സംസ്ഥാന പൗള്‍ട്രി വികസന കോര്‍പ്പറേഷന്റെ കീഴില്‍ പ്രവര്‍ത്തിക്കുന്ന റസ്റ്റോറന്റിലേക്ക് കരാര്‍ അടിസ്ഥാനത്തില്‍ എഫ് ആന്റ് ബി മാനേജരുടെ ഒഴിവിലേക്ക് അപേക്ഷിക്കാം. യോഗ്യത: ഡിപ്ലോമ ഇന്‍ ഹോട്ടല്‍ മാനേജ്‌മെന്റും 10 വര്‍ഷത്തില്‍ കുറയാത്ത മുന്‍പരിചയവും. പ്രായപരിധി 35-50 വയസ്. അപേക്ഷ ബയോഡേറ്റ സഹിതം മാനേജിംങ് ഡയറക്ടര്‍, കേരള സംസ്ഥാന പൗള്‍ട്രി വികസന കോര്‍പ്പറേഷന്‍ ലിമിറ്റഡ്(കെപ്‌കോ), ടി സി 30/697 പേട്ട, തിരുവനന്തപുരം 695024, എന്ന വിലാസത്തില്‍ ഏപ്രില്‍ രണ്ടിനകം ലഭിക്കണം. വിവരങ്ങള്‍ക്ക് 9446364116, kepcopoultry@gmail.com, kspdc@yahoo.co.in.

ശാസ്താംകോട്ട എല്‍ ബി എസ് സെന്ററില്‍ ഡേറ്റാ എന്‍ട്രി ആന്റ് ഓഫീസ് ആട്ടോമേഷന്‍ (ഇംഗ്ലീഷ് ആന്‍ഡ് മലയാളം) കോഴ്‌സിലേക്ക് എസ് എസ് എല്‍ സി യോഗ്യതയുള്ളവര്‍ക്ക് അപേക്ഷിക്കാം. എസ് സി/എസ് ടി/ഒ ഇ സി /ഒ ബി സി (എച്ച്) വിഭാഗക്കാര്‍ക്ക് ഫീസ് സൗജന്യം. http://lbscentre.kerala.gov.in/services/courses എന്ന ലിങ്കില്‍ അപേക്ഷ സമര്‍പ്പിക്കാം. ഫോണ്‍: 9446854661.

ഇഞ്ചവിള സര്‍ക്കാര്‍ വൃദ്ധസദനത്തിലെ താമസക്കാരുടെ സന്തോഷത്തിനും വ്യക്തിത്വ വികസനത്തിനും വികാസത്തിനും ഉതകും വിധം ഈ വര്‍ഷത്തെ വിഷു ആഘോഷം ഏപ്രില്‍ 15ന് വൃദ്ധസദനത്തില്‍ നടത്തും. ദീപാലങ്കാരം, വിഷുക്കണി, വിഷുക്കൈനീട്ടം, വിഷുസദ്യ, നാടന്‍പാട്ട്, താമസക്കാര്‍, ജീവനക്കാര്‍, ബ്ലോക്ക്-ഗ്രാമ-പഞ്ചായത്ത് പ്രതിനിധികള്‍ തുടങ്ങിയവരുടെ കലാപരിപാടികളും നടത്തുമെന്ന് സാമൂഹിക നീതി വകുപ്പ് സൂപ്രണ്ടന്റ് അറിയിച്ചു.

ദേശീയ സരസ് മേളയുമായി ബന്ധപ്പെട്ട് ജില്ലാ കലക്ടര്‍ അഫ്‌സാന പര്‍വീണിന്റെ അധ്യക്ഷതയില്‍ വിവിധ വകുപ്പുതല ഉദ്യോഗസ്ഥരുടെ ആലോചനയോഗം ചേര്‍ന്നു. ഏപ്രില്‍ 23 മുതല്‍ മെയ് ഏഴ് വരെ ആശ്രാമം മൈതാനത്ത് മേള നടത്തുന്നത്. വിവിധ സംസ്ഥാനങ്ങളില്‍ നിന്നുള്ള വൈവിധ്യമാര്‍ന്ന സ്റ്റാളുകളും, ഇന്‍ഡ്യാ ഫുഡ് കോര്‍ട്ട് തുടങ്ങി വ്യത്യസ്ത കലാസാംസ്‌കാരിക പരിപാടികളും മേളയില്‍ സംഘടിപ്പിക്കുമെന്ന് ജില്ലാ കലക്ടര്‍ യോഗത്തില്‍ അറിയിച്ചു. കുടുംബശ്രീ ജില്ലാമിഷന്‍ കോ-ഓര്‍ഡിനേറ്റര്‍ ആര്‍ വിമല്‍ചന്ദ്രന്‍ മേള പ്രവര്‍ത്തനങ്ങള്‍ വിശദീകരിച്ചു.

ന്യായമായ വിലയ്ക്ക് ഫാക്ടറി ഔട്ട്‌ലെറ്റുകളില്‍ നിന്ന് കശുവണ്ടി പരിപ്പ് ലഭ്യമാക്കാന്‍ സൗകര്യം ഒരുക്കുന്നതിന്റെ ഭാഗമായി കാഷ്യൂ കോര്‍പ്പറേഷന്‍ മൂന്ന് സെയില്‍സ് ഔട്ട്‌ലെറ്റുകള്‍ കൂടി ജില്ലയില്‍ ആരംഭിച്ചു. ഇടമുളക്കല്‍, ചെങ്ങമനാട്, മൈനാഗപ്പള്ളി എന്നിവിടങ്ങളിലെ ഔട്ട്‌ലെറ്റുകളുടെ ഉദ്ഘാടനം കാഷ്യൂ കോര്‍പ്പറേഷന്‍ ചെയര്‍മാന്‍ എസ് ജയമോഹന്‍ നിര്‍വഹിച്ചു.

കേരള മദ്രസ്സാധ്യാപക ക്ഷേമനിധി രണ്ട് വര്‍ഷം പൂര്‍ത്തിയായ അംഗങ്ങള്‍ക്ക് കേരള സംസ്ഥാന ന്യൂനപക്ഷ ധനകാര്യ വികസന കോര്‍പ്പറേഷന്‍ മുഖേന നല്‍കുന്ന പലിശ രഹിത ഭവന വായ്പക്ക് അപേക്ഷ ക്ഷണിച്ചു. രണ്ടര ലക്ഷം രൂപയാണ് വായ്പയായി അനുവദിക്കുന്നത്. ഏഴ് വര്‍ഷമാണ് തിരിച്ചടവ് കാലാവധി. പ്രായം 30-50നും മധ്യേ. അപേക്ഷ ഫോറം www.kmtboard.in വെബ്‌സൈറ്റില്‍ ലഭിക്കും.

സംസ്ഥാന സര്‍ക്കാര്‍ അനെര്‍ട്ട് മുഖേന അക്ഷയ ഊര്‍ജ രംഗത്ത് മികച്ച പ്രവര്‍ത്തനങ്ങള്‍ നടത്തിയിട്ടുള്ളവര്‍ക്ക് അവാര്‍ഡുകള്‍ നല്‍കുന്നതിന് അപേക്ഷ ക്ഷണിച്ചു. പൊതു സ്ഥാപനങ്ങള്‍, വിദ്യാഭ്യാസ, ഗവേഷണ, തദ്ദേശ സ്വയംഭരണ സ്ഥാപനങ്ങള്‍, സര്‍ക്കാര്‍ ഇതര സംഘടനകള്‍, യുവ, വാണിജ്യ സംരംഭകര്‍, ചെറുകിട വ്യവസായ സ്ഥാപനങ്ങള്‍ തുടങ്ങി വിവിധ മേഖലകളിലുള്ളവര്‍ക്ക് അപേക്ഷിക്കാം.  

പത്തനാപുരം പുന്നല വില്ലേജ് ഓഫീസറായിരിക്കെ അന്തരിച്ച ടി വി അജയകുമാറിന്റെ കുടുംബത്തിന് റവന്യു വകുപ്പ് ജീവനക്കാര്‍ സ്വരൂപിച്ച ഒന്‍പത് ലക്ഷം രൂപയുടെ സഹായധനം ജില്ലാ കലക്ടര്‍ അഫ്സാന പര്‍വീണ്‍ അജയകുമാറിന്റെ ഭാര്യ മീരയ്ക്ക് കൈമാറി. ഈ തുക അജയകുമാറിന്റെ വിദ്യാര്‍ഥികളായ മക്കളുടെ പേരില്‍ പോസ്റ്റ് ഓഫീസില്‍ നിക്ഷേപിക്കും. കൂടാതെ ഭാര്യക്ക് പെന്‍ഷന്‍ ലഭിച്ചു തുടങ്ങുന്നത് വരെ 10,000 രൂപ പ്രതിമാസം നല്‍കാനും പത്തനാപുരം സ്റ്റാഫ് കൗണ്‍സില്‍ തീരുമാനിച്ചു.

കരുനാഗപ്പള്ളി നഗരസഭയുടെ ആഭിമുഖ്യത്തില്‍ ഹോമിയോ ആശുപത്രിയില്‍ ലോക ഹോമിയോപ്പതി ദിനാചരണം നടന്നു. മുന്‍സിപ്പല്‍ ചെയര്‍പേഴ്‌സണ്‍ കോട്ടയില്‍ രാജു ഉദ്ഘാടനം ചെയ്തു. ആരോഗ്യ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ ഡോ മീന ഹനിമാന്‍ അനുസ്മരണ പ്രഭാഷണം നടത്തി. ലോകാരോഗ്യ സംഘടനയുടെ കണക്കുകള്‍ പ്രകാരം ലോകത്തില്‍ രണ്ടാമതായി ഏറ്റവും കൂടുതല്‍ ഉപയോഗിക്കപ്പെടുന്ന ചികിത്സ രീതിയാണ് ഹോമിയോപ്പതിയെന്നും നിലവിലെ പല വെല്ലുവിളികളും നേരിടുന്ന ആരോഗ്യ സാഹചര്യങ്ങളില്‍ ഹോമിയോപ്പതിയില്‍ നിന്നും കൂടുതല്‍ സേവനങ്ങള്‍ പൊതുജനങ്ങള്‍ക്ക് എത്തിക്കേണ്ടതിന്റെ ആവശ്യകതയെക്കുറിച്ചും ഡോ മീന ഓര്‍മിപ്പിച്ചു.

കേരളത്തില്‍ കഴിഞ്ഞ വര്‍ഷം ആഭ്യന്തര സഞ്ചാരികളുടെ എണ്ണത്തില്‍ സര്‍വകാല റെക്കോര്‍ഡെന്ന് പൊതുമരാമത്ത് ടൂറിസം വകുപ്പ് മന്ത്രി പി എ മുഹമ്മദ് റിയാസ്. കിളികൊല്ലൂര്‍ സഹകരണ ബാങ്കിന്റെ സൗഹാര്‍ദ വിനോദ സഞ്ചാര പദ്ധതി ഉദ്ഘാടനം ചെയ്യുകയായിരുന്നു അദ്ദേഹം. 1.80 കോടി ആഭ്യന്തര സഞ്ചാരികളാണ് 2022ല്‍ കേരളത്തില്‍ എത്തിയത്. 2023ല്‍ ഇത് പുതിയ റെക്കോര്‍ഡ് സൃഷ്ടിക്കും. ടൂറിസം മേഖലയില്‍ അപൂര്‍വ നേട്ടങ്ങളും വൈവിധ്യങ്ങളുമാണ് സര്‍ക്കാര്‍ നടപ്പിലാക്കുന്നത്. ഡെസ്റ്റിനേഷന്‍ വെഡിങ് റാങ്കിങ്ങില്‍ കേരളത്തിന് ഒന്നാം സ്ഥാനമാണ്. ഫ്‌ളോട്ടിങ് ബ്രിഡ്ജ് മുഴുവന്‍ തീരദേശ ജില്ലകളിലും നടപ്പിലാക്കും.