സ്ഥാനാര്‍ഥികളുടെ സാമൂഹിക മാധ്യമം വഴിയുള്ള തിരഞ്ഞെടുപ്പ് പ്രചാരണത്തിന് മീഡിയ സര്‍ട്ടിഫിക്കേഷന്‍ നിര്‍ബന്ധമാണെന്ന് അഡീഷണല്‍ ചീഫ് ഇലക്ടറല്‍ ഓഫീസര്‍ പി ബി നൂഹ് അറിയിച്ചു. സാമൂഹിക മാധ്യമ അക്കൗണ്ടിലൂടെ വോട്ടര്‍മാരെ സ്വാധീനിക്കാന്‍ നിരവധി പോസ്റ്ററും റീല്‍സും ഉള്‍പ്പെടെ സ്ഥാനാര്‍ഥികള്‍ അപ്‌ലോഡ് ചെയ്യുന്നുണ്ട്. സര്‍ട്ടിഫിക്കേഷന്‍ ഇല്ലാതെ ഇവ പ്രസിദ്ധപ്പെടുത്തിയാല്‍ കര്‍ശന നടപടി സ്വീകരിക്കും.  ജില്ല ആസൂത്രണ സമിതി സെക്രട്ടറിയേറ്റ് കോണ്‍ഫറന്‍സ് ഹാളില്‍ ചേര്‍ന്ന് ഉദ്യോഗസ്ഥരുടെ തിരഞ്ഞെടുപ്പ് അവലോകന യോഗത്തിലാണ് നിര്‍ദേശം.

പത്തനംതിട്ട ജില്ലയിലെ തിരഞ്ഞെടുപ്പ് ഒരുക്കം അഡീഷണല്‍ ചീഫ് ഇലക്ടറല്‍ ഓഫീസര്‍ പി ബി നൂഹിന്റെ നേതൃത്വത്തില്‍ ജില്ല ആസൂത്രണ സമിതി സെക്രട്ടറിയേറ്റ് കോണ്‍ഫറന്‍സ് ഹാളില്‍ വിലയിരുത്തി. ജില്ലയിലെ ഇതുവരെയുള്ള തിരഞ്ഞെടുപ്പ് പ്രവര്‍ത്തനം ജില്ല കലക്ടര്‍ എസ് പ്രേം കൃഷ്ണന്‍ വിശദീകരിച്ചു. ആദ്യഘട്ട റാന്‍ഡമൈസേഷനും പോളിംഗ് ഉദ്യോഗസ്ഥരുടെ പരിശീലനവും പൂര്‍ത്തിയാക്കി. ഇലക്ട്രോണിക് വോട്ടിംഗ് മെഷീന്‍  വിവിധ നിയോജക മണ്ഡലങ്ങളിലെ സ്‌ട്രോങ് റൂമിലേക്ക് മാറ്റി. ഇന്നത്തെ (മാര്‍ച്ച് 29) രണ്ടാംഘട്ട റാന്‍ഡമൈസേഷന് ശേഷം പോളിംഗ് ഉദ്യോഗസ്ഥരുടെ അടുത്ത പരിശീലനം ആരംഭിക്കും.

ജില്ലയില്‍ വേനല്‍ച്ചൂട് കഠിനമാകുന്ന സാഹചര്യത്തില്‍ തിരഞ്ഞെടുപ്പ് പ്രവര്‍ത്തനങ്ങളില്‍ ഏര്‍പ്പെടുന്നവര്‍ ആരോഗ്യകാര്യങ്ങളില്‍ പ്രത്യേകം ശ്രദ്ധകാണിക്കണമെന്ന് ജില്ലാ മെഡിക്കല്‍ ഓഫീസര്‍ (ആരോഗ്യം) അറിയിച്ചു. സൂര്യാഘാതം, സൂര്യതപം, നിര്‍ജ്ജലീകരണം തുടങ്ങിയ ഗുരുതരമായ ആരോഗ്യപ്രശ്‌നങ്ങള്‍ക്ക് സാധ്യതയുള്ളതിനാല്‍ സ്ഥാനാര്‍ത്ഥികളും രാഷ്ട്രീയ പ്രവര്‍ത്തകരും ഉദ്യോഗസ്ഥരും കടുത്ത വെയിലിനെ പ്രതിരോധിക്കാനുള്ള മുന്‍കരുതലുകള്‍ സ്വീകരിക്കണം. പ്രചാരണ പരിപാടികളും തിരഞ്ഞെടുപ്പ് ജോലികളും തടസ്സമില്ലാതെ മുന്നോട്ട് കൊണ്ടുപോകുന്നതിനൊപ്പം തന്നെ ശാരീരിക അസ്വസ്ഥതകള്‍ ഉണ്ടാകാതിരിക്കാന്‍ ശ്രദ്ധിക്കണം.

ശാരീരികഅവശതയുള്ള 85 വയസിനു മുകളില്‍ പ്രായമുള്ള മുതിര്‍ന്ന പൗരര്‍, ഭിന്നശേഷിവിഭാഗം വോട്ടര്‍മാര്‍ എന്നിവര്‍ക്കുള്ള ഹോം വോട്ടിംഗ് ജില്ലയില്‍ മാര്‍ച്ച് 30 മുതല്‍ ആരംഭിക്കുമെന്ന് ജില്ലാ തിരഞ്ഞെടുപ്പ് ഓഫീസറായ ജില്ലാ കലക്ടര്‍ എന്‍ ദേവിദാസ്.   രാഷ്ട്രീയകക്ഷി പ്രതിനിധികളുടെ യോഗത്തില്‍ അധ്യക്ഷത വഹിക്കവെ 12 ഡി ഫോമില്‍ അപേക്ഷിച്ചവര്‍ക്കാണ് ഹോം വോട്ടിങ്ങിന് അവസരമെന്ന് വ്യക്തമാക്കി. ഏപ്രില്‍ നാലു വരെ പ്രക്രിയ തുടരും. ജില്ലയില്‍ 14,905 വോട്ടര്‍മാര്‍ക്കാണ് ഹോം വോട്ടിങ്ങിന് അംഗീകാരം ലഭിച്ചത്. ഇതില്‍ 10,853 വോട്ടര്‍മാര്‍ മുതിര്‍ന്ന പൗരരും, 4,052 പേര്‍ ഭിന്നശേഷി വിഭാഗത്തിലുള്ളവരുമാണ്.

ജില്ലയിലെ തിരഞ്ഞെടുപ്പു തയ്യാറെടുപ്പുകളുടെ രണ്ടാംഘട്ടവും സുഗമമായി പുരോഗമിക്കുന്നവെന്ന് ജില്ലാ തിരഞ്ഞെടുപ്പ് ഓഫീസറായ ജില്ലാ കലക്ടര്‍ എന്‍. ദേവിദാസ്. അഡിഷനല്‍ ചീഫ് ഇലക്ട്രല്‍ ഓഫീസര്‍ പി.ബി. നൂഹ്, ഡെപ്യൂട്ടി ചീഫ് ഇലക്ട്രല്‍ ഓഫീസര്‍ ഹര്‍ഷില്‍ മീണ എന്നിവര്‍ പങ്കെടുത്ത യോഗത്തിലാണ് അധ്യക്ഷനായ ജില്ലാ കലക്ടര്‍ പ്രവര്‍ത്തനപുരോഗതി വിശദമാക്കിയത്. രണ്ടാംഘട്ട പരിശീലനത്തിന് ഒരുക്കങ്ങളായി. തിരഞ്ഞെടുപ്പ് ജോലികള്‍ കൃത്യതയോടെ എന്നുറപ്പാക്കാന്‍ പ്രത്യേക പരിശീലനവുമുണ്ടാകും.

തിരുവനന്തപുരം സെൻട്രൽ പ്രസ്സിൽ അച്ചടിച്ച പോസ്റ്റൽ ബാലറ്റ് പേപ്പറുകൾ ജില്ലാ കളക്ടറും ജില്ലാ തിരഞ്ഞെടുപ്പ് ഓഫീസറുമായ അനു കുമാരിയ്ക്ക് കൈമാറി. സെൻട്രൽ പ്രസ്സിൽ നടന്ന ചടങ്ങിൽ അച്ചടി വകുപ്പ് ഡയറക്ടർ അമീർ സി എ യാണ് പോസ്റ്റൽ ബാലറ്റ് പേപ്പറുകൾ ജില്ലാ കളക്ടർക്ക് കൈമാറിയത്.

സംസ്ഥാന ശാസ്ത്ര സാങ്കേതിക മ്യൂസിയം തിരുവനന്തപുരം, ചാലക്കുടി, കോട്ടയം കേന്ദ്രങ്ങളിൽ ഏപ്രിൽ, മെയ് മാസങ്ങളിൽ സ്‌കൂൾ വിദ്യാർത്ഥികൾക്കായി സംഘടിപ്പിക്കുന്ന ക്രിയേറ്റീവ് സമ്മർ സയൻസ് വർക്ക്‌ഷോപ്പിലേയ്ക്ക് മാർച്ച് 30 രാവിലെ 10 മുതൽ ഓൺലൈൻ രജിസ്ട്രേഷൻ ആരംഭിക്കും. വിശദവിവരങ്ങൾക്ക്: www.kstmuseum.com.

കേരള സ്റ്റേറ്റ് ജവഹർ ബാലഭവനിൽ കുട്ടികൾക്കായി 'കളിമുറ്റം' മധ്യവേനലവധിക്കാല ക്ലാസ്സുകൾ ഏപ്രിൽ-മെയ് മാസങ്ങളിൽ നടത്തും. 4 മുതൽ 16 വയസ്സു വരെയുള്ള കുട്ടികൾക്ക് പങ്കെടുക്കാം. എയ്‌റോമോഡലിംഗ്, സംഗീതം, നൃത്തം, അബാക്കസ്, ഗിറ്റാർ, വയലിൻ,  തബല, കീബോർഡ്, നാടകം, ക്രാഫ്റ്റ്, യോഗ, ചിത്രരചന തുടങ്ങി 26 വിഷയങ്ങളിൽ പരിശീലനം നൽകും. വാഹന സൗകര്യം ലഭ്യമാണ്.  രജിസ്‌ട്രേഷൻ തുടരുന്നു.

ഗുരു ഗോപിനാഥ് നടനഗ്രാമത്തിൽ മധ്യവേനലവധി ക്ലാസുകൾ ഏപ്രിൽ 6  രാവിലെ 10 മണിക്ക് ആരംഭിക്കുന്നു. വ്യക്തിത്വ വളർച്ചയ്ക്കും അന്തർലീനമായ കഴിവുകളുടെ വികാസത്തിനും അനുയോജ്യമായ കലാ പരിശീലനം, ക്രിയേറ്റീവ് ലേണിംഗ്, ആർട്ട് ആന്റ് ക്രാഫ്റ്റ് പരിശീലനം, സിനിമാ റീൽസ് നിർമ്മിതി, പുസ്തക പരിചയം, യോഗ, സുംബ എന്നിവ ഉൾപ്പടെ വ്യത്യസ്തമായ പരിശീലനത്തിലൂടെ സൃഷ്ടിപരവും നേതൃത്വപരവുമായ കഴിവുകൾ വളർത്തുകയാണ് ലക്ഷ്യം.

ഗുരു ഗോപിനാഥ് നടന ഗ്രാമത്തിൽ കേരള നടനം ഏകവത്സര സർട്ടിഫിക്കറ്റ് കോഴ്സിന്റെ എട്ടാം ബാച്ച് ഏപ്രിൽ 6 രാവിലെ 10 മുതൽ ആരംഭിക്കും. 18 വയസ് പൂർത്തിയാക്കിയവർ ഓഫീസിൽ നിന്നും ലഭിക്കുന്ന നിശ്ചിത ഫോറത്തിൽ ഏപ്രിൽ 5 വൈകിട്ട് 5ന് മുൻപായി അപേക്ഷ  സമർപ്പിക്കണം.