കുടുംബശ്രീയിലെ എല്ലാ അംഗങ്ങള്‍ക്കും ഇന്‍ഷ്വറന്‍സ് പരിരക്ഷ ഉറപ്പാക്കുന്നതിനുള്ള ഒരുമ ജീവന്‍ ദീപം ഇന്‍ഷ്വറന്‍സ് പദ്ധതിയുടെ പ്രീമിയം തുക ഈ വര്‍ഷം മുതല്‍ 345 രൂപയില്‍ നിന്ന് 174 രൂപയായി കുറച്ചു. ഏപ്രില്‍ 20 വരെ പോളിസിയില്‍ ചേരാം.

ഒരു ലക്ഷം രൂപ വരെ ഇന്‍ഷ്വറന്‍സ് തുക ലഭിക്കും. 18-50 വയസ്സിനിടയിലുള്ള അംഗങ്ങള്‍ മരിച്ചാല്‍ ഒരു ലക്ഷവും 51-60 നിടയില്‍ മരണം സംഭവിച്ചാല്‍ 45,000 രൂപയും ലഭിക്കും. 61 മുതല്‍ 70 വയസ്സിനിടയിലുള്ള മരണങ്ങള്‍ക്ക് 15,000 രൂപ ലഭിക്കും. 71-74 വയസ് വരെ 10,000 രൂപയാണ്. അപകട മരണം/ അപകടത്തിലുണ്ടാവുന്ന സ്ഥിര അംഗപരിമിതി എന്നിവയ്ക്ക് 25,000 രൂപ അധികം ലഭിക്കും.  

കേരള ചുമട്ടു തൊഴിലാളി ക്ഷേമ ബോര്‍ഡ് (അസംഘടിത) വിഭാഗത്തില്‍ 2022 ഡിസംബര്‍ വരെ പെന്‍ഷന്‍ കൈപ്പറ്റിയ ഗുണഭോക്താക്കള്‍ ഏപ്രിലില്‍ തന്നെ മസ്റ്ററിങ് നടത്തി വിവരങ്ങള്‍ കേരള ചുമട്ടു തൊഴിലാളി ക്ഷേമബോര്‍ഡ് ജില്ലാ ഓഫീസില്‍ ഹാജരാക്കണം. അല്ലാത്തപക്ഷം ജൂണ്‍ 30ന് ശേഷം പെന്‍ഷന്‍ വിതരണം ചെയ്യുന്നതല്ല. ഫോണ്‍- 0474 2749048, 8075333190.

കരുനാഗപ്പള്ളി എഞ്ചിനീയറിങ് കോളജില്‍ ട്രേഡ്‌സ്മാന്‍ മെക്കാനിക്കല്‍ (പ്ലംബര്‍) ഒഴിവിലേക്ക് അപേക്ഷിക്കാം. യോഗ്യത എസ് എസ് എല്‍ സി, ബന്ധപ്പെട്ട വിഷയത്തില്‍ നാഷണല്‍ ട്രേഡ് സര്‍ട്ടിഫിക്കറ്റ്. അസല്‍ സര്‍ട്ടിഫിക്കറ്റ് സഹിതം ഏപ്രില്‍ 10 രാവിലെ 10.30ന് കോളജില്‍ എഴുത്തുപരീക്ഷ/ ഇന്റര്‍വ്യൂവിന് ഹാജരാകണം. വിവരങ്ങള്‍ക്ക് www.ceknpy.ac.in ഫോണ്‍- 0476 2666160, 2665935.

കേരള ഷോപ്പ്സ് ആന്‍ഡ് കമേഴ്സ്യല്‍ എസ്റ്റാബ്ലിഷ്മെന്റ്സ് തൊഴിലാളി ക്ഷേമനിധി ബോര്‍ഡില്‍ നിന്നും 2022 ഡിസംബര്‍ 31 വരെ പെന്‍ഷന്‍ അനുവദിച്ച മുഴുവന്‍ ഗുണഭോക്താക്കളും (ലൈഫ് സര്‍ട്ടിഫിക്കറ്റ് ഹാജരാക്കിയവരും, ഓഫീസില്‍ നേരിട്ട് ഹാജരായവരും ഉള്‍പ്പെടെ) ജൂണ്‍ 30നകം അക്ഷയകേന്ദ്രം വഴി ബയോമെട്രിക് മസ്റ്ററിങ് നടത്തണമെന്ന് ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു. വിവരങ്ങള്‍ക്ക് ആനന്ദവല്ലീശ്വരത്തുള്ള ജില്ലാ ഓഫീസുമായി ബന്ധപ്പെടാം. ഫോണ്‍: 0474 2792248.

കര്‍ഷക തൊഴിലാളി ക്ഷേമനിധി പദ്ധതിയില്‍ അംഗങ്ങളായി 60 വയസ് പൂര്‍ത്തീകരിച്ച് 2017 ഡിസംബര്‍ വരെ അധിവര്‍ഷാനുകൂല്യത്തിന് അപേക്ഷ സമര്‍പ്പിച്ചവരില്‍ ആനുകൂല്യം കൈപ്പറ്റാത്തവര്‍ കൈപ്പറ്റ് രസീത്, ആധാര്‍കാര്‍ഡ്, ബാങ്ക് പാസ്ബുക്ക് എന്നിവയുടെ പകര്‍പ്പുകളും അംഗത്തിന്റെ ഫോണ്‍ നമ്പറും ക്ഷേമനിധി ഓഫീസില്‍ ഹാജരാക്കണം. പേരിലോ വിലാസത്തിലോ വ്യത്യാസമുള്ളവര്‍ വാര്‍ഡ് മെമ്പറുടെ സാക്ഷ്യപത്രം കൂടി സമര്‍പ്പിക്കണം.

കുഴല്‍കിണര്‍ നിര്‍മിക്കുന്ന റിഗ്ഗുകള്‍/ ഏജന്‍സികള്‍/ സ്ഥാപനങ്ങള്‍ എന്നിവ കേരള ഭൂജല അതോറിറ്റിയില്‍ രജിസ്റ്റര്‍ ചെയ്യുന്നതിനുള്ള അപേക്ഷ ഏപ്രില്‍ 29നകം രാവിലെ 11 മുതല്‍ മൂന്ന്‌വരെ ജില്ലാ ഭൂജലവകുപ്പ് ഓഫീസില്‍ സമര്‍പ്പിക്കാം. വിവരങ്ങള്‍ക്ക് ഭൂജല വകുപ്പ് ഡയറക്‌ട്രേറ്റുമായോ ജില്ലാ ഓഫീസുമായോ ബന്ധപ്പെടാം. ഫോണ്‍ : 0474 - 2790313, 0471-2434098 (ഭൂജലവകുപ്പ് ഡയറക്ട്രേറ്റ്)

ആശ്രാമം ശ്രീകൃഷ്ണസ്വാമി ക്ഷേത്രത്തിലെ ഉത്സവത്തോടനുബന്ധിച്ച് ഏപ്രില്‍ 14, 15, 16 തീയതികളില്‍ ക്ഷേത്രത്തിന് മൂന്ന് കിലോമീറ്റര്‍ ചുറ്റളവിലുള്ള പ്രദേശങ്ങള്‍ ഉത്സവമേഖലയായി ജില്ലാ കലക്ടര്‍ പ്രഖ്യാപിച്ചു. ഹരിതചട്ടം കര്‍ശനമായി പാലിക്കണം. ഭക്ഷ്യസുരക്ഷാ നിയമലംഘനം, ശബ്ദ-പരിസര മലിനീകരണം എന്നിവയ്‌ക്കെതിരെ കര്‍ശന നടപടി സ്വീകരിക്കും. ക്രമസമാധാനപാലനം, ഗതാഗത നിയന്ത്രണം എന്നിവയ്ക്ക് ആവശ്യമായ പൊലീസ് സംവിധാനം ഏര്‍പ്പെടുത്തും. അനധികൃത മദ്യവിലപ്പന, ലഹരി വസ്തുക്കളുടെ വിതരണം എന്നിവ തടയുന്നതിന് എക്സൈസ് വകുപ്പിനെ ചുമതലപ്പെടുത്തി.

കൊല്ലം പൂരത്തോടനുബന്ധിച്ച് ഏപ്രില്‍ 16ന് ആശ്രാമം ശ്രീകൃഷ്ണസ്വാമി ക്ഷേത്രത്തിന് മൂന്ന് കിലോമീറ്റര്‍ ചുറ്റളവില്‍ ഉള്‍പ്പെടുന്ന മുഴുവന്‍ പ്രദേശങ്ങളും സമ്പൂര്‍ണ മദ്യനിരോധിത മേഖലയായി ജില്ലാ കലക്ടര്‍ പ്രഖ്യാപിച്ചു.

കുടുംബശ്രീ മിഷന്റെ നേതൃത്വത്തില്‍ ഏപ്രില്‍ 27 മുതല്‍ മെയ് ഏഴ് വരെ ആശ്രാമം മൈതാനത്ത് സംഘടിപ്പിക്കുന്ന ദേശീയ സരസ് മേളയുടെ ഭാഗമായുള്ള ലക്കി കൂപ്പണിന്റെ ആദ്യ വിതരണം ധനകാര്യ മന്ത്രി കെ എന്‍ ബാലഗോപാല്‍ പവിത്രേശ്വരം ചെയര്‍പേഴ്‌സണ്‍ ഷെര്‍മി വിശ്വനാഥനില്‍ നിന്ന് ഏറ്റുവാങ്ങി.

തൊഴിലുറപ്പ് പദ്ധതി ഓംബുഡ്‌സ്മാന്‍ സിറ്റിങ് ഏപ്രില്‍ 11 ന് രാവിലെ 11 മുതല്‍ 12 വരെ ശാസ്താംകോട്ട ബ്ലോക്ക് പഞ്ചായത്ത് ഓഫീസില്‍ നടത്തും. തൊഴിലുറപ്പ്, പ്രധാനമന്ത്രി ആവാസ് യോജനപദ്ധതികള്‍ സംബന്ധിച്ച പരാതികള്‍ നേരിട്ടോ, സയീദ് എ, ഓംബുഡ്‌സ്മാന്‍, എം ജി എന്‍ ആര്‍ ഇ ജി എസ്, കലക്‌ട്രേറ്റ്, കൊല്ലം എന്ന മേല്‍വിലാസത്തിലോ, ombudsmankollam@gmail.com ഇ-മെയില്‍ വഴിയോ 9995491934 എന്ന നമ്പറിലോ സമര്‍പ്പിക്കാം.