുനിസിപ്പൽ ചെയർപേഴ്സൺ കെ കെ ജയമ്മ എന്നിവർ സംസാരിച്ചു.

പൊതുവിദ്യാഭ്യാസ വകുപ്പ് സമഗ്രശിക്ഷാ കേരളം ജില്ലാ സ്‌പെസിഫിക്ക് ഇന്നവേറ്റീവ് പ്രോഗ്രാമിന്റെ ഭാഗമായി രൂപീകരിച്ച ഭിന്നശേഷി കുട്ടികളുടെ സംഗീത ട്രൂപ്പ് 'രാഗലയം' കെ.വി സുമേഷ് എം എൽ എ ഉദ്ഘാടനം ചെയ്തു. കുട്ടികൾ ദൈവതുല്യമായ ശേഷിയുള്ളവരാണെന്ന് തെളിയിക്കുന്നതാണ് രാഗലയത്തിന്റെ പ്രവർത്തനങ്ങളെന്ന് എം എൽ എ പറഞ്ഞു. ചിട്ടയായ പരിശീലനവും ഇടപെടലുകളും നൽകിയാൽ ഭിന്നശേഷി കുട്ടികളെ മുഖ്യധാരയിലേക്ക് ഉയർത്താനാകും. ഇതിന് ഉദാഹരണമാണ് രാഗലയം സംഗീതട്രൂപ്പും ഇൻക്ലൂസീവ് സ്‌പോർട്ട്‌സ് മീറ്റുമെന്നും അദ്ദേഹം പറഞ്ഞു.

കേരള പബ്ലിക് സര്‍വ്വീസ് കമ്മിഷന്‍ കാസര്‍കോട് ജില്ലയില്‍ വിദ്യാഭ്യാസ വകുപ്പില്‍ എല്‍.പി സ്‌കൂള്‍ ടീച്ചര്‍ (മലയാളം മീഡിയം) (കാറ്റഗറി നം. 213/2023) ( I എന്‍.സി.എ-എസ്.സി) ചുരുക്കപ്പട്ടിക  പ്രസിദ്ധീകരിച്ചു.  

ആലപ്പുഴ നഗരത്തിൽ ആഘോഷ സായാഹ്നമൊരുക്കി സംസ്ഥാനസ്കൂൾ ശാസ്ത്രോത്സവ വിളംബര ജാഥ. ആലപ്പുഴ നഗരസഭ ശതാബ്ദി മന്ദിരത്തിൽ നിന്നും വൈകിട്ട് നാലിന് ആരംഭിച്ച വിളംബര ഘോഷയാത്ര എച്ച് സലാം എം എൽ എ  ഫ്ലാഗ് ഓഫ് ചെയ്തു. 
സംഘാടകസമിതി ചെയർമാനും ഫിഷറീസ്,  സാംസ്കാരിക, യുവജനക്ഷേമ വകുപ്പ് മന്ത്രിയുമായ സജി ചെറിയാൻ, പി പി ചിത്തരഞ്ജൻ എം എൽ എ,  ജില്ലാ പഞ്ചായത്ത് പ്രസിഡൻ്റ് കെ ജി രാജേശ്വരി, ആലപ്പുഴ മുനിസിപ്പൽ ചെയർപേഴ്സൻ കെ കെ ജയമ്മ, ജില്ലാ പഞ്ചായത്ത് അംഗങ്ങളായ  ടി എസ് താഹ, ആർ റിയാസ്, വിദ്യാഭ്യാസ ഉപഡയറക്ടർ ഇ.എസ്.ശ്രീലത എന്നിവർ ജാഥക്ക് നേതൃത്വം നൽകി അണിനിരന്നു.

കേരള പബ്ലിക് സര്‍വ്വീസ് കമ്മിഷന്‍ കാസര്‍കോട് ജില്ലയില്‍ വുമന്‍ ഫയര്‍ ആന്‍ഡ് റസ്‌ക്യൂ ഓഫീസര്‍ തസ്തികയിലേക്കുള്ള (ട്രെയിനീ) (കാറ്റഗറി നം. 287/2023) (I എന്‍.സി.എ-എസ്.സി)  സ്വിമ്മിംഗ് ടെസ്റ്റിനുള്ള ഷോര്‍ട് ലിസ്റ്റ്  പ്രസിദ്ധീകരിച്ചു.  

തളിപ്പറമ്പ് മണ്ഡലത്തിന്റെ ആഭിമുഖ്യത്തിലുള്ള എഡ്യൂ എക്‌സ്‌പോ ടേണിങ് പോയിന്റ് മൂന്നാം പതിപ്പ് കണ്ണൂർ ഗവ. എഞ്ചിനീയറിംഗ് കോളേജിൽ ചലച്ചിത്ര താരം അന്ന ബെൻ ഉദ്ഘാടനം ചെയ്തു. എല്ലാവരുടെ ജീവിതത്തിലും പല പല ടേണിംഗ് പോയിൻറുകൾ ഉണ്ടാവുമെന്ന് അന്ന ബെൻ പറഞ്ഞു. ധൈര്യത്തോടെ അവ അനുഭവിക്കുക. എഡ്യു എക്‌സ്‌പോ പല അവസരങ്ങൾ, പല മേഖലകൾ വിദ്യാർഥികൾക്കുമുന്നിൽ തുറന്നിടുന്നു. അവ എന്താണെന്ന് അറിയുന്നത് വിദ്യാർഥികളുടെ ഇഷ്ടങ്ങളിലേക്ക് നയിക്കുന്നെും അവർ പറഞ്ഞു.