ലോക്‌സഭാ തിരഞ്ഞെടുപ്പില്‍ കോട്ടയം ജില്ലയിലെ പോളിംഗ് ഉദ്യോഗസ്ഥരുടെ പരിശീലനം സമാപിച്ചു. ഒന്‍പത് നിയമസഭാ നിയോജക മണ്ഡലങ്ങളിലായി തിരഞ്ഞെടുപ്പ് ജോലികള്‍ക്കായി നിയോഗിച്ച 7476 ഉദ്യോഗസ്ഥര്‍ പരിശീലനം പൂര്‍ത്തിയാക്കി.  

പുതുച്ചേരി തെരഞ്ഞെടുപ്പ്: 16 മുതല്‍ 18 വരെ ഡ്രൈഡേ 

കേന്ദ്രഭരണ പ്രദേശമായ പുതുച്ചേരിയില്‍ ലോക്‌സഭാ തെരഞ്ഞെടുപ്പ് നടക്കുന്ന പശ്ചാത്തലത്തില്‍ ഏപ്രില്‍ 16ന് വൈകിട്ട് ആറ് മണി മുതല്‍ 18ന് വൈകിട്ട് ആറ് മണി വരെ ജില്ലയിലെ മാഹിയോട് ചേര്‍ന്ന് കിടക്കുന്ന പ്രദേശങ്ങളില്‍ ജില്ലാ കലക്ടര്‍ ഡ്രൈഡേ പ്രഖ്യാപിച്ചു.

വിവിധ തൊഴില്‍ മേഖലകളില്‍ ജോലി ചെയ്യുന്ന എല്ലാ തൊഴിലാളികള്‍ക്കും വോട്ടു ചെയ്യുന്നതിന്  ശമ്പളത്തോടെ അവധി ലഭിക്കും. കേരള ഷോപ്സ് ആന്‍ഡ് കൊമേഴ്സ്യല്‍ എസ്റ്റാബ്ലിഷ്മെന്റ് ആക്ടിന് കീഴില്‍ വരുന്ന എല്ലാ സ്വകാര്യ സ്ഥാപനങ്ങളിലെയും ജീവനക്കാര്‍ക്ക് വോട്ടെടുപ്പ് ദിനമായ ഏപ്രില്‍ 23ന് ശമ്പളത്തോടെ അവധി പ്രഖ്യാപിച്ച് ലേബര്‍ കമ്മിഷണര്‍ ഉത്തരവിറക്കി.

ലോക്സഭ തെരഞ്ഞെടുപ്പുമായി ബന്ധപ്പെട്ട് സ്ഥാനാര്‍ഥികളുടെ വരവ് ചെലവ്  കണക്കുകള്‍ രേഖപ്പെടുത്തുന്ന രജിസ്റ്ററുകള്‍ തെരഞ്ഞെടുപ്പ് ചെലവ് നിരീക്ഷകന്‍ മഹ്ഫൂസ് റഹ്മാന്റെ നേതൃത്വത്തില്‍ പരിശോധിച്ചു. ഇത് രണ്ടാം തവണയാണ് കണ്ണൂര്‍ ലോക്സഭ മണ്ഡലത്തിലെ സ്ഥാനാര്‍ഥികളുടെ രജിസ്റ്ററുകള്‍ പരിശോധിക്കുന്നത്. സ്ഥാനാര്‍ഥികള്‍ തയ്യാറാക്കിയ ചെലവ് രജിസ്റ്റര്‍ ചെലവ് നിരീക്ഷണ ഉദ്യോഗസ്ഥര്‍ സൂക്ഷിക്കുന്ന ഷാഡോ രജിസ്റ്ററുമായി താരതമ്യപ്പെടുത്തുന്നതിനും പെരുത്തക്കേടുകളുണ്ടെങ്കില്‍ ബന്ധപ്പെട്ട സ്ഥാനാര്‍ഥികളെ അറിയിച്ച് ആവശ്യമായ നടപടികളെടുക്കുന്നതിനുമാണ് പരിശോധന നടത്തുന്നത്.

തെരഞ്ഞെടുപ്പ് കമ്മീഷന്റെ ഔദ്യോഗിക മൊബൈല്‍ ആപ്ലിക്കേഷനായ പോള്‍ മാനേജര്‍ ആപ്പിന്റെ ഉപയോഗത്തെക്കുറിച്ച് ജില്ലയിലെ സെക്ടര്‍ ഓഫീസര്‍മാര്‍ക്ക് പരിശീലനം നല്‍കി. വോട്ടെടുപ്പുമായി ബന്ധപ്പെട്ട പ്രധാന വിവരങ്ങള്‍ ഉടനടി ജില്ലാതലത്തില്‍ ലഭ്യമാക്കുന്നതിനായാണ് പോള്‍ മാനേജര്‍ ആപ്പ് തയ്യാറാക്കിയിരിക്കുന്നത്. ജില്ലാ പഞ്ചായത്ത് ഹാളില്‍ നടന്ന പരിശീലന പരിപാടിയില്‍ ജില്ലാ ഇന്‍ഫര്‍മാറ്റിക്സ് ഓഫീസറും കമ്പ്യൂട്ടറൈസേഷന്‍, ഐസിടി ആപ്ലിക്കേഷന്‍ നോഡല്‍ ഓഫീസറുമായ ആന്‍ഡ്രൂസ് വര്‍ഗീസ് ക്ലാസിന് നല്‍കി. 

ലോക്‌സഭ തെരഞ്ഞെടുപ്പിന് നിയോഗിച്ചിട്ടുള്ള ജീവനക്കാര്‍ക്ക് വോട്ട് ചെയ്യുന്നതിനുള്ള ഇലക്ഷന്‍ ഡ്യൂട്ടി സര്‍ട്ടിഫിക്കറ്റ് വിതരണത്തിന് തയ്യാറായി. കല്‍പ്പറ്റ, സുല്‍ത്താന്‍ ബത്തേരി അസിസ്റ്റന്റ് റിട്ടേണിങ് ഓഫീസര്‍മാരുടെ കളക്ട്രേറ്റിലെ ഓഫീസുകളില്‍ നിന്നും മാനന്തവാടി അസിസ്റ്റന്റ് റിട്ടേണിംഗ് ഓഫീസറായ സബ്കളക്ടറുടെ ഓഫീസില്‍ നിന്നും ഏപ്രില്‍ 20 ന് സര്‍ട്ടിഫിക്കറ്റുകള്‍ വിതരണം ചെയ്യും. ഉദ്യോഗസ്ഥര്‍ നേരിട്ട് ഹാജരായി സര്‍ട്ടിഫിക്കറ്റുകള്‍ കൈപ്പറ്റണമെന്ന് അസിസ്റ്റന്റ് റിട്ടേണിംഗ് ഓഫീസര്‍മാര്‍ അറിയിച്ചു.

പൊതു തിരഞ്ഞെടുപ്പ് അടുത്ത സാഹചര്യത്തില്‍ മാതൃകാ പെരുമാറ്റച്ചട്ടം നടപ്പാക്കുന്നതിനായി ജില്ലയില്‍ 11 ആന്‍റി ഡീഫെയ്സ്മെന്‍റ് സ്ക്വാഡുകളെ കൂടി നിയോഗിച്ചു. 
പാലക്കാട് നിയോജക മണ്ഡലം ഒഴികെയുള്ള 11 മണ്ഡലങ്ങളിലാണ് ഓരോ സ്ക്വാഡിനെ വീതം രൂപീകരിച്ചിരിക്കുന്നത്. ഇതുവരെ ജില്ലാതലത്തില്‍ ഒന്നും നിയോജക മണ്ഡലങ്ങളിലായി 12 എണ്ണമുള്‍പ്പെടെ 13 ആന്‍റി ഡീഫെയ്സ്മെന്‍റ് സ്ക്വാഡുകളാണ് പ്രവര്‍ത്തിച്ചിരുന്നത്. ഒരു പൊലീസ് ഉദ്യോഗസ്ഥന്‍ ഉള്‍പ്പെടെ നാലുപേരാണ് സ്ക്വാഡില്‍ ഉള്‍പ്പെടുന്നത്. ഇതോടെ ജില്ലയില്‍ 24 ആന്‍റി ഡീഫെയ്സ്മെന്‍റ് സ്ക്വാഡുകളായി.