2017-2018 അധ്യയന വര്‍ഷത്തില്‍ എസ്.എസ്.എല്‍.സി പരീക്ഷയില്‍ എല്ലാ വിഷയങ്ങള്‍ക്കും ബി പ്ലസില്‍ കുറയാതെ ഗ്രേഡ് നേടിയ ജില്ലയിലെ പ്രമുഖ പരിശീലന സ്ഥാപനങ്ങളില്‍ മെഡിക്കല്‍, എഞ്ചിനീയറിംഗ് കോഴ്‌സുകള്‍ക്ക് ചേര്‍ന്നു പഠിക്കുന്ന പട്ടികജാതി വിഭാഗത്തില്‍പ്പെട്ട പ്ലസ് വണ്‍ വിദ്യാര്‍ഥികള്‍ക്ക് ധനസഹായത്തിന് അപേക്ഷിക്കാം. വാര്‍ഷിക വരുമാന പരിധി 4.50 ലക്ഷം രൂപ.

ഗിഫ്റ്റഡ് ചില്‍ഡണ്‍ 2018-19 അക്കാദമിക് വര്‍ഷത്തേക്ക് ജില്ലയിലെ മൂന്ന് വിദ്യാഭ്യാസ ജില്ലകള്‍ക്കായി കോ-ഓര്‍ഡിനേറ്റര്‍മാരെ നിയമിക്കുന്നു. 10 വര്‍ഷത്തില്‍ കുറയാത്ത ഗവ. ഹൈസ്‌കൂള്‍ അസിസ്റ്റന്റ് സേവനപരിചയമുള്ളവര്‍ സ്വയം തയാറാക്കിയ അപേക്ഷ ജില്ലാ വിദ്യാഭ്യാസ ആഫീസര്‍ സാക്ഷ്യപ്പെടുത്തിയ സര്‍ട്ടിഫിക്കറ്റുകള്‍ സഹിതം വിദ്യാഭ്യാസ ഉപ ഡയറക്ടര്‍ക്ക് ജൂലൈ 25ന് വൈകീട്ട് അഞ്ച് മണിക്കുള്ളില്‍ സമര്‍പ്പിക്കുക. ഫോണ്‍: 8301064274.

വ്യാജമദ്യം തടയാന്‍ ഓണത്തിന് മുന്നോടിയായി പഞ്ചായത്ത് തലത്തില്‍ വിവിധ വകുപ്പുകളുടെ സംയുക്ത റെയ്ഡുകള്‍ നടത്താന്‍ ജില്ലാതല ജനകീയ കമ്മിറ്റിയോഗം തീരുമാനിച്ചു. ആഗസ്റ്റ് ഒന്നു മുതല്‍ 31 വരെ സ്‌പെഷല്‍ ഡ്രൈവുകള്‍ നടത്തും. 

വെള്ളറട ഗ്രാമപഞ്ചായത്തിലെ പനച്ചമൂട് ചന്ത അന്താരാഷ്ട്ര നിലവാരത്തിലേക്ക് ഉയര്‍ത്തുന്നതിന്റെ ഭാഗമായി സി.കെ. ഹരീന്ദ്രന്‍ എം.എല്‍.എ. യുടെ നേതൃത്വത്തില്‍ വെള്ളറട പഞ്ചായത്ത് ഓഫീസ് ഹാളില്‍ അവലോകന യോഗം നടന്നു. പ്രാരംഭ നവീകരണത്തിന് ആവശ്യമായ പ്രോജക്ട് റിപ്പോര്‍ട്ട് തയ്യാറാക്കുന്നതിനായാണ് യോഗം ചേര്‍ന്നത്.  ഇതിനോടനുബന്ധിച്ച് എം.എല്‍.എ. സ്ഥലം സന്ദര്‍ശിച്ചു. ആറു മാസത്തിന്നുള്ളില്‍ നിര്‍മാണ പ്രവര്‍ത്തനങ്ങള്‍ ആരംഭിക്കുമെന്ന് അദ്ദേഹം അറിയിച്ചു.  20 കോടി രൂപയുടെ നവീകരണ പ്രവര്‍ത്തനങ്ങള്‍ നടത്തും.   ഒന്നാംഘട്ട നവീകരണ പ്രവര്‍ത്തനങ്ങള്‍ക്കായി അഞ്ച് കോടി രൂപയുടെ ഭരണാനുമതി ലഭിച്ചിട്ടുണ്ട്.

കെ.എസ്.ആര്‍.ടി.സി കണ്ണൂര്‍ ഡിപ്പോയുടെ സമഗ്രവികസനത്തിനായുള്ള പ്രവര്‍ത്തനങ്ങളുടെ പുരോഗതി തുറമുഖ-പുരാവസ്തു വകുപ്പു മന്ത്രി രാമചന്ദ്രന്‍ കടന്നപ്പള്ളി വിലയിരുത്തി. ഡിപ്പോയുടെ സമഗ്ര വികസനത്തിനു വേണ്ടി ഏപ്രിലില്‍ ഗതാഗതമന്ത്രി എ.കെ ശശീന്ദ്രന്റെ അധ്യക്ഷതയില്‍ തിരുവനന്തപുരത്ത് ചേര്‍ന്ന യോഗത്തില്‍ ആവിഷ്‌കരിച്ച സമഗ്ര മാസ്റ്റര്‍ പ്ലാനിന്റേയും വിവിധ പദ്ധതികളുടേയും പുരോഗതിയാണ് ഡിപ്പോ സന്ദര്‍ശിച്ച മന്ത്രി ഉദ്യോഗസ്ഥരുമായി ചര്‍ച്ച ചെയ്തത്. 

ജില്ലയിലെ എയര്‍ കണ്ടീഷന്‍ ടെക്‌നീഷ്യന്‍മാരുടെ കൂലി നിരക്ക് സംബന്ധിച്ച് എച്ച്.വി.എ.സി.ആര്‍ എംപ്ലോയിസ് യൂണിയന്‍ ജില്ലാ ലേബര്‍ ഓഫീസറുടെ സാന്നിധ്യത്തില്‍ നടന്ന ചര്‍ച്ചയില്‍ ഒത്തുതീര്‍പ്പായെന്ന രീതിയില്‍ പത്രങ്ങളില്‍ വന്ന വാര്‍ത്ത ശരിയല്ലെന്ന് ജില്ലാ ലേബര്‍ ഓഫീസര്‍ അറിയിച്ചു. ജില്ലാ ലേബര്‍ ഓഫീസില്‍ വെച്ച് കൂലി ഏകീകരിക്കുന്നതുമായി ബന്ധപ്പെട്ട് മാനേജ്‌മെന്റും യൂണിയനും തമ്മില്‍ ചര്‍ച്ച നടന്നുവരുന്നതേയുളളൂ.  ഇക്കാര്യത്തില്‍ ഇതുവരെ തീരുമാനമൊന്നും ആയിട്ടില്ല. യൂണിയന്‍ ഏകപക്ഷീയമായി പത്രസമ്മേളനം നടത്തിയാണ് പുതിയ നിരക്ക് അറിയിച്ചിരിക്കുന്നത്.

    വയോജനങ്ങള്‍ക്കായുള്ള പകല്‍വീടുകളില്‍ വ്യായാമത്തിനും വിനോദത്തിനും അവസരമൊരുക്കി ജില്ലാ പഞ്ചായത്തിന്റെ വയോജന ക്ഷേമം പദ്ധതിക്ക് തുടക്കമായി. ജില്ലാ പഞ്ചായത്തിന്റെ വാര്‍ഷിക പദ്ധതിയിലുള്‍പ്പെടുത്തി നടപ്പാക്കുന്ന പദ്ധതിയുടെ ജില്ലാതല ഉദ്ഘാടനം കടമ്പൂര്‍ പഞ്ചായത്തിലെ പനോന്നേരി വയോജനകേന്ദ്രത്തില്‍ തുറമുഖവകുപ്പ് മന്ത്രി രാമചന്ദ്രന്‍ കടന്നപള്ളി നിര്‍വ്വഹിച്ചു. 

കലാപാഠം നൃത്തശാലയ്ക്ക് തുടക്കമായി

കൊച്ചി: പൊതുവിദ്യാഭ്യാസ വകുപ്പും കേരള സംഗീത നാടക അക്കാദമിയും സംയുക്തമായി സംഘടിപ്പിക്കുന്ന ''കലാപാഠം'' നൃത്തശില്പശാലയ്ക്ക് എറണാകുളം ഗവ: ഗേള്‍സ് ഹയര്‍ സെക്കണ്ടറി സ്‌കൂളില്‍ തുടക്കമായി. വിദ്യാഭ്യാസ ഉപഡയറക്ടര്‍ സി.എ.സന്തോഷ് ഉദ്ഘാടനം നിര്‍വഹിച്ചു. കേരള സംഗീത നാടക അക്കാദമി അഡ്മിനിസ്‌ട്രേറ്റീവ് ഓഫീസര്‍ പി.മധു അദ്ധ്യക്ഷത വഹിച്ചു. ചടങ്ങില്‍ ശ്രീലക്ഷ്മി ഗോവര്‍ദ്ധന്‍, അശ്വതി ശ്രീകാന്ത്, സ്‌കൂള്‍ ഹെഡ്മാസ്റ്റര്‍ രാധാകൃഷ്ണന്‍ എന്നിവര്‍ സംസാരിച്ചു.

കാക്കനാട്: തൃക്കാക്കര നഗരസഭയുടെ കീഴില്‍ എസ്.എസ്.എല്‍.സി, പ്ലസ് ടു പരീക്ഷയില്‍ എല്ലാവിഷയങ്ങള്‍ക്കും എ പ്ലസ് നേടിയ വിദ്യാര്‍ഥികളെ ആദരിച്ചു. തൃക്കാക്കര കമ്മ്യൂണിറ്റി ഹാളില്‍ വെച്ച് നടന്ന ചടങ്ങ്  പി ടി തോമസ് എം എല്‍ എ ഉദ്ഘാടനം ചെയ്തു. 

കാക്കനാട്:  ജില്ലയില്‍ തൊഴില്‍ നിയമങ്ങള്‍ പാലിക്കാതെ പ്രവര്‍ത്തിക്കുന്ന സ്ഥാപനങ്ങള്‍ക്കെതിരെ  തൊഴില്‍ വകുപ്പ് കര്‍ശന നടപടികള്‍ക്കൊരുങ്ങുന്നു.  2018 ജനുവരി മുതല്‍ ജൂലൈ വരെ നടത്തിയ അന്വേഷണ റിപ്പോര്‍ട്ടിനെ തുടര്‍ന്നാണ് നടപടി.

വേതന സുരക്ഷാ നിയമം, ഷോപ്പ് ആന്റ് എസ്റ്റാബ്ലിഷ്‌മെന്റ് ആക്റ്റ്, ഗര്‍ഭകാലാനുകൂല്യം, ദേശീയ അവധി നിയമം തുടങ്ങിയ  വിഭാഗങ്ങളില്‍ നിരവധി  നിയമ ലംഘനങ്ങള്‍ വകുപ്പ് പരിശോധയില്‍ കണ്ടെത്തി.