ശബരിമല: തീര്‍ത്ഥാടനകാലത്ത് ഡിജിറ്റല്‍ പേയ്‌മെന്റിനായി കാര്‍ഡ് ഉപയോഗിക്കുന്നവര്‍ക്ക് വിപുലമായ സജ്ജീകരണങ്ങളാണ് ധനലക്ഷ്മി ബാങ്ക് ഏര്‍പ്പെടുത്തിയിരിക്കുന്നത്. കഴിഞ്ഞവര്‍ഷം ലഭിച്ച നടവരവില്‍ 14 ശതമാനത്തോളം ഡിജിറ്റല്‍ പേയ്‌മെന്റായിരുന്നു. ഈ വര്‍ഷം ഇതേവരെയുള്ള നടവരവില്‍ 12 ശതമാനം ഡിജിറ്റല്‍ പേയ്‌മെന്റാണ്. നോട്ടുനിരോധനത്തെ തുടര്‍ന്നുണ്ടായ കറന്‍സിഷാമം പരിഹരിക്കാനാണ് കഴിഞ്ഞവര്‍ഷം ഇത്തരം സജ്ജീകരണം ചെയ്തത്. നോട്ട് ക്ഷാമം കാര്യമായി ഇല്ലെങ്കിലും ഭക്തര്‍ കാര്‍ഡുപയോഗം വര്‍ധിപ്പിച്ചിരിക്കുമെന്ന കണക്കുകൂട്ടലില്‍ ഈവര്‍ഷവും ഡിജിറ്റല്‍ സൗകര്യം നിലനിര്‍ത്തിയിരിക്കുകയാണ്.

ഊരൂട്ടമ്പലം എല്‍. പി സ്‌കൂളില്‍ ഇന്നലെ (നവംബര്‍ 24) ദിവ്യയായിരുന്നു താരം. അധ്യാപകര്‍ക്കും കൂട്ടുകാര്‍ക്കും ദിവ്യയെ അഭിനന്ദിച്ചു മതിയായിട്ടില്ല.  മുഖ്യമന്ത്രിക്കെഴുതിയ കത്തിലൂടെ സ്‌കൂളിന് സ്വന്തം ബസ് എത്തിച്ചാണ് ദിവ്യ സ്‌കൂളിന്റേയും നാടിന്റേയും പ്രിയങ്കരിയായത്. പ്രസിദ്ധമായ കണ്ടല ലഹളയിലൂടെ ചരിത്രത്തില്‍ ഇടം നേടിയ സ്‌കൂളാണ് ഊരൂട്ടമ്പലം എല്‍. പി സ്‌കൂള്‍.  കണ്ടല ലഹളയുമായി ബന്ധപ്പെട്ട പഞ്ചമിയുടെ നാലാം തലമുറയില്‍പ്പെട്ട ആതിര ഇപ്പോള്‍ ഈ സ്‌കൂളിലാണ് പഠിക്കുന്നത്.  ആതിരയുടെ കൂട്ടുകാരിയാണ് കത്തെഴുതിയ ദിവ്യ.

ഇന്‍ഫര്‍മേഷന്‍ - പബ്ലിക് റിലേഷന്‍സ് വകുപ്പ് ഡയറക്ടറായി ടി.വി. സുഭാഷ് ചുമതലയേറ്റു.

പി.എന്‍.എക്‌സ്.5015/17

തിരുവനന്തപുരം പ്രവേശന കമ്മീഷണറുടെ കാര്യാലയത്തില്‍ വിവിധ തസ്തികകളില്‍ ഡെപ്യൂട്ടേഷന്‍ നിയമനത്തിന് അപേക്ഷകള്‍ ക്ഷണിച്ചു. സംസ്ഥാന സര്‍ക്കാര്‍ സര്‍വ്വീസിലോ, സര്‍ക്കാര്‍ സ്വയംഭരണ സ്ഥാപനങ്ങളിലോ,  കേന്ദ്രസര്‍ക്കാര്‍ സ്ഥാപനങ്ങളിലോ തത്തുല്യ, തസ്തികകളില്‍ ജോലി  ചെയ്യുന്നവര്‍ക്ക് അപേക്ഷിക്കാം. സിസ്റ്റം മാനേജര്‍, പ്രോഗ്രാമിംഗ് ഓഫീസര്‍, ഇന്‍ഫര്‍മേഷന്‍ ഓഫീസര്‍, ടെക്‌നിക്കല്‍ അസിസ്റ്റന്റ്, കോണ്‍ഫിഡന്‍ഷ്യല്‍ അസിസ്റ്റന്റ്, അറ്റന്‍ഡര്‍ തസ്തികകളിലാണ് ഡെപ്യൂട്ടേഷന്‍ നിയമനം. താല്‍പര്യമുള്ളവര്‍ ഡിസംബര്‍ എട്ടിനകം അപേക്ഷ സമര്‍പ്പിക്കണം. കൂടുതല്‍ വിവരങ്ങള്‍ക്ക് www.ceekerala.org.

പി.എന്‍.എക്‌സ്.5014/17

പൊതുവിദ്യാഭ്യാസ വകുപ്പിന്റെ ആഭിമുഖ്യത്തില്‍ ദേശീയ സംസ്‌കൃത സെമിനാര്‍ നവംബര്‍ 29 ന് വി.ജെ.ടി ഹാളില്‍ വിദ്യാഭ്യാസമന്ത്രി പ്രൊഫ: സി. രവീന്ദ്രനാഥ് ഉദ്ഘാടനം ചെയ്യും. വി.എസ്. ശിവകുമാര്‍ എം.എല്‍.എ അധ്യക്ഷത വഹിക്കും. മേയര്‍ വി.കെ. പ്രശാന്ത് മുഖ്യാതിഥിയായിരിക്കും. മുന്‍ ചീഫ് സെക്രട്ടറി ആര്‍. രാമചന്ദ്രന്‍ നായര്‍ മുഖ്യപ്രഭാഷണം നടത്തും. എസ്.സി.ഇ.ആര്‍.ടി ഡയറക്ടര്‍ ഡോ. ജെ. പ്രസാദ് സംസ്‌കൃത സെമിനാറുകളുടെ ആമുഖപ്രഭാഷണം നിര്‍വഹിക്കും.

സര്‍ട്ടിഫിക്കറ്റ് കോഴ്‌സ് ഇന്‍ ഫാര്‍മസി (ഹോമിയോ) 2017 പ്രവേശനത്തിനുളള രണ്ടാംഘട്ട അലോട്ട്‌മെന്റ് www.lbscentre.in ല്‍ പ്രസിദ്ധീകരിച്ചു.  വെബ്‌സൈറ്റില്‍ നിന്നും പ്രിന്റൗട്ടെടുത്ത് അലോട്ട്‌മെന്റ് മെമ്മോ ഫെഡറല്‍ ബാങ്കിന്റെ ഏതെങ്കിലും ശാഖയില്‍ നല്‍കി നവംബര്‍ 28നകം ഫീസ് അടയ്ക്കണം.  ഫോണ്‍: 0471 - 2560362, 63, 64, 65.

പി.എന്‍.എക്‌സ്.5012/17

കെ-ടെറ്റ് ഡിസംബര്‍ 2017-ന് ഡിസംബര്‍ 3 വരെ അപേക്ഷിക്കാം. ഒന്നില്‍ കൂടുതല്‍ വിഭാഗങ്ങളില്‍ അപേക്ഷിക്കേണ്ടവര്‍ ഒരു അപേക്ഷയില്‍ തന്നെ എല്ലാം സെലക്ട് ചെയ്യണം. ഒന്നില്‍കൂടുതല്‍ അപേക്ഷകള്‍ അനുവദിക്കില്ല. അന്തിമ സബ്മിഷന്‍ കഴിഞ്ഞ് ഫീസ് അടയ്ക്കുന്നതിനു മുമ്പ് ആപ്ലിക്കേഷന്‍ നമ്പര്‍, ആപ്ലിക്കേഷന്‍ ഐഡി എന്നിവ എഴുതി സൂക്ഷിക്കണം. ആധാര്‍ നമ്പര്‍, ലാന്‍ഡ് ഫോണ്‍ നമ്പര്‍ email id എന്നിവ നിര്‍ബന്ധമല്ല. 

പി.എന്‍.എക്‌സ്.5011/17

നോര്‍ക - റൂട്‌സ് ചീഫ് എക്‌സിക്യൂട്ടീവ് ഓഫീസറായി ജാഫര്‍ മാലിക് ചുമതലയേറ്റു. ടൂറിസം അഡീഷനല്‍ ഡയറക്ടര്‍ ജനറല്‍ ആയി സേവനം അനുഷ്ഠിക്കവെ നോര്‍ക്ക റൂട്‌സിന്റെ അധികച്ചുമതല നല്‍കുകയായിരുന്നു. പെരിന്തല്‍മണ്ണ സബ് കളക്ടര്‍, ഇടുക്കി അസിസ്റ്റന്റ് കളക്ടര്‍ എന്നീ നിലകളില്‍ പ്രവര്‍ത്തിച്ചിട്ടുണ്ട്. 

2013 ബാച്ച് കേരള കേഡര്‍ ഐഎഎസ് ഓഫീസറായ ജാഫര്‍ മാലിക് രാജസ്ഥാനിലെ സവായ് മധോപുര്‍ സ്വദേശിയാണ്. ചീഫ് സെക്രട്ടറിയുടെ ഓഫീസര്‍ ഓണ്‍ സ്‌പെഷ്യല്‍ ഡ്യൂട്ടി അഫ്‌സാന പര്‍വീണ്‍ ഭാര്യയാണ്.  

പി.എന്‍.എക്‌സ്.5010/17

മൃഗസംരക്ഷണ വകുപ്പിലെ ഹെഡ് ക്ലാര്‍ക്ക് തസ്തികയിലെ 2017 ഒക്ടോബര്‍ 31ലെ നിലയനുസരിച്ചുളള താത്കാലിക മുന്‍ഗണനാ പട്ടിക www.ahdkerala.gov.in ല്‍ പ്രസിദ്ധീകരിച്ചു.  പട്ടികയില്‍ ആക്ഷേപങ്ങളോ, അഭിപ്രായങ്ങളോ ഉണ്ടെങ്കില്‍ ബന്ധപ്പെട്ട രേഖകള്‍ സഹിതം നിശ്ചിത മാതൃകയില്‍ 15 ദിവസത്തിനകം മൃഗസംരക്ഷണ വകുപ്പ് ഡയറക്ടര്‍ക്ക് നല്‍കണം.

പി.എന്‍.എക്‌സ്.5009/17