കേന്ദ്ര സർക്കാറിന്റെ  വിവിധ സാമൂഹിക സുരക്ഷാ ഇൻഷുറൻസ് സ്കീമുകളായ
പ്രധാനമന്ത്രി സുരക്ഷാ ബീമ യോജന (പിഎംഎസ്ബിവൈ), പ്രധാനമന്ത്രി ജീവൻ ജ്യോതി ബീമാ യോജന (പിഎംജെജെബി വൈ) പദ്ധതികളിൽ അംഗത്വം വർദ്ധിപ്പിക്കാനായി ജില്ലയിൽ പ്രത്യേക ക്യാമ്പയിൻ സംഘടിപ്പിക്കാൻ തീരുമാനം.

ജില്ലയിൽ സാമൂഹിക സുരക്ഷ ഇൻഷുറൻസ് പദ്ധതി അംഗത്വം വർദ്ധിപ്പിക്കുന്നതിന്റെ  ഭാഗമായി ജില്ലാ കലക്ടർ വിളിച്ചു ചേർത്ത വിവിധ  ബാങ്ക്  പ്രതിനിധികളുടെ യോഗത്തിലാണ്  ഇൻഷുറൻസ് അംഗത്വം വർദ്ധിപ്പിക്കാൻ ആവശ്യമായ പ്രവർത്തനങ്ങൾ ആസൂത്രണം ചെയ്തത്. 

സമഗ്രശിക്ഷാ കേരളയുടെ ആഭിമുഖ്യത്തില്‍ മലപ്പുറം ബി.ആര്‍.സി കോട്ടയ്ക്കല്‍ നഗരസഭാതലം ഭാഷോത്സവം സംഘടിപ്പിച്ചു. എല്‍.പി വിഭാഗം 3,4 ക്ലാസുകളിലെ കുട്ടികള്‍ക്കും രക്ഷിതാക്കള്‍ക്കുമായി നടപ്പിലാക്കിയ വായനച്ചങ്ങാത്തത്തിലൂടെ സ്വതന്ത്ര രചനയും, വായനയും പരിപോഷിപ്പിക്കലുമാണ്. ലക്ഷ്യമിടുന്നത്. നഗരസഭാ പരിധിയിലെ വിവിധ വിദ്യാലയങ്ങളില്‍ നിന്നായി 60 ഓളം കുട്ടികളും രക്ഷിതാക്കളും പങ്കാളികളായി.

ജില്ലാ സൈനിക ക്ഷേമ ഓഫീസിന്റെ ആഭിമുഖ്യത്തില്‍ വിമുക്തഭടന്മാര്‍ക്കും അവരുടെ ആശ്രിതര്‍ക്കുമായി ബോധവല്‍ക്കരണ സെമിനാര്‍ സംഘടിപ്പിച്ചു. മലപ്പുറം സൈനിക റസ്റ്റ് ഹൗസില്‍ വച്ച് നടന്ന സെമിനാറില്‍ ജില്ലാ സൈനിക ക്ഷേമ ഓഫീസര്‍ കെ.എച്ച് മുഹമ്മദ് അസ്ലം അധ്യക്ഷത വഹിച്ചു. കേന്ദ്ര, സംസ്ഥാന സര്‍ക്കാരുകള്‍ വിമുക്തഭടന്മാര്‍ക്കും അവരുടെ ആശ്രിതര്‍ക്കും വേണ്ടി നടപ്പിലാക്കുന്ന വിവിധ ക്ഷേമ പുനരധിവാസ പദ്ധതികള്‍, ' സ്വയം തൊഴില്‍ ടോപ്പ് അപ്പ് സബ്‌സിഡി സ്‌കീം'', പുതിയ പെന്‍ഷന്‍ പോര്‍ട്ടലായ  ''സ്പര്‍ശ് ' എന്നിവയെ സംബന്ധിച്ച് ഹെഡ് ക്ലാര്‍ക്ക് സി.ജെ ജോസഫ്  , വെല്‍ഫെയര്‍ ഓര്‍ഗനൈസര്‍ പി.പി പ്രസാദ് എന്നിവര്‍ ക്ലാസെടുത്തു.

സംസ്ഥാന സര്‍ക്കാര്‍ സ്ഥാപനമായ എല്‍.ബി.എസ് സെന്റര്‍ ഫോര്‍  സയന്‍സ് ആന്‍ഡ് ടെക്നോളജിയുടെ മഞ്ചേരി കേന്ദ്രത്തില്‍ എസ്.എസ്.എല്‍.സി യോഗ്യതയുള്ളവര്‍ക്കായി നാലു മാസം ദൈര്‍ഘ്യമുളള ഡാറ്റാ എന്‍ട്രി ആന്റ് ഓഫീസ് ഓട്ടോമേഷന്‍ കോഴ്സിലേക്ക് പ്രവേശനത്തിന് അപേക്ഷ ക്ഷണിച്ചു. പ്രവേശനം ആഗ്രഹിക്കുന്നവര്‍  കച്ചേരിപ്പടിയിലെ ഐ ജി  ബി ടി യില്‍ പ്രവര്‍ത്തിക്കുന്ന   എല്‍. ബി. എസ്.  സെന്ററുമായി  ബന്ധപ്പെടണം.  ഫോണ്‍ :2764674.

 വാഹന അപകടത്തിൽ പെടുന്നവരെ രക്ഷപ്പെടുത്തുന്നവർക്ക്  നിയമത്തിന്റെ നൂലാമാലകൾ വിനയാവില്ലെന്ന് ഉറപ്പ് നൽകി പ്രചോദിപ്പിക്കുന്ന വിവരങ്ങൾ, രക്ഷക സംരക്ഷണ നിയമം-മാർഗ്ഗ രേഖ എന്ന തലക്കെട്ടിൽ പ്രധാന സ്ഥലങ്ങളിൽ പ്രദർശിപ്പിക്കുകയാണ് തിരൂരങ്ങാടി മോട്ടോർ വാഹന വകുപ്പ് അധികൃതർ.