കേരള പൊതുമരാമത്ത് വകുപ്പിൽ 01.11.2010 മുതൽ 31.10.2018 വരെയുള്ള സീനിയർ ക്ലാർക്കുമാരുടെ സ്ഥാനക്കയറ്റ തിയതി പുനർനിർണയിച്ചുകൊണ്ടുള്ള താത്കാലിക ലിസ്റ്റ് www.keralapwd.gov.in ൽ പ്രസിദ്ധീകരിച്ചു.

പി.എൻ.എക്സ്. 1058/19

തിരുവനന്തപുരം എൻജിനീയറിംഗ് കോളേജിലെ സി.ഇ.ടി സ്‌കൂൾ ഓഫ് മാനേജ്‌മെന്റിൽ എം.ബി.എ. ഫുൾടൈം, പാർട്ട്‌ടൈം കോഴ്‌സുകൾക്ക് അപേക്ഷിക്കാം. അപേക്ഷാ ഫോം www.mba.cet.ac.in ൽ ലഭിക്കും. 30 ന് വൈകിട്ട് 4നകം അപേക്ഷ നൽകണം.

പി.എൻ.എക്സ്. 1057/19

സംസ്ഥാന സാക്ഷരതാ മിഷന്‍ ആദിവാസി കോളനികളില്‍ നടപ്പിലാക്കുന്ന സാക്ഷരതാ തുല്യതാ പദ്ധതിയായ സമഗ്ര പദ്ധതിയുടെ പ്രവേശനോത്സവം സംഘടിപ്പിച്ചു. കുമ്പള മാവിനകട്ട എസ്.സി.കോളനിയില്‍ ജില്ലാ കോഡിനേറ്റര്‍ ഷാജു ജോണ്‍  പ്രവേശനോത്സവം ഉദ്ഘാടനം ചെയ്തു. കാസര്‍കോട് ബ്ലോക്ക് നോഡല്‍ പ്രേരക് സി.കെ.പുഷ്പകുമാരി അദ്ധ്യക്ഷത വഹിച്ചു. പ്രേരക് വിലാസിനി,വിജയമ്മ,ഇന്‍സ്ട്രക്ടര്‍ രേശ്മ എന്നിവര്‍ സംസാരിച്ചു.

 അജാനൂര്‍ ഗ്രാമപഞ്ചായത്തില്‍ കുടിവെളള വിതരണം നടത്തുവാന്‍ താല്‍പര്യമുളളവരില്‍ നിന്നും ക്വട്ടേഷന്‍ ക്ഷണിച്ചു.  ക്വട്ടേഷനുകള്‍ ഏപ്രില്‍ 11 ന് ഉച്ചയ്ക്ക് രണ്ടിനകം പഞ്ചായത്ത് സെക്രട്ടറിക്ക് സമര്‍പ്പിക്കണം. കൂടുതല്‍ വിവരങ്ങള്‍ക്ക്- 0467 2266386.

വിദ്യാനഗര്‍ കേന്ദ്രീയ വിദ്യാലയ നമ്പര്‍ രണ്ടില്‍ അടുത്ത അധ്യായന  വര്‍ഷത്തിലെ നാലും ഏഴും ക്ലാസുകളിലേക്കുള്ള ഒഴിവിലേക്ക് അപേക്ഷ ക്ഷണിച്ചു. ഏപ്രില്‍ ഒന്‍പതു വരെ അപേക്ഷിക്കാം. അപേക്ഷാഫോറം വിദ്യാലയ ഓഫീസില്‍ നിന്ന് എല്ലാ പ്രവര്‍ത്തി ദിവസങ്ങളിലും ലഭിക്കും.

കാസര്‍കോട് ജില്ലാ തെരഞ്ഞെടുപ്പ് പ്രചാരണത്തിന്റെ ഭാഗമായി സ്വീപ് തയ്യാറാക്കിയ പ്രചാരണ വീഡിയോ തെരഞ്ഞെടുപ്പ് വിഭാഗം നിരീക്ഷകന്‍ എസ് ഗണേഷ്  ഐ.എ.എസിന്റെ സാന്നിദ്ധ്യത്തില്‍ ജില്ലാ കളക്ടര്‍ ഡോ.ഡി സജിത് ബാബു പ്രകാശനം ചെയ്തു. കളക്ടറേറ്റ് ചേമ്പറില്‍ അസിസ്റ്റന്‍ഡ് റിട്ടേണിംഗ് ഓഫീസര്‍മാര്‍, വിവിധ നോഡല്‍ ഓഫീസര്‍മാര്‍, സ്വീപ് നോഡല്‍ ഓഫീസര്‍ വി.മുഹമ്മദ് നൗഷാദ്  എന്നിവരുടെ സാന്നിദ്ധ്യത്തിലായിരുന്നു പ്രകാശനം. 
ഒളിമ്പ്യന്‍ പി.ടി. ഉഷ, പ്രശസ്ത ചിത്രകാരന്‍ പി.എസ്. പുണിഞ്ചിത്തായ, ഇന്ത്യന്‍ ഫുട്‌ബോളര്‍  എം. സുരേഷ്,  കാസര്‍കോട് ജില്ലാ കളക്ടര്‍ ഡി.സജിത് ബാബു എന്നിവരുടെ സന്ദേശങ്ങളടങ്ങിയതാണ് വീഡിയോ.   

പരിസ്ഥിതി സൗഹൃദ തെരഞ്ഞെടുപ്പ് എന്ന സന്ദേശം പകരാന്‍ ശുചിത്വമിഷന്റെ നേതൃത്വത്തില്‍ കാഞ്ഞങ്ങാട്  ഇന്ന് (ഏപ്രില്‍ 04) വൈകുന്നേരം നാലിന് ഹരിത റാലി നടത്തും. കാഞ്ഞങ്ങാട് താലൂക്ക് ഓഫീസ്  പരിസരത്ത് നിന്നാരംഭിക്കുന്ന റാലി   കോട്ടച്ചേരിയില്‍ സമാപിക്കും. ഹരിത തെരഞ്ഞെടുപ്പ് ലോഗോ പതിച്ച ജേഴ്‌സിയണിഞ്ഞ് എന്‍ എസ് എസ് വിദ്യാര്‍ത്ഥികള്‍, വളണ്ടിയര്‍മാര്‍, ഹരിത കര്‍മ്മ സേനാംഗങ്ങള്‍, ശുചിത്വ മിഷന്‍ ജീവനക്കാര്‍, കാഞ്ഞങ്ങാട് മുനിസിപ്പാലിറ്റി ഹെല്‍ത്ത് വിഭാഗം ജീവനക്കാര്‍ എന്നിവര്‍   റാലിയില്‍ പങ്കെടുക്കും.

കാസര്‍കോട് ലോക്‌സഭാ മണ്ഡലത്തില്‍ ഇന്നലെ (ഏപ്രില്‍ 3) മൂന്നു പേര്‍ കൂടി പത്രിക നല്‍കി. കെ പി സതീഷ് ചന്ദ്രന്‍ (സിപിഐ (എം)), രവി തന്ത്രി (ബിജെപി), രാജ് മോഹന്‍ ഉണ്ണിത്താന്‍ (ഐഎന്‍സി) എന്നിവരാണ് പത്രിക നല്‍കിയത്. 

ഇലക്ഷന്‍ കമ്മീഷന്റെ പൊതുനിരീക്ഷകന്‍ എസ് ഗണേഷ്  കളക്ടറേറ്റില്‍ പ്രവര്‍ത്തിക്കുന്ന എംസിഎംസി സെല്‍ സന്ദര്‍ശിച്ച് സെല്ലിന്റെ പ്രവര്‍ത്തനങ്ങള്‍ വിലയിരുത്തി. ജില്ലാകളക്ടര്‍ ഡോ ഡി സജിത് ബാബു പൊതുനിരീക്ഷകനെ അനുഗമിച്ചു.തെരഞ്ഞെടുപ്പ് പ്രവര്‍ത്തനങ്ങള്‍ ഏകോപിപ്പിക്കുന്ന കണ്‍ട്രോള്‍ റൂമും നിരീക്ഷകന്‍ സന്ദര്‍ശിച്ച് തൃപ്തി രേഖപ്പെടുത്തി.