പട്ടികവര്‍ഗ്ഗ വികസന വകുപ്പിന് കീഴില്‍ നിലമ്പൂരില്‍ പ്രവര്‍ത്തിക്കുന്ന ഇന്ദിരാഗാന്ധി മെമ്മോറിയല്‍ മോഡല്‍ റസിഡന്‍ഷ്യല്‍ സ്‌കൂളില്‍ നിലവിലുള്ള ഹയര്‍സെക്കന്‍ഡറി സ്‌കൂള്‍ ടീച്ചര്‍, ഹൈസ്‌കുള്‍ ടീച്ചര്‍, പ്രൈമറി ടീച്ചര്‍ തസ്തികകളിലേക്കും അടുത്ത അധ്യയന വര്‍ഷം താല്‍ക്കാലികമായി ഉണ്ടായേക്കാവുന്ന ഒഴിവുകളിലേക്കുമായി കരാര്‍ അടിസ്ഥാനത്തില്‍ അധ്യാപകരെ നിയമിക്കുന്നു.

ജില്ലയില്‍ അന്തരീക്ഷ താപനില ക്രമാതീതമായി  കൂടുന്ന സാഹചര്യത്തില്‍  എല്ലാവരും ജാഗ്രത പുലര്‍ത്തണമെന്ന് ജില്ലാ മെഡിക്കല്‍ ഓഫീസര്‍ ഡോ: ആര്‍. രേണുക അറിയിച്ചു. രാവിലെ 11 മണി മുതല്‍ വൈകുന്നേരം  3  മണി  വരെ നേരിട്ടുള്ള  വെയില്‍ കൊള്ളുന്നത് ഒഴിവാക്കേണം. നേരിട്ടുള്ള സൂര്യ പ്രകാശം ഏല്‍ക്കാതിരിക്കാന്‍ കുടയോ, തൊപ്പിയോ ഉപയോഗിക്കേണ്ടതാണ്. ചൂട് കാലമായതിനാല്‍ ദാഹമില്ലെങ്കില്‍ പോലും ധാരാളം വെള്ളം കുടിക്കണം. അല്ലെങ്കില്‍ നിര്‍ജലീകരണം മൂലം വലിയ ആരോഗ്യ പ്രശ്‌നങ്ങള്‍ ഉണ്ടാക്കും.

താനൂർ ഗവ.കോളേജിനായി ഒഴൂരിൽ കണ്ടെത്തിയ ഭൂമി സർക്കാരിലേക്ക് കൈമാറി. ചടങ്ങ് മന്ത്രി വി. അബ്ദുറഹിമാൻ ഉദ്ഘാടനം ചെയ്തു. നിലവിലുള്ള പ്രകൃതി സൗന്ദര്യം നിലനിർത്തിക്കൊണ്ട് തന്നെയാണ് കോളേജ് ക്യാമ്പസ് തയ്യാറാക്കുക. ഭൂമിയിൽ നിലനിൽക്കുന്ന പഴയ വീട് ക്യാമ്പസിലെ കോഫിഹൗസായി നിലനിർത്തും. ക്യാമ്പസിലേക്കുള്ള മുഴുവൻ റോഡുകളും മികച്ച രീതിയിൽ നവീകരിക്കുമെന്നും മന്ത്രി ഉദ്ഘാടന പ്രസംഗത്തിൽ പറഞ്ഞു. പ്രദേശവാസികളുടെ പൂർണ പിന്തുണയും മേൽനോട്ടവും പദ്ധതിക്ക്  ആവശ്യ മാണെന്നും മന്ത്രി പറഞ്ഞു.

    ചടങ്ങിൽ ഒഴൂർ ഗ്രാമപഞ്ചായത്ത് പ്രസിഡന്റ് യൂസഫ് കൊടിയേങ്ങൽ അധ്യക്ഷത വഹിച്ചു. 

 44 പേരുടെ ജീവനുകളെടുത്ത് കേരളത്തെ നടുക്കിയ  പൂക്കിപറമ്പ് ദുരന്തത്തിന് ഇന്നേക്ക് 22 വർഷം പൂർത്തിയാകുന്നു. ദുരന്തം തീര്‍ത്ത  ഭീതിയുടെയും ദുഖത്തിന്റെയും ഓര്‍മ്മകള്‍ അപകട സ്ഥലത്തെത്തിയും, വിവിധ ബസ് സ്റ്റാൻഡുകളിലെത്തിയും ഡ്രൈവർമാരിലും യാത്രക്കാരിലുമെത്തിച്ച് സുരക്ഷിത യാത്രക്കായി ബോധവൽക്കരണം നൽകുകയാണ് തിരൂരങ്ങാടി മോട്ടോര്‍ വാഹന വകുപ്പ് ഉദ്യോഗസ്ഥർ.

ജില്ലാ കേരളോത്സവം കലാ-കായിക മത്സരങ്ങളിൽ ഒന്നാം സ്ഥാനം കരസ്ഥമാക്കിയ ചേളന്നൂർ ബ്ലോക്ക് പഞ്ചായത്തിനുള്ള എവറോളിംഗ് ട്രോഫി കൈമാറി. സംസ്ഥാന യുവജനക്ഷേമ ബോർഡും കോഴിക്കോട് ജില്ലാ പഞ്ചായത്തും സംയുക്തമായി നടത്തിയ മത്സരങ്ങളിലാണ് ചേളന്നൂർ ബ്ലോക്ക് പഞ്ചായത്ത് ഒന്നാമത്തെത്തിയത്.

ജില്ലാപഞ്ചായത്ത് ഹാളിൽ നടന്ന ചടങ്ങിൽ ജില്ലാപഞ്ചായത്ത് പ്രസിഡന്റ് ഷീജ ശശി  ബ്ലോക്ക് പഞ്ചായത്ത് പ്രസിഡന്റ് കെ.പി.സുനിൽ കുമാറിന് ട്രോഫി കൈമാറി.

തിരുവാലി ഗ്രാമപഞ്ചായത്തില്‍ കെട്ടിട നികുതി, ലൈസന്‍സ് ഫീ, തൊഴില്‍ നികുതി എന്നിവ സ്വീകരിക്കുന്നതിനും ഫയലുകള്‍ തീര്‍പ്പാക്കുന്നതിനുമായി ഈ മാസം രണ്ടാം ശനി, ഞായറാഴ്ചകള്‍ തുടങ്ങിയ അവധി ദിവസങ്ങളില്‍ ഓഫീസ് തുറന്നു പ്രവര്‍ത്തിക്കുമെന്ന് സെക്രട്ടറി അറിയിച്ചു.

ഫറോക്ക് മൃഗാശുപത്രിയിലേക്ക് ഫർണീച്ചർ നൽകി. നഗരസഭ ചെയർമാൻ എൻ.സി. അബ്ദുൾ റസാക്ക് വെറ്ററിനറി ഡോക്ടർക്ക് ഫർണീച്ചർ നൽകി ഉദ്ഘാടനം നിർവഹിച്ചു. 2022-23 വാർഷിക പദ്ധതിയിൽ ഉൾപെടുത്തിയാണ് ഫർണീച്ചർ നൽകിയത്.

ഡെപ്യൂട്ടി ചെയർപേഴ്സൺ കെ. റീജ, വികസന കാര്യ സ്റ്റാന്റിംഗ് കമ്മറ്റി ചെയർമാൻ കെ.കുമാരൻ, പൊതുമരാമത്ത് സ്റ്റാന്റിംഗ് കമ്മറ്റി ചെയർപേഴ്സൺ ഇ.കെ താഹിറ, കൗൺസിലർമാരായ കെ. മുഹമ്മദ് കോയ, കെ. ലൈല, സാജിത കബീർ, സഫീന മജീദ്, റഹ്മ പാറോൽ എന്നിവർ പങ്കെടുത്തു.

തിരൂര്‍- മലപ്പുറം റോഡില്‍ വൈലത്തൂര്‍ പെട്രോള്‍ പമ്പിന് സമീപം ഓവുപാലത്തിന്റെ പുനര്‍ നിര്‍മാണം നടക്കുന്നതിനാല്‍ വൈലത്തൂരിനും പൊന്മുണ്ടത്തിനും ഇടയില്‍ മാര്‍ച്ച് 11 മുതല്‍ 17 വരെ ഗതാഗതം നിരോധിച്ചു. വാഹനയാത്രയ്ക്കായി തിരൂര്‍- പൊന്മുണ്ടം ബൈപ്പാസ് റോഡ് ഉപയോഗപ്പെടുത്തണം.

പുറമേരി ഗ്രാമ പഞ്ചായത്തിൽ വിഷു വിപണന മേള ആരംഭിച്ചു. കുടുംബശ്രീയുടെ നേതൃത്വത്തിൽ ആരംഭിച്ച വിപണന മേള  തൂണേരി ബ്ലോക്ക് പഞ്ചായത്ത് പ്രസിഡന്റ് കെ.പി വനജ ഉദ്ഘാടനം ചെയ്തു.