ജില്ലയില്‍ തെരഞ്ഞെടുപ്പ് പ്രചരണത്തിന്റെ ഭാഗമായി  വിവിധ രാഷ്ട്രീയ കക്ഷികള്‍ പല ഘട്ടങ്ങളിലായി   പെരുമാറ്റ ചട്ടം ലംഘിച്ചതായി  പരാതി. ഇത് സംബന്ധിച്ച് 71 പരാതികളാണ് സി- വിജില്‍ ആപ്പ് വഴി തെരഞ്ഞെടുപ്പ് കമ്മീഷന് ലഭിച്ചതെന്ന് ഉദ്യോഗസ്ഥര്‍ പറഞ്ഞു.

തിരഞ്ഞെടുപ്പിന് മുന്നോടിയായി  വിവിധ തെരഞ്ഞെടുപ്പ് ഉദ്യോഗസ്ഥര്‍ക്കുള്ള പരിശീലനം 26 മുതല്‍ ആരംഭിക്കും.  ഡിസ്ട്രിക് ലെവല്‍ മാസ്റ്റര്‍ ട്രെയിനര്‍മാര്‍ക്കുള്ള പരിശീലനം  ഈ മാസം 26നും  27 നും കളക്ടറേറ്റ് കോണ്‍ഫറസ് ഹാളില്‍ നല്‍കും. ഇവരുടെ നേത്യത്വത്തിലായിരിക്കും പോളിംഗ് ജീവനക്കാര്‍ക്ക് വിവിധ കേന്ദ്രങ്ങളില്‍ പരിശീലനം നല്‍കുക.

    മെഡികെയര്‍, നെഹ്റു യുവകേന്ദ്ര, സേവക്ക് എന്നിവയുടെ സംയുക്താഭിമുഖ്യത്തില്‍ ചിറ്റൂര്‍ താലൂക്ക് നല്ലേപ്പള്ളി ഗ്രാമപഞ്ചായത്ത് അരണ്ടപ്പള്ളം അങ്കണവാടിയില്‍ മെഡിക്കല്‍ ക്യാമ്പ് സംഘടിപ്പിച്ചു. വേനല്‍ക്കാല രോഗങ്ങള്‍, പോഷകാഹാരകുറവ്  എന്നീ വിഷയങ്ങളില്‍ ബോധവത്കരണ ക്ലാസും നടത്തി. നെഹ്റു യുവകേന്ദ്ര കോ-ഓഡിനേറ്റര്‍ എം.അനില്‍കുമാര്‍,ജെ.പി അലക്സ്, ഡോ.ജിതിന്‍, എം.സജിന, എന്‍.സുദര്‍ശന്‍ എന്നിവര്‍ സംസാരിച്ചു. ക്യാമ്പില്‍ നൂറോളം പേര്‍ക്ക് സൗജന്യ മരുന്ന് വിതരണം ചെയ്തു.

പൊതു തിരഞ്ഞെടുപ്പ് മാതൃകാ പെരുമാറ്റച്ചട്ടം നടപ്പാക്കുന്നതിന്‍റെ ഭാഗമായി രൂപീകരിച്ച ആന്‍റി ഡീഫെയ്സ്മെന്‍റ് സ്ക്വാഡ് ഇന്നലെ (മാര്‍ച്ച് 22) മാത്രം 1627 പ്രചരണ സാമഗ്രികള്‍ നീക്കി. ഇതില്‍ പൊതുയിടങ്ങളില്‍ നിന്നും 11 ചുവരെഴുത്തുകള്‍, 1275 പോസ്റ്റര്‍, 100 ബാനറുകള്‍, 241 കൊടികളും മറ്റുമാണ് നീക്കിയത്. ഇതോടെ സ്ക്വാഡ് രൂപീകരിച്ചതിന് ശേഷം കേന്ദ്ര- സംസ്ഥാന സര്‍ക്കാരുകളുടെ അധീനതയിലുള്ള സ്ഥലങ്ങളിലെ 5881 സാമഗ്രികളാണ് നീക്കം ചെയ്തത്.