ലോക്‌സഭാ തെരഞ്ഞെടുപ്പ് പരിസ്ഥിതി സൗഹൃദപരമായി നടത്തുന്നതിന്റെ ഭാഗമായി ഹരിതപെരുമാറ്റച്ചട്ടം നടപ്പില്‍ വരുത്തണമെന്ന് കേന്ദ്ര തെരഞ്ഞെടുപ്പ് കമ്മീഷന്‍ നിര്‍ദ്ദേശങ്ങളുടെയും കേരള ഹൈക്കോടതിയുടെ ഇടക്കാല ഉത്തരവിന്റെയും അടിസ്ഥാനത്തില്‍ ചീഫ് ഇലക്ടറല്‍ ഓഫീസര്‍ ഉത്തരവിട്ടു. 

ലോക്സഭ തെരഞ്ഞെടുപ്പുമായി ബന്ധപ്പെട്ട് ചെലവ് നിരീക്ഷണത്തിനായി രൂപീകരിച്ച ടീമുകള്‍ക്ക് ജില്ലാ തെരഞ്ഞെടുപ്പ് ഓഫീസര്‍ കൂടിയായ ജില്ലാ കലക്ടറുടെ നേതൃത്വത്തില്‍ പരിശീലന പരിപാടി സംഘടിപ്പിച്ചു. നിയമസഭാ മണ്ഡലം അടിസ്ഥാനത്തില്‍ രൂപീകരിച്ച ഫ്ളൈയിംഗ് സ്‌ക്വാഡ്, സ്റ്റാറ്റിക് സര്‍വെയ്‌ലന്‍സ് ടീം, വീഡിയോ സര്‍വെയ്‌ലന്‍സ് ടീം എന്നിവര്‍ക്കാണ് വിവിധ വിഷയങ്ങളില്‍ പരിശീലനം നല്‍കിയത്. ഓരോ ടീമും പാലിക്കേണ്ട നിര്‍ദേശങ്ങളെക്കുറിച്ചും നിര്‍വഹിക്കേണ്ട ചുമതലകളെക്കുറിച്ചും യോഗത്തില്‍ വിശദീകരിച്ചു. 

ജില്ലാ ലീഗല്‍ സര്‍വീസസ് അതോറിറ്റി, പാലക്കാട് താലൂക്ക് ലീഗല്‍ സര്‍വീസസ് കമ്മിറ്റി എന്നിവയുടെ സംയുക്താഭിമുഖ്യത്തില്‍ മാര്‍ച്ച് എട്ട് ഉച്ചയ്ക്ക് രണ്ടിന് അയ്യപുരം ഗവ. എല്‍.പി സ്കൂളില്‍ ലോക വനിതാ ദിനം ആചരിക്കും. ജില്ലാ ലീഗല്‍ സര്‍വീസസ് അതോറിറ്റി സെക്രട്ടറിയും സബ് ജഡ്ജുമായ എം.തുഷാര്‍ പരിപാടി ഉദ്ഘാടനം ചെയ്യും. നഗരസഭാ കൗണ്‍സിലര്‍ കെ. ദിവ്യ അധ്യക്ഷയാവുന്ന യോഗത്തില്‍ വിശ്വാസ് സെക്രട്ടറി അഡ്വ. പി. പ്രേംനാഥ് മുഖ്യപ്രഭാഷണം നടത്തും. അഡ്വ.ആര്‍.ദേവികൃപ, ഡോ. പി.സി ഏലിയാമ്മ, പി.വി പാര്‍വതി, ഭാരതി ഹരിദാസ്, പി.ടി.എ പ്രസിഡന്‍റ് സി.വിജയ, പി.എല്‍.വി.മാരായ സി.പ്രമീള, പി.വി സുമതി സംസാരിക്കും.

കേരള വാട്ടര്‍ അതോറിറ്റിയുടെ കുടിവെള്ള പദ്ധതി സംബന്ധിച്ച പരാതികളോ അഭിപ്രായങ്ങളോ 0491-2546632 എന്ന കണ്‍ട്രോള്‍ റൂം നമ്പറില്‍ വിളിച്ച് അറിയിക്കാവുന്നതാണെന്ന് സൂപ്രണ്ടിങ് എന്‍ജിനീയര്‍ അറിയിച്ചു.

പട്ടാമ്പി ലീഗല്‍ മെട്രോളജി ഇന്‍സ്പെക്ടര്‍ ഓഫീസിന്‍റെ പ്രവര്‍ത്തനോദ്ഘാടനം ഇന്ന് (മാര്‍ച്ച് ഏഴ്) വൈകീട്ട് മൂന്നിന് തെക്കുമുറിയില്‍ ഭക്ഷ്യ-പൊതുവിതരണ-ഉപഭോക്തൃ കാര്യ- ലീഗല്‍ മെട്രോളജി വകുപ്പ് മന്ത്രി പി.തിലോത്തമന്‍ നിര്‍വഹിക്കും. മുഹമ്മദ് മുഹ്സിന്‍ എം.എല്‍.എ അധ്യക്ഷനാവുന്ന പരിപാടിയില്‍ എം.ബി രാജേഷ് എം പി മുഖ്യാതിഥിയാവും. ത്രിതല പഞ്ചായത്ത് പ്രതിനിധികളും ലീഗല്‍ മെട്രോളജി ഉദ്യോഗസ്ഥരും ജനപ്രതിനിധികളും പങ്കെടുക്കും.

    റിഹാബിലിറ്റേഷന്‍ കൗണ്‍സില്‍ ഓഫ് ഇന്ത്യയും സംസ്ഥാന വിദ്യാഭ്യാസ ഗവേഷണ പരിശീലന കേന്ദ്രവും സംയുക്തമായി സര്‍ക്കാര്‍ ഉദ്യോഗസ്ഥര്‍ക്കായി നടത്തിയ ത്രിദിന പരിശീലന പരിപാടി പുതുപ്പരിയാരം ഗ്രാമപഞ്ചായത്ത് പ്രസിഡന്‍റ് പ്രസന്നകുമാരി ഉദ്ഘാടനം ചെയ്തു. ജയരാജന്‍, ജി. പ്രദീപ്, റോഷ്നി രവീന്ദ്രന്‍, ടി. ജയപ്രകാശ് എന്നിവര്‍ സംസാരിച്ചു.