റെഗുലർ ക്ലാസുകൾ ജൂൺ മൂന്ന് മുതൽ

 ജില്ലാ ജവഹർ ബാലഭവനിൽ ഏപ്രിൽ ഒന്നിന്  ആരംഭിച്ച വേനലവധിക്കാല കലാപരിശീലന ക്ലാസ്സ് ‘ഗ്രീഷ്മോത്സവം’  സമാപിച്ചു.

സമാപന സമ്മേളനത്തിന്റെ ഉദ്ഘാടനം ആലപ്പുഴ നഗരസഭ ചെയർപേഴ്സൺ  മോളി ജേക്കബ് നിർവ്വഹിച്ചു. ചടങ്ങിൽ ഭരണസമിതി അംഗവും വാർഡ് കൗൺസിലറുമായ  എ എസ് കവിത  അധ്യക്ഷത വഹിച്ചു. ജവഹർ ബാലഭവൻ എക്സിക്യൂട്ടീവ് ഡയറക്ടർ  ബി. രാജശേഖരൻ സംസാരിച്ചു.

 റെഗുലർ ക്ലാസുകൾ ജൂൺ മൂന്നാം തീയതി മുതൽ ആരംഭിക്കുന്നതാണെന്ന് എക്സിക്യൂട്ടീവ് ഡയറക്ടർ അറിയിച്ചു.

*കളക്ടറേറ്റിൽ അവലോകനയോഗം ചേർന്നു

എസ്.ബി.ഐ.യുടെ ഗ്രാമീണ സ്വയംതൊഴിൽ പരിശീലന കേന്ദ്രത്തിന്റെ നേതൃത്വത്തിൽ കലവൂർ ആര്യാട് ബ്ലോക്ക് പഞ്ചായത്ത് കോംപ്ലക്സിൽ 12 ദിവസത്തെ സൗജന്യ ഭക്ഷണ നിർമാണ (നോർത്ത് ഇന്ത്യൻ, സൗത്ത് ഇന്ത്യൻ, ചൈനീസ് വിഭവങ്ങൾ, കേക്ക്) പരിശീലനം നൽകുന്നു. 18 വയസ്സിനും 50 വയസ്സിനും ഇടയിലുള്ള യുവതീയുവാക്കൾക്ക് ഈ പരിശീലനത്തിൽ പങ്കെടുക്കാവുന്നതാണ്. സംരംഭങ്ങൾ തുടങ്ങുന്നതിനെക്കുറിച്ചും വിവിധ ലോൺ സ്കീമുകളെക്കുറിച്ചും ക്ലാസുകളുണ്ടാകും.

കേരള കള്ളുവ്യവസായ തൊഴിലാളി ക്ഷേമനിധിയിൽ അംഗങ്ങളായ തൊഴിലാളികളുടെ മക്കളിൽ, സർക്കാർ/എയ്ഡഡ്/അൺ-എയ്ഡഡ് സ്കൂളുകളിൽ ഒന്നു മുതൽ ഏഴു വരെ ക്ലാസുകളിൽ പഠിക്കുന്ന ജനുവരി 21 വരെ അപേക്ഷ സമർപ്പിച്ച വിദ്യാർഥികൾക്കുള്ള പഠനക്കിറ്റ് വിതരണം മേയ് 31-ന് രാവിലെ 11 മണിക്ക് ആലപ്പുഴ ജില്ലാ ഓഫീസിൽ നടത്തുന്നു.

പഠനക്കിറ്റ് കൈപ്പറ്റുന്നതിനായി ഐഡന്റിഫിക്കേഷൻ ഫോമും ആധാർ കാർഡ്/സ്കൂൾ ഐ.ഡി കാർഡ് എന്നിവയുമായി ആലപ്പുഴ ജില്ലാ വെൽഫെയർ ഫണ്ട് ഇൻസ്പെക്ടറുടെ ഓഫീസിൽ എത്തിച്ചേരേണ്ടതാണ്. ഫോൺ: 0477-2267751.

മൺസൂൺ മുന്നൊരുക്കത്തിൻ്റെ ഭാഗമായി തോട്ടപ്പള്ളി സ്പിൽവേയിലൂടെയുള്ള നീരൊഴുക്ക് സുഗമമാക്കുന്നതിന് മണ്ണ് നീക്കം ചെയ്യുന്നതിനുള്ള നടപടികൾ പൂർത്തിയായതായി ജില്ലാ കളക്ടർ ഷാജി വി നായർ പറഞ്ഞു. വെള്ളപ്പൊക്ക സാധ്യത വർധിപ്പിക്കുന്ന രീതിയിൽ ജില്ലയിലെ വിവിധയിടങ്ങളിൽ രൂപപ്പെട്ടിരിക്കുന്ന ഓരുമുട്ടുകൾ അടിയന്തരമായി നീക്കം ചെയ്യണമെന്നും ജില്ലാ കളക്ടർ ബന്ധപ്പെട്ട വകുപ്പുകളിലെ ഉദ്യോഗസ്ഥർക്ക് നിർദ്ദേശം നൽകി.

ദേശസുരക്ഷ ഉറപ്പാക്കുന്നതിന്റെ ഭാഗമായി ടീം  കമാൻഡർ, ട്രെയിനിംഗ് എൻ.എസ്.ജി , ഡൽഹിയുടെ നേതൃത്വത്തിൽ ആലപ്പുഴയിൽ മോക്ക് ഡ്രിൽ സംഘടിപ്പിക്കുന്നു. വിവിധ സർക്കാർ വകുപ്പുകളെ ഏകോപിപ്പിച്ചുകൊണ്ട് മേയ് 28ന്  ഉച്ചക്കഴിഞ്ഞ് മൂന്ന് മണി മുതൽ വൈകിട്ട് ആറ് മണി വരെ  പുന്നമടക്കായലിലാണ് മോക്ക് ഡ്രിൽ നടക്കുക.

മോക്ക് ഡ്രില്ലുമായി ബന്ധപ്പെട്ടുള്ള അഭ്യാസപ്രകടനങ്ങൾ കണ്ട് പൊതുജനങ്ങളോ വിനോദസഞ്ചാരികളോ യാതൊരു കാരണവശാലും പരിഭ്രാന്തരാകേണ്ടതില്ലെന്ന് ജില്ലാ കളക്ടർ  ഷാജി വി നായർ അറിയിച്ചു.

മൺസൂൺ കാലമായതിനാൽ ഹൗസ് ബോട്ടുകൾ, മോട്ടോർ ബോട്ടുകൾ, ശിക്കാര ബോട്ടുകൾ, സ്പീഡ് ബോട്ടുകൾ ഉൾപ്പെടെയുള്ള ഉൾനാടൻ ജലയാനങ്ങൾ സുരക്ഷിത യാത്ര ഉറപ്പാക്കണമെന്ന് തുറമുഖ ഓഫീസർ അറിയിച്ചു.

ആറാട്ടുപുഴ ഗ്രാമപഞ്ചായത്തിലെ വിവിധ വാർഡുകളിൽ വയറിളക്കരോഗങ്ങൾ റിപ്പോർട്ട് ചെയ്ത സാഹചര്യത്തിൽ ആരോഗ്യവകുപ്പിന്റെ നേതൃത്വത്തിൽ ദ്രുതകർമസേന യോഗം ചേർന്ന് രോഗപ്രതിരോധ പ്രവർത്തനങ്ങൾ ഊർജ്ജിതമാക്കാൻ തീരുമാനിച്ചു. 

വനിതാ ശിശു വികസന വകുപ്പിന്റെ കീഴിൽ സംയോജിത ശിശു സംരക്ഷണ പദ്ധതിയുടെ ഭാഗമായി പ്രവർത്തിക്കുന്ന ആലപ്പുഴ ജില്ലാ സംരക്ഷണ യൂണിറ്റിലും, ചേർത്തല മായിത്തറ ഗവ. ഒബ്സർവേഷൻ ഹോമിലേക്കും ഡി.സി.പി.യു കൗൺസിലർ (ഹോണറേറിയം 18,536), ഗവ. ഒബ്സർവേഷൻ ഹോം കൗൺസിലർ (ഹോണറേറിയം 23,170) എന്നീ തസ്തികകളിലേക്ക് ഒരാളെ വീതം ദിവസവേതന അടിസ്ഥാനത്തിൽ നിയമനം നടത്തുന്നു.

അമ്പലപ്പുഴ - ഹരിപ്പാട് റെയിൽവേ പാതയിലുള്ള സബ്‌വേ ബ്രിഡ്ജ് ഇ.എ.കെ 231എ (വാത്തുകുളങ്ങര) മേയ് 27-ന് രാവിലെ എട്ടു മണി മുതൽ ജൂൺ അഞ്ചിന് വൈകിട്ട് ആറു മണി വരെ അറ്റകുറ്റപ്പണികൾക്കായി അടച്ചിടും. ഈ കാലയളവിൽ റോഡ് ഗതാഗതത്തിനായി പൊതുജനങ്ങൾ  സബ്‌വേ ബ്രിഡ്ജ് ഇ.എ.കെ 232എ (വെല്ലന) ഉപയോഗിക്കേണ്ടതാണെന്ന് റെയിൽവേ അധികൃതർ അറിയിച്ചു.