വിമുക്തഭടന്മാര്‍ക്കും ആശ്രിതര്‍ക്കും ഏപ്രില്‍ 24 മുതല്‍ 27 വരെ തിരുവനന്തപുരം ശേഷന്‍സ് അക്കാദമിയില്‍ നടക്കുന്ന സൗജന്യ സിവില്‍ സര്‍വീസ് വര്‍ക്കിങ് ക്യാമ്പില്‍ പങ്കെടുക്കാം. വിശദവിവരങ്ങള്‍ക്ക് ഫോണ്‍ -9349812622 .

കുഴല്‍മന്ദം ഗവ. ഐ.ടി.ഐ.യില്‍ ആരംഭിച്ച ലിഫ്റ്റ് ഇറക്ടര്‍ കോഴ്സ് പ്രവേശനത്തിന്   ഏപ്രില്‍ 24 വരെ അപേക്ഷിക്കാം. മൂന്ന് മാസമാണ് കോഴ്സ് കാലാവധി. കൂടുതല്‍ വിവരങ്ങള്‍ക്ക് ഫോണ്‍ - 9446360105, 9447111955.

പൊതു തിരഞ്ഞെടുപ്പുമായി ബന്ധപ്പെട്ട് പോളിങ് ഉദ്യോഗസ്ഥര്‍ക്കായുളള രണ്ടാംഘട്ട പരിശീലനത്തില്‍ പങ്കെടുക്കാത്തവര്‍ക്കായി ഏപ്രില്‍ 20ന് ഉച്ചയ്ക്ക് രണ്ടിന് കലക്ടറേറ്റ് കോണ്‍ഫറന്‍സ് ഹാളില്‍ പരിശീലനം നടക്കുമെന്ന് ട്രെയിനിങ് നോഡല്‍ ഓഫീസര്‍ അറിയിച്ചു. നിയോജക മണ്ഡലാടിസ്ഥാനത്തില്‍ പോളിങ് ഉദ്യോഗസ്ഥര്‍ക്ക് നടത്തിവന്ന രണ്ടാംഘട്ട പരിശീലന ക്ലാസുകള്‍ പൂര്‍ത്തിയായ സാഹചര്യത്തിലാണ് പങ്കെടുക്കാന്‍ കഴിയാത്തവര്‍ക്കായി പരിശീലനം ഒരുക്കിയിരിക്കുന്നത്.

സി-വിജില്‍ ആപ്ലിക്കേഷനിലൂടെ ഇതുവരെ ലഭിച്ചത് 1379 പരാതികളാണ്. ഇതില്‍ 1332 പരാതികള്‍ കൃത്യമാണെന്ന് സ്ഥിരീകരിക്കുകയും നടപടി സ്വീകരിക്കുകയും ചെയ്തിട്ടുണ്ട്. എല്ലാ നിയമസഭാ മണ്ഡലത്തിലും പരാതികള്‍ അന്വേഷിക്കുന്നതിന് ഓരോ ഫ്ളയിംഗ് സ്ക്വാഡും സര്‍വെയ്ലന്‍സ് ടീമും ആന്‍റി ഡിഫെയ്സ്മെന്‍റ് സ്ക്വാഡും പ്രവര്‍ത്തിക്കുന്നുണ്ട്. പൊതുസ്ഥലങ്ങളിലും സ്വകാര്യ വ്യക്തികളുടെ സ്ഥലത്ത് ഉടമകളുടെ അനുവാദമില്ലാതെ പോസ്റ്റര്‍, ബാനര്‍ പതിച്ചത്/ സ്ഥാപിച്ചത് സംബന്ധിച്ചും പ്രിന്‍റര്‍ ആന്‍ഡ് പബ്ലിഷറുടെ പേര് ഉള്‍പ്പെടാത്തത് സംബന്ധിച്ചുമുളളതാണ് കൂടുതല്‍ പരാതികള്‍.

  കര-നാവിക-വ്യോമ സേനകളില്‍ സേവനമനുഷ്ഠിക്കുന്ന 4650 സര്‍വീസ് വോട്ടര്‍മാര്‍ക്ക് പോസ്റ്റല്‍ ബാലറ്റ് അയച്ചു നല്‍കിയതായി ജില്ലാ തിരഞ്ഞെടുപ്പ് വിഭാഗം അറിയിച്ചു. ഇ.ടി.പി.ബി.എസ് (ഇലക്ട്രോണിക്കലി ട്രാന്‍സ്മിറ്റഡ് പോസ്റ്റല്‍ ബാലറ്റ് സിസ്റ്റം) വഴി ഓണ്‍ലൈനായി പാലക്കാട് ലോക്സഭാ മണ്ഡലത്തില്‍ 2328 ഉം ആലത്തൂരില്‍ 2322 ഉം സര്‍വീസ് വോട്ടര്‍മാര്‍ക്കാണ് പോസ്റ്റല്‍ ബാലറ്റുകള്‍ അയച്ചത്. 

ചിറ്റൂര്‍ വെറ്ററിനറി പോളി ക്ലിനിക്കിലെ കെ.ആര്‍.വി 2843 മഹീന്ദ്ര ജീപ്പ് മെയ് 25 രാവിലെ 11.30 ന് ലേലം ചെയ്യുന്നു. വാഹനം പാര്‍ക്ക് ചെയ്തിരിക്കുന്ന പോളി ക്ലിനിക്കിലെ ഷെഡിലാണ് ലേലം നടക്കുക. പങ്കെടുക്കുന്നവര്‍ക്ക് അന്നേദിവസം രാവിലെ 10 വരെ നിരതദ്രവ്യം അടയ്ക്കാം. 2.5 ശതമാനമാണ് നിരതദ്രവ്യം. 

ഷൊര്‍ണൂര്‍ ഗവ. ടെക്നിക്കല്‍ ഹൈസ്കൂള്‍ എട്ടാംക്ലാസ് പ്രവേശനത്തിന് അപേക്ഷിക്കാം. സ്കൂള്‍ ഓഫീസില്‍ നിന്നും അപേക്ഷകള്‍ 10 രൂപയ്ക്ക് ലഭിക്കും. പൂരിപ്പിച്ച അപേക്ഷ മെയ് രണ്ട് വൈകീട്ട് മൂന്ന് വരെ സ്വീകരിക്കും. മെയ് മൂന്നിന്  രാവിലെ 11.30ന് പൊതുപ്രവേശന പരീക്ഷ നടത്തുകയും ഫലം അന്നേദിവസം വൈകീട്ട് നാലിന് പ്രസിദ്ധീകരിക്കുന്നതുമാണ്. എന്തെങ്കിലും പരാതിയുണ്ടെങ്കില്‍ മെയ് നാല് ഉച്ചയ്ക്ക് ഒന്നിനകം സമര്‍പ്പിക്കണം. പ്രവേശനത്തിന് തിരഞ്ഞെടുക്കപ്പെട്ടവരുടെ പട്ടിക മെയ് ഏഴ് ഉച്ചയ്ക്ക് രണ്ടിന് പ്രസിദ്ധീകരിക്കും. ഒന്നാംഘട്ട പ്രവേശനം മെയ് 15ന് നടക്കും. 

  
വാളയാര്‍ ടോള്‍ ഗേറ്റ്, ചന്ദ്രനഗര്‍ എന്നിവിടങ്ങളില്‍ ഏപ്രില്‍ 12ന് നടത്തിയ പ്രത്യേക വാഹന പരിശോധനയില്‍ ബാംഗ്ലൂരില്‍ നിന്നും കേരളത്തിലേക്ക് സര്‍വീസ് നടത്തുന്ന കര്‍ണാടക ട്രാന്‍സ്പോര്‍ട്ട് കോര്‍പറേഷന്‍റെ ഒമ്പത് ബസ്സുകള്‍ കസ്റ്റഡിയിലെടുത്തു. പെര്‍മിറ്റ് അടക്കമുള്ള മതിയായ രേഖകള്‍ ഇല്ലാത്തതിനെ തുടര്‍ന്നാണ് വാഹനങ്ങള്‍ കസ്റ്റഡിയില്‍ എടുത്തത്. കൂടാതെ നിയമം ലംഘിച്ച മറ്റു വാഹനങ്ങളില്‍ നിന്നും 50000 രൂപയോളം പിഴ ഈടാക്കി. എന്‍ഫോഴ്സ്മെന്‍റ് ആര്‍.ടി.ഒ പി.ശിവകുമാറിന്‍റെ നേതൃത്വത്തില്‍ നടത്തിയ പരിശോധനയില്‍ എം.വി.ഐമാര്‍, എ.എം.വി.ഐമാര്‍ അടക്കം 13ഓളം പേര്‍ പങ്കെടുത്തു.

മലമ്പുഴ മേഖലാ കോഴി വളര്‍ത്തല്‍ കേന്ദ്രത്തിലെ  വേങ്ങ , എലവ് മരങ്ങള്‍ മുറിച്ചു മാറ്റുന്നതിനും മഴ മരത്തിന്‍റെ ചില്ലകള്‍ മുറിച്ചു മാറ്റുന്നതിനും ഏപ്രില്‍ 20ന് രാവിലെ 11ന് ഓഫീസില്‍  പുനര്‍ലേലം ചെയ്യുന്നു. ലേലത്തില്‍ പങ്കെടുക്കാന്‍ ആഗ്രഹിക്കുന്നവര്‍ അന്നേ ദിവസം രാവിലെ 11 ന് മുമ്പായി 500 രൂപ നിരതദ്രവ്യം ഓഫീസില്‍ അടയ്ക്കേണ്ടതാണ് . കൂടുതല്‍ വിവരങ്ങള്‍ക്ക് 0491 2815206 ല്‍ ബന്ധപെടാവുന്നതാണ്.