ജില്ലാ ഖാദി ഗ്രാമ വ്യവസായ ഓഫീസിന്റെ ആഭിമുഖ്യത്തില്‍ നാളെ (27) ബുധനാഴ്ച ദേവികുളം താലൂക്ക് ഓഫീസില്‍ ഏകദിന ഓണം ഖാദി വിപണന മേള സംഘടിപ്പിക്കും. ദേവികുളം തഹസില്‍ദാര്‍ ജയന്‍ കെ എം മേളയുടെ ഉദ്ഘാടനം നിര്‍വഹിക്കും. റെഡിമെയ്ഡ് ഷര്‍ട്ടുകള്‍, ഷര്‍ട്ട് പീസുകള്‍ , ചുരിദാര്‍ തുണിത്തരങ്ങള്‍, സാരികള്‍, ബെഡ്ഷീറ്റുകള്‍, ഗ്രാമീണ വ്യവസായ ഉത്പന്നങ്ങള്‍ എന്നിവയുടെ ആകര്‍ഷകമായ ശേഖരം ഒരുക്കിയിട്ടുണ്ട്. ഖാദി തുണിത്തരങ്ങള്‍ക്ക് 30% സര്‍ക്കാര്‍ റിബേറ്റും സര്‍ക്കാര്‍, അര്‍ധസര്‍ക്കാര്‍, പൊതുമേഖല, സഹകരണ സ്ഥാപനങ്ങളിലെ ജീവനക്കാര്‍ക്ക് ഒരു ലക്ഷം രൂപ വരെ ക്രെഡിറ്റ് സൗകര്യവും ലഭ്യമാണ്.

ഓണക്കാലത്ത് വിലക്കയറ്റം, കരിഞ്ചന്ത, പൂഴ്ത്തിവെയ്പ് എന്നിവ തടയുന്നതിനായി പൊതുവിതരണ ഉപഭോക്തൃകാര്യ വകുപ്പ്, ലീഗൽ മെട്രോളജി, ഭക്ഷ്യസുരക്ഷാ വകുപ്പുകളുടെ സംയുക്ത സ്‌ക്വാഡ് പരിശോധന നടത്തി. കോഴിക്കോട് താലൂക്കിലെ കുന്ദമംഗലം, പടനിലം, ചൂലാംവയൽ എന്നിവിടങ്ങളിലാണ് പൊതുവിപണി പരിശോധന നടത്തിയത്. 

മുദ്ര പതിക്കാത്ത ത്രാസ് ഉപയോഗിച്ചതായി കണ്ടെത്തിയ മൂന്ന് കടകളിൽ നിന്നായി 6000 രൂപ പിഴ ഈടാക്കുകയും വിലവിവര പട്ടിക പ്രദർശിപ്പിക്കാത്ത നാല് കടകൾക്കെതിരെയും, ഭക്ഷ്യസുരക്ഷാ ലൈസൻസ് ഇല്ലാത്തതും ന്യൂനതകൾ കണ്ടെത്തിയതുമായ രണ്ട് സ്ഥാപനങ്ങൾക്കെതിരെ നടപടി സ്വീകരിക്കുന്നതിനായി നോട്ടീസ് നൽകുകയും ചെയ്തു. 

കാല്‍പന്തുകളിയുടെ ആവേശമുയര്‍ത്തി അപ്പപ്പാറ എടയൂര്‍ പാടശേഖരത്തില്‍ നടന്ന ബെദിയാട്ട സീസണ്‍ 3 മഡ് ഫുട്‌ബോളില്‍ റണ്ണേഴ്‌സ് മീന്‍ക്കൊല്ലി  കിരീടം നേടി. കുടുംബശ്രീ ജില്ലാ മിഷന്‍, തിരുനെല്ലി സി.ഡി.എസ് തിരുനെല്ലി ആദിവാസി സമഗ്ര വികസന പദ്ധതിയുടെ ഭാഗമായി ബായിസാക്ക് യൂത്ത് റിസോഴ്‌സ് സെന്റര്‍ ട്രൈബല്‍ ലൈബ്രറിയുടെ നേതൃത്വത്തില്‍ ലഹരിക്കെതിരെ പുത്തന്‍ ലഹരിയിലൂടെ കൈകോര്‍ക്കാം എന്ന ലക്ഷ്യത്തോടെയാണ് മത്സരം സംഘടിപ്പിച്ചത്. മത്സരത്തില്‍ തദ്ദേശീയ മേഖലയിലെ 13 യൂത്ത് ക്ലബ്ബുകള്‍ പങ്കാളികളായി. സെവന്‍ സ്റ്റാര്‍ കോണവയല്‍, തുടി അറവനാഴി ടീമുകള്‍ രണ്ടും മൂന്നും സ്ഥാനം കരസ്ഥമാക്കി.

പാപ്പിനിശ്ശേരി മുതല്‍ താഴെചൊവ്വ വരെയുള്ള ദേശീയപാത റീ ടാറിങ് നടത്തണമെന്ന് മന്ത്രി രാമചന്ദ്രന്‍ കടന്നപ്പള്ളി ദേശീയപാത അതോറിറ്റിക്ക് നിര്‍ദ്ദേശം നല്‍കി. കലക്ടറേറ്റില്‍ മന്ത്രിയുടെ അധ്യക്ഷതയില്‍ കെ.വി സുമേഷ് എംഎല്‍എയുടെ സാന്നിധ്യത്തില്‍ ചേര്‍ന്ന യോഗത്തിലാണ് നിര്‍ദ്ദേശം. മഴ പെയ്തു പൊട്ടിപൊളിഞ്ഞ റോഡില്‍ ചെറിയ രീതിയിലുള്ള അറ്റകുറ്റപ്പണികളാണ് ഇപ്പോള്‍ നടന്നുകൊണ്ടിരിക്കുന്നത്. ഇത് ഗതാഗത കുരുക്കിന് കാരണമാകുന്നുണ്ട്. അറ്റകുറ്റപ്പണി ഒഴിവാക്കി റീ ടാറിങ് നടത്തണമെന്ന് ദേശീയപാത അതോറിറ്റിയോടും കരാര്‍ കമ്പനിയോടും മന്ത്രി ആവശ്യപ്പെട്ടു. 

സപ്ലൈകോയുടെ നേതൃത്വത്തില്‍ കല്‍പ്പറ്റയില്‍ സംഘടിപ്പിക്കുന്ന ഓണം ഫെയര്‍ ജില്ലാതല ഉദ്ഘാടനം ഇന്ന് (ഓഗസ്റ്റ് 26) രാവിലെ 10 ന് പട്ടിക ജാതി-പട്ടികവര്‍ഗ്ഗ- പിന്നാക്കക്ഷേമ വകുപ്പ് മന്ത്രി ഒ.ആര്‍ കേളു നിര്‍വഹിക്കും. അരി, വെളിച്ചെണ്ണ, മറ്റ് ഭക്ഷ്യവസ്തുക്കള്‍ ന്യായവിലയ്ക്ക് ഉറപ്പാക്കുന്നതോടൊപ്പം ഉപഭോക്താക്കള്‍ക്കായി വന്‍വിലക്കുറവും ഓഫറുകളും നല്‍കുന്നുണ്ട്.  ഓണം ഫെയറിന്റെ ഭാഗമായി പ്രത്യേക സമ്മാന പദ്ധതികളും ഒരുക്കിയിട്ടുണ്ട്. സെപ്തംബര്‍ നാല് വരെയാണ് മേള. കല്‍പ്പറ്റ പള്ളിത്താഴെ റോഡിലെ നെല്ലിക്കുന്ന് ടവറില്‍ നടക്കുന്ന ഓണം ഫെയറില്‍ എം.എല്‍.എ ടി.സിദ്ധിഖ് അധ്യക്ഷനാവും.

സപ്ലൈകോ ശബരി ബ്രാൻഡിലെ വെളിച്ചെണ്ണയ്ക്ക് ലിറ്ററിന് സബ്സിഡി നിരക്കിൽ 339 രൂപയായും സബ്സിഡി ഇതര നിരക്കിൽ 389 രൂപയായും ഇന്നു (26) മുതൽ സപ്ലൈകോ വില്പനശാലകളിൽ ലഭിക്കും.സബ്സിഡിയിതര നിരക്കിൽ ഉള്ള വെളിച്ചെണ്ണ ഉപഭോക്താവിന് ആവശ്യം പോലെ വാങ്ങാം. നേരത്തെ ശബരി വെളിച്ചെണ്ണ യുടെ വില സബ്സിഡി നിരക്കിൽ 349 രൂപയും സബ്സിഡി ഇതര നിരക്കിൽ 429 രൂപയും ആയിരുന്നു.

ഓണം 2025 നോടനുബന്ധിച്ച് സപ്ലൈകോയുടെ മൊബൈല്‍ ഓണചന്ത ഇന്ന് (26) മുതല്‍. ജില്ലയിലെ തൊടുപുഴ, ഇടുക്കി, ഉടുമ്പന്‍ചോല, പീരുമേട്, ദേവികുളം എന്നീ 5 നിയോജക മണ്ഡലങ്ങളില്‍ സെപ്റ്റംബര്‍ 4 വരെ മൊബൈല്‍ ഓണചന്ത സഞ്ചരിച്ച് വില്‍പ്പന നടത്തും.

ജില്ലാ വ്യവസായ കേന്ദ്രവും ജില്ലാപഞ്ചായത്തും സംയുക്തമായി കണ്ണൂർ പോലീസ് മൈതാനിയിൽ സംഘടിച്ച കാർഷിക പരമ്പരാഗത വ്യവസായ ഉൽപന്ന പ്രദർശന വിപണമേള രജിസ്ട്രേഷൻ വകുപ്പ് മന്ത്രി രാമചന്ദ്രൻ കടന്നപ്പള്ളി ഉദ്ഘാടനം ചെയ്തു. സ്റ്റാർട്ടപ്പുകൾ, പരമ്പരാഗത വ്യവസായങ്ങൾ, കാർഷിക ഉൽപന്നങ്ങൾ, ഫർണിച്ചറുകൾ, ജൈവ കമ്പോസ്റ്റ് ടാങ്ക്, ഭക്ഷ്യോൽപന്നങ്ങൾ, സോളാർ പവർപ്ലാന്റ് ഉൾപ്പെടെയുള്ള വൈവിധ്യങ്ങളായ 106 സ്റ്റാളുകളാണ് പവലിയനിൽ ഒരുക്കിയിട്ടുള്ളത്.

ഹരിത കേരളം മിഷന്റെയും ഇരിക്കൂർ പഞ്ചായത്തിന്റെയും നേതൃത്വത്തിൽ തയ്യാറാക്കിയ 2024-25 വർഷത്തെ ജലബജറ്റ് പഞ്ചായത്ത് പ്രസിഡന്റ് ടി.പി ഫാത്തിമ പ്രകാശനം ചെയ്തു. ഇരിക്കൂർ ഗ്രാമപഞ്ചായത്ത് ഹാളിൽ നടന്ന പരിപാടിയിൽ ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയർപേഴ്‌സൺ എൻ.കെ സുലൈഖ ടീച്ചർ അധ്യക്ഷയായി. പഞ്ചായത്തിലെ നിലവിലുള്ള ജല സ്രോതസ്സുകളുടെ വിവരം, വിതരണം ചെയ്യുന്ന വെള്ളത്തിന്റെ അളവ്, മഴയുടെ തോത് എന്നിവ ജല ലഭ്യതാ വിഭാഗത്തിലും ഗാർഹികം, കൃഷി, വ്യവസായം, വാണിജ്യം, മറ്റുള്ളവ എന്നിവ വിനിയോഗ വിഭാഗത്തിലും ഉൾപ്പെടുത്തി.