കരുതലും കൈത്താങ്ങും പരാതി പരിഹാര അദാലത്തില്‍ പൊതുജനങ്ങള്‍ക്ക് പരാതി സമര്‍പ്പിക്കാനുള്ള സമയപരിധി ഏപ്രില്‍ 15 വരെ ദീര്‍ഘിപ്പിച്ചു. പരാതികള്‍ പൂര്‍ണമായും സൗജന്യമായി സമര്‍പ്പിക്കാം. ഏപ്രില്‍, മെയ് മാസങ്ങളില്‍ മന്ത്രിമാരുടെ നേതൃത്വത്തിലാണ് അദാലത്തുകള്‍ നടക്കുക. നിലവില്‍ ആയിരത്തോളം പരാതികളാണ് ജില്ലയില്‍ ലഭിച്ചിട്ടുള്ളത്. ഇതില്‍ നടപടികള്‍ സ്വീകരിച്ചുവരുകയാണ്. പരാതികള്‍ നേരിട്ട് താലൂക്ക് അദാലത്ത് സെല്ലുകള്‍ വഴിയും www.karuthal.kerala.gov.in മുഖേനയും നല്‍കാം. അക്ഷയ കേന്ദ്രങ്ങള്‍ വഴി പരാതി നല്‍കുമ്പോള്‍ 20 രൂപ സര്‍വീസ് ചാര്‍ജ് ഇടാക്കും.

ഇരട്ടക്കുളം വാണിയംപാറ റോഡിലെ തെന്നാലിപ്പുഴയ്ക്ക് കുറുകെയുള്ള തെന്നിലാപുരം പാലത്തിന്റെ സംരക്ഷണ ഭിത്തിയുടെ നിര്‍മാണം നടക്കുന്നതിനാല്‍ ഏപ്രില്‍ 17 മുതല്‍ പ്രവൃത്തി പൂര്‍ത്തീകരിക്കുന്നത് വരെ ഇവിടെ നിന്നും ചീനിക്കോട് പാടൂര്‍ ഭാഗത്തേക്കും തിരിച്ചുമുള്ള വാഹനഗതാഗതം പൂര്‍ണമായി നിരോധിച്ചു. ചീനിക്കോട് പാടൂര്‍ ഭാഗത്തു നിന്നും ഇരട്ടക്കുളം ഭാഗത്തേക്ക് പോകേണ്ട വാഹനങ്ങള്‍ കനാല്‍ റോഡ് തെന്നിലാപുരം വഴിയും പുളിങ്കൂട്ടം, വാണിയമ്പാറ ഭാഗത്തേക്ക് പോകേണ്ടവര്‍ തോണിക്കടവ്, മണപ്പാടം വഴിയും തിരിച്ചും പോകണമെന്ന് കേരള റോഡ് ഫണ്ട് ബോര്‍ഡ് എക്‌സിക്യൂട്ടീവ് എന്‍ജിനീയര്‍ അറിയിച്ചു. ഫോണ്‍: 0466 2960090.

കെ.എസ്.ആര്‍.ടി.സി. ബജറ്റ് ടൂറിസം പാലക്കാട് സെല്‍ വിഷുവിനോടനുബന്ധിച്ച് യാത്രകള്‍ സംഘടിപ്പിക്കുന്നു. ഏപ്രില്‍ 16, 27 തീയതികളില്‍ വയനാട്, ഏപ്രില്‍ 20 ന് ഗവി, ഏപ്രില്‍ 22 ന് മൂന്നാര്‍ യാത്രകളാണ് നടത്തുന്നത്. എല്ലാ ശനി, ഞായര്‍ ദിവസങ്ങളില്‍ നെല്ലിയാമ്പതിയിലേക്കും യാത്രയുണ്ട്. ആഢംബര കപ്പല്‍ യാത്രയുടെ മെയ് മാസ ബുക്കിങ് ആരംഭിച്ചതായും അധികൃതര്‍ അറിയിച്ചു. ബുക്കിങ്ങിനായി യാത്രയുടെ പേര് 9947086128 ല്‍ വാട്ട്‌സ്ആപ്പ് ചെയ്യുക.
 

ഗവ. ഐ.ടി.ഐ/ പ്രൈവറ്റ് ഐ.ടി.ഐകളില്‍ ട്രെയിനിങ് പൂര്‍ത്തീകരിച്ച് പി.എന്‍.ടി.സി/എന്‍.ടി.സി കരസ്ഥമാക്കി ഇതുവരെയും അപ്രന്റിസ് ലഭ്യമാകാത്തവര്‍ www.apprenticeshipindia.gov.in ല്‍ രജിസ്റ്റര്‍ ചെയ്യണം. രജിസ്റ്റര്‍ ചെയ്ത ഷീറ്റുമായി പാലക്കാട് ആര്‍.ഐ സെന്ററില്‍ നേരിട്ടെത്തണമെന്ന് ട്രെയിനിങ് ഓഫീസര്‍ അറിയിച്ചു. ഫോണ്‍: 0491 2815761, 9946460590, 8089606074.
 

വികസനത്തിന്റെ നേര്‍ക്കാഴ്ചകളും വിനോദവും ഒരുക്കി എന്റെ കേരളം പ്രദര്‍ശന മേളയില്‍ ഇന്‍ഫര്‍മേഷന്‍ ആന്‍ഡ് പബ്ലിക് റിലേഷന്‍ വകുപ്പ് സ്റ്റാള്‍. കേരളം കൈവരിച്ച വികസന നേട്ടങ്ങള്‍ അടയാളപ്പെടുത്തി ഒരുക്കിയ ചിത്രങ്ങളും വീഡിയോകളും കാണികളുടെ ശ്രദ്ധയാകര്‍ഷിച്ചു. ചിത്രങ്ങള്‍ക്ക് താഴെയുള്ള ഡിജിറ്റല്‍ സ്‌ക്രീനില്‍ വികസനനേട്ടങ്ങളുടെ ഉള്‍പ്പെടെ വിശദാംശങ്ങള്‍ നല്‍കിയിട്ടുണ്ട്.

ഇന്ദിരാഗാന്ധി മുന്‍സിപ്പല്‍ സ്റ്റേഡിയത്തില്‍ ഏപ്രില്‍ 15 വരെ നടക്കുന്ന എന്റെ കേരളം പ്രദര്‍ശന വിപണന മേളയില്‍ ജില്ലാ ഇന്‍ഫര്‍മേഷന്‍ ഓഫീസിന്റെ ആഭിമുഖ്യത്തില്‍ ജീവിക്കാം പ്രകൃതിയെ നോവിക്കാതെ എന്ന സന്ദേശം ഉള്‍ക്കൊണ്ട് 'സേവ് നേച്ചര്‍ സേവ് സെല്‍ഫി' മത്സരം സംഘടിപ്പിക്കുന്നു. ഇന്ദിരാഗാന്ധി മുന്‍സിപ്പല്‍ സ്റ്റേഡിയത്തിന് മുന്നില്‍ സ്ഥാപിച്ചിട്ടുള്ള ഉള്‍ക്കാട് ചിത്രീകരിച്ച സെല്‍ഫി പോയിന്റില്‍ നിന്ന് എടുത്ത സെല്‍ഫി ഇന്‍സ്റ്റഗ്രാമില്‍ പങ്കുവെച്ച് സമ്മാനം നേടാനാണ് അവസരം.