ജില്ലയിലെ വോട്ടെടുപ്പ് നടപടി ക്രമങ്ങള്‍ വിലയിരുത്തുന്നതിന് പൊതു തിരഞ്ഞെടുപ്പ് നിരീക്ഷക ഗരിമ ഗുപ്തയുടെ നേതൃത്വത്തില്‍ വോട്ടെണ്ണല്‍ കേന്ദ്രമായ പൈനാവ് മോഡല്‍ റെസിഡന്‍ഷ്യല്‍ സ്‌കൂളില്‍ അവലോകന യോഗം ചേര്‍ന്നു. തിരഞ്ഞെടുപ്പ് പോലീസ് നിരീക്ഷകന്‍ മാന്‍സിംഗ് ഐ.പി.എസ്, ജില്ലാ വരണാധികാരിയും ജില്ലാ കളക്ടറുമായ എച്ച്. ദിനേശന്‍, എ.ഡി.എം അനില്‍ ഉമ്മന്‍, ദേവികുളം സബ് കലക്ടര്‍ ഡോ. രേണു രാജ്, തിരഞ്ഞെടുപ്പ് ഡെപ്യൂട്ടി കളക്ടര്‍ ജോസ് ജോര്‍ജ്, ആര്‍.ഡി.ഒ എം.പി വിനോദ്, അസിസ്റ്റന്റ് റിട്ടേണിങ് ഓഫീസര്‍മാര്‍ വിവിധ രാഷ്ട്രീയ പാര്‍ട്ടി പ്രതിനിധികള്‍ തുടങ്ങിയവര്‍ പങ്കെടുത്തു.

ആലപ്പുഴ: ലോക്‌സഭാ തിരഞ്ഞെടുപ്പ് സമാധാനപരമായി നടത്തുന്നത് ലക്ഷ്യമിട്ട് ജില്ലയിലെ പോളിങ് ബൂത്തുകളിൽ വിവിധ കേന്ദ്ര സേനകളെ വിന്യസിച്ചിരുന്നു. കേന്ദ്രത്തിൽ നിന്നുള്ള നാല്  കമ്പനി സേനയെ ആണ് ജില്ലയിൽ വിന്യസിച്ചിട്ടുള്ളത്. ഇൻസാസ് 9എംഎം, എ.കെ. 47, വിവിധ ഇനം കത്തികൾ തുടങ്ങി അത്യാധുനിക ആയുധങ്ങളാണ് ഇവരുടെ പക്കൽ ഉള്ളത്. നിയോഗിക്കപ്പെട്ട ഓരോ പോളിങ് ബൂത്തിലും ഒരു മേജറിന്റെ കീഴിലാണ് ഇവരുടെ പ്രവർത്തനം. മേജർ ഫാനിൻഡർ റബ, റുസോൺ തമാങ്, സജയ് കച്ചാരി, സുരേസ് തമാങ് എന്നിവരായിരുന്നു കൈനകരി ഹോളി ഫാമിലി ഗേൾസ് സ്‌കൂളിലെ 12,13 ബൂത്തുകളിലെ സുരക്ഷ ഉറപ്പാക്കിയിരുന്നത്. 

ആലപ്പുഴ:   സമാനതകളില്ലാത്ത പ്രളയത്തെ തുടർന്ന് ജനജീവിതം ദുസഹമായ  കുട്ടനാടൻ ജനത തങ്ങളുടെ സമ്മതിദാന അവകാശം വിനിയോഗിക്കുന്ന കാര്യത്തിൽ ഒട്ടും വീര്യം ചോർന്നിട്ടില്ല   എന്നു ബോധ്യപ്പെടുത്തുന്ന തരത്തിലായിരുന്നു. രാവിലെ മുതൽ ബുത്തുകൾക്കു മുമ്പിൽ കണ്ട നീണ്ട നിര.  കഴിഞ്ഞ ആഗസ്റ്റിലുണ്ടായ മഹാ പ്രളയത്തെ തുടർന്ന് കേരളത്തിന്റെ നെല്ലറയെന്നു വിശേഷണമുള്ള കുട്ടനാടിന്   ഏറെ നാശനഷ്ടമുണ്ടായിരുന്നു.  പ്രായമുള്ളവരും  കൈ കുഞ്ഞുങ്ങളുമായി അമ്മമാരും  വോട്ടു ചെയ്യാൻ നേരത്തെ തന്നെ നിരയിലെത്തിയ കാഴ്ചയാണ് ഇവിടെ കാണാനായത്.

ആലപ്പുഴ :കൊടും വെയിലിലും ആലപ്പുഴയുടെ തീരദേശ മേഖലയുടെ തിരഞ്ഞെടുപ്പ് ആവേശത്തിന് തെല്ലും കുറവുണ്ടായിരുന്നില്ല . ഉച്ചക്ക് ശേഷം മണ്ഡലത്തിന്റെ തീരദേശ മേഖലകളിലെ മിക്ക പോളിങ് ബൂത്തുകളിലും വോട്ടർമാരുടെ നീണ്ട നിരയാണ് കാണപ്പെട്ടത്. പലരും തങ്ങളുടെ സമ്മതിദാനാവകാശം നിർവഹിക്കാനായി മണിക്കൂറുകൾ തന്നെ കാത്തു നിന്നു. സ്ത്രീകളടക്കമുള്ള വോട്ടർമാർ കൈക്കുഞ്ഞുങ്ങളുമായി വരെയാണ് വോട്ട് ചെയ്യാനായി പോളിങ് ബൂത്തുകളിലേക്ക് എത്തിയത്. അർത്തുങ്കൽ ,ചേന്നവേലി ,കാട്ടൂർ തുടങ്ങിയ ആലപ്പുഴ മണ്ഡലത്തിലെ  തീരദേശ മേഖലകളിലെല്ലാം തന്നെ വോട്ടർമാരുടെ തിരക്ക് ദൃശ്യമായിരുന്നു.

ആലപ്പുഴ: ജില്ലയിൽ ഭിന്നശേഷിക്കാർക്ക് സുഖകരമായി വോട്ട് രേഖപ്പെടുത്തുന്നതിന് അവസരം ഒരുക്കി തിരഞ്ഞെടുപ്പ് കമ്മീഷനും ജില്ലാ ഭരണകൂടവും. ജില്ലയിലെ ഭിന്നശേഷിക്കാർക്കായി 261 ഓട്ടോറിക്ഷകൾ, ആവശ്യത്തിന് വീൽചെയറുകൾ, 79 പാലിയേറ്റീവ് വാഹനങ്ങൾ, മൂന്നു ബോട്ടുകൾ എന്നിവ തയ്യാറാക്കി നൽകി. ഭിന്നശേഷിക്കാരായ വോട്ടർമാരുടെ ലിസ്റ്റ് തയ്യാറാക്കി അവരെ നേരിൽ ഉദ്യോഗസ്ഥർ സമീപിച്ചാണ് വോട്ട് ചെയ്യാനുള്ള അവസരം ഒരുക്കിയത്. ചമ്പക്കുളം, കൈനകരി ഭാഗങ്ങളിലേക്കാണ് ഭിന്നശേഷിക്കാരായ വോട്ടർമാർക്കുവേണ്ടി ബോട്ട് സർവീസ് ഒരുക്കിയത്.

ആലപ്പുഴ: ലോക്‌സഭാ തിരഞ്ഞെടുപ്പിനോടനുബന്ധിച്ച് ഇന്ന് (23.04.2019) നടക്കുന്ന വോട്ടെടുപ്പില്‍ കള്ളവോട്ട്/ ഒന്നില്‍ കൂടുതല്‍ വോട്ട് ചെയ്യാന്‍ ശ്രമിക്കുന്നവര്‍ക്കെതിരെ ക്രിമിനല്‍ നിയമ നടപടി സ്വീകരിക്കുമെന്ന് ജില്ലാ തിരഞ്ഞെടുപ്പ് ഉദ്യോഗസ്ഥന്‍ കൂടിയായ ജില്ലാ കളക്ടര്‍ എസ്. സുഹാസ് അറിയിച്ചു. രാവിലെ ഏഴ് മുതല്‍ വൈകിട്ട് ആറ് മണി വരെ വോട്ട് രേഖപ്പെടുത്താം. തിരഞ്ഞെടുപ്പ് കമ്മീഷന്റെ തിരിച്ചറിയല്‍ കാര്‍ഡ് കൂടാതെ തിരഞ്ഞെടുപ്പ് കമ്മീഷന്‍ അംഗീകരിച്ച മറ്റു തിരിച്ചറിയല്‍ രേഖകള്‍ ഉപയോഗിച്ചും വോട്ട് രേഖപ്പെടുത്താം.

ആലപ്പുഴ: ഇന്ത്യൻ മഹാസമുദ്രത്തിന്റെ ഭൂമധ്യരേഖ പ്രദേശത്തും അതിനോട്  ചേർന്നുള്ള  തെക്കു  പടിഞ്ഞാറൻ  ബംഗാൾ  ഉൾക്കടലിലും ശ്രീലങ്കയുടെ തെക്കുകിഴക്കുമായി ഏപ്രിൽ 25ന്  ന്യൂനമർദ്ദം പ്രതീക്ഷിക്കുന്നതായി കേന്ദ്ര കാലാവസ്ഥ നിരീക്ഷണ കേന്ദ്രം അറിയിച്ചു. ഇതുമൂലം  ഏപ്രിൽ 25നും  ഇന്ത്യൻ മഹാസമുദ്രത്തിന്റെ ഭൂമധ്യരേഖ പ്രദേശത്തും അതിനോട്  ചേർന്നുള്ള  തെക്കു  പടിഞ്ഞാറൻ  ബംഗാൾ  ഉൾക്കടലിലും  കാറ്റിന്റെ വേഗത മണിക്കൂറിൽ 35  മുതൽ 45  കിലോമീറ്റർ വരെയാവാനും ഏപ്രിൽ 26നും കാറ്റിന്റെ വേഗത മണിക്കൂറിൽ 40   മുതൽ 55  കിലോമീറ്റർ വരെയാവാനും സാധ്യതയുണ്ട്.

ആലപ്പുഴ: ആലപ്പുഴ ലോകസഭ  മണ്ഡലത്തിലെ ചേർത്തല നിയോജകമണ്ഡലത്തിൽ ഉൾപ്പെട്ട 88-ാം നമ്പർ ബൂത്തിൽ പോളിങ് ആരംഭിക്കുന്നതിനുമുമ്പ്   മോക്ക്പോൾ നടത്തിയപ്പോൾ ബാലറ്റ് യൂണിറ്റിൽ പ്രസ് ഏറർ സംഭവിച്ചതുമൂലമാണ് ബാലറ്റ് യൂണിറ്റ് മാറ്റിയിട്ടുള്ളതെന്നും  മാധ്യമങ്ങളിൽ പ്രചരിച്ചതുപോലെ ഒരു പിശകും  സംഭവിച്ചിട്ടില്ലെന്നും ജില്ല തിരഞ്ഞെടുപ്പ് ഓഫീസറായ  ജില്ല കളക്ടർ അറിയിച്ചു