സംസ്ഥാന ശാസ്ത്ര സാങ്കേതിക മ്യൂസിയം തിരുവനന്തപുരം, ചാലക്കുടി, കോട്ടയം കേന്ദ്രങ്ങളിൽ ഏപ്രിൽ, മെയ് മാസങ്ങളിൽ സ്‌കൂൾ വിദ്യാർത്ഥികൾക്കായി സംഘടിപ്പിക്കുന്ന ക്രിയേറ്റീവ് സമ്മർ സയൻസ് വർക്ക്‌ഷോപ്പിലേയ്ക്ക് മാർച്ച് 30 രാവിലെ 10 മുതൽ ഓൺലൈൻ രജിസ്ട്രേഷൻ ആരംഭിക്കും. വിശദവിവരങ്ങൾക്ക്: www.kstmuseum.com.

കേരള സ്റ്റേറ്റ് ജവഹർ ബാലഭവനിൽ കുട്ടികൾക്കായി 'കളിമുറ്റം' മധ്യവേനലവധിക്കാല ക്ലാസ്സുകൾ ഏപ്രിൽ-മെയ് മാസങ്ങളിൽ നടത്തും. 4 മുതൽ 16 വയസ്സു വരെയുള്ള കുട്ടികൾക്ക് പങ്കെടുക്കാം. എയ്‌റോമോഡലിംഗ്, സംഗീതം, നൃത്തം, അബാക്കസ്, ഗിറ്റാർ, വയലിൻ,  തബല, കീബോർഡ്, നാടകം, ക്രാഫ്റ്റ്, യോഗ, ചിത്രരചന തുടങ്ങി 26 വിഷയങ്ങളിൽ പരിശീലനം നൽകും. വാഹന സൗകര്യം ലഭ്യമാണ്.  രജിസ്‌ട്രേഷൻ തുടരുന്നു.

ഗുരു ഗോപിനാഥ് നടനഗ്രാമത്തിൽ മധ്യവേനലവധി ക്ലാസുകൾ ഏപ്രിൽ 6  രാവിലെ 10 മണിക്ക് ആരംഭിക്കുന്നു. വ്യക്തിത്വ വളർച്ചയ്ക്കും അന്തർലീനമായ കഴിവുകളുടെ വികാസത്തിനും അനുയോജ്യമായ കലാ പരിശീലനം, ക്രിയേറ്റീവ് ലേണിംഗ്, ആർട്ട് ആന്റ് ക്രാഫ്റ്റ് പരിശീലനം, സിനിമാ റീൽസ് നിർമ്മിതി, പുസ്തക പരിചയം, യോഗ, സുംബ എന്നിവ ഉൾപ്പടെ വ്യത്യസ്തമായ പരിശീലനത്തിലൂടെ സൃഷ്ടിപരവും നേതൃത്വപരവുമായ കഴിവുകൾ വളർത്തുകയാണ് ലക്ഷ്യം.

ഗുരു ഗോപിനാഥ് നടന ഗ്രാമത്തിൽ കേരള നടനം ഏകവത്സര സർട്ടിഫിക്കറ്റ് കോഴ്സിന്റെ എട്ടാം ബാച്ച് ഏപ്രിൽ 6 രാവിലെ 10 മുതൽ ആരംഭിക്കും. 18 വയസ് പൂർത്തിയാക്കിയവർ ഓഫീസിൽ നിന്നും ലഭിക്കുന്ന നിശ്ചിത ഫോറത്തിൽ ഏപ്രിൽ 5 വൈകിട്ട് 5ന് മുൻപായി അപേക്ഷ  സമർപ്പിക്കണം.

സ്വീപ് തിരുവനന്തപുരത്തിന്റെ ആഭിമുഖ്യത്തിൽ പേരൂർക്കട ജെ.പി.എച്ച്. എൻ ട്രയിനിംഗ് സെന്ററിൽ വോട്ടർ ബോധവൽക്കരണ പരിപാടി സംഘടിപ്പിച്ചു. അസിസ്റ്റന്റ് കളക്ടർ ശിവശക്തിവേൽ  ഉദ്ഘാടനം ചെയ്തു.  

വിദ്യാർത്ഥികളുടെ വിവിധ കലാപരിപാടികൾ, സമ്മതിദായകർക്കുള്ള പ്രതിജ്ഞ എന്നിവ സംഘടിപ്പിച്ചു. പേരൂർക്കട നഴ്സിങ് കോളജിൽ നടന്ന പരിപാടിയിൽ ട്രെയിനിംഗ് സെന്റർ പ്രിൻസിപ്പൽ സിന്ധു കുമാരി , നഴ്സിംഗ് വിദ്യാർഥികൾ, അധ്യാപകർ തുടങ്ങിയവർ പങ്കെടുത്തു.

തിരഞ്ഞെടുപ്പ് പ്രചാരകർക്കും ഉദ്യോഗസ്ഥർക്കും  വേനൽക്കാല ജാഗ്രതാനിർദേശവുമായി ആരോഗ്യ വകുപ്പ്. കടുത്ത വേനൽ ആയതിനാൽ നിർജലീകരണ സാധ്യത കൂടുതലാണ്. ദാഹം ഇല്ലെങ്കിൽ കൂടി ഇടയ്ക്കിടെ തിളപ്പിച്ചാറിയ വെള്ളം കുടിക്കുക.
 
കരിക്കിൻ വെള്ളം, സംഭാരം, നാരങ്ങാ വെള്ളം, ഒ.ആർ.എസ് തുടങ്ങിയ പാനീയങ്ങൾ ഉപയോഗിക്കുക. പാനീയങ്ങൾ തയ്യാറാക്കുമ്പോൾ ശുദ്ധജലമാണ് ഉപയോഗിക്കുന്നതെന്ന് ഉറപ്പാക്കുക. ചായ, കാപ്പി, കാർബണേറ്റഡ് ലഘു പാനീയങ്ങൾ, കൃത്രിമ പാനീയങ്ങൾ, മദ്യം എന്നിവ ഒഴിവാക്കുക. ഐസിന്റെ ശുദ്ധത, ഗുണനിലവാരം എന്നിവയെക്കുറിച്ച് ഉറപ്പില്ലെങ്കിൽ പാനീയങ്ങളിൽ ഐസ് ചേർക്കുന്നത് ഒഴിവാക്കുക.

തുടർച്ചയായി കൂടുതൽ സമയം അൾട്രാവയലറ്റ് രശ്മികൾ ശരീരത്തിൽ ഏൽക്കുന്നത് സൂര്യാതപത്തിനും ത്വക്ക് രോഗങ്ങൾക്കും നേത്രരോഗങ്ങൾക്കും മറ്റ് ആരോഗ്യ പ്രശ്നങ്ങൾക്കും കാരണമായേക്കാം. പൊതുജനങ്ങൾ സുരക്ഷാമുൻകരുതലുകൾ സ്വീകരിക്കണം.

പകൽ 10 മണി മുതൽ 3 മണി വരെയുള്ള സമയങ്ങളിലാണ് ഉയർന്ന അൾട്രാവയലറ്റ് സൂചിക രേഖപ്പെടുത്തപ്പെടുന്നത്. അതിനാൽ ആ സമയങ്ങളിൽ കൂടുതൽ നേരം ശരീരത്തിൽ നേരിട്ട് സൂര്യപ്രകാശം ഏൽക്കുന്നത് പരമാവധി ഒഴിവാക്കുക.

നിയമസഭാ തിരഞ്ഞെടുപ്പുമായി ബന്ധപ്പെട്ട ഡ്യൂട്ടിയുള്ള നോൺ-പോളിംഗ് ഓഫീസർമാർ പോസ്റ്റൽ ബാലറ്റിനുള്ള അപേക്ഷകൾ (ഫോം 12)  ഇന്ന് (മാർച്ച് 28) വൈകിട്ട് 5 മണിക്ക് മുൻപ് നൽകണം.

​ജില്ലാതല ക്ലിയറിംഗ് സെന്ററായ (DLCC) ജില്ലാ പഞ്ചായത്ത് പ്രിയദർശിനി ഹാളിലാണ് അപേക്ഷകൾ എത്തിക്കേണ്ടത്.
​അപേക്ഷയോടൊപ്പം
​പൂരിപ്പിച്ച ഫോം 12
​പോസ്റ്റിംഗ് ഓർഡറിൻ്റെ പകർപ്പ്
​വോട്ടർ പട്ടികയിലെ പാർട്ട് നമ്പർ, സീരിയൽ നമ്പർ
​എപ്പിക് (EPIC) നമ്പർ എന്നിവ ചേർത്തിരിക്കണം.

നിയമസഭ തിരഞ്ഞെടുപ്പിന്റെ ഭാഗമായി ജില്ലാ കളക്ടർ ജി പ്രിയങ്കയുടെ നിർദ്ദേശപ്രകാരം  കൊച്ചി നഗരസഭയുടെ വിവിധ ഡിവിഷനുകളിൽ  ജില്ലാ എൻഫോഴ്സ്മെന്റ്സ് സ്‌ക്വാഡ് നടത്തിയ മിന്നൽ പരിശോധനയിൽ നിരോധിത ഫ്ലക്സ് പിടികൂടി.

 നഗരസഭയിലെ 20-ാം ഡിവിഷനിൽ സ്ഥിതിചെയ്യുന്ന ഗോഡൗണിൽ നിന്ന് നിയമവിരുദ്ധമായി സൂക്ഷിച്ചിരുന്ന 30 ടൺ നിരോധിത ഫ്ലക്സ് പിടികൂടി.

 ഡിവിഷൻ 18 ലെ സ്ഥാപനത്തിൽ നിന്നും 20 കിലോയും, ഡിവിഷൻ 19 ൽ നിന്നും 113 കിലോയുമാണ് പിടികൂടിയത്. 

അനുമതിയോ ലൈസൻസോ ഇല്ലാതെ പ്രവർത്തിച്ചു വരുന്ന ഈ സ്ഥാപനങ്ങൾ കൊച്ചി നഗരസഭാ സീൽ ചെയ്തു.