ആലപ്പുഴ: ഗവൺമെന്റ് ടി.ഡി. മെഡിക്കൽ കോളജ് ആശുപത്രിയിലേക്ക് ഡിസ്‌പോസിബിൾ ടെസ്റ്റ് ട്യൂബ് 15000 എണ്ണം വാങ്ങുന്നതിന് ക്വട്ടേഷൻ ക്ഷണിച്ചു. നവംബർ 13ന് വൈകിട്ട് മൂന്നിനകം സൂപ്രണ്ട്, ഗവൺമെന്റ് റ്റി.ഡി. മെഡിക്കൽ കോളേജ് ആശുപത്രി, വണ്ടാനം, ആലപ്പുഴ എന്ന വിലാസത്തിൽ ക്വട്ടേഷൻ നൽകണം.

(പി.എൻ.എ.2584/17)

ആലപ്പുഴ ഗവൺമെന്റ് മുഹമ്മദൻസ് ഗേൾസ് എച്ച്.എസിൽ ദിവസവേതനാടിസ്ഥാനത്തിൽ എച്ച്.എസ്.എ.യെ (ഗണിതശാസ്ത്രം) നിയമിക്കുന്നു. താത്പര്യമുള്ള ഉദ്യോഗാർഥികൾ നവംബർ മൂന്നിന് രാവിലെ 10ന് സ്‌കൂൾ ഓഫീസിൽ നടക്കുന്ന അഭിമുഖത്തിൽ അസൽ സർട്ടിഫിക്കറ്റുകളുമായി എത്തണം.

(പി.എൻ.എ.2583/17)

ആലപ്പുഴ: ഇന്ന് (നവംബർ 1) രാവിലെ സ്‌കൂളുകളിൽ പ്രത്യേക അസംബ്‌ളി ചേർന്ന് മലയാള ഭാഷ പ്രതിജ്ഞയെടുക്കും. പ്രതിജ്ഞ ചുവടെ: ''മലയാളം എന്റെ മാതൃ ഭാഷയാണ്. മലയാളത്തിന്റെ സമ്പത്തിൽ ഞാൻ അഭിമാനിക്കുന്നു. മലയാള ഭാഷയെയും കേരള സംസ്‌ക്കാരത്തെയും ഞാൻ ആദരിക്കുന്നു. മലയാളത്തിന്റെ വളർച്ചയ്ക്കുവേണ്ടി എന്റെ കഴിവുകൾ ഞാൻ വിനിയോഗിക്കും.''

(പി.എൻ.എ.2582/17)

ആലപ്പുഴ: കേരളപ്പിറവി ദിനാഘോഷത്തിന്റെയും ഭരണഭാഷ വാരാഘോഷത്തിന്റെയും ജില്ലാതല ഉദ്ഘാടനം ഇന്ന്(നവംബർ 1) രാവിലെ 10.30ന് കളക്ടറേറ്റ് കോൺഫറൻസ് ഹാളിൽ നടക്കും. ജില്ലാ കളക്ടർ ടി.വി. അനുപമ ഉദ്ഘാടനം നിർവഹിക്കും. അഡീഷണൽ ജില്ലാ മജിസ്‌ട്രേറ്റ് എ. അബ്ദുൾ സലാം ആധ്യക്ഷ്യം വഹിക്കും. ഡോ. എസ്. അജയകുമാർ മുഖ്യപ്രഭാഷണം നടത്തും. വിദ്യാഭ്യാസ ഉപഡയറക്ടർ കെ.പി. ലതിക മലയാള ഭാഷ പ്രതിജ്ഞ ചൊല്ലിക്കൊടുക്കും. ജില്ലാ ഇൻഫർമേഷൻ ഓഫീസർ ചന്ദ്രഹാസൻ വടുതല, ജില്ലാതല ഉദ്യോഗസ്ഥർ എന്നിവർ പങ്കെടുക്കും. നവംബർ ഏഴുവരെ നീണ്ടു നിൽക്കുന്ന ആഘോഷങ്ങൾക്കാണ് ഇന്നു തുടക്കമാകുക.

(പി.എൻ.എ.2581/17)

മണ്ഡല മകരവിളക്ക് തീര്‍ഥാടനം ആരംഭിക്കുന്നതിനു മുന്നോടിയായി ശബരിമല ക്ഷേത്രത്തില്‍ അരവണ നിര്‍മാണം ആരംഭിച്ചു. തിരുവിതാംകൂര്‍ ദേവസ്വം ബോര്‍ഡ് പ്രസിഡന്‍റ് പ്രയാര്‍ ഗോപാലകൃഷ്ണന്‍ നിലവിളക്ക് തെളിച്ച് അരവണ നിര്‍മാണത്തിന് തുടക്കം കുറിച്ചു. തീര്‍ഥാടനകാലം തുടങ്ങുന്നതിനു മുന്‍പ് 30 ലക്ഷം ടിന്‍ അരവണ കരുതല്‍ ശേഖരമായി സൂക്ഷിക്കാന്‍ കഴിയും. ഒരു ദിവസം രണ്ട് ലക്ഷം ടിന്‍ അരവണ നിര്‍മിക്കും. ശബരിമല മേല്‍ശാന്തി ഉണ്ണികൃഷ്ണന്‍ നമ്പൂതിരി, മാളികപ്പുറം മേല്‍ശാന്തി പുതുമന മനു നമ്പൂതിരി, എക്സിക്യുട്ടീവ് ഓഫീസര്‍ വി.എന്‍. ചന്ദ്രശേഖരന്‍, അഡ്മിനിസ്ട്രേറ്റീവ് ഓഫീസര്‍ ദിലീപ് കുമാര്‍ തുടങ്ങിയവര്‍ സന്നിഹിതരായിരുന്നു.

പൊതുവിദ്യാലയങ്ങളിലെ അക്കാദമിക നിലവാരം ഉയര്‍ത്തുന്നതിന് എല്ലാ സ്കൂളുകളിലും ജനുവരി 30ന് മുന്‍പ് അക്കാദമിക് മാസ്റ്റര്‍ പ്ലാന്‍ തയാറാക്കുമെന്ന് വിദ്യാഭ്യാസമന്ത്രി സി. രവീന്ദ്രനാഥ് പറഞ്ഞു. തിരുമൂലപുരം ഇരുവള്ളിപ്ര സെന്‍റ് തോമസ് ഹയര്‍സെക്കന്‍ഡറി സ്കൂളില്‍ പൊതുവിദ്യാഭ്യാസ സംരക്ഷണവുമായി ബന്ധപ്പെട്ട് ചേര്‍ന്ന ജില്ലയിലെ വിദ്യാഭ്യാസ ഓഫീസര്‍മാരുടെയും പ്രിന്‍സിപ്പല്‍മാരുടെയും പ്രഥമാധ്യാപകരുടെയും അവലോകന യോഗത്തില്‍ സംസാരിക്കുകയായിരുന്നു അദ്ദേഹം. കുട്ടികളുടെ വൈവിധ്യമാര്‍ന്ന കഴിവുകളെ പൂര്‍ണതയിലേക്ക് എത്തിക്കുന്ന വിധമായിരിക്കണം അക്കാദമിക് മാസ്റ്റര്‍ പ്ലാന്‍ തയാറാക്കേണ്ടത്.

മഹാത്മാഗാന്ധി ദേശീയ ഗ്രാമീണ തൊഴിലുറപ്പു പദ്ധതിയില്‍ ജില്ലയില്‍ ലേബര്‍ ബജറ്റിന്‍റെ 41 ശതമാനം നേട്ടം കൈവരിച്ചു. 18,54,000 തൊഴില്‍ ദിനങ്ങളാണ് ജില്ലയില്‍ ഈ വര്‍ഷം കേന്ദ്ര സര്‍ക്കാര്‍ അംഗീകരിച്ച ലേബര്‍ ബജറ്റ്. ജില്ലയില്‍ കഴിഞ്ഞ ദിവസം വരെ 7,52,674 തൊഴില്‍ ദിനങ്ങള്‍ സൃഷ്ടിച്ചതായി പദ്ധതിയുടെ ജില്ലാ പ്രോഗ്രാം കോ-ഓര്‍ഡിനേറ്ററായ ജില്ലാ കലക്ടര്‍ ആര്‍ ഗിരിജ അറിയിച്ചു. സംസ്ഥാന ശരാശരി 36.68 ആണ്. അംഗീകരിച്ച പദ്ധതി അടങ്കലായ 79.72 കോടിയില്‍ 24.31 കോടി രൂപയാണ് ഇതുവരെയുളള ചെലവ.് മുന്‍വര്‍ഷം ഇതേ സമയം ലേബര്‍ ബജറ്റിന്‍റെ 48 ശതമാനം തൊഴില്‍ ദിനങ്ങള്‍ സൃഷ്ടിച്ചിരുന്നു.

ശബരിമല തീര്‍ഥാടന കാലത്ത് വ്യാജമദ്യത്തിന്‍റെയും കഞ്ചാവ് ഉള്‍പ്പെടെ ലഹരി വസ്തുക്കളുടെയും വില്പന തടയുന്നതിന് പരിശോധന ശക്തമാക്കാന്‍ ഡെപ്യുട്ടി കളക്ടര്‍ പി.ടി. ഏബ്രഹാമിന്‍റെ അധ്യക്ഷതയില്‍ കളക്ടറേറ്റില്‍ ചേര്‍ന്ന ജില്ലാ വ്യാജമദ്യ നിയന്ത്രണ സമിതി യോഗം തീരുമാനിച്ചു. പരിശോധനയ്ക്കായി പ്രത്യേക സ്ക്വാഡിനെ നിയോഗിക്കും. ലഹരി വില്‍പ്പനക്കാരെ പിടികൂടാന്‍ സ്റ്റുഡന്‍റ്സ് പൊലീസ് കേഡറ്റുകളുടെ സഹായത്തോടെ നിരീക്ഷണം ശക്തമാക്കും. വിദ്യാര്‍ഥികള്‍ക്കായി ലഹരി ബോധവത്കരണ ക്ലാസുകള്‍ നടത്തും. മയക്കുമരുന്നിന്‍റെ വില്പ്പന നടക്കുന്നതായി ശ്രദ്ധയില്‍പ്പെട്ടാല്‍ ആര്‍ക്കും എക്സൈസ് വകുപ്പുമായി ബന്ധപ്പെടാം.

റേഷന്‍ മുന്‍ഗണനാ പട്ടികയില്‍ ഉള്‍പ്പെടുത്തുന്നതിന് നിലവില്‍ അപേക്ഷ സമര്‍പ്പിച്ചവരുടെയും ഒന്നാംഘട്ട അദാലത്തില്‍ ഹാജരാകാതിരുന്നവരുടെയും പരാതികള്‍ തീര്‍പ്പാക്കുന്നതിന് നവംബര്‍ മൂന്നു മുതല്‍ ഒന്‍പതുവരെ പഞ്ചായത്തു തലത്തില്‍ രണ്ടാംഘട്ട അദാലത്ത് നടത്തുമെന്ന് കോഴഞ്ചേരി താലൂക്ക് സപ്ലൈ ഓഫീസര്‍ അറിയിച്ചു. തീയതി, പഞ്ചായത്ത്, അദാലത്ത് സ്ഥലം എന്ന ക്രമത്തില്‍-നവംബര്‍ മൂന്നിന്, ഇലന്തൂര്‍, ഓമല്ലൂര്‍, കോഴഞ്ചേരി താലൂക്ക് സപ്ലൈ ഓഫീസ്. മൂന്നിന്, കുളനട, കുളനട എആര്‍ഡി 35. നാലിന്, കോഴഞ്ചേരി, കോഴഞ്ചേരി താലൂക്ക് സപ്ലൈ ഓഫീസ്. നാലിന്, പത്തനംതിട്ട മുന്‍സിപ്പാലിറ്റി, കോഴഞ്ചേരി താലൂക്ക് സപ്ലൈ ഓഫീസ്.

സരസകവി മൂലൂര്‍ സ്മാരകത്തിന്‍റെ ആഭിമുഖ്യത്തില്‍ ഇലവുംതിട്ട ചന്ദനക്കുന്ന് സരസകവി മൂലൂര്‍ സ്മാരക ഗവണ്‍മെന്‍റ് യുപി സ്കൂളില്‍ ഇന്ന്(1) രാവിലെ 10ന് മലയാളഭാഷാ ദിനാഘോഷം നടക്കും. മുന്‍ എംഎല്‍എയും മൂലൂര്‍ സ്മാരക മാനേജിംഗ് കമ്മിറ്റി പ്രസിഡന്‍റുമായ കെ.സി. രാജഗോപാലന്‍ അധ്യക്ഷത വഹിക്കും.പ്രൊഫ.എ.ഒ. വര്‍ഗീസ് മുഖ്യപ്രഭാഷണം നടത്തും. മാതൃഭാഷയുടെ മാധുര്യവും മാതൃഭാഷാ പഠനത്തിന്‍റെ പ്രാധാന്യവും കുട്ടികളിലും രക്ഷിതാക്കളിലും എത്തിക്കുകയെന്ന ലക്ഷ്യത്തിലാണ് പരിപാടി സംഘടിപ്പിക്കുന്നത്. വിദ്യാര്‍ഥികളും അധ്യാപകരും രക്ഷിതാക്കളും സ്വന്തം രചനകളും പ്രശസ്ത മലയാള സാഹിത്യകൃതികളില്‍ നിന്നുള്ള ഭാഗങ്ങളും അവതരിപ്പിക്കും.