മഴക്കെടുതിയില്‍ ദുരിതമനുഭവിക്കുന്നവരെ പുനരധിവസിപ്പിക്കുന്നതിന് പ്രളയ ബാധിത പ്രദേശങ്ങള്‍ സര്‍ക്കാര്‍ വകുപ്പുകളുടെയും തദ്ദേശസ്വയം ഭരണസ്ഥാപനങ്ങളുടെയും സന്നദ്ധ സംഘടനകളുടെയും സഹകരണത്തോടെ ആഗസ്റ്റ് 30 ന് അവസാനഘട്ട ശുചീകരണംനടത്തുമെന്ന് ജില്ലാ കളകടര്‍ കേശവേന്ദ്രകുമാര്‍ അറിയിച്ചു. പ്രളയബാധിതരെ പുനരധിവസിപ്പിക്കുന്നതിനും അടസ്ഥാന സൗകര്യങ്ങള്‍ പുനസ്ഥാപിക്കുന്നതിനും തദ്ദേശ ഭരണസ്ഥാപനങ്ങള്‍ക്കും സന്നദ്ധസംഘടനകള്‍ക്കും ഏറ്റെടുക്കാന്‍ കഴിയുന്ന പ്രവര്‍ത്തനങ്ങളെക്കുറിച്ച് ചര്‍ച്ചചെയ്യുന്നതിന് ആസൂത്രണഭവന്‍ എ.പി.ജെ ഹാളില്‍ ചേര്‍ന്ന യോഗത്തില്‍ അദ്ധ്യക്ഷത വഹിക്കുകയായിരുന്നു കളക്ടര്‍.

    മുന്‍മന്ത്രി കെ.കെ.രാമചന്ദ്രന്‍ ഒരു മാസത്തെ പെന്‍ഷന്‍തുകയായ 31,250 രൂപ മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്തു
 

    ക്ഷീരവികസന വകുപ്പ് ഗുണനിയന്ത്രണ വിഭാഗത്തിന്റെ ഓണക്കാല ഊര്‍ജിത പാല്‍ പരിശോധനയുടെ ആഭിമുഖ്യത്തില്‍ പൊതുജനങ്ങള്‍ക്ക് പാല്‍ സാമ്പിളിന്റെ ഗുണമേന്‍മ സൗജന്യമായി പരിശോധിച്ച് നല്‍കും.  വിവരങ്ങള്‍ക്ക് കല്‍പ്പറ്റ സിവില്‍ സ്റ്റേഷനിലെ ക്ഷീരവികസന വകുപ്പ് ഗുണനിയന്ത്രണ ഓഫീസുമായി ബന്ധപ്പെടാം. 

ആരോഗ്യവകുപ്പ്/ആരോഗ്യവിദ്യാഭ്യാസവകുപ്പ് നടത്തുന്ന ഹെല്‍ത്ത് ഇന്‍സ്‌പെക്ടര്‍ കോഴ്‌സില്‍ ജില്ലയിലെ ഡിപ്ലോമ പാസ്സായവരെ തിരഞ്ഞെടുക്കുന്നു. പ്രളയം ബാധിച്ച അടിയന്തര സാഹചര്യത്തിലാണ് നിയമനം. ആഗസ്ത് 23 ന് രാവിലെ 10 ന് കോഴിക്കോട് മലാപറമ്പ് ഹെല്‍ത്ത് ആന്റ് ഫാമിലി വെല്‍ഫെയര്‍ ട്രൈനിംഗ് സെന്ററില്‍ വാക് ഇന്‍ ഇന്റര്‍വ്യൂ നടത്തും.  സേവനസന്നദ്ധരായവര്‍ യോഗ്യത തെളിയിക്കുന്ന സര്‍ട്ടിഫിക്കറ്റുകളുമായി ഹാജരാകണം. 30 ദിവസത്തേക്ക് 23565 രൂപ വേതനം ലഭിക്കും.
 

 വെള്ളാരംകുന്ന് പെരുന്തട്ട മഹാത്മ കലാ സാംസ്‌കാരിക നിലയം അംഗങ്ങളില്‍ നിന്നും പൊതുജനങ്ങളില്‍ നിന്നും പിരിച്ചെടുത്ത 10,000 രൂപ മുഖ്യമന്ത്രിയുടെ ദുരിതാശ്വാസ നിധിയിലേക്ക് കൈമാറി. നിലയം പ്രസിഡന്റ് എ. രാധാകൃഷ്ണന്‍, സെക്രട്ടറി എം. രവിചന്ദ്രന്‍ എന്നിവര്‍ ചേര്‍ന്നാണ് ജില്ലാ കളക്ടര്‍ ഇന്‍ ചാര്‍ജ് കേശവേന്ദ്ര കുമാറിനെ ചേമ്പറിലെത്തി തുക ഏല്‍പ്പിച്ചത്. ദുരിതാശ്വാസ പ്രവര്‍ത്തനങ്ങളുടെ ഭാഗമായി ഓണാഘോഷ പരിപാടികളും ഒഴിവാക്കിയെന്ന് പ്രസിഡന്റ് അറിയിച്ചു.