പോഷകാഹാരത്തിന്‍റെ പ്രാധാന്യം വിദ്യാര്‍ഥികളിലെത്തിക്കുന്നതിന് പത്തനംതിട്ട കാതോലിക്കേറ്റ് കോളേജ് ഓഡിറ്റോറിയത്തില്‍ ഇന്നും നാളെയും (19,20) ജില്ലാ മെഡിക്കല്‍ ഓഫിസിന്‍റെയും സംസ്ഥാന പോഷകാഹാര ബ്യൂറോയുടെയും ആഭിമുഖ്യത്തില്‍ എക്സിബിഷന്‍ നടത്തുന്നു. ഇന്ന് രാവിലെ 10ന് നഗരസഭാ ചെയര്‍പേഴ്സണ്‍ രജനി പ്രദീപ് പ്രദര്‍ശനം ഉദ്ഘാടനം ചെയ്യും. ആരോഗ്യ വിദ്യാഭ്യാസ സ്ഥിരം സമിതി അധ്യക്ഷ സിന്ധു അനില്‍ അധ്യക്ഷത വഹിക്കുന്ന ചടങ്ങില്‍ വാര്‍ഡ് കൗണ്‍സിലര്‍ സുശീല പുഷ്പന്‍, ജില്ലാ മെഡിക്കല്‍ ഓഫീസര്‍ ഡോ.എ.എല്‍.ഷീജ, കോളേജ് പ്രിന്‍സിപ്പല്‍ തുടങ്ങിയവര്‍ പങ്കെടുക്കും. 

    കേരള ഭാഗ്യക്കുറി ടിക്കറ്റുകളില്‍ ഉള്‍പ്പെടുത്തിയിട്ടുള്ള സുരക്ഷാ മാനദണ്ഡങ്ങള്‍ പരിചയപ്പെടുത്തുന്നതിന് കളക്ടറേറ്റ് കോണ്‍ഫറന്‍സ് ഹാളില്‍ പരിശീലനം നടത്തി. ജില്ലാ  ഭാഗ്യക്കുറി ഓഫീസിലെ ജീവനക്കാര്‍, ജില്ലാ പോലീസ് മേധാവിയുടെ കീഴിലെ വിവിധ സ്റ്റേഷനുകളിലെ പോലീസ് ഉദ്യോഗസ്ഥര്‍, ജില്ലയിലെ രജിസ്റ്റേഡ് ഏജന്‍റുമാര്‍ തുടങ്ങിയവര്‍ പങ്കെടുത്തു. സിഡിറ്റിലെ ശാസ്ത്രജ്ഞന്‍ സാജന്‍ അമ്പാടി സുരക്ഷാ മാനദണ്ഡങ്ങളെപ്പറ്റി ക്ലാസ് നയിച്ചു. അനധികൃത ലോട്ടറിക്കെതിരെയും ടിക്കറ്റുകളുടെ ഫോട്ടോകോപ്പി എടുത്തും സമ്മാനം തട്ടിയെടുക്കുന്ന സാഹചര്യങ്ങള്‍ ഒഴിവാക്കുന്നതിനാണ് പരിശീലനം നല്‍കിയത്. 

    മലമ്പുഴ നിയോജക മണ്ഡലത്തിലെ ഒന്‍പത് പേര്‍ക്ക്  മുഖ്യമന്ത്രിയുടെ ദുരിതാശ്വാസ നിധിയില്‍ നിന്ന് 1,83000 രൂപ വിതരണം ചെയ്തു. ഭരണപരിഷ്കരണ കമീഷന്‍ ചെയര്‍മാനും സ്ഥലം എം.എല്‍.എയുമായ വി.എസ്.അച്യുതാന്ദനാണ് പാലക്കാട് ഗവ.ഗസ്റ്റ് ഹൗസില്‍ തുക വിതരണം നടത്തിയത്. അപകടത്തെ തുടര്‍ന്ന് ഭര്‍ത്താവ് മരണപ്പെട്ട എല്ലപ്പുള്ളി സ്വദേശിനിയ്ക്ക് ഒരു  ലക്ഷം നല്‍കി. ബാക്കിയുളള തുക മരുതറോഡ്, അകത്തേത്തറ, മലമ്പുഴ, പുതുശ്ശേരി 
ഗ്രാമപഞ്ചായത്ത് നിവാസികള്‍ക്ക് ചികിത്സാധനസഹായമായി വിതരണം ചെയ്തു.

തീര്‍ഥാടകര്‍ക്ക് ശുദ്ധമായ നാളീകേര ഉത്പന്നങ്ങള്‍ ലഭ്യമാക്കുന്നതിനുള്ള കേരഫെഡിന്‍റെ സ്റ്റാള്‍ പമ്പ മണപ്പുറത്ത് പ്രവര്‍ത്തനം തുടങ്ങി. കേരഫെഡ് ചെയര്‍മാന്‍ അഡ്വ. ജെ. വേണുഗോപാലന്‍ നായര്‍ ഉദ്ഘാടനം ചെയ്തു. ആദ്യവില്‍പ്പന കേരഫെഡ് മാനേജിംഗ് ഡയറക്ടര്‍ എന്‍. രവികുമാര്‍ നിര്‍വഹിച്ചു. കേരാഫെഡ് ഉത്പന്നങ്ങളായ കേര വെളിച്ചെണ്ണ, കേര തേങ്ങാപ്പൊടി, കേര ചിരകിയത്, കേരളം കേശാമൃത് ഹെര്‍ബല്‍ ഓയില്‍ എന്നിവ സ്റ്റാളില്‍ മിതമായ വിലയില്‍ ലഭ്യമാണ്. കേരഫെഡ് ബോര്‍ഡ് മെമ്പര്‍മാരും ഉദ്യോഗസ്ഥരും യോഗത്തില്‍ സംബന്ധിച്ചു.                                              (പിഎന്‍പി 3416/17)